Nĩ Kĩĩ Kĩngĩgũteithia Gũtiga Kũnyua Thigara

“Gũtua itua irũmu rĩa gũtiga kũnyua thigara nĩguo ũndũ ũrĩa wa bata mũno ũteithagia andũ arĩa mahotaga gũtiga.”—Ibuku rĩĩtagwo “Stop Smoking Now!”

ANGĨKORŨO nĩ ũrenda gũtiga kũnyua thigara, nĩ ũrabatara gũtua itua irũmu rĩa gwĩka ũguo. Ũngĩkĩra hinya atĩa itua rĩaku rĩa gũtiga kũnyua thigara? Ũndũ wa mbere, wĩcirie ũrĩa ũkũgunĩka watiga kũnyuaga thigara.

Nĩ ũkũhonokia mbeca. Ũngĩnyua kabagiti kamwe ga thigara o mũthenya, no ũhũthĩre mbeca nyingĩ mũno o mwaka. “Ndiamenyete ũrĩa ndateangaga mbeca nyingĩ na thigara.”—Gyanu, Nepal.

Ũtũũro waku nĩ ũkwagĩra makĩria. “Ũtũũro wakwa nĩ waagĩrire mũno rĩrĩa ndatigire kũnyua thigara na ũthiaga ũkĩagagĩraga o mũthenya.” (Regina, Afrika ya Mũhuro) Rĩrĩa mũndũ atiga kũnyua thigara, ũhoti wake wa gũcama na wa kũnungĩra nĩ wagagĩra makĩria, agakorũo na hinya makĩria, na akoneka arĩ na riri.

Ũgima waku wa mwĩrĩ no wagagĩre. “Gũtiga kũnyua thigara nĩ gũkoragwo na ũguni mũnene na wa na ihenya harĩ athuri na atumia a ũkũrũ o wothe.”—The U.S. Centers for Disease Control and Prevention.

Nĩ ũkũgĩa na ũmĩrĩru makĩria. “Ndaatigire kũnyua thigara tondũ ndieendaga gũtuĩka ngombo yacio. Ndeendaga gũtongoragia mwĩrĩ wakwa niĩ mwene.”—Henning, Denmark.

Andũ anyu a famĩlĩ na arata nĩ mekũgunĩka. “Kũnyua thigara . . . nĩ gũthũkagia ũgima wa mwĩrĩ wa andũ arĩa magũthiũrũrũkĩirie. . . . Ũthuthuria nĩ wonanĩtie atĩ andũ ngiri nyingĩ nĩ makuaga o mwaka kuumana na kansa ya mahũri na mĩrimũ ya ngoro ĩrĩa yumanaga na kũhuhia ndogo ya andũ arĩ manyuaga thigara.”—American Cancer Society.

Nĩ ũgũkenia Mũkũmbi. “Inyuĩ endwa akwa-rĩ, . . . nĩ twĩtheriei ũndũ o wothe ũrĩa ũngĩthahia mwĩrĩ.” (2 Akorintho 7:1) “Mũrute mĩĩrĩ yanyu ĩrĩ igongona . . . itheru na rĩretĩkĩrĩka nĩ Ngai.”—Aroma 12:1.

“Rĩrĩa ndataũkĩirũo atĩ Ngai ndakenagio nĩ indo iria ithahagia mwĩrĩ, nĩ ndatuire itua rĩa gũtiga kũnyua thigara.”—Sylvia, Spain.

O na kũrĩ ũguo, kaingĩ gũtua itua gũtikoragwo kũrĩ kũiganu. Nĩguo mũndũ ahote gũtiga kũnyua thigara, no abatare gũteithĩrĩrio nĩ andũ angĩ, ta andũ a famĩlĩ na arata. Mangĩmũteithĩrĩria atĩa?