ŨRĨA KŨRĨ

Mĩtangĩko nĩ kũigua ũtaiganĩire na kũigua ũkĩmaka. Tondũ tũratũũra thĩ ĩrĩ na mathĩna, ithuothe no tũtangĩke.

ŨRĨA BIBILIA YUGAGA

Mũthamaki Daudi aandĩkire ũũ: “Nĩ ihinda rĩigana atĩa ngũtũũra ndĩĩgiyaga thĩinĩ wa roho wakwa, ngagĩtindaga mũthenya wothe ndĩ o na kĩeha ngoro?” (Thaburi 13:2) Nĩ kĩĩ gĩateithirie Daudi? Aaitũrũrĩire Ngai ngoro yake na njĩra ya mahoya ehokete biũ ũtugi wa Ngai. (Thaburi 13:5; 62:8) Ngai atwĩraga tũmũitũrũrĩre mathĩna maitũ. 1 Petero 5:7 yugaga ũũ: “Mũkĩmũikagĩria mĩtangĩko yanyu yothe, nĩ ũndũ nĩ amũrũmbũyagia.”

Nĩ kũrĩ maũndũ maingĩ tũngĩka nĩguo tũnyihie mĩtangĩko. Kwa ngerekano, rĩrĩa mwandĩki wa Bibilia wetagwo Paulo aaiguire ‘agĩtangĩkĩra ciũngano ciothe,’ nĩ eekĩrire kĩyo nĩguo amomĩrĩrie na amekĩre ngoro. (2 Akorintho 11:28) Nĩ ũndũ ũcio, gũtangĩka gwake kwarĩ na ũguni tondũ nĩ gwatũmire erutĩre kũmateithia. O na ithuĩ no twĩke take. No tũngĩkorũo na mwerekera wa kwaga gũtindanĩra, tũtingĩkorũo tũkĩonania wendo.—Thimo 17:17.

“Mũtekũrũmbũiya o maũndũ manyu moiki, no mũkarũmbũyagia nginya maũndũ ma arĩa angĩ.” —Afilipi 2:4.

ŨRĨA KŨRĨ

Andũ no matangĩke nĩ ũndũ wa maũndũ moru meekire tene, kana ũhoro wa ihinda rĩũkĩte kana maũndũ megiĩ mbeca. *

ŨRĨA BIBILIA YUGAGA

Gũtangĩka nĩ ũndũ wa maũndũ moru mũndũ eekire tene: Mbere ya gũtuĩka Akristiano, andũ amwe hĩndĩ ya karine ya mbere maakoragwo marĩ arĩĩu, atunyani, meingĩragia ngomanio-inĩ itagĩrĩire, na aici. (1 Akorintho 6:9-11) Handũ ha gũikara magĩĩciragia maũndũ macio, maagarũrĩire mĩthiĩre yao na makĩĩhoka Ngai atĩ nĩ ekũmonia tha iria onanagia. Thaburi 130:4 yugaga ũũ: “No rĩ’, harĩ wee [Ngai] he na wohanĩri.”

Gũtangĩka nĩ ũndũ wa rũciũ: Jesu Kristo oigire ũũ: “Mũtikanatangĩke nĩ ũndũ wa rũciũ, tondũ rũciũ nĩ rũgaakorũo na mĩtangĩko yaruo.” (Mathayo 6:25, 34) Eendaga kuuga atĩ ũtangĩkagĩre o mathĩna ma mũthenya ũcio. Ndũkaingĩhie mathĩna ma mũthenya ũcio na njĩra ya gwĩciria ũhoro wa ma rũciũ, tondũ ũndũ ũcio no ũtũme ũtue matua ũtecirĩtie. Ningĩ thutha-inĩ no ũcoke wone atĩ o na ndũrabataraga gũtangĩka mũno.

Mathĩna ma mbeca: Mũndũ ũmwe warĩ mũũgĩ oigire ũũ: “Ndũkandehere ũkĩa kana ũtonga.” (Thimo 30:8) Handũ ha ũguo, aaiganagĩra na kĩrĩa aarĩ nakĩo, ũndũ ũrĩa ũtũmaga mũndũ etĩkĩrĩke nĩ Ngai. Ahibirania 13:5 yugaga ũũ: “Mũtũũrĩre-inĩ wanyu-rĩ, tigagai kwenda mbeca, na mũiganagĩre na indo iria mũrĩ nacio. Nĩ gũkorũo we [Ngai] oigĩte ũũ: ‘Ndirĩ hĩndĩ ngaagũtiga, na ndirĩ hĩndĩ ngaagũtirika.’” Ngũrani na mbeca iria itarĩ cia kwĩhokeka, Ngai ndarĩ hĩndĩ agaatiganĩria arĩa othe mamwĩhokaga na maikaraga ũtũũro mũhũthũ.

‘Ndirĩ ndona mũndũ mũthingu atiganĩirio, kana mbeũ yake ĩkĩhoyanga irio.’—Thaburi 37:25.

ŨRĨA ANDŨ MOIGAGA

Mwandĩki wĩtagwo Harriet Green aandĩkire ũũ mwaka wa 2008, thĩinĩ wa gĩcunjĩ kĩa ngathĩti ĩtagwo The Guardian: “Mĩtangĩko ĩgũthiĩ ĩingĩhĩte.” Nake Patrick O’Connor aandĩkire ũũ mwaka wa 2014 thĩinĩ wa The Wall Street Journal: “Arĩa maikaraga Amerika matirĩ maagĩa na mĩtangĩko ta ĩrĩa marĩ nayo.”

ŨRĨA BIBILIA YUGAGA

“Ũritũ ũrĩ ngoro ya mũndũ ũtũmaga ĩiname, ĩndĩ kwarĩrio wega nĩ gũkena gũtũmaga ĩkene.” (Thimo 12:25) “Kwarĩrio wega” no kuumane na ‘ũhoro mwega wa Ũthamaki.’ (Mathayo 24:14) Ũthamaki ũcio ũrĩa nĩ thirikari ya Ngai, nĩ ũkeeheria maũndũ marĩa ithuĩ tũtangĩhota kweheria. Ũkeeheria mĩtangĩko yothe na njĩra ya kũniina kĩhumo kĩayo, kĩrĩa nĩ hamwe na mĩrimũ na gĩkuũ. ‘Ngai nĩ egũtũgiria maithori mothe mathire maitho-inĩ maitũ, na gĩkuũ gĩtigacoka gũkorũo kuo rĩngĩ, o na kĩeha kana kĩrĩro kana ruo.’—Kũguũrĩrio 21:4.

“Ngai ũrĩa ũheanaga kĩĩrĩgĩrĩro aromũiyũria gĩkeno na thayũ nĩ ũndũ wa kũmwĩtĩkia.”—Aroma 15:13.