Delphine ũrĩa ũkũgwetetwo gĩcunjĩ-inĩ kĩu kĩngĩ aiguaga mĩtangĩko yake ĩkĩmũtindĩkĩrĩria ende kũnyua njohi mũno. Bibilia ndiugĩte kũnyua njohi na gĩthimi kĩrĩa kĩagĩrĩire nĩ ũũru, no yugaga: “Ndũkanegwatanie na inyui-cia-njohi kana arĩa manyuaga ndibei nyingĩ.” (Thimo 23:20) Kũhũthĩra njohi ũũru nĩ kũrehaga mathĩna manene ma mwĩrĩ, gũgathũkia ũrata, na gũgatũma andũ milioni nyingĩ makue o mwaka. Mathĩna maingĩ ta macio no methemwo korũo andũ no marũmĩrĩre ũtaaro wa Bibilia.

Ũguo nĩguo Delphine eekire. Oigire ũũ: “Ndonire atĩ njohi ndĩandeithagia kũniina mĩtangĩko yakwa. Ndaahũthĩrire ũtaaro wa rĩandĩko rĩa Afilipi 4:6, 7 rĩrĩa riugaga: ‘Mũtigatangĩkage nĩ ũndũ o na ũrĩkũ, no . . . menyithagiai Ngai maũndũ marĩa mũbataraga kũgerera mahoya na mathaithana.’ Ndaahoyaga Jehova o mũthenya rĩrĩa ndaigua ngĩtoorio nĩ meciria na mĩtangĩko. Ndaamwĩraga ũrĩa wothe ndĩraigua ngoro-inĩ, rĩrĩa ndarakara, ndakua ngoro, kana ndaigua ta ndiganĩirio, na ngamwĩra andeithie hote kuona maũndũ ũrĩa kwagĩrĩire. Rũcinĩ ngĩũkĩra ndaatigagĩrĩra atĩ nĩ ndateanĩria meciria macio biũ. Kũhoya Jehova kaingĩ nĩ kwandeithirie kũiga meciria harĩ indo iria ndarĩ nacio handũ ha iria itarĩ nacio. Ndaatuire itua rĩa kwaga kũnyua njohi rĩngĩ o rĩ o rĩ. Tondũ thayũ ũrĩa ndaagĩire warĩ wa bata mũno, ndingĩendire gwĩka ũndũ ũngĩatũmire njũrũo nĩguo.”

Ngomanio itagĩrĩire nĩ ũmwe wa maũndũ marĩa matũmaga mũndũ akue ngoro na anyitwo nĩ kĩeha kĩnene. No motaaro ma Bibilia no matũteithie gwĩthema mathĩna ta macio na njĩra ya gũtuonia maũndũ mamwe marĩa mamarehaga, ta gũthakĩra mũndũ na maũndũ ma ũũra-thoni. Mwanake ũmwe wĩtagwo Samuel oigire: “Warĩ ũndũ mũhũthũ gũthakĩra mũndũ ũngĩ. Rĩmwe ndiakoragwo ngĩgucĩrĩrio nĩ mũndũ, no ndona atĩ we nĩ aragucĩrĩrio nĩ niĩ ũndũ, ũcio waatũmaga ndĩmũthakĩre.” Samuel nĩ onire atĩ nĩ amenagĩrĩrio kaingĩ atĩ nĩ athakanagĩra, nginya rĩrĩa atabangĩte gwĩka ũguo, na ũndũ ũcio ũgĩtũma atue itua rĩa gũthakanĩra akĩendaga. No ũndũ ũcio nĩ wamũthumbũraga. Oigire ũũ: “Ũndũ ũcio ndwarĩ mwega tondũ watũmire ngũrie mwerekera wa kwĩyenda.”

Samuel nĩ aathomire gĩcunjĩ kĩa andũ ethĩ thĩinĩ wa jw.org. Nĩ eecirire ũhoro wa Thimo 20:11, ĩrĩa yugaga: “O na kaana kamenyeka na ciĩko ciako, kana maũndũ mako nĩ makembu, na kana no marũngĩrĩru.” Ũndũ ũcio wamũteithirie atĩa? Samuel nĩ aamenyire atĩ gũthakanĩra gũtiarĩ gũtheru kana kwagĩrĩru. Oigire ũũ: “Ningĩ nĩ ndamenyire atĩ mũndũ mwĩthĩ ũrathakanĩra, akũragia ngumo igatũma age gũkorũo arĩ mũthuri kana mũtumia mwega. Ndambĩrĩirie gwĩciria ũrĩa mũtumia ũrĩa ngaahikia angĩigua angĩona ngĩthakĩra mũtumia ũngĩ. Ũndũ ũcio nĩ watũmire menye atĩ mũtugo ũcio ti mwega. Gũtuĩka atĩ nĩ ũhũthũ gũthakĩra mũndũ ti kuuga atĩ ũndũ ũcio nĩ mwega.” Nĩ aacenjirie. Gwĩthema gũthakanĩra ningĩ nĩ kũmũteithĩtie gwĩthema ngomanio itagĩrĩire.

Antonio aarĩ ũgwati-inĩ mũnene gũkĩra wa ngomanio tondũ aamenyerete kwĩrorera maũndũ ma ũũra-thoni. O na gũtuĩka aahikĩtie mũtumia eendete mũno, eekoraga agĩcokera mũtugo ũcio rĩngĩ na rĩngĩ. Oigire atĩ gwĩciria ũhoro wa rĩandĩko rĩa 1 Petero 5:8 nĩ kwamũteithirie mũno. Riugaga ũũ: “Mwĩmenyagĩrĩrei, ikaragai mwĩiguĩte! Thũ yanyu Mũcukani, aikaraga agĩcangacangaga ta mũrũthi ũrararama, agĩetha mũndũ wa kũmeria.” Antonio oigire ũũ: “Mbica cia ũũra thoni ciyũire kũndũ guothe thĩinĩ wa thĩ na no cikare meciria-inĩ. Mũhari ũcio nĩ wandeithirie gwĩciria kĩrĩa gĩatũmaga ngwe magerio-inĩ. Nĩ ndabataraga kũririkana na ihenya atĩ mbica icio cioimaga kũrĩ Mũcukani. Rĩu nĩ njũĩ atĩ no Jehova ũngĩhota kũndeithia ‘ndĩmenyagĩrĩre na njikarage ndĩiguĩte’ nĩguo hote kũhũrana na tharĩkĩro cia meciria, ngoro, na kĩhiko gĩakwa.” Antonio nĩ onire ũteithio ũrĩa aabataraga na rĩu nĩ ahotete gũtooria mũtugo ũcio mũũru. Ũndũ ũcio nĩ ũmũteithĩtie gwĩthema nginya mogwati manene.

Hatarĩ nganja, Bibilia nĩ ĩtũheaga ũtaaro ũngĩtũteithia gwĩthema mathĩna manene. Ĩ namo mathĩna marĩa magĩĩte mĩri na magatherema? Rekei tuone ũrĩa Kiugo kĩa Ngai kĩngĩtũteithia gũtooria mathĩna maritũ ta macio.