Ũtaaro wa Bibilia: “Mũtũũrĩre-inĩ wanyu-rĩ, tigagai kwenda mbeca, na mũiganagĩre na indo iria mũrĩ nacio.”—Ahibirania 13:5.

Thikũ ici thĩinĩ wa thĩ andũ matindĩkagĩrĩria arĩa angĩ kũgũra indo nyingĩ iria moigaga nĩ cia o mũhaka. No Bibilia yugaga atĩ no ‘tũiganĩre na indo iria tũrĩ nacio.’ Tũngĩka ũguo atĩa?

Wĩtheme “kwenda mbeca.” Andũ no meke ũndũ o wothe o na angĩkorũo nĩ ũgũthũkia ũgima wao wa mwĩrĩ, famĩlĩ, arata, mĩtugo, o na kana gĩtĩo kĩao no ũndũ wa “kwenda mbeca.” (1 Timotheo 6:10) Ũcio nĩ ũndũ mũũru mũno! Ningĩ, mũndũ wendete ũtonga “ndarĩ hĩndĩ akaigania.”—Kohelethu 5:10.

Andũ nĩ a bata gũkĩra indo. Ũrĩa kũrĩ nĩ atĩ, indo cia kĩĩmwĩrĩ nĩ irĩ ũguni wacio. No indo itingĩhota gũtuonia wendo kana ngatho, no andũ no mahote. Gũkorũo na “mũrata wa ma” no gũtũteithie kũiganĩra ũtũũro-inĩ.—Thimo 17:17.

Ũtaaro wa Bibilia: “Ngoro ĩrĩ na gĩkeno nĩ ndawa njega.”—Thimo 17:22.

O ta “ndawa njega,” gĩkeno no gĩtũteithie gũkirĩrĩria o na rĩrĩa tũrĩ arwaru. No tũngĩhota atĩa gũkorũo na gĩkeno rĩrĩa tũrĩ arwaru?

Onanagia ngatho. Tũngĩĩciragia o ũhoro wa mathĩna maitũ, tũrĩonaga “matukũ mothe” marĩ moru. (Thimo 15:15) Handũ ha ũguo, Bibilia ĩtwĩraga ũũ: “Muonanagie atĩ mũrĩ na ngatho.” (Akolosai 3:15) Wĩrute kuonanagia ngatho nginya nĩ ũndũ wa tũmaũndũ tũnini ũtũũro-inĩ. Ũthaka wa riũa rĩgĩthũa, karũhuho kahoreru, gũthekio nĩ mũndũ wendete, nĩ maũndũ mangĩtũma ũtũũro wagĩre.

Teithagia andũ arĩa angĩ. O na angĩkorũo ũgima witũ wa mwĩrĩ ti mwega, “kũheana nĩ kũrĩ gĩkeno kĩnene gũkĩra kwamũkĩra.” (Atũmwo 20:35) Rĩrĩa arĩa angĩ matũcokeria ngatho nĩ ũndũ wa maũndũ marĩa tũmekĩire, nĩ tũgĩaga na gĩkeno makĩria, na ũndũ ũcio ũgatũma twage gwĩciria mũno ũhoro wa mathĩna maitũ. Ũtũũro witũ no wagagĩre rĩrĩa twateithĩrĩria arĩa angĩ kwagagĩria ũtũũro wao.

Ũtaaro wa Bibilia: “Mũkũũranage maũndũ marĩa ma bata makĩria.”—Afilipi 1:10.

Mũthuri na mũtumia mangĩaga kũhũthĩra mahinda maingĩ hamwe, makoragwo makĩingĩria kĩhiko kĩao ũgwati-inĩ. Nĩ ũndũ ũcio mũthuri na mũtumia nĩ magĩrĩirũo kuona kĩhiko kĩao kĩrĩ ũndũ ũmwe wa maũndũ marĩa ma bata makĩria ũtũũro-inĩ wao.

Ĩkagai maũndũ mũrĩ hamwe. Handũ ha gwĩka maũndũ marĩa wendete ũrĩ wika, nĩ wega kũbanga gwĩka maũndũ mũrĩ hamwe. Bibilia yugaga: “Nĩ kaba andũ erĩ gũkĩra ũmwe.” (Kohelethu 4:9) No mũthiĩ thoko mũrĩ hamwe, mũceere handũ, mũnyuanĩre gacai mũhurũkĩte, kana mwĩke ũndũ ũngĩ mũrĩ hamwe.

Onia ũrĩa mũhikanĩtie nake atĩ nĩ ũmwendete. Bibilia ĩkagĩra ngoro mũthuri na mũtumia monanagie wendo na gĩtĩo. (Aefeso 5:28, 33) Kũmũthekia na njĩra ya wendo, kũmũhĩmbĩria, kana kũmũhe kĩheo o na kĩrĩ kĩnini, nĩ maũndũ mangĩkĩra kĩhiko hinya. Arĩa mahikanĩtie matiagĩrĩirũo kuuma nja ya kĩhiko kana gũkomania na andũ angĩ.—Ahibirania 13:4.