Ndaciarirũo mwaka-inĩ wa 1955, famĩlĩ-inĩ ya anake atatũ na nĩ niĩ ndaarĩ mũnini. Ndarereirũo hakuhĩ na gĩcũa kĩa mwena wa mũhuro gĩa Finland, kũrĩa rĩu gũkoragwo gwĩ taũni ya Vantaa.

Mami aabatithirio agĩtuĩka Mũira wa Jehova mĩaka mĩnini itanaciarũo. O na kũrĩ ũguo, baba nĩ aareganaga na ũhoro wa ma na ndeetĩkagĩria mami gũtũruta kana gũtũtwara mĩcemanio-inĩ ya kĩũngano. Kwoguo mami aatũrutaga ma cia mũthingi rĩrĩa baba atarĩ hakuhĩ.

Kuuma ndĩ o mũnini nĩ ndendaga gwathĩkĩra Jehova. Kwa ngerekano, hĩndĩ ĩmwe ndĩ na mĩaka mũgwanja, mwarimũ witũ nĩ aarakarire mũno tondũ nĩ ndaregire kũrĩa verilättyjä (mĩkorogo ya Finland ĩkĩragwo thakame). Aahihinyire makai nĩguo njathamie kanua, na akĩgeria gũtindĩkĩrĩria hũma yarĩ na kĩenyũ kĩa mũkorogo ũcio kanua-inĩ gakwa. Ndaringire hũma ĩyo ĩkĩgwa.

Ndĩ na mĩaka 12, baba nĩ aakuire. Thutha ũcio nĩ ingĩahotire gũthiĩ mĩcemanio ya kĩũngano. Ariũ a Ithe witũ thĩinĩ wa kĩũngano nĩ maanyonirie wendo, na ũndũ ũcio ũkĩndeithia gũkũra kĩĩroho. Ngĩambĩrĩria gũthomaga Bibilia o mũthenya na kwĩruta mabuku maitũ na kĩyo. Maũndũ macio nĩ maandeithirie nginya ngĩkinyĩrĩra kũbatithio ndĩ na mĩaka 14, mweri-inĩ wa Agosti 8, 1969.

 Ndarĩkia cukuru, nĩ ndatuĩkire painia wa hĩndĩ ciothe. Thutha wa ciumia cigana ũna, nĩ ndathamĩire kũndũ kwarĩ na bata mũnene wa ahunjia, taũni-inĩ ya Pielavesi, ĩrĩa ĩrĩ hakuhĩ na gĩcigo gĩa gatagatĩ kĩa Finland.

Kũu Pielavesi nĩkuo twacemanirie na Sirkka, ũrĩa wacokire gũtuĩka mũtumia wakwa. Ndagucĩrĩirio nĩwe tondũ aarĩ mwĩnyihia na nĩ eendete Jehova mũno. Ndeecaragĩria igweta kana gũthingata indo cia kĩĩmwĩrĩ. Ithuerĩ nĩ tweriragĩria gũtungatĩra Jehova ũrĩa wothe tũngĩahotire, gũtekũmakania mĩeke ya ũtungata ĩrĩa tũheetwo. Twahikanirie mweri-inĩ wa Machi 23, 1974. Handũ ha gũthiĩ honeymoon, nĩ gũthama twathamĩire Karttula, kũrĩa kwarĩ na bata mũnene makĩria wa ahunjia a Ũthamaki.

Kuuma rĩrĩa twahikanirie, Jehova nĩ atuonetie atĩ nĩ arĩtũhingagĩria mabataro maitũ twathiĩ na mbere kũiga Ũthamaki wake mbere. (Mat. 6:33) Kwa ngerekano tũrĩ Karttula, tũtiarĩ na ngaari no twahũthagĩra mũithikiri. Mahinda-inĩ ma heho nĩ kwahehaga mũno, na kwoguo nĩguo tũhote kũhunjia icigo cia kũraihu, nĩ twabataraga ngaari. No tũtiarĩ na mbeca cia kũgũra ngaari.

