Gĩcunjĩ-inĩ kĩu, nĩ twerutire atĩ nĩ harĩ ũndũ ũmwe ũhutagia andũ othe o hamwe na araika, na nĩguo gũtherio kwa rĩĩtwa itũũgĩru rĩa Jehova. Ũndũ ũmwe ũhutanĩtie na gũtherio kwa rĩĩtwa rĩa Jehova nĩ kana njĩra yake ya gwathana nĩyo njega makĩria. Wĩkindĩru wa andũ harĩ Ngai nĩ ũndũ ũngĩ ũhutanĩtie na gũtherio kwa rĩĩtwa rĩa Jehova.

Nĩ kĩĩ kĩratũma tũtĩtĩrithie atĩ ũndũ ũrĩa mũnene nĩ rĩĩtwa rĩa Jehova na gũtherio kwa rĩĩtwa rĩu? Reke twarĩrĩrie itũmi ithatũ.

Wa mbere, Shaitani nĩ ookĩrĩire rĩĩtwa rĩa Jehova, kana ngumo ciake, mũgũnda-inĩ wa Edeni. Kĩũria kĩrĩa Shaitani ooririe Hawa na njĩra ya wara kĩeendaga kuonania atĩ Jehova ndaarĩ Ngai mũtaana na atĩ mawatho marĩa aaheaga Adamu na Hawa matiarĩ ma kĩhooto. Ningĩ Shaitani nĩ aaugire mũgarũ na ũrĩa Jehova aaugĩte akĩenda kuonania atĩ Jehova nĩ mũheenania. Kwoguo agĩcambia rĩĩtwa rĩa Jehova. Agĩtuĩka “Mũcukani,” rĩĩtwa rĩrĩa riugĩte “mũcambania.” (Joh. 8:44) Tondũ Hawa nĩ eetĩkirie maheeni ma Shaitani, nĩ aaregire gwathĩkĩra Ngai, na kwoguo akĩonania atĩ ndeendaga gwathwo nĩwe. (Kĩam. 3:1-6) Shaitani no acambagia rĩĩtwa rĩa Ngai nginya ũmũthĩ na njĩra ya gũtheremia maheeni megiĩ ngumo cia Jehova. Andũ arĩa metĩkagia maheeni ta macio no marege gwathĩkĩra Jehova. Kwoguo, harĩ andũ a Ngai, ũndũ ũrĩa mũũru mũno wanekwo nĩ gũcambio kwa rĩĩtwa itheru rĩa Jehova. Ũndũ ũcio nĩguo kĩhumo kĩa mathĩna na waganu thĩinĩ wa thĩ.

Wa kerĩ, nĩguo ũũmbi wothe ũgunĩke, Jehova nĩ atuĩte itua rĩa gũtetera rĩĩtwa rĩake, arĩtherie kuumana na gĩko o gĩothe rĩngĩkorũo rĩhakĩtwo. Ũcio nĩguo ũndũ ũrĩa wa bata mũno harĩ Jehova. Nĩkĩo augĩte ũũ: “Hatarĩ nganja nĩ ngaatheria rĩĩtwa rĩakwa inene.” (Ezek. 36:23) Na Jesu nĩ oonanirie wega ũndũ ũrĩa wagĩrĩirũo gũkorũo ũrĩ wa bata makĩria mahoya-inĩ ma ndungata ciothe njĩhokeku cia Jehova rĩrĩa aaugire ũũ: “Rĩĩtwa rĩaku nĩ rĩtherio.” (Mat. 6:9) Bibilia nĩ ĩtĩtĩrithagia maita maingĩ bata wa kũgoocithia rĩĩtwa rĩa Jehova. Ta wĩcirie ngerekano ici cigana ũna: “Hei Jehova riri ũrĩa wagĩrĩire rĩĩtwa rĩake.” (1 Maũ. 16:29; Thab. 96:8) “Inai nyĩmbo mũgooce rĩĩtwa rĩake itũũgĩru.” (Thab. 66:2) “Ngũtũũra ngoocaga rĩĩtwa rĩaku tene na tene.” (Thab. 86:12) Kũrĩ hĩndĩ ĩmwe Jehova we mwene aaririe kuuma igũrũ thutha wa Jesu kũmwĩra ũũ arĩ hekarũ-inĩ Jerusalemu: “Awa, goocithia rĩĩtwa rĩaku.” Nake Jehova akĩmũcokeria akĩmwĩra: “Nĩ ndĩrĩgoocithĩtie na nĩ ngũrĩgoocithia rĩngĩ.”—Joh. 12:28. a

Wa gatatũ, muoroto wa Jehova nĩ ũkonainie na rĩĩtwa rĩake, kana ngumo ciake. Wĩcirie ũndũ ũyũ: Thutha wa igerio rĩa mũico rĩrĩa rĩgeekĩka mũthia-inĩ wa Wathani wa Mĩaka Ngiri wa Kristo, gũgaathiĩ atĩa? Hihi araika o hamwe na andũ makaaigua atĩa igũrũ rĩgiĩ rĩĩtwa rĩa Jehova hĩndĩ ĩyo? Nĩguo tũhote gũcokia kĩũria kĩu, reke tũririkane  maũndũ marĩa merĩ mahutanĩtie na gũtherio kwa rĩĩtwa rĩa Jehova, nĩmo wĩkindĩru wa andũ na ũnene wa Jehova. Hihi andũ arĩa magaakorũo monekete atĩ nĩ ehokeku nĩ makaaritũhĩrũo rĩngĩ nĩ gũtũũria wĩkindĩru wao? Aca. Magaakorũo marĩ akinyanĩru na mageretio biũ. Nĩ magaakorũo maheetwo muoyo wa tene na tene. Ningĩ gũtigakorũo na bata wa kuonania kana njĩra ya Jehova ya gwathana nĩyo njega makĩria. Hĩndĩ ĩyo, araika othe kũrĩa igũrũ na andũ othe gũkũ thĩ magaakorũo na ũrũmwe na magaakorũo makĩnyita mbaru wathani wa Jehova. Ĩ ha ũhoro wĩgiĩ rĩĩtwa rĩa Jehova?

Gũkinyĩria hĩndĩ ĩyo, rĩĩtwa rĩa Jehova nĩ rĩgaakorũo rĩtheretio biũ, na rĩkehererio gĩko o gĩothe rĩngĩkorũo rĩhakĩtwo. O na kũrĩ ũguo, rĩĩtwa rĩa Jehova rĩgathiĩ na mbere gũkorũo rĩrĩ kĩndũ kĩrĩa kĩa bata mũno harĩ ndungata ciothe cia Jehova. Nĩkĩ? Tondũ nĩ makoona Jehova agĩthiĩ na mbere gwĩka maũndũ ma magegania. Ta wĩcirie ũndũ ũyũ: Tondũ Jesu arĩ na wĩnyihia nĩ agaacokeria Jehova wathani wothe, Ngai agaakoragwo arĩ “maũndũ mothe harĩ andũ othe.” (1 Kor. 15:28) Thutha ũcio, andũ gũkũ thĩ nĩ magaakenera “wĩyathi ũrĩ na riri wa ciana cia Ngai.” (Rom. 8:21) Na Jehova nĩ akaahingia biũ muoroto wake wa ihinda iraihu wa gũkorũo na famĩlĩ ĩmwe ĩrĩ na ũrũmwe ya araika na andũ.—Ef. 1:10.

Maũndũ macio makaahutia atĩa famĩlĩ ya Jehova ya kũrĩa igũrũ na gũkũ thĩ? Hatarĩ nganja, no tũgaakorũo na wendi mũnene wa kũgoocaga rĩĩtwa rĩa Jehova. Daudi mwandĩki wa Thaburi aatongoririo nĩ roho kwandĩka ũũ: “Jehova Ngai arogoocwo . . . Rĩĩtwa rĩake itũũgĩru rĩrogoocwo tene na tene.” (Thab. 72:18, 19) Nĩ tũgaathiĩ na mbere gũkorũo na itũmi njerũ na cia gũcanjamũra cia gũtũma tũgoocage Ngai tene na tene.

Rĩĩtwa rĩa Jehova rĩrũgamĩrĩire maũndũ mothe mamwĩgiĩ. Kwoguo, rĩĩtwa rĩake nĩ rĩtũririkanagia igũrũ rĩgiĩ wendo wake. (1 Joh. 4:8) Tũgũtũũra tũrĩririkanaga atĩ Jehova aatũũmbire nĩ ũndũ wa wendo, agĩtũhe igongona rĩa ũkũũri nĩ ũndũ wa wendo, na atĩ njĩra yake ya gwathana nĩ ya ũthingu na ya wendo. Nĩ tũrĩthiaga na mbere kuona wendo wa Jehova nginya tene na tene. Nĩ tũgũtũũra twendete gũkuhĩrĩria Ithe witũ na kũmũinĩra nyĩmbo cia kũgooca rĩĩtwa rĩake tene na tene.—Thab. 73:28.