GĨCUNJĨ KĨA WĨRUTI GĨA 19
Tũngĩkĩra Wĩtĩkio Witũ Hinya Atĩa Harĩ Kĩĩranĩro kĩa Jehova gĩa Thĩ Njerũ?
“Rĩrĩa [Jehova] oiga ũndũ-rĩ, na githĩ to nginya awĩke?” —NDAR. 23:19.
RWĨMBO NA. 142 Kũrũmia Kĩĩrĩgĩrĩro Gitũ
GĨCUNJĨ-INĨ GĨKĨ a
1-2. Tũrabatara gwĩka atĩa o tũgĩetagĩrĩra thĩ njerũ?
NĨ TŨKENAGĨRA mũno kĩĩranĩro kĩa Jehova gĩa kweheria mũtabarĩre ũyũ wa maũndũ nĩguo arehe thĩ njerũ ĩrĩ na ũthingu. (2 Pet. 3:13) O na gũtuĩka tũtiũĩ rĩrĩa kĩĩranĩro gĩa thĩ njerũ gĩkaahinga, nĩ tuonaga ũira ũronania atĩ kĩrĩ hakuhĩ kũhinga.—Mat. 24:32-34, 36; Atũm. 1:7.
2 Kamũira hĩndĩ ĩyo ĩkinye, ithuothe nĩ tũrabatara gwĩkĩra hinya wĩtĩkio witũ harĩ kĩĩranĩro kĩu, gũtekũmakania tũkoretwo ũhoro-inĩ wa ma ihinda rĩigana atĩa. Nĩkĩ? Tondũ o na wĩtĩkio ũrĩ na hinya no ũthiĩ ũhwererekeire. Mũtũmwo Paulo aaugire atĩ kwaga wĩtĩkio nĩ “mehia marĩa matũrigicaga na njĩra hũthũ.” (Ahib. 12:1) Nĩguo wĩtĩkio witũ ndũkahwererekere, nĩ tũrabatara gũikara tũgĩthuthuragia maũndũ marĩa maronania atĩ thĩ njerũ ĩrĩ hakuhĩ.—Ahib. 11:1.
3. Tũkwarĩrĩria maũndũ marĩkũ gĩcunjĩ-inĩ gĩkĩ?
3 Gĩcunjĩ-inĩ gĩkĩ, tũkwarĩrĩria maũndũ matatũ mangĩtũteithia gwĩkĩra hinya wĩtĩkio witũ harĩ kĩĩranĩro kĩa Jehova gĩa thĩ njerũ: (1) na njĩra ya gwĩcũrania igũrũ rĩgiĩ ũkũũri, (2) na njĩra ya gwĩcũrania igũrũ rĩgiĩ hinya wa Jehova, na (3) na njĩra ya gwĩka maũndũ mangĩtũteithia gũkuhĩrĩria Jehova makĩria. Nĩ tũgũcoka twarĩrĩrie ũrĩa wĩtĩkio witũ ũngĩkĩrũo hinya nĩ ndũmĩrĩri ĩrĩa Jehova aaheire Habakuku. No rekei twambe twarĩrĩrie maũndũ mamwe tũngĩkorũo tũgĩcemania namo ũmũthĩ mangĩtũma tũbatare gwĩkĩra hinya wĩtĩkio witũ harĩ kĩĩranĩro gĩa thĩ njerũ.
MAŨNDŨ MABATARAGA WĨTĨKIO MŨRŨMU
4. Nĩ matua marĩkũ mabataraga tũkorũo na wĩtĩkio mũrũmu?
4 O mũthenya nĩ tũtuaga matua mabataraga tũkorũo na wĩtĩkio mũrũmu. Kwa ngerekano, nĩ tũtuaga matua megiĩ arata, maũndũ ma gwĩkenia, gĩthomo, kĩhiko, ciana, na wĩra. Nĩ wega kwĩyũria: ‘Hihi matua makwa nĩ monanagia atĩ ndĩ na ma mũtabarĩre ũyũ no wa ihinda inini na atĩ ica ikuhĩ Ngai nĩ ekũrehe thĩ njerũ? Kana hihi njĩkaga maũndũ ta marĩa mekagwo nĩ andũ arĩa metĩkĩtie atĩ gĩkuũ nĩkĩo mũico wa maũndũ mothe?’ (Mat. 6:19, 20; Luk. 12:16-21) No tũhote gũtua matua mega tũngĩkorũo na wĩtĩkio biũ atĩ thĩ njerũ ĩrĩ hakuhĩ.
