O NA GŨTUĨKA ũremi wa aciari aitũ a mbere Adamu na Hawa nĩ wareheire andũ othe mehia na gĩkuũ, ũndũ ũcio ndwagarũrire muoroto wa Ngai harĩ andũ. Thĩinĩ wa Kiugo gĩake Bibilia, Ngai nĩ acokerete kũndũ kũingĩ atĩ muoroto wake ndũrĩ wacenjia.

• “Andũ arĩa athingu nĩ makaagaya thĩ, na magaatũũra thĩinĩ wayo tene na tene.”​—Thaburi 37:29.

• “Nĩ akaameria gĩkuũ tene na tene, na Jehova Mwathani Ũrĩa Mũnene nĩ akaagiria maithori mothiũ mothe.”​—Isaia 25:8.

• “Thũ ya mũico ĩrĩa ĩkaaniinwo nĩ gĩkuũ.”​—1 Akorintho 15:26.

• “Gĩkuũ gĩtigaacoka gũkorũo kuo rĩngĩ, o na gũcakaya kana kĩrĩro kana ruo.”​—Kũguũrĩrio 21:4.

Ngai “akaameria gĩkuũ” atĩa nĩguo ‘aniine’ thũ ĩyo? O ta ũrĩa hekũgwetetwo, Bibilia nĩ yonanagia wega atĩ ‘arĩa athingu magaatũũra tene na tene.’ No ningĩ nĩ ĩcokaga ĩkoiga atĩ “gũtirĩ mũndũ mũthingu thĩinĩ wa thĩ wĩkaga o maũndũ mega hingo ciothe.” (Kohelethu 7:20) Hihi ũguo nĩ kuuga atĩ Ngai nĩ akaaregeria ithimi ciake nĩguo andũ matarĩ akinyanĩru na ehia matũũre tene na tene? Aca! Ndangĩka ũguo, tondũ ‘Ngai ndangĩheenania.’ (Tito 1:2) Gũkĩrĩ ũguo-rĩ, Ngai ageeka atĩa nĩguo ahingie muoroto wake wa wendo ũrĩa aarĩ naguo akĩũmba andũ?

Jehova Ngai nĩ aathondekire mũbango wa wendo wa gũkũũra andũ kuuma harĩ gĩkuũ, na njĩra ya kũruta ũkũũri. Ũkũũri nĩ thogora ũrutagwo kũrĩhĩra kĩndũ gĩthũkĩtio kana kũhingia kĩhooto kĩa ũndũ mũna, na thogora ũcio no mũhaka ũkorũo ũiganaine na kĩrĩa kĩrarĩhĩrũo. Tondũ andũ othe nĩ ehia na magĩrĩire o gũkua-rĩ, Bibilia yugaga ũũ ĩtekũhithĩrĩra: “Gũtirĩ o na ũmwe wao ũngĩhota gũkũũra mũrũ wa ithe kana ahe Ngai kĩndũ gĩa gũkũũra mũndũ ũcio, (thogora wa gũkũũra mĩoyo yao nĩ wa goro mũno ũũ atĩ gũtirĩ hĩndĩ mangĩhota kũũrĩha).”—Thaburi 49:7, 8.

Rĩrĩa mũndũ ũtarĩ mũkinyanĩru akua, arĩhagĩra o mehia make tu, ndangĩhota gwĩkũũra we mwene, o na kũrĩha mehia ma mũndũ ũngĩ o na ũrĩkũ. (Aroma 6:7) Twabataraga mũndũ mũkinyanĩru na ũtarĩ mwĩhia arute muoyo wake, ti tondũ wa mehia make we mwene, no nĩ tondũ wa mehia maitũ.—Ahibirania 10:1-4.

Ũcio nĩguo mũbango ũrĩa Ngai aabangire. Aatũmire Mũrũ wake Jesu kuuma igũrũ aciarũo gũkũ thĩ arĩ mũndũ mũkinyanĩru, ũtarĩ na mehia. (1 Petero 2:22) Jesu ooigire atĩ ookire nĩguo “arute muoyo wake ũtuĩke ũkũũri nĩ ũndũ wa gũkũũra andũ aingĩ.” (Mariko 10:45) Aakuire nĩguo atoorie thũ ĩyo ĩtagwo gĩkuũ nĩguo tũkoona muoyo.—Johana 3:16.

Ũmũthĩ ũrathi wa Bibilia nĩ ũrahinga, tũratũũra “mahinda ma ũgwati maritũ kũhiũrania namo,” ũndũ ũrĩa ũronania atĩ tũrĩ “matukũ-inĩ ma kũrigĩrĩria” ma mũtabarĩre ũyũ mũũru wa maũndũ. (2 Timotheo 3:1) Matukũ ma kũrigĩrĩria magaathira hĩndĩ ya “mũthenya ũrĩa wa ciira na wa kũniinwo kwa andũ arĩa matetigĩrĩte Ngai.” (2 Petero 3:3, 7) No andũ arĩa mendete Ngai nĩ makaahonoka mwanangĩko ũcio na marathimwo na “muoyo wa tene na tene.”—Mathayo 25:46.

Andũ angĩ milioni nyingĩ nĩ makaagĩa na mweke wa kũgĩa na muoyo wa tene na tene rĩrĩa makaariũkio.  Jesu nĩ aariũkanirie rĩrĩa aaceerire itũũra rĩa Naini. Mũrũ wa mũmwe wa mũtumia wa ndigwa nĩ aakuĩte, na Jesu ‘akĩigua tha’ akĩmũriũkia. (Luka 7:11-15) Mũtũmwo Paulo aandĩkire ũũ: “Ndĩ na kĩĩrĩgĩrĩro harĩ Ngai, . . . atĩ nĩ gũkaariũkio andũ arĩa athingu na arĩa matarĩ athingu.” Kĩĩrĩgĩrĩro kĩu kĩrũmu kĩonanagia wendo mũnene ũrĩa Ngai oonirie andũ.—Atũmwo 24:15.

Andũ aingĩ marĩ na kĩĩrĩgĩrĩro gĩa gũgaatũũra tene na tene. Bibilia yugaga ũũ: “Andũ arĩa athingu nĩ makaagaya thĩ, na magaatũũra thĩinĩ wayo tene na tene.” (Thaburi 37:29) Hĩndĩ ĩyo, nĩ magaakena mũno kuona ciugo ici mũtũmwo Paulo aandĩkire mĩaka ta 2,000 mĩthiru: “Atĩrĩrĩ wee gĩkuũ, ũhootani waku ũrĩ ha? Atĩrĩrĩ wee gĩkuũ, rũboora rwaku rũrĩ ha?” (1 Akorintho 15:55) Gĩkuũ, thũ ĩrĩa ĩtũmaga mũndũ etigĩre nĩ gĩgaakorũo gĩtooretio!