Hĩndĩ ĩmwe mũrũ wa maitũ ũrĩa nyumĩte thutha nĩ ookire gũtũceerera tũtamwĩrĩgĩrĩire. Nĩ aatũheire ngaari yake, na yarĩ ndĩhĩre insurance. Ũndũ ũrĩa twabataraga gwĩka no kũmĩgũrĩra maguta. Rĩu twarĩ na ngaari ĩrĩa twabataraga.

Jehova nĩ aatuonirie atĩ nĩ eehaarĩirie gũtũhingĩria mabataro maitũ. Wĩra witũ warĩ o kũiga Ũthamaki wake mbere.

Tũrĩ Cukuru ya Ũtungata wa Ũpainia mwaka-inĩ wa 1978, mũrutani witũ ũmwe wĩtagwo Raimo Kuokkanen, a nĩ aatwĩkĩrire ngoro tũiyũrie fomu ya gũthiĩ Cukuru ya Gileadi. Kwoguo tũkĩambĩrĩria kwĩruta Gĩthũngũ nĩguo tũhote kwagĩrĩra gũthiĩ cukuru ĩyo. O na tũtaiyũrĩtie fomu ĩyo, nĩ twetirũo tũthiĩ tũgatungate wabici-inĩ ya rũhonge ya Finland, mwaka-inĩ wa 1980. Hĩndĩ ĩyo, arĩa maatungataga Betheli matingĩaiyũririe fomu ya gũthiĩ Gileadi. No tondũ twendaga gũtungata kũrĩa Jehova arona kwagĩrĩire no ti kũrĩa ithuĩ tũrona kwagĩrĩire, tũgĩtĩkĩra gũthiĩ  Betheli. O na kũrĩ ũguo, no twathiire na mbere kwĩruta Gĩthũngũ nĩguo tũngĩkagĩa na mweke wa kũiyũria fomu ya gũthiĩ Gileadi, tũgaakorũo twĩhaarĩirie.

Thutha wa mĩaka ĩigana ũna, Kĩama Kĩrĩa Gĩtongoragia nĩ gĩetĩkĩririe arĩa matungataga Betheli kũiyũria fomu ya gũthiĩ Gileadi. O rĩo tũkĩiyũria fomu ĩyo, no ti tondũ tũtiakenagĩra gũtungata Betheli, ĩndĩ twendaga kwĩheana makĩria nĩguo tũtungate kũrĩa kũrĩ na bata mũnene wa ahunjia, angĩkorũo nĩ tũngĩagĩrĩire. Nĩ twetirũo Gileadi, kĩrathi kĩa 79 na tũkĩrĩkia kũrĩ mweri wa Septemba, mwaka wa 1985. Twatũmirũo Colombia tũgatungate kuo.

Tũrĩ Colombia, twambire kũheo wĩra wa gũtungata wabici-inĩ ya rũhonge. Nĩ nderutanagĩria mũno wĩra-inĩ wakwa, no thutha wa mwaka ũmwe, nĩ ndonire atĩ nĩ twabataraga kũgarũrĩra ũtungata witũ. Hĩndĩ ĩyo norĩo tu ndanoria tũheo wĩra ũngĩ. Thutha-inĩ nĩ twaheirũo wĩra wa kũhunjia tũrĩ amishonarĩ taũni-inĩ ya Neiva, gĩcigo-inĩ kĩa Huila.

Ndũũrĩte ngeneire wĩra wa kũhunjia. Rĩrĩa ndarĩ Finland ndĩ painia itanahikania, mahinda mamwe ndahunjagia kuuma kĩroko tene nginya hwaĩ-inĩ biũ. Na twahikania na Sirkka, kaingĩ twahunjagia mũthenya mũgima. Tũkĩhunjia icigo-inĩ cia kũraihu, rĩmwe nĩ twararaga ngaari-inĩ. Ũndũ ũcio nĩ watũteithagia kũnyihia thabarĩ, na kwoguo tũkahota kwambĩrĩria kũhunjia tene mũthenya ũyũ ũngĩ.

Tũrĩ amishonarĩ, nĩ twakenagĩra wĩra wa kũhunjia ta ũrĩa twakenagĩra tene. Kĩũngano gitũ nĩ gĩakũrire, na aarĩ na ariũ a Ithe witũ a Colombia nĩ maatuonagia wendo na gĩtĩo, na nĩ maakenagĩra gũkorũo hamwe na ithuĩ.