5-6. Tũbataraga wĩtĩkio mũrũmu nĩkĩ rĩrĩa tũragerera moritũ? Heana ngerekano.
5 Ningĩ nĩ tũbataraga wĩtĩkio mũrũmu rĩrĩa tũracemania na magerio. Rĩngĩ no tũkorũo tũkĩnyarirũo, tũkĩhiũrania na mũrimũ mũũru, kana maũndũ mangĩ mangĩtũũraga ngoro. Kĩambĩrĩria-inĩ, no tũkorũo na hinya wa gũkirĩrĩria igerio ta rĩu. No igerio rĩngĩikara ihinda iraihu, o ta ũrĩa gũthiaga harĩ magerio maingĩ, no tũbatare wĩtĩkio mũrũmu nĩguo tũhote gũkirĩrĩria na gũthiĩ na mbere gũtungatĩra Jehova tũrĩ na gĩkeno.—Rom. 12:12; 1 Pet. 1:6, 7.
6 Rĩrĩa tũrahiũrania na igerio, no tuone ta gũtarĩ hĩndĩ Jehova akaarehe thĩ njerũ. Hihi ũguo nĩ kuuga atĩ tũtirĩ na wĩtĩkio mũrũmu? To mũhaka. Ta wĩcirie ngerekano ĩno. Riũa rĩngĩara ihinda iraihu, no tuone ta gũtarĩ hĩndĩ mbura ĩkoira. No mbura nĩ ĩcokaga ĩkoira. Ũndũ ũmwe na ũcio, rĩrĩa tũraigua tũkuĩte ngoro mũno, no tuone ta gũtarĩ hĩndĩ thĩ njerũ ĩgooka. No wĩtĩkio witũ ũngĩkorũo ũrĩ na hinya, nĩ tũmenyaga atĩ ciĩranĩro cia Ngai nĩ ikaahinga. (Thab. 94:3, 14, 15; Ahib. 6:17-19) Tũngĩkorũo na ũũma ũcio, no tũhote gũthiĩ na mbere kũiga ũthathaiya wa Jehova mbere ũtũũro-inĩ witũ.
7. Nĩ mwerekera ũrĩkũ twagĩrĩirũo gwĩthema?
7 Ningĩ nĩ tũbataraga wĩtĩkio mũrũmu nĩguo tũhote kũruta wĩra wa kũhunjia. Andũ aingĩ arĩa tũhunjagĩria mationaga ta ‘ũhoro mwega’ wĩgiĩ thĩ njerũ ya Ngai ĩrĩa ĩroka ta ũngĩkorũo ũrĩ wa ma. (Mat. 24:14; Ezek. 33:32) Tũtingĩenda mwerekera ũcio ũhutie meciria maitũ. Nĩguo twĩtheme ũndũ ũcio, no mũhaka tũthiĩ na mbere gwĩkĩra wĩtĩkio witũ hinya. Rekei twarĩrĩrie maũndũ matatũ mangĩtũteithia gwĩka ũguo.
WĨCŨRANAGIE IGŨRŨ RĨGIĨ ŨKŨŨRI
8-9. Gwĩcũrania igũrũ rĩgiĩ ũkũũri kũngĩkĩra wĩtĩkio witũ hinya atĩa?
8 Ũndũ ũmwe tũngĩka nĩguo twĩkĩre wĩtĩkio witũ hinya, nĩ gwĩcũranagia igũrũ rĩgiĩ ũkũũri. Ũkũũri nĩ ũtũheaga ũũma atĩ ciĩranĩro cia Ngai nĩ ikaahinga. Tũngĩĩcũrania na njĩra ndikĩru kĩrĩa gĩatũmire ũkũũri ũrutwo na maũndũ marĩa maabataranagia nĩguo ũrutwo, nĩ twĩkĩraga wĩtĩkio witũ hinya wa atĩ kĩĩranĩro kĩa Ngai kĩa muoyo wa tene na tene thĩinĩ wa thĩ njerũ, nĩ gĩkaahinga hatarĩ nganja. Nĩ kĩĩ kĩngĩtũma tuuge ũguo?
