Mũndũ ũrĩ na ũhoti wa gũcokereria thutha wa moritũ nĩ ahotaga gũcokererũo nĩ hinya wake o na ihenya thutha wa kũhĩtũkĩra ũndũ mũritũ. Nĩ habataraga ihinda nĩguo mũndũ akũrie ũhoti ũcio. O ta ũrĩa mwana atangĩmenya gũthiĩ atambĩte kũgwa maita maigana ũna, noguo atangĩmenya ũrĩa angĩgaacĩra ũtũũro-inĩ atambĩte kũgerera mathĩna maigana ũna.

Ciana imwe nĩ ikuaga ngoro rĩrĩa ciaremwo gwĩka ũndũ mũna, ciacemania na ũndũ mũũru, kana rĩrĩa ciarutwo mahĩtia nĩ andũ arĩa angĩ. Ingĩ o na nĩ ikuaga ngoro biũ ikaremwo nĩ gũcokereria. O na kũrĩ ũguo, nĩ ciagĩrĩirũo gũtaũkĩrũo nĩ maũndũ maya marũmĩrĩire:

• Rĩmwe nĩ tũremagwo kũhingia maũndũ marĩa tũrenda.​—Jakubu 3:2.

• Maũndũ moru no makore mũndũ o wothe.​—Kohelethu 9:11.

• Kũrũngwo nĩ gũteithagia mũndũ kwĩruta.​—Thimo 9:9.

Ũhoti wa gũcokereria thutha wa moritũ nĩ ũrĩteithagia mwana waku kũhiũrania na moritũ ma ũtũũro arĩ na ũmĩrĩru.

Rĩrĩa mwana waku aremwo kũhingia ũndũ mũna.

ŨTAARO WA BIBILIA: “Mũndũ mũthingu no agwe maita mũgwanja, o agĩũkĩraga.”​—Thimo 24:16.

Teithia mwana waku kwĩruta ũrĩa angĩmenya kana thĩna mũna nĩ mũnene kana ti mũnene. Kwa ngerekano, angĩka atĩa angĩgwa kĩgeranio cukuru? Ahota gũkua ngoro oige, “Hatirĩ ũndũ ingĩhota gwĩka wega!”

Nĩguo mwana waku akũrie ũhoti wa gũcokereria thutha wa moritũ, mũteithie gwĩciria ũrĩa angĩka nĩguo ageeka wegega hĩndĩ ĩngĩ. Na njĩra ĩyo nĩ ekwĩrutanĩria kũhiũrania na thĩna ũcio handũ ha kwĩiguĩra tha.

Ihinda-inĩ o rĩu, wĩtheme kũniinĩra mwana waku thĩna ũcio. Handũ ha ũguo, mũteithie kũgĩa na njĩra ya kũhiũrania na thĩna ũcio we mwene. No ũmũũrie, “Ũngĩka atĩa nĩguo ũhote gũtaũkĩrũo wega makĩria nĩ mathomo marĩa ũrarutwo?”

Rĩrĩa maũndũ moru moimĩra.

ŨTAARO WA BIBILIA: “Mũtiũĩ ũrĩa ũtũũro wanyu ũgaakorũo ũhaana rũciũ.”​—Jakubu 4:14.

Rũciũ rũtiũĩo. Mũndũ mũtongu ũmũthĩ, rũciũ no athĩne; mũndũ ũrĩ na ũgima mwega ũmũthĩ, rũciũ no arware. Bibilia yugaga atĩ, “Ti hĩndĩ ciothe arĩa marĩ ihenya mahootanaga ihenya-inĩ, kana arĩa marĩ hinya makahootana mbaara-inĩ, . . . tondũ ihinda na maũndũ materĩgĩrĩirũo makoraga andũ othe.”​—Kohelethu 9:11.

Ũrĩ ta mũciari, nĩ wĩkaga ũrĩa wothe ũngĩhota kũgitĩra mwana waku kuumana na ũgwati. O na kũrĩ ũguo, gũtingĩhoteka kũgitĩra mwana waku kuumana na maũndũ mothe moru.

Mwana waku no akorũo atakinyĩtie mĩaka ya kũhĩtũkĩra mathĩna ta kũrũo nĩ wĩra kana kũhara. O na kũrĩ ũguo, ihinda-inĩ rĩrĩ no ũmũteithie kũhiũrania na maũndũ mangĩ moru ta kũũrũo nĩ arata, kana gũkuĩrũo nĩ mũndũ wa famĩlĩ. *

Rĩrĩa mwana waku arutwo mahĩtia nĩguo eke ũgarũrũku.

ŨTAARO WA BIBILIA: “Thikagĩrĩria ũtaaro . . . nĩgetha ũgaatuĩka mũndũ mũũgĩ ũtũũro-inĩ waku wa thutha.”​—Thimo 19:20.

Rĩrĩa mũndũ aruta mwana waku mahĩtia nĩguo eke ũgarũrũku, ndekaga ũguo nĩguo amũmakie kana amũtuurithie, no ekaga ũguo nĩgetha amũteithie gũtuĩka mũndũ mwega makĩria.

Rĩrĩa waruta mwana waku gwĩtĩkĩra kũrũngwo, inyuerĩ nĩ mũrĩgunĩkaga. Mũciari ũmwe wĩtagwo John aaugire, “Ciana ingĩagaga kũrũnga mahĩtia ma cio, gũtirĩ hĩndĩ ikeruta. Irĩtũũraga na mathĩna, nawe wĩ ta mũciari, wĩra waku ũrĩkoragwo kũmaniinĩra mathĩna macio. Ũndũ ũcio ũritũhagia ũtũũro wa aciari na wa mwana.”

Ũngĩteithia mwana waku atĩa kũgunĩka rĩrĩa arutwo mahĩtia nĩguo eke mogarũrũku? Rĩrĩa mwana waku arũngwo arĩ cukuru kana kũndũ kũngĩ, ndũkauge atĩ ndegũbatiĩ kũrũngwo. Handũ ha ũguo, no ũmũũrie:

• “Ũgwĩciria ũrũngirũo nĩkĩ?”

• “Ũngĩagagĩria atĩa?”

• “Ũgeeka atĩa ũngĩgekora rĩngĩ ũndũ-inĩ ta ũcio?”

Ririkana atĩ rĩrĩa mwana waku arutwo mahĩtia nĩguo eke ũgarũrũku, nĩ arĩgunĩkaga ihinda-inĩ rĩrĩ na nginya atuĩka mũndũ mũgima.