ITHUOTHE nĩ twendete kũgĩa na gĩkeno, githĩ tiguo?— No andũ aingĩ matikoragwo na gĩkeno. Hihi nĩ ũĩ gĩtũmi?— Nĩ tondũ matirĩ maamenya kĩrĩa kĩrehaga gĩkeno. Meciragia atĩ kũgĩa na indo nyingĩ nĩkuo kũrehaga gĩkeno. No o na magĩa na indo nyingĩ, matitũũraga na gĩkeno.

Mũrutani Ũrĩa Mũnene nĩ aagwetire ũndũ ũrĩa ũrehaga gĩkeno. Oigire atĩrĩ: ‘Kũheana nĩ kũrĩ gĩkeno kĩnene gũkĩra kũheo.’ (Atũmwo 20:35) Kwoguo nĩ kĩĩ kĩngĩtũma tũgĩe na gĩkeno?— Nĩ kũheaga andũ arĩa angĩ iheo na kũmekĩra maũndũ mega. Hihi wee nĩ ũroĩ ũguo?—

Ta reke twĩcirie ũndũ ũcio makĩria. Hihi Jesu eendaga kuuga atĩ mũndũ ũrĩa ũramũkĩra kĩheo ndagĩaga na gĩkeno?— Aca, gũtirĩ mũndũ ũtendete kũheo kĩheo. Hihi wee nĩ wendete kũheo kĩheo?— Nĩ tũkenaga rĩrĩa twaheo kĩndũ kĩega.

 No Jesu oigire atĩ tũgĩaga na gĩkeno makĩria rĩrĩa twaheana. Hihi ũngiuga nũũ wanaheana indo nyingĩ gũkĩra andũ arĩa angĩ othe?— Nĩ Jehova Ngai.

Bibilia yugaga atĩ Ngai “nĩwe ũheaga andũ othe muoyo na mĩhũmũ na indo ciothe.” Atũheaga mbura kuuma igũrũ o na riũa, nĩguo mĩmera ĩkũre, tũgĩe na irio cia kũrĩa. (Atũmwo 14:17; 17:25) Nĩkĩo Bibilia yugaga atĩ Jehova nĩ ‘Ngai ũrĩ gĩkeno.’ (1 Timotheo 1:11) Kũheana nĩ gũtũmaga Ngai akorũo na gĩkeno. O na ithuĩ tũngĩheana no tũgĩe na gĩkeno.

Hihi nĩ indo ta irĩkũ tũngĩhe andũ arĩa angĩ? Wee ũreciria nĩ indo ta irĩkũ?— Rĩmwe no tũmagũrĩre kĩheo. Nĩguo ũgũre kĩheo kĩu, nĩ ũkũbatara mbeca. Kwoguo ũngĩenda kũheana kĩheo ta kĩu, ũkũbatara kũiga mbeca nginya cigane cia kũgũra kĩheo kĩu.

No to nginya tũheane kĩheo gĩa kũgũrũo nduka-inĩ. Kwa ngerekano-rĩ, ũngĩhe mũndũ mũnyotu maĩ ma kũnyua, no aigue wega mũno. Kwoguo ũngĩhe mũndũ kĩheo ta kĩu, nĩ ũkũgĩa na gĩkeno nĩ ũndũ wa kũheana.

Rĩmwe no mũruge mandathi na mami wanyu. Kau nĩ kaũndũ kega mũno. No handũ ha kũrĩa mandathi macio mothe-rĩ, nĩ ũndũ ũrĩkũ ũngĩka ũngĩtũma ũgĩe na gĩkeno makĩria?— No ũhe arata aku mandathi mamwe marĩ ta kĩheo. Hihi no wende gwĩka ũguo?—

 Mũrutani Ũrĩa Mũnene na atũmwo ake nĩ maamenyaga atĩ kũheana nĩ kũrehaga gĩkeno. Hihi nĩ ũĩ kĩrĩa maaheire andũ arĩa angĩ?— Maaheanire kĩndũ kĩrĩa kĩega mũno thĩinĩ wa thĩ! Nĩ maamenyaga ũhoro wĩgiĩ Ngai, kwoguo nĩ maahunjagĩria andũ arĩa angĩ ũhoro ũcio mwega. Meekaga ũguo mategwĩtĩkĩra kũrĩhwo.

