Nĩ ũthomete na kinyi icunjĩ cia mwaka ũyũ cia Mũrangĩri? Ta rora kana no ũhote gũcokia ciũria ici:

‘Kũgarũrĩra meciria maku’ kũhutĩtie maũndũ marĩkũ? (Rom. 12:2)

Nĩ makĩria ma gwĩka ciĩko njega. Nĩ kũhutĩtie gwĩthuthuria ũrĩa tũtariĩ ngoro-inĩ na gwĩka mogarũrũku nĩguo tũtigĩrĩre atĩ ũtũũro witũ nĩ ũratwarana na ithimi cia Ngai ũrĩa wothe kũngĩhoteka.—w23.01, kar. 8-9.

Tũngĩonania ũigananĩru atĩa tũkĩĩrorera maũndũ marĩa marekĩka thĩinĩ wa thĩ?

Nĩ twendaga kũmenya ũrĩa maũndũ marĩa marekĩka thĩinĩ wa thĩ marahingia ũrathi wa Bibilia. Handũ ha kwĩihũrĩria maũndũ, ũndũ ũrĩa ũngĩthũkia ũrũmwe witũ, nĩ wega gũtigĩrĩra atĩ mĩario itũ