Hihi Ũrĩ Wamenya?
Nĩ kĩĩ gĩatũmĩte Mũthamaki Daudi akorũo na andũ mataarĩ Aisiraeli mbũtũ-inĩ yake?
MBŨTŨ ya Daudi nĩ yarĩ na arũme mataarĩ Aisiraeli ta, Zeleki Mũamoni, Uria Mũhiti, na Ithima Mũmoabi. a (1 Maũ. 11:39, 41, 46) Ningĩ mbũtũ ĩyo nĩ yarĩ na “Akerethi . . . Apelethi, na Agiiti.” (2 Sam. 15:18) Akerethi na Apelethi meerĩkanaga atĩ nĩ meetainwo na Afilisti. (Ezek. 25:16) Nao Agiiti maarĩ a itũũra rĩa Afilisti rĩa Gathu.—Josh. 13:2, 3; 1 Sam. 6:17, 18.
Nĩ kĩĩ gĩatũmire Daudi etĩkĩrie andũ mataarĩ Aisiraeli mbũtũ-inĩ yake? Aarĩ na ma atĩ nĩ maarĩ ehokeku harĩ we, na makĩria harĩ Jehova. Kwa ngerekano, The New Interpreter’s Dictionary of the Bible yugaga ũũ ũhoro-inĩ wĩgiĩ Akerethi na Apelethi: “Maaikarire marĩ ehokeku harĩ Daudi ihinda-inĩ rĩrĩa rĩarĩ iritũ mũno rĩa wathani wake.” Meekire ũguo atĩa? Rĩrĩa “arũme othe a Isiraeli” maatigire kũrũmĩrĩra Daudi makĩrũmĩrĩra “mũndũ wa thogothogo wetagwo Sheba,” Akerethi na Apelethi maaikarire mwena wa Daudi na makĩmũteithia kũniina ũregani ũcio Sheba aambĩrĩirie. (2 Sam. 20:1, 2, 7) Hĩndĩ ĩngĩ narĩo, Adonija mũrũ wa Daudi nĩ aageririe kwĩyoera ũthamaki. No Akerethi na Apelethi nĩ moonanirie wĩhokeku harĩ Daudi na makĩmũteithia gũtua Suleimani Mũthamaki, o we ũrĩa wathuurĩtwo nĩ Jehova acoke ithenya-inĩ rĩa Daudi.—1 Ath. 1:24-27, 38, 39.
Mũndũ ũngĩ ũtaarĩ Mũisiraeli ũrĩa watũũrire arĩ mwĩhokeku harĩ Daudi nĩ Itai Mũgiiti. Itai na arũme ake 600 nĩ maateithirie Mũthamaki Daudi rĩrĩa mũrũwe Abisalomu aageragia kũgucĩrĩria ngoro cia andũ a Isiraeli, nĩguo matige kũrũmĩrĩra mũthamaki. Daudi eerire Itai atĩ tondũ we ndaarĩ Mũisiraeli, ndaabataraga gũthiĩ kũmũrũĩrĩra. No Itai aamũcokeirie ũũ: “O ta ũrĩa Jehova atũũraga muoyo na o ta ũrĩa mwathi wakwa mũthamaki atũũraga muoyo, harĩa hothe mwathi wakwa mũthamaki egũkorũo arĩ, kana nĩ gũkua kana nĩ gũtũũra muoyo, hau nĩho ndungata yaku ĩrĩkoragwo ĩrĩ!”—2 Sam. 15:6, 18-21.
Itai aarĩ mwĩhokeku harĩ Mũthamaki Daudi, mũitĩrĩrie maguta wa Jehova
O na gũtuĩka Akerethi, Apelethi, na Agiiti maarĩ andũ a kũngĩ, nĩ mooĩ atĩ Jehova nĩwe Ngai ũrĩa wa ma na atĩ Daudi aarĩ mũitĩrĩrie maguta wa Jehova. No mũhaka akorũo Daudi nĩ aakenaga mũno nĩ ũndũ wa gũkorũo na arũme ta acio, arĩa maarĩ ehokeku harĩ we!
a Watho wa Ngai ũrĩa ũrĩ thĩinĩ wa Gũcokerithia Maathani 23:3-6 nĩ wagirĩtie Aamoni na Amoabi kũingĩra kĩũngano-inĩ kĩa Isiraeli. Kuonekaga ta watho ũcio woonanagia atĩ matingĩatuĩkire a rũrĩrĩ rũu biũ, no ndwamagirĩtie kũingĩrana na andũ a Ngai kana gũikarania nao. Rora Insight on the Scriptures, Mbuku ya 1, kar. 95.