Hakuhĩ na Neiva kũrĩa twatungataga, nĩ kwarĩ na matũũra mangĩ gũtaarĩ na Aira a Jehova. Nĩ ndeeciragia mũno ũrĩa ũhoro mwega ũngĩkinya matũũra-inĩ macio. No mũndũ ũtarĩ wa kũu angĩathiire kuo, angĩarĩ ũgwati-inĩ tondũ wa ikundi cia aregani iria ciarũaga. Kwoguo nĩ ndahoyaga Jehova hagĩe na mũndũ wa kuuma matũũra macio ũgũtuĩka Mũira wa Jehova. Na tondũ ndeciragia atĩ mũndũ ta ũcio no akorirũo agĩikara Neiva nĩguo erute ũhoro wa ma, nĩ ndahoyaga atĩ mũndũ ũcio aabatithio, akũre kĩĩroho na acoke kwao mũciĩ, nĩguo akahunjie kuo. No Jehova aarĩ na mũbango mwega makĩria ma ũrĩa ndeciragia.

Thutha wa ihinda inini nĩ ndaambĩrĩirie kwĩruta Bibilia na mwanake ũmwe wetagwo Fernando González. Aaikaraga Algeciras, itũũra rĩmwe rĩa matũũra marĩa gũtaarĩ na Aira a Jehova. Fernando ookaga rũgendo rwa kilomita 50 nĩguo akinye Neiva kũrĩa aarutaga wĩra. Nĩ aahaaragĩria wega wĩruti wa Bibilia, na o rĩo akĩambĩrĩria gũthiaga mĩcemanio yothe ya kĩũngano. Kuuma o kiumia kĩa mbere ambĩrĩria kwĩruta, nĩ aacokanagĩrĩria andũ itũũra-inĩ rĩa kwao, na akamaruta maũndũ marĩa erutĩte wĩruti-inĩ wake wa Bibilia.

Thutha wa kwĩruta ihinda-inĩ rĩa mĩeri ĩtandatũ, Fernando nĩ aabatithirio mweri-inĩ wa Janũarĩ 1990. Thutha ũcio nĩ aatuĩkire painia wa hĩndĩ ciothe. Rĩu tondũ nĩ kwarĩ na Mũira wa Jehova taũni-inĩ ĩyo ya Algeciras, wabici ya rũhonge  nĩ ĩngĩahotire gũtũma mapainia a mwanya taũni-inĩ ĩyo. Kũrĩ mweri wa Februarĩ 1992, nĩ kwambĩrĩirio kĩũngano taũni-inĩ ĩyo.

Hihi Fernando aahunjagia o taũni-inĩ ya kwao? Aca. Thutha wa kũhikania, nĩ maathamĩire taũni ĩngĩ ĩtaarĩ na Aira a Jehova ya San Vicente del Caguán, na magĩteithĩrĩria kwambĩrĩria kĩũngano kuo. Mwaka-inĩ wa 2002, Fernando nĩ aamũrirũo agĩtuĩka mũrori wa mũthiũrũrũko, na marĩ na mũtumia wake Olga, no marathiĩ na mbere na wĩra ũcio.

Ũndũ ũcio ndeyoneire nĩ wandutire bata wa kũgweta ũndũ ĩmwe kwa ĩmwe rĩrĩa tũrahoya igũrũ rĩgiĩ ũtungata witũ wa gĩtheokrasi. Jehova nĩ ekaga ũndũ ũrĩa tũtangĩhota gwĩka. Ũrĩa kũrĩ nĩ atĩ wĩra ũyũ wa magetha nĩ wake, no ti witũ.—Mat. 9:38.

Mwaka-inĩ wa 1990 nĩ ndatuĩkire mũrori ũrĩa ũgendaga. Mũthiũrũrũko witũ wa mbere warĩ taũni-ini nene ya Bogotá. Nĩ twaiguire twamaka mũno twaheo wĩra ũcio. Tũrĩ na mũtumia wakwa tũrĩ o andũ a kawainda matarĩ na iheo cia mwanya, na tũtiamenyerete gũikara taũni-inĩ nene ĩrĩ na andũ aingĩ. O na kũrĩ ũguo, Jehova nĩ aahingirie kĩĩranĩro gĩkĩ gĩake kĩrĩ thĩinĩ wa Afilipi 2:13: “Ngai, nĩ ũndũ wa ũrĩa onaga arĩ wega, nĩwe ũmwĩkagĩra hinya, akamũhe wendi o na ũhoti wa gwĩka maũndũ.”

