GERIA KANA NO ŨMENYE

Onania maũndũ maya kana nĩguo kana tiguo.

NĨGUO TIGUO

1. Aira a Jehova nĩ Akristiano.

2. Aira a Jehova matiĩtĩkĩtie indo ciombirũo na mĩthenya ĩtandatũ ya mathaa 24.

3. Aira a Jehova matithiaga thibitarĩ.

4. Aira a Jehova nĩ metĩkĩtie Bibilia ĩrĩ yothe.

5. Aira a Jehova mahũthagĩra Bibilia yao tu.

6. Aira a Jehova nĩ macenjetie Bibilia yao nĩguo ĩtwarane na wĩtĩkio wao.

7. Aira a Jehova matiendaga kũnyitanĩra na andũ arĩa angĩ.

8. Aira a Jehova nĩ manyararĩte andũ a ndini ingĩ.

Nĩguo wone macokio, rora tũratathi tũrĩa tũrũmĩrĩire.

1.  1 NĨGUO. Nĩ tũgeragia kũrũmĩrĩra biũ morutani na mĩthiĩre ya Jesu Kristo. (1 Petero 2:21) O na kũrĩ ũguo, nĩ kũrĩ maũndũ mamwe tũkoragwo tũrĩ ngũrani na ndini iria ciĩĩtaga cia Gĩkristiano. Kwa ngerekano nĩ tũmenyete atĩ Bibilia ĩrutanaga atĩ Jesu nĩ Mũrũ wa Ngai; no ti gĩcunjĩ gĩa Ũtatũ. (Mariko 12:29) Nĩ twĩtĩkĩtie atĩ muoyo wa mũndũ nĩ ũkuaga na atĩ hatirĩ handũ thĩinĩ wa Maandĩko honanagia atĩ Ngai nĩ aherithagia andũ tene na tene mwaki-inĩ wa icua. Tũtiĩtĩkĩtie atĩ arĩa matongoragia maũndũ ma ndini nĩ magĩrĩirũo kũheo marĩĩtwa ma ũnene ma kũmatũgĩria.—Kohelethu 9:5; Ezekieli 18:4; Mathayo 23:8-10.

2. 2 TIGUO. Twĩtĩkĩtie atĩ Ngai nĩwe wombire indo ciothe. No tũtiĩtĩkanĩtie na mawoni mamwe moigagwo nĩ andũ megiĩ ũũmbi. Nĩkĩ hihi? Tondũ mawoni macio matiumanĩte na Bibilia. Kwa ngerekano, andũ amwe moigaga atĩ mĩthenya ĩtandatũ ya ũũmbi yarĩ ya mathaa 24. No thĩinĩ wa Bibilia, kiugo “mũthenya” no gĩkorũo gĩkĩonania ihinda iraiharaihu. (Kĩambĩrĩria 2:4; Thaburi 90:4) Ningĩ, mawoni macio nĩ monanagia atĩ thĩ ĩkoretwo kuo mĩaka ngiri nini tu. O na kũrĩ ũguo, Bibilia nĩ yonanagia atĩ igũrũ na thĩ ciarĩ kuo ihinda iraihu mbere ya mĩthenya ĩtandatũ ya ũũmbi. ¹—Kĩambĩrĩria 1:1.

3. 3 TIGUO. Nĩ tũthiaga thibitarĩ. O na amwe aitũ nĩ mandagĩtarĩ, o ta Mũkristiano wa karine ya mbere wetagwo Luka. (Akolosai 4:14) O na kũrĩ ũguo tũtiĩtĩkagĩra ũrigitani ũrĩa ũreganĩte na mootaro ma Bibilia. Kwa ngerekano, tũtiĩtĩkagĩra gwĩkĩrũo thakame tondũ Bibilia nĩ ĩgirĩtie ũhũthĩri wa thakame.—Atũmwo 15:20, 28, 29.

   O na kũrĩ ũguo, nĩ tũcaragia ũrigitani ũrĩa wagĩrĩire nĩ ũndũ witũ na famĩlĩ ciitũ. Ũrigitani ũrĩa ũhũthagĩrũo harĩ Aira a Jehova wa kũgirĩrĩria thakame ndĩkoore mũno, nĩ ũrahũthĩrũo nĩguo ũteithie andũ aingĩ. Mabũrũri-inĩ maingĩ, mũndũ no athuure gwĩthema mogwati marĩa moimanaga na gwĩkĩrũo thakame ta, mĩrimũ ya kũgwatanio, thakame kũregana na mwĩrĩ waku, kana thĩna ũngĩ ũngiumĩra.

4. 4 NĨGUO. Twĩtĩkĩtie atĩ Bibilia ĩrĩ yothe ‘ĩtongoretio nĩ roho wa Ngai na nĩ ĩrĩ ũguni.’ (2 Timotheo 3:16) Ĩhutĩtie Kĩrĩkanĩro Kĩrĩa Gĩkũrũ na Kĩrĩkanĩro Kĩrĩa Kĩerũ, ta ũrĩa ciũĩkaine. Maita maingĩ, tũciĩtaga Maandĩko ma Kĩĩhibirania na Maandĩko ma Kĩngiriki ma Gĩkristiano. Na njĩra ĩyo, tũgethema kuonania ta icunjĩ imwe cia Bibilia irĩ hĩtũke nĩ mahinda kana ta itarĩ cia bata.

5.  5 TIGUO. Nĩ tũhũthagĩra Bibilia itiganĩte rĩrĩa tũreruta Bibilia. O na kũrĩ ũguo, nĩ twendete kũhũthĩra Bibilia ya New World Translation of the Holy Scriptures angĩkorũo nĩ yonekaga na rũthiomi rũrĩa tũhũthagĩra, tondũ nĩ ĩhũthĩrĩte rĩĩtwa rĩa Ngai, ĩtaũrĩtwo ũrĩa kwagĩrĩire, na nĩ hũthũ gũtaũkĩrũo. Ta wĩcirie ũhoro wa kũhũthĩra rĩĩtwa rĩa Ngai, Jehova. Thĩinĩ wa ũhoro wa kwambĩrĩria wa Bibilia ĩmwe, nĩ handĩkĩtwo marĩĩtwa ma andũ 79 arĩa maahũthĩrirũo nĩguo Bibilia ĩyo yoneke. O na kũrĩ ũguo, Bibilia ĩyo nĩ yeheretie rĩĩtwa rĩa ũrĩa wamĩtungire, na nĩwe Jehova Ngai! Ngũrani na ũguo, Bibilia ya New World Translation nĩ ĩcoketie rĩĩtwa rĩu itheru kũndũ kũingĩ kũrĩa rĩarĩ maandĩko-inĩ ma tene. ²

6. 6 TIGUO. Rĩrĩa twamenya atĩ wĩtĩkio witũ ndũratwarana biũ na Bibilia, nĩ tũgarũragĩra. Mbere o na tũtanaruta Bibilia ya New World Translation of the Holy Scriptures mwaka-inĩ wa 1950, nĩ twahũthagĩra Bibilia itiganĩte iria ciarĩ kuo kũiga mũthingi wa wĩtĩkio witũ.

7. 7 TIGUO. Wĩra witũ wa kũhunjia nĩ ũgunaga andũ aingĩ. Nĩ tũteithĩtie andũ aingĩ gũtigana na indo iria ithũkagia mwĩrĩ ta ndawa cia kũrebia na kũnyua njohi gũkĩria gĩthimi. Andũ ngiri nyingĩ nĩ mateithĩkĩte mũno nĩ irathi iria tũkoragwo nacio kũndũ kũingĩ thĩinĩ wa thĩ cia gũteithia andũ kũmenya gũthoma na kwandĩka. Ningĩ nĩ tũheanaga ũteithio kũrĩ andũ arĩa magũmĩirũo nĩ icanjama, o na akorũo ti Aira a Jehova. Nĩ twĩrutanagĩria kũmomĩrĩria na kũmahe ũteithio wa kĩĩroho mahinda-inĩ ta macio. ³

8. 8 TIGUO. Tũrũmagĩrĩra ũtaaro wa Bibilia wa ‘gũtĩa andũ a mĩthemba yothe’—gũtekũmakania nĩ a ndini ĩrĩkũ. (1 Petero 2:17) Kwa ngerekano, o na gũtuĩka thĩinĩ wa mabũrũri mamwe tũkoragwo tũrĩ aingĩ mũno, tũtigeragia gũtindĩkĩrĩria thirikari igirĩrĩrie kana igirie ndini iria ingĩ gũtwarithia maũndũ mao. Ningĩ tũtiĩkaga kambĩini nĩguo gũkorũo na watho atĩ andũ othe marũmagĩrĩre ithimi citũ cia mĩtugo na maũndũ marĩa twĩtĩkĩtie. Handũ ha ũguo, twĩkagĩra andũ arĩa angĩ o ta ũrĩa tũngĩenda matwĩkagĩre.—Mathayo 7:12.

Ũhoro ũrĩa ũrĩ gĩcunjĩ-inĩ gĩkĩ ũrutĩtwo Intaneti-inĩ thĩinĩ wa jw.org/ki. Nĩguo wĩrute ũhoro makĩria, thiĩ harĩ ŨHORO WITŨ > CIŨRIA IRIA CIŨRAGIO KAINGĨ.