ŨRĨA ANDŨ AMWE MOIGAGA

Andũ marĩ mawĩtĩkio matiganĩte megiĩ igũrũ na muoroto wa kuo. Kwa ngerekano:

• Andũ aingĩ arĩa meĩtaga Akristiano no metĩkanie na ibuku rĩa New Catholic Encyclopedia rĩrĩa riugaga atĩ, igũrũ nĩ “mũciĩ wa arĩa atheru arĩa makuaga marĩ thĩinĩ wa Mwathani.”

• Mũtongoria wa ndini ya Ayahudi wĩtagwo Bentzion Kravitz oigire atĩ, andũ a ndini ĩyo nĩ meciragia mũno ũhoro wa ũtũũro wa rĩrĩa mũndũ arĩ muoyo no ti thutha wake gũkua. No nĩ oigire atĩ “maroho ma arĩa makuĩte nĩ makoragwo na gĩkeno kĩnene kũrĩa igũrũ, nĩ ũndũ wa kũigua marĩ hakuhĩ biũ na Ngai gũkĩra mbere ya gũkua.” No Kravitz nĩ aacokire akiuga atĩ “o na akorũo Ayahudi nĩ metĩkĩtie ũhoro wa gũthiĩ igũrũ, ibuku rĩao rĩa ndini, Torah, rĩtiaragia ũhoro ũcio mũno.”

• Ndini ya Ahĩndĩ na Abutha metĩkĩtie atĩ igũrũ nĩ kũndũ gũtiganĩte gwa kĩĩroho. Nĩ kũndũ kũrĩa mũndũ athiaga thutha wa gũkua nĩguo acoke aciarũo rĩngĩ thĩinĩ wa thĩ kana athiĩ Nirvana, kũndũ kwega makĩria gũkĩra igũrũ.

• Andũ amwe nĩ mareganaga na mawoni o mothe ma ndini megiĩ gũthiĩ igũrũ na makonania atĩ mawoni ta macio nĩ ũrimũ.

ŨRĨA BIBILIA ĨRUTANAGA

Thĩinĩ wa Bibilia, kiugo “igũrũ” nĩ gĩtaaragĩrio na njĩra itiganĩte. Kwa ngerekano:

• Kĩambĩrĩria 1:20 nĩ ĩtaaragĩria ũhoro wa kũmbwo kwa nyoni iria ‘ciũmbũkaga igũrũ rĩa thĩ itheri-inĩ rĩa mũtambũrũko wa matu-mairũ ma igũrũ.’ Nĩ ũndũ ũcio, kiugo “igũrũ” haha kĩronania nĩ rĩera-inĩ.

• Isaia 13:10 nĩ ĩgwetaga ũhoro wa ‘njata cia ndũire o na iria ihenahenagia irĩ gĩtutu kũu igũrũ’ kũrĩa hinya witũ wa maitho ũkinyaga.

• Bibilia nĩ yugaga atĩ gĩikaro kĩa Ngai kĩrĩ ‘kũu igũrũ matu-inĩ, o kũndũ kũrĩa atũũraga,’ ningĩ ĩkaaria ũhoro wa “araika arĩa marĩ igũrũ.” (1 Athamaki 8:30; Mathayo 24:36) Ciugo “igũrũ matu-inĩ” na “igũrũ” thĩinĩ wa maandĩko macio ironania kũndũ gwa gũikara kana gwa gũtũũra. *

‘Cũthĩrĩria thĩ ũrĩ o kũu igũrũ wĩrorere ũrĩa gũtariĩ ũrĩ o kũu gĩikaro-inĩ gĩaku kĩrĩa gĩtheru, o kĩu kĩa riri waku.’ —Isaia 63:15.

Bibilia ndĩrutanaga atĩ thĩ no kũndũ gwa gũikarũo ihinda inini tu twetereire gũkua nĩguo tũgatũũre igũrũ. Bibilia nĩ yonanagia wega atĩ gĩkuũ gĩtiarĩ muoroto-inĩ wa Ngai akĩũmba andũ. Ta wĩcirie:

• Ngai eerire mũthuri na mũtumia wa mbere ũũ: “Ciarai mũno, mũthegee, mũiyũre thĩ.” (Kĩambĩrĩria 1:28) Mũndũ aarĩ atũũre thĩinĩ wa thĩ tene na tene. Mũthuri na mũtumia wa mbere mangĩakuire angĩkorũo nĩ mangĩagire gwathĩkĩra Ngai. Ũndũ wa kĩeha nĩ atĩ, maathurire kwaga gwathĩka.—Kĩambĩrĩria 2:17; 3:6.

• Nĩ ũndũ wa mũndũ wa mbere kwaga gwathĩka nĩ aarehire gĩkuũ, to kũrĩ we wiki na mũtumia wake no nĩ nginya kũrĩ njiarũa ciao. (Aroma 5:12) Hihi ũndũ ũcio nĩ watigire andũ matarĩ na mwĩhoko?

• Bibilia yugaga atĩ, “kũringana na kĩĩranĩro gĩake [Ngai], nĩ twetereire igũrũ rĩerũ na thĩ njerũ.” * (2 Petero 3:13) Ngai nĩ akaahũthĩra Ũthamaki wake gũcokia thĩ itũ ĩtuĩke ũrĩa aatanyĩte, “na gĩkuũ gĩtigacoka gũkorũo kuo rĩngĩ.” (Kũguũrĩrio 21:3, 4) Hihi ciugo icio iraria ũhoro wa igũrũ kana wa gũkũ thĩ? Nĩguo kĩndũ gĩtuĩke atĩ “gĩtigacoka gũkorũo kuo rĩngĩ,” no mũhaka gĩkorũo nĩ kĩarĩ kuo mbere ĩyo. No gĩkuũ gĩtirĩ gĩakorũo kũrĩa igũrũ. Kwoguo rĩandĩko rĩu rĩronania ũrĩa gũkahaanĩka gũkũ thĩ, kũrĩa twatanyĩtwo tũikarage na kũrĩa twĩriragĩria gũkorũo hamwe na endwa aitũ. Ningĩ Bibilia nĩ ĩguũragia atĩ arĩa makuĩte nĩ magaacokio muoyo na matũũranie rĩngĩ na endwa ao.—Johana 5:28, 29.

Andũ aingĩ nĩ makenaga kũmenya ũrĩa Bibilia ĩrutanaga ũhoro wĩgiĩ igũrũ. Kwa ngerekano, mũndũ ũmwe warĩ wa Gatoreki tene wĩtagwo George oigaga ũũ: “Ũrutani wa Bibilia wĩgiĩ gũtũũra gũkũ thĩ tene na tene nĩ wa gwĩkĩra ngoro. Ũndũ ũcio nĩ wangucĩrĩirie gũkĩra ũrĩa wa gũthiĩ matu-inĩ.” *

‘Igũrũ-rĩ, rĩo rĩene nĩ rĩa Jehova, nayo thĩ nĩ kũhe aheete ciana cia kĩrĩndĩ.’—Thaburi 115:16.