Thutha-inĩ nĩ twaheirũo mũthiũrũrũko ũngĩ, ũrĩa warĩ taũni-inĩ ya Medellín, ĩrĩa ngũgwetete kĩambĩrĩria-inĩ. Andũ a kũu nĩ maamenyerete mũno kuona wĩki-naĩ ũũ atĩ gũtirĩ ũndũ wamamakagia. Kwa ngerekano, hĩndĩ ĩmwe tũkĩĩruta Bibilia na mũndũ, harĩ andũ maambĩrĩirie kũrathũkanĩria mĩcinga nja ya nyũmba ĩyo twarĩ. Ndaarĩ hakuhĩ gũkoma thĩ, no mũrutwo wa Bibilia aathiire o na mbere gũthoma kĩbungo atekũmaka. Arĩkia gũthoma nĩ eehoire oime nja. Thutha wa kahinda kanini, aacokire na twana twĩrĩ na akĩnjĩra ũũ ahooreire: “Nyuma kũgĩĩra twana tũtũ twakwa.”

Nĩ kũrĩ mahinda mangĩ twanakorũo ũgwati-inĩ. Hĩndĩ ĩmwe tũkĩhunjia nyũmba kwa nyũmba, mũtumia wakwa nĩ ookire harĩ niĩ atengʼerete, amakĩte mũno. Aanjĩrire atĩ harĩ mũndũ ũkwendaga kũmũratha. Ũndũ ũcio nĩ wahahũrire. No thutha-inĩ, nĩ twamenyire atĩ mũndũ ũcio ndeendaga kũratha Sirkka no eendaga kũratha mũndũ wahĩtũkagĩra hakuhĩ nake.

Thutha wa ihinda, nĩ twamenyerire wĩki-naĩ ũrĩa warĩ kũu. Nĩ twekĩragwo ngoro nĩ ũkirĩrĩria wa aarĩ na ariũ a Ithe witũ a kũu, arĩa maacemanagia na maũndũ ta macio na mangĩ moru makĩria. Twatuire atĩ tondũ Jehova nĩ aamateithagia, o na ithuĩ nĩ arĩtũteithagia. Hĩndĩ ciothe nĩ twarũmagĩrĩra ũtaaro wa athuri a kĩũngano a kũu, tũkoya makinya ma kwĩmenyerera, na tũgatigĩra Jehova maũndũ macio mangĩ.

Mahinda mamwe maũndũ matiakoragwo marĩ moru ta ũrĩa tweciragia. Kwa ngerekano, hĩndĩ ĩmwe ndĩ nyũmba kwa mũndũ ndahunjagĩria, ndaiguire ta harĩ atumia erĩ maranegenanĩria hau nja. O na gũtuĩka ndiendaga kuona ngucanio ĩyo, mwene nyũmba nĩ aandindĩkĩrĩirie thiĩ hau nja baranda-inĩ. Rĩrĩa ndaathiire, ndakorire  ti atumia erĩ maanegenanagia, no nĩ tũnyoni twĩrĩ twa kasuku twacokagĩra ũrĩa andũ a mũciĩ ũcio ũngĩ maaugaga.

Mwaka-inĩ wa 1997, nĩ ndamũrirũo ngĩtuĩka mũrutani wa Cukuru ya Kũmenyeria Maũndũ ma Ũtungata. b Nĩ ndakenagĩra cukuru cia gĩtheokrasi, no ndieciragia atĩ nĩ ingĩagĩire na mweke wa gũkorũo ngĩrutana cukuru-inĩ ta icio.