Mũthenya ũmwe mũtũmwo Paulo na mũrata wake Luka nĩ maakorire mũtumia weendaga kũgĩa na gĩkeno gĩa kũheana. Maamũkorire handũ rũũĩ-inĩ. Paulo na Luka maathiĩte hau tondũ nĩ maiguĩte atĩ andũ nĩ maahoyagĩra ho. Na rĩrĩa maakinyire ho, haarĩ atumia maakorire makĩhoya.

Paulo akĩambĩrĩria kũhe atumia acio ũhoro mwega wĩgiĩ Jehova Ngai na Ũthamaki wake. Ũmwe wa atumia acio eetagwo Ludia na nĩ aathikagĩrĩria ũhoro ũcio wega mũno. Thutha ũcio, Ludia nĩ eendire gwĩka kaũndũ ga kuonania atĩ nĩ akenio nĩ ũhoro ũcio mwega. Kwoguo akĩra Paulo na Luka ũũ: “Angĩkorũo nĩ muona atĩ ndĩ mwĩhokeku harĩ Jehova, ũkai gwakwa mũikare kuo.” Akĩmaringĩrĩria nginya magĩthiĩ gwake.—Atũmwo 16:13-15.

Ludia nĩ aakenire mũno rĩrĩa ndungata icio cia Ngai ciathiire gwake. Nĩ aamendire mũno tondũ nĩ maamũteithirie kũmenya ũhoro wĩgiĩ Jehova na Jesu na ũrĩa andũ mangĩka nĩguo matũũre tene na tene. Ludia nĩ aakenire mũno nĩ ũndũ wa kũhe Paulo na Luka irio na handũ ha kũhurũka. Ludia aakenire ũguo tondũ aaheanire eyendeire. Nĩ twagĩrĩirũo kũririkana ũndũ ũcio. Mũndũ no atwĩre tũheane kĩheo. No tũngĩheana kĩheo tũtekwenda, tũtingĩgĩa na gĩkeno.

Ta nĩ tuuge ũrĩ na thuiti ũrenda kũrĩa. Ingĩkwĩra wenyũrĩre kaana kangĩ-rĩ, hihi no ũkenere gwĩka ũguo?— Ĩ ũngĩcemania na mũrata waku wendete mũno hĩndĩ ĩrĩa wĩ na thuiti, hihi no  ũmũhe? Ũngĩĩciria kũmũhe ũterĩtwo nĩ mũndũ-rĩ, githĩ ũndũ ũcio to ũtũme ũgĩe na gĩkeno?—

No tũkorũo twendete mũndũ mũno nginya tũkaigua tũkĩenda kũmũhe kĩrĩa gĩothe tũrĩ nakĩo. O ũrĩa wendo witũ harĩ Ngai ũraingĩha, noguo tũrĩiguaga tũkĩenda kũmũhe kĩrĩa gĩothe tũrĩ nakĩo.

Mũrutani Ũrĩa Mũnene nĩ onire mũtumia mũthĩni warĩ na wendo ta ũcio. Mũtumia ũcio aarĩ hekarũ-inĩ ĩrĩa yarĩ Jerusalemu. Aarĩ na thendi igĩrĩ tu. No nĩ aaikirie thendi icio igĩrĩ thĩinĩ wa ithandũkũ rĩa mĩhothi irĩ ta kĩheo nĩ ũndũ wa hekarũ. Gũtirĩ mũndũ wamwĩrire eke ũguo. Andũ aingĩ o na matiamenyire kĩrĩa aahothire. Eekire ũguo eyendeire tondũ nĩ eendete Jehova. Nĩ aakenire mũno nĩ ũndũ wa kũheana.—Luka 21:1-4.

Nĩ kũrĩ njĩra nyingĩ cia kũheana. Hihi wee nĩ ũĩ njĩra imwe nĩ irĩkũ?— Tũngĩheana twĩyendeire, nĩ tũrĩgĩaga na gĩkeno. Nĩkĩo Mũrutani Ũrĩa Mũnene atwĩraga ũũ: “Mwĩmenyagĩriei kũheanaga.” (Luka 6:38) Tũngĩka ũguo nĩ tũrĩtũmaga andũ arĩa angĩ magĩe na gĩkeno. Na ithuĩ nĩ tũrĩgĩaga na gĩkeno makĩria!