9 Nĩ maũndũ marĩkũ maabataranagia nĩguo ũkũũri ũrutwo? Jehova aatũmire Mũrũ wake wa irigithathi ũrĩa warĩ mũrata wake mũnene, kuuma kũrĩa igũrũ nĩguo aciarũo gũkũ thĩ arĩ mũndũ mũkinyanĩru. Jesu arĩ gũkũ thĩ nĩ aacemanirie na moritũ ma mĩthemba yothe. Agĩcoka akĩnyarirĩka na agĩkua gĩkuũ kĩa ruo. Hatarĩ nganja ũcio warĩ thogora mũnene Jehova aarĩhire. Ngai witũ ũrĩ wendo ndangĩetĩkĩririe Mũrũ wake anyamarĩke na akue nogetha tu tũkorũo na ũtũũro mwega ĩndĩ wa ihinda inini. (Joh. 3:16; 1 Pet. 1:18, 19) Tondũ Jehova aarĩhire thogora mũnene, nĩ agaatigĩrĩra atĩ nĩ twahota gũtũũra thĩinĩ wa thĩ njerũ tene na tene.
WĨCŨRANAGIE IGŨRŨ RĨGIĨ HINYA WA JEHOVA
10. Kũringana na Aefeso 3:20, nĩ atĩa Jehova angĩhota gwĩka?
10 Ũndũ wa kerĩ ũrĩa tũngĩka nĩguo twĩkĩre wĩtĩkio witũ hinya nĩ gwĩcũranagia igũrũ rĩgiĩ hinya wa Jehova. Jehova arĩ na hinya wa kũhingia kĩĩranĩro o gĩothe eranĩire. Ma nĩ atĩ, maitho-inĩ ma andũ aingĩ, kĩĩranĩro kĩa muoyo wa tene na tene thĩinĩ wa thĩ njerũ no kĩoneke ta gĩtangĩhinga. No nĩ maita maingĩ Jehova eranagĩra maũndũ andũ matangĩhota kũhingia. No eke ũguo tondũ nĩwe Ngai Mwene-Hinya-Wothe. (Ayub. 42:2; Mar. 10:27) Kwoguo tũtigegaga rĩrĩa eranĩra ũndũ ũngĩoneka ta ũtangĩhinga.—Thoma Aefeso 3:20
11. Heana ngerekano ya kĩĩranĩro kĩmwe kĩa Ngai kĩngĩoonekire ta gĩtangĩhinga. (Rora gathandũkũ “ Kũhinga gwa Ciĩranĩro Cingĩoonekire ta Itangĩhinga.”)
11 Ta wĩcirie ũhoro wa ciĩranĩro imwe Jehova eerĩire andũ ake mahinda-inĩ ma tene, iria cioonekaga ta itangĩhinga. Nĩ eerĩire Iburahimu na Sara atĩ nĩ mangĩagĩire mwana wa kahĩĩ mĩaka-inĩ yao ya ũkũrũ. (Kĩam. 17:15-17) Ningĩ nĩ eerire Iburahimu atĩ nĩ angĩkaahe njiarũa ciake bũrũri wa Kanaani. Ihinda-inĩ rĩa mĩaka mĩingĩ rĩrĩa Aisiraeli arĩa maarĩ njiarũa cia Iburahimu maarĩ Misiri marĩ ngombo, nĩ kũngĩonekire ta kĩĩranĩro kĩu gĩtarĩ hĩndĩ gĩkaahinga. No nĩ kĩahingire. Thutha-inĩ, Jehova nĩ eerĩire Elizabethi atĩ nĩ angĩagĩire mwana o na arĩ mũkũrũ. Ningĩ nĩ eerĩire Mariamu, mũirĩtu warĩ gathirange, atĩ nĩwe ũngĩaciarire Mũrũwe. Ũndũ ũcio nĩ ũngĩahingirie kĩĩranĩro kĩrĩa Jehova eeranĩire mĩaka ngiri nyingĩ mbere ĩyo mũgũnda-inĩ wa Edeni.—Kĩam. 3:15.