Thutha-inĩ, nĩ ndatungatire ndĩ mũrori wa ngʼongo. Rĩrĩa mũbango ũcio wathirire, ndacokereire wĩra wa gũceerera ciũngano. Kwoguo kwa ihinda rĩa makĩria ma mĩaka 30, nĩ ngeneire gũtungata ndĩ mũrutani na mũrori ũrĩa ũgendaga. Maũndũ macio nĩ mandeheire irathimo nyingĩ no gũtiagĩte moritũ. Reke ndaarĩrie makĩria.

Ngoragwo ndĩ mũndũ wĩ na ũmĩrĩru mũno. Ngumo ĩyo nĩ ĩndeithĩtie kũhota kũhiũrania na moritũ maingĩ. O na kũrĩ ũguo, kũrĩ mahinda ndanakĩria njano ngĩgeria kũrũnga maũndũ ciũngano-inĩ. O na rĩmwe ndanahũthĩra gĩthũri ngĩra andũ amwe marũmbũyanagie na arĩa angĩ na njĩra ya wendo na ũigananĩru. Ũndũ wa kĩeha nĩ atĩ, mahinda-inĩ macio nĩrĩo o na niĩ ndaagaga kuonania ngumo icio.—Rom. 7:​21-23.

Mahĩtia makwa nĩ matũmĩte rĩmwe njigue nguĩte ngoro mũno. (Rom. 7:24) Kũrĩ hĩndĩ ndeerire Jehova mahoya-inĩ atĩ nĩ kaba ndige wĩra wa ũmishonarĩ na njoke Finland. Hwaĩ-inĩ ũcio nĩ ndaathiire mũcemanio wa kĩũngano, na maũndũ marĩa twathomire nĩ maatũmire ngorũo na ma atĩ nĩ ndaagĩrĩirũo gũthiĩ na mbere na ũtungata wakwa na thiĩ na mbere kũrutĩra wĩra mawathe makwa ma kwaga gũkinyanĩra. Nginyagia ũmũthĩ ũyũ, nĩ hutagio mũno kuona ũrĩa Jehova aacokirie mahoya macio makwa. Ningĩ nĩ njokagia ngatho mũno nĩ kuona ũrĩa andeithĩtie gũtooria mawathe makwa.

Tũrĩ na Sirkka nĩ tũcokagĩria Jehova ngatho mũno nĩ ũndũ wa gũtũhe mweke wa kũhũthĩra ũtũũro witũ ũtungata-inĩ wa mahinda mothe. Ningĩ nĩ ngenaga mũno nĩ gũkorũo Jehova nĩ aheete mũtumia ũnyendete na mwĩhokeku, ũrĩa ngeneire gũkorũo hamwe nake kwa ihinda rĩa mĩaka mĩingĩ.

Ica ikuhĩ nĩ ngũkinyia mĩaka 70 na ndige wĩra wa gũtungata ndĩ mũrutani wa cukuru cia gĩtheokrasi na mũrori ũrĩa ũgendaga. O na kũrĩ ũguo, ũndũ ũcio ndũranjĩkĩra kĩeha tondũ nĩ njĩtĩkĩtie biũ atĩ ũndũ ũrĩa ũtĩithagia Jehova nĩ rĩrĩa twamũtungatĩra tũrĩ na wĩnyihia na twamũgooca kuuma ngoro tũrĩ na wendo na ngatho nyingĩ. (Mik. 6:8; Mar. 12:​32-34) Tũtirabatara gũkorũo ũtungata-inĩ wa mwanya nĩguo tũtĩithie Jehova.

Ndecũrania mawĩra marĩa ndanaruta ũtungata-inĩ wa Jehova, nĩ nyonaga atĩ ndiaheirũo mawĩra macio tondũ ndarĩ wa bata kũrĩ arĩa angĩ kana atĩ tondũ ndarĩ na ũhoti wa mwanya. Ngũrani na ũguo, Jehova aheete mawĩra macio nĩ ũndũ wa ũtugi wake mũnene. Tondũ aanjĩhokeire mĩeke ĩyo ndĩ o na mawathe makwa ma kwaga gũkinyanĩra, ndĩ na ma atĩ hotete kũhingia mawĩra macio nĩ ũndũ wa ũteithio wake. Na njĩra ĩyo, mawathe makwa nĩ matũmĩte hinya wa Ngai wĩyonanie.—2 Kor. 12:9.