Mũtũmwo Paulo aandĩkĩire Akristiano a Thesalonike ũũ: “Mũndũ o na ũrĩkũ angĩaga gwathĩkĩra kiugo gitũ kĩrĩa kĩrĩ marũa-inĩ maya, mwĩkĩrei rũũri.” (2 Thes. 3:14) Na hau kabere, tũrataũkĩirũo atĩ ũtongoria ũcio werekeirio kũrĩ athuri a kĩũngano. Mũndũ angĩrathiire na mbere kwagarara motaaro ma Bibilia o na thutha wa kũrũngwo maita maigana ũna, athuri a kĩũngano nĩ mangĩrarutire mĩario ya kũruta mũkaana. Thutha ũcio, ahunjia nĩ mangĩratigire kũnyitanĩra na mũndũ ũcio wĩkĩrĩtwo rũũri maũndũ-inĩ ma ũtũũro wa o mũthenya.

O na kũrĩ ũguo, ũgarũrũku nĩ ũrabatarania ũndũ-inĩ ũcio. Ũtaaro ũcio Paulo aaheanire wĩgiĩ gwĩkĩra mũndũ rũũri, nĩ itua rĩagĩrĩire gũtuo nĩ Akristiano marĩ mũndũ ũmwe ũmwe gũkĩringana na ciĩko cia mũndũ ũcio. Kwoguo athuri a kĩũngano matirabatara kũheana mĩario ya kũruta mũkaana. Ũgarũrũku ũcio ũrabatarania nĩkĩ? Reke tũthuthurie ũhoro ũrĩa ũthiũrũrũkĩirie ũtaaro ũcio wa Paulo.

Paulo nĩ oonire atĩ andũ amwe kĩũngano-inĩ kĩu maarĩ na “mĩthiĩre ĩrĩa ĩtagĩrĩire.” Nĩ maaregaga gwathĩkĩra ũtaaro ũrĩa maaheagwo kuuma Kiugo-inĩ kĩa Ngai. Mbere ĩyo nĩ aamaceereire na akamahe watho ũyũ: “Mũndũ angĩkorũo ndarenda kũruta wĩra, o na kũrĩa ndakarĩe.” O na kũrĩ ũguo, amwe no maaregaga kũruta wĩra nĩguo marũmbũiye mabataro mao, o na marĩ na hinya wa gwĩka ũguo. Ningĩ nĩ meeingĩragia maũndũ-inĩ ma andũ arĩa angĩ. Hihi Akristiano maagĩrĩirũo kũrũmbũyania atĩa na mũndũ ũrĩ na mĩthiĩre ta ĩyo ĩtagĩrĩire?—2 Thes. 3:​6, 10-12.

Paulo aaugire: “Mwĩkĩrei rũũri.” Kiugo gĩa Kĩngiriki kĩrĩa kĩhũthĩkĩte hau, kĩonanagia gũkũũrana mũndũ ta ũcio na kũmwĩmenyerera nĩguo tũtigeke take. Paulo aaheanire ũtaaro ũcio kũrĩ kĩũngano gĩothe, no ti kũrĩ athuri a kĩũngano tu. (2 Thes. 1:1; 3:6) Kwoguo Mũkristiano angĩonire mũrũ kana mwarĩ wa Ithe ũtarathĩkĩra ũtaaro kuuma Kiugo-inĩ kĩa Ngai, nĩ angĩathuurire ‘gũtiga gũthiaga thiritũ’ nake.

Hihi ũguo nĩ kuuga atĩ mũndũ ũcio angĩarũmbũyanirio nake ta mũndũ weheretio kĩũngano-inĩ? Aca, tondũ Paulo aacokire akiuga ũũ: “Thiĩi na mbere kũmũtaara o ta mũrũ wa Ithe witũ.” Kwoguo Akristiano arĩa angĩ nĩ mangĩathiire na mbere kũnyitanĩra na mũndũ ũcio mĩcemanio-inĩ na ũtungata-inĩ, no nĩ mangĩathuurire gũtiga kũnyitanĩra nake maũndũ-inĩ maya mangĩ ma ũtũũro. Nĩkĩ? Paulo aaugire: “Nĩgetha aconoke.” Kwoguo rĩrĩa twatiga kũnyitanĩra na mũrũ kana mwarĩ wa Ithe witũ na njĩra ĩyo, no aigue aconokete nĩ ũndũ wa mĩthiĩre yake na agarũrĩre.—2 Thes. 3:​14, 15.

Akristiano mangĩmenya atĩa kana mũndũ nĩ abatiĩ gwĩkĩrũo rũũri? Wa mbere, mabatiĩ gũkorũo na ma atĩ mũndũ ũcio arĩ na “mĩthiĩre ĩrĩa ĩtagĩrĩire” ta ũrĩa Paulo aataarĩirie. Paulo ndaaragia ũhoro wa andũ mareka maũndũ mataretĩkĩrĩka nĩ thamiri citũ ĩndĩ matiragarara ithimi cia Bibilia. Ningĩ ndaaragia ũhoro wa andũ arĩa mangĩkorũo matũtuurithĩtie. Handũ ha ũguo, Paulo aaragĩrĩria ũhoro wa andũ arĩa maheetwo ũtaaro kuuma Kiugo-inĩ kĩa Ngai, ĩndĩ magathuura kwaga kũwathĩkĩra.

Mũndũ angĩmenya Mũkristiano mũna nĩ aronania roho ta ũcio wa kwaga gwathĩka, a nĩ arĩtuaga itua rĩa kwaga kũnyitanĩra nake maũndũ-inĩ maya mangĩ ma ũtũũro. Tondũ rĩu nĩ itua rĩa mũndũ kĩũmbe, tũtiagĩrĩirũo kwarĩrĩria ũndũ ũcio na andũ angĩ tiga o andũ a famĩlĩ arĩa tũikaraga nao. Ĩndĩ no tũrĩthiaga na mbere kũnyitanĩra na mũndũ ũcio mĩcemanio-inĩ na ũtungata-inĩ. Na angĩcenjia mĩthiĩre yake, no twambĩrĩrie kũnyitanĩra nake maũndũ-inĩ mothe.