12. Maandĩko ma Joshua 23:14 na Isaia 55:10, 11 maratũhe ũũma ũrĩkũ wĩgiĩ hinya wa Jehova?
12 Gwĩcũrania ũhoro wĩgiĩ ciĩranĩro iria Jehova eeranĩire na ũrĩa aacihingirie no gũtũteithie gũkorũo na wĩtĩkio mũrũmu atĩ arĩ na hinya wa kũrehe thĩ njerũ. (Thoma Joshua 23:14; Isaia 55:10, 11.) Wĩtĩkio ũcio nĩ ũtũhotithagia gũikara twĩhaarĩirie gũteithia andũ arĩa angĩ o nao kũmenya atĩ kĩĩranĩro kĩa muoyo thĩinĩ wa thĩ njerũ nĩ gĩkaahinga. Jehova we mwene aaugire ũũ igũrũ rĩgiĩ kĩĩranĩro kĩu kĩa igũrũ rĩerũ na thĩ njerũ: “Ciugo icio nĩ cia kwĩhokeka na nĩ cia ma.”—Kũg. 21:1, 5.
ĨKAGA MAŨNDŨ MANGĨGŨTEITHIA GŨKUHĨRĨRIA JEHOVA MAKĨRIA
MĨCEMANIO YA KĨŨNGANO
Ũndũ ũyũ ũngĩgũteithia atĩa gwĩkĩra wĩtĩkio waku hinya? (Rora kĩbungo gĩa 13)
13. Mĩcemanio ya kĩũngano ĩngĩkĩra wĩtĩkio witũ hinya atĩa? Taarĩria.
13 Ũndũ wa gatatũ ũrĩa ũngĩtũteithia gwĩkĩra wĩtĩkio witũ hinya nĩ kũhũthagĩra mahinda gwĩka maũndũ mangĩtũteithia gũkuhĩrĩria Jehova makĩria. Kwa ngerekano, ta wĩcirie ũrĩa tũgunĩkaga nĩ mĩcemanio itũ ya kĩũngano. Anna, ũrĩa ũkoretwo ũtungata-inĩ ũtiganĩte wa mahinda mothe ihinda-inĩ rĩa mĩaka mĩingĩ aaugire ũũ: “Mĩcemanio nĩ ĩndeithĩtie gũthiĩ na mbere gwĩkĩra wĩtĩkio wakwa hinya. O na mwaria angĩkorũo atarĩ na ũhoti mũnene wa kũrutana kana akorũo ndararutana ũndũ mwerũ, hingo ciothe ndiagaga kũigua kaũndũ karandeithia gũtaũkĩrũo wega nĩ ma cia Bibilia na gagekĩra wĩtĩkio wakwa hinya.” b Hatarĩ nganja, o na ithuĩ wĩtĩkio witũ nĩ wĩkĩragwo hinya rĩrĩa twaigua macokio ma arĩa angĩ mĩcemanio-inĩ.—Rom. 1:11, 12; 10:17.
ŨTUNGATA
Ũndũ ũyũ ũngĩgũteithia atĩa gwĩkĩra wĩtĩkio waku hinya? (Rora kĩbungo gĩa 14)
14. Ũtungata wĩkagĩra wĩtĩkio witũ hinya atĩa?
14 Ningĩ nĩ twĩkagĩra wĩtĩkio witũ hinya rĩrĩa twanyitanĩra ũtungata-inĩ. (Ahib. 10:23) Barbara, ũrĩa ũkoretwo agĩtungatĩra Jehova kwa ihinda rĩa makĩria ma mĩaka 70, aaugire ũũ: “Hĩndĩ ciothe nĩ nyonaga atĩ wĩra wa kũhunjia nĩ wĩkĩraga hinya wĩtĩkio wakwa. O ũrĩa ndĩrera andũ arĩa angĩ ũhoro wĩgiĩ ciĩranĩro cia Jehova cia magegania, noguo wĩtĩkio wakwa ũgĩaga hinya makĩria.”
WĨRUTI WA MŨNDŨ KĨŨMBE
Ũndũ ũyũ ũngĩgũteithia atĩa gwĩkĩra wĩtĩkio waku hinya? (Rora kĩbungo gĩa 15)
15. Wĩruti wa mũndũ kĩũmbe wĩkagĩra wĩtĩkio witũ hinya atĩa? (Ningĩ rora mbica.)
15 Ũndũ ũngĩ wĩkĩraga wĩtĩkio witũ hinya nĩ wĩruti wa mũndũ kĩũmbe. Mwarĩ wa Ithe witũ ũmwe wĩtagwo Susan aaugire atĩ gũkorũo na mũtaratara mwega wa kwĩruta nĩ kũmũteithĩtie. Aaugire ũũ: “Mũthenya wa Kiumia, haaragĩria Wĩruti wa Mũrangĩri wa kiumia kĩrĩa kĩrũmĩrĩire. Naguo mũthenya wa Njumatatũ na Njumaine, ngahaarĩria mũcemanio wa gatagatĩ-inĩ ga kiumia. Nacio thikũ icio ingĩ, igakorũo irĩ cia wĩruti wakwa kĩũmbe.” Tondũ Susan nĩ arũmagĩrĩra biũ mũtaratara wake wa kwĩruta, wĩtĩkio wake nĩ ũthiaga na mbere gũkũra. Nake Irene, ũrĩa ũtungatĩte mĩaka mĩingĩ wabici-inĩ nene ya Aira a Jehova, nĩ onete atĩ kwĩruta morathi ma Bibilia nĩ gwĩkĩraga wĩtĩkio wake hinya. Aaugire ũũ: “Nĩ ngegagio kuona ũrĩa morathi ma Jehova mahingaga nginya tũmaũndũ-inĩ tũrĩa tũnini.” c
“HATARĨ NGANJA NĨ GĨKAAHINGA”
16. Nĩkĩ kĩngĩtũma tuuge atĩ ciugo iria Jehova eerire Habakuku nĩ itũhutagia ũmũthĩ? (Ahibirania 10:36, 37)
16 Ndungata imwe cia Jehova nĩ cietereire mũthia wa mũtabarĩre ũyũ wa maũndũ kwa ihinda iraihu. Tũrĩ andũ no tuone ta ciĩranĩro cia Ngai cikarire mũno igĩkaahinga. Jehova nĩ amenyaga atĩ ndungata ciake nĩ ciguaga ũguo, na nĩkĩo eerire mũnabii Habakuku ũũ: “Kĩoneki kĩu nĩ kĩa ihinda rĩrĩa rĩtuĩtwo, na nĩ kĩrahiũha kĩerekeire mũthia wakĩo, na gĩtigaatuĩka kĩa maheeni. O na kĩngĩikara, ikara ũkĩĩrĩgĩrĩire! Tondũ hatarĩ nganja nĩ gĩkaahinga. Gĩtigaacererũo!” (Hab. 2:3) Hihi ciugo icio ciarĩ cia gũteithia o Habakuku wiki? Kana o na ithuĩ no itũteithie ũmũthĩ? Mũtũmwo Paulo agĩtongorio nĩ roho nĩ oonanirie atĩ ciugo icio nĩ irahutia nginya Akristiano, arĩa merĩgagĩrĩra thĩ njerũ. (Thoma Ahibirania 10:36, 37.) Kwoguo, no tũkorũo na ma atĩ o na kĩĩranĩro kĩa Jehova gĩa gũtũhonokia kĩngĩoneka ta gĩikarĩte gĩgĩkaahinga, “hatarĩ nganja nĩ gĩkaahinga. Gĩtigaacererũo!”
17. Mwarĩ wa Ithe witũ ũmwe aahũthĩrire atĩa ũtaaro ũrĩa Jehova aaheire Habakuku?
17 Athathaiya aingĩ a Jehova nĩ marũmĩrĩire ũtaaro wa ‘gũikara merĩgĩrĩire’ kũhinga gwa ciĩranĩro ciake. Amwe ao mekĩte ũguo kwa ihinda rĩa mĩaka mĩingĩ. Kwa ngerekano, mwarĩ wa Ithe witũ Louise aambĩrĩirie gũtungatĩra Jehova mwaka wa 1939. Aaugire ũũ: “Hĩndĩ ĩyo, ndeciragia atĩ Hari–Magedoni ĩngĩokire itarĩkĩtie cukuru ya sekondarĩ. No ũguo tiguo gwathiire. Ihinda-inĩ rĩa mĩaka ĩyo, nĩ ngʼunĩkĩte nĩ gũthoma ngʼano iria njĩtaga ‘ngʼano cia gweterera’ iria iheanĩtwo Bibilia-inĩ cia andũ ta Nuhu, Iburahimu, Jusufu, na andũ angĩ arĩa maabatarire gweterera ihinda iraihu nĩguo Jehova amahingĩrie ciĩranĩro iria aamerĩire. Gwĩtĩkia hingo ciothe atĩ ciĩranĩro icio nĩ ikaahinga, nĩ kũndeithĩtie na gũgateithia andũ angĩ gũkorũo na ma atĩ thĩ njerũ ĩrĩ hakuhĩ.” Andũ angĩ aingĩ arĩa matungatĩire Jehova kwa ihinda iraihu nĩ metĩkanagia na ciugo icio.
18. Kwĩrorera ũũmbi kũngĩkĩra wĩtĩkio witũ hinya atĩa atĩ thĩ njerũ nĩ ĩgooka?
18 Ma nĩ atĩ, thĩ njerũ ndĩrĩ ĩroka. No ta wĩcirie ũhoro wĩgiĩ indo iria irĩ kuo ta njata, mĩtĩ, nyamũ, na andũ. Gũtirĩ mũndũ ũngĩkĩrĩra nganja auge atĩ indo icio ciothe itirĩ kuo, o na gũtuĩka kũrĩ hĩndĩ itaarĩ kuo. Irĩ kuo tondũ Jehova nĩ aaciũmbire. (Kĩam. 1:1, 26, 27) Ngai witũ ningĩ nĩ eranĩire atĩ nĩ akaarehe thĩ njerũ. Nĩ akaahingia kĩĩranĩro kĩu. Thĩinĩ wa thĩ njerũ, andũ magaatũũra tene na tene marĩ na ũgima mũkinyanĩru wa mwĩrĩ. No tũkorũo na ma biũ atĩ thĩ njerũ nĩ ĩgooka ihinda rĩrĩa Ngai atuĩte.—Isa. 65:17; Kũg. 21:3, 4.
19. Ũngĩkĩra wĩtĩkio waku hinya atĩa?
19 Kamũira hĩndĩ ĩyo ĩkinye, hũthagĩra mweke o wothe ũrĩ naguo gwĩkĩra wĩtĩkio waku hinya. Cokagia ngatho nĩ ũndũ wa ũkũũri. Wĩcũranagie igũrũ rĩgiĩ hinya wa Jehova. Ĩkaga maũndũ mangĩgũteithia gũkuhĩrĩria Jehova. Ũngĩka ũguo, no ũkorũo gatagatĩ-inĩ ka “arĩa kũgerera wĩtĩkio na wetereri magayaga ciĩranĩro.”—Ahib. 6:11, 12; Rom. 5:5.
RWĨMBO NA. 139 Hũũra Mbica Ũrĩ Thĩ Njerũ
a Andũ aingĩ ũmũthĩ matiĩtĩkĩtie kĩĩranĩro kĩa Bibilia gĩa thĩ njerũ. Meciragia atĩ no kĩroto, na ti ũndũ ũngĩhoteka. O na kũrĩ ũguo, tũrĩ na ma atĩ ciĩranĩro ciothe cia Jehova nĩ ikaahinga. No nĩguo tũtũũrie wĩtĩkio witũ, nĩ twagĩrĩirũo gũthiĩ na mbere kũwĩkĩra hinya. Tũngĩka ũguo atĩa? Gĩcunjĩ gĩkĩ nĩ gĩgũtaarĩria.
b Marĩĩtwa mamwe nĩ macenjetio.
c No wone icunjĩ nyingĩ irarĩrĩria ũrathi wa Bibilia rungu rwa kĩongo “Ũrathi” thĩinĩ wa Ũteithio wa Ũthuthuria Harĩ Aira a Jehova. Kwa ngerekano, rora gĩcunjĩ kĩrĩ na kĩongo “Wĩhoke Jehova Ngai Mwene ‘Mahinda O na Imera’” thĩinĩ wa ngathĩti ya Mũrangĩri ya Mĩĩ 1, 2012.
