THAMAKI cia Cuttlefish no ihote gũcenjia rangi wacio na ciĩhithanie, ũndũ mũndũ angĩaga gũciona na ihenya. Kũringana na riboti ĩmwe, thamaki icio “nĩ ihotaga gwĩcenjia mũhianĩre wacio wa mwĩrĩ na ihenya mũno.” Ihotaga gwĩka ũguo atĩa?

Ta wĩcirie: Thamaki cia Cuttlefish icenjagia rangi ikĩhũthĩra tũhengereta tũkoragwo ngothi-inĩ yacio. Rĩrĩa Cuttlefish ĩrenda kwĩhithania, tombo wayo ũtũmaga ũhoro kũrĩ tũhengereta tũu. Ũndũ ũcio ũgatũma thamaki ĩyo ĩcenjie na ihenya rangi na mũhianĩre wayo. Ningĩ, thamaki ĩyo no ĩhũthĩre njĩra ĩyo ya kwĩhithania nĩguo ya njamba ĩgucĩrĩrie ya nga nayo ya nga ĩgucĩrĩrie ya njamba, na ningĩ nĩguo ciaranĩrie.

Ataaramu a Yunivasĩtĩ ya Bristol thĩinĩ wa England, nĩ maathondekire ngothi ta ya thamaki ĩyo. Meekĩrire icunjĩ cia raba mũirũ thĩinĩ wa indo irutaga wĩra ta mwĩrĩ wa thamaki ĩyo. Rĩrĩa ataaramu acio maanyitithanirie indo icio na thitima, indo icio cia raba no kwĩyaramia cieyaramirie, ikĩiria na igĩcenjia rangi wa ngothi ĩyo maathondekete.

Ũtuĩria wa mũtaaramu wĩtagwo Jonathan Rossiter wĩgiĩ mwĩrĩ wa cuttlefish nĩ atĩ, “ũthondeketwo na njĩra njega mũno” na no ũteithie gũthondeka nguo ĩngĩcenja-cenjia rangi kahinda-inĩ kanini. Rossiter oigire atĩ andũ no mehumbe nguo ithondeketwo ta mwĩrĩ wa cuttlefish nĩguo mehithanie kana o kwĩgemia.

We ũkuona atĩa? Hihi ũhoti wa cuttlefish wa gwĩcenjia rangi nĩ ũndũ wa kwĩyumĩria? Kana nĩ kũũmbwo yombirũo?