TA HŨŨRA mbica ũgĩthiĩra gacĩra karĩ na nduma hwaĩ-inĩ ũmwe. O na gũtuĩka riũa nĩ rĩthũĩte, ndũraigua ũtarĩ na mwĩhoko tondũ ũrĩ na toci ĩrĩ na ũtheri mũingĩ. Wamũrĩka thĩ hatirĩ kĩndũ ũtarona. Na wamũrĩka mbere, ũtheri wayo mũingĩ nĩ ũrakũmũrĩkĩra kũraihu gacĩra-inĩ karĩa ũragerera.

Na njĩra ya mũhaano, Bibilia nĩ ta toci ĩyo. O ta ũrĩa tuonire thĩinĩ wa icunjĩ iria ciuma mbere, Kiugo kĩa Ngai no gĩtũteithie kũhiũrania na mathĩna marĩa marĩ mbere itũ marĩa andũ othe macemanagia namo o mũthenya thĩinĩ wa thĩ ĩno. No Bibilia no ĩtũteithie makĩria. Nĩ ĩtũteithagia kuona maũndũ marĩa marĩ mbere, ĩgatũhotithia kuona na kũrũmĩrĩra njĩra ĩrĩa ĩtũtongoragia harĩ gĩkeno gĩa gũtũũra na kũiganĩra. (Thaburi 119:105) Na njĩra ĩrĩkũ?

Reke tuone njĩra igĩrĩ iria Bibilia ĩtũteithagia gũkorũo na mwĩhoko mahinda mokĩte: 1 Nĩ ĩtũmaga tũgĩe na ũtũũro ũrĩ na muoroto, na 2 nĩ ĩtũrutaga ũrĩa tũngĩgĩa ũrata na Ngai.

Bibilia nĩ ĩtũheaga ũtaaro wa kwĩhokeka wa kũhiũrania na mathĩna, na kwoguo ndĩngĩringithanio na ibuku rĩngĩ o rĩothe. Handũ ha gũtwĩkĩra ngoro tũthingate o maũndũ maitũ tu, Bibilia nĩ ĩtũrutaga atĩ nĩ twagĩrĩirũo kuona maũndũ na njĩra njariĩ. Na tũngĩka ũguo, ũtũũro witũ no ũgĩe na muoroto.

Kwa ngerekano ta wĩcirie ũtaaro ũyũ wa Bibilia: “Kũheana nĩ kũrĩ gĩkeno kĩnene gũkĩra kwamũkĩra.” (Atũmwo 20:35) Hihi no ũririkane hĩndĩ ĩmwe wateithirie mũndũ warĩ na thĩna? Kana hĩndĩ wathikĩrĩirie mũrata waku agĩgũitũrũrĩra ngoro yake? Na githĩ ndwaiguire waiganĩra wamũteithia agĩe mwĩhoko?

Nĩ tũgĩaga na gĩkeno kĩnene rĩrĩa twaheana tũtekwĩrĩgĩrĩra tũheo. Mwandĩki ũmwe oigire: “Nĩ ũndũ mũritũ kwĩheana ũtekwĩrĩgĩrĩra ũheo, no  ũkorirũo waheanaga ũtekwĩrĩgĩrĩra ũcokerio guoko.” O na kũrĩ ũguo, rĩrĩa tweheana na makĩria kũrĩ andũ arĩa matangĩhota gũtũhe kĩndũ, nĩ twamũkagĩra kĩheo. Na njĩra ĩyo nĩ tũhotaga kuona maũndũ na njĩra njega. Tweka ũguo tũkoragwo tũkĩrutithania wĩra na Mũũmbi witũ, ũrĩa wonaga ciĩko ta icio cia ũtugi irĩ thirĩ harĩ we. (Thimo 19:17) Nĩ oyaga na ũritũ maũndũ marĩa twĩkagĩra andũ arĩa matarĩ hinya, na nĩ atwĩraga atĩ nĩ agatũrĩha na muoyo wa tene na tene thĩinĩ wa thĩ njerũ. Na githĩ kĩu ti kĩĩrĩgĩrĩro gĩa gũcanjamũra mũno ihinda rĩũkĩte!— Thaburi 37:29; Luka 14:12-14 *

Makĩria ma ũguo, Bibilia nĩ ĩtũrutaga atĩ no tũmenye muoroto wa ũtũũro tũngĩtungatagĩra Jehova, Ngai ũrĩa wa ma. Kiugo gĩake gĩtwĩraga tũmũgoocage, tũmwathĩkagĩre, na tũmũheage gĩtĩo kĩrĩa kĩmwagĩrĩire. (Kohelethu 12:13; Kũguũrĩrio 4:11) Rĩrĩa tweka ũguo, nĩ tũhingagia ũndũ wa bata mũno tondũ nĩ tũtũmaga Ngai akene. O na atwĩraga: “Tuĩka mũndũ mũũgĩ, ũgĩkenagie ngoro yakwa.” (Thimo 27:11) Ta wĩcirie ũndũ ũyũ, rĩrĩa twatua matua mehocetie harĩ motaaro ma Bibilia na njĩra ya ũũgĩ, nĩ tũtũmaga Ithe witũ wa igũrũ akene. Nĩkĩ? Tondũ nĩ atũrũmbũyagia na eendaga tũgunĩke nĩ ũndũ wa kũrũmĩrĩra ũtongoria wake. (Isaia 48:17, 18) Gũtirĩ ũndũ ũngĩ ũngĩtũma tũgĩe na muoroto wa ũtũũro gũkĩra gũtungatĩra Mwathani mũnene wa igũrũ na thĩ, na gũtũũra na njĩra ĩrĩa ĩmũkenagia.

Ningĩ Bibilia nĩ ĩtũrutaga ũrĩa tũngĩgĩa ũrata na Mũũmbi witũ. Maandĩko moigaga: “Kuhĩrĩriai Ngai, nake nĩ ekũmũkuhĩrĩria.” (Jakubu 4:8) Rĩmwe no twĩkĩrĩre nganja kana no tũgĩe ũrata na Mũũmbi witũ. Bibilia ĩtwĩraga na ma atĩ angĩkorũo nĩ ‘tũgũcaria Ngai,’ nĩ ‘tũkũmuona,’ tondũ “ndarĩ haraya na mũndũ o na ũmwe witũ.” (Atũmwo 17:27) Ũtaaro wa Bibilia ũrĩa ugaga tũgĩe ũrata na Ngai nĩ wa bata mũno nĩ ũndũ wa mahinda maitũ marĩa mokĩte. Na njĩra ĩrĩkũ?

Ta wĩcirie ũndũ ũyũ: O na tũngĩgeria atĩa, gũtirĩ mũndũ o na ũmwe ũngĩhota kũũrĩra thũ ĩrĩa itũ nene, gĩkuũ. (1 Akorintho 15:26) O na kũrĩ ũguo, Ngai atũũraga tene na tene. Ndarĩ hingo agakua, na endaga o na arata ake matũũre tene na tene. Bibilia ĩkĩhũthĩra ciugo njega cia gwĩkĩra ngoro nĩ ĩtaaragĩria ũrĩa Jehova endagĩra arĩa mamũcaragia. Yugaga ũũ: “Ngoro cianyu irotũũra nginya tene na tene.”—Thaburi 22:26.

Nĩ na njĩra ĩrĩkũ ũngĩgĩa ũrata wa tene na tene hamwe na Ngai? Thiĩ na mbere kwĩruta ũhoro wake ũrĩa ũrĩ Bibilia-inĩ. (Johana 17:3; 2 Timotheo 3:16) Mũhoe agũteithie nĩguo ũtaũkĩrũo nĩ Maandĩko. Bibilia ĩtwĩraga na ma atĩ angĩkorũo nĩ ‘ tũgũthiĩ na mbere kũhoya Ngai’ atũhe ũũgĩ nĩ egũtũhe. * (Jakubu 1:5) Nĩ ũndũ ũcio, wĩrutanĩrie kũhũthĩra maũndũ marĩa ũreruta, na ũrekage Kiugo kĩa Ngai gĩgũtongoragie kĩrĩ ‘tawa wa gũkũmũrĩkagĩra makinya maku’ na ‘kĩrĩ ũtheri wa gũkuonagia njĩra’ rĩu na tene na tene.—Thaburi 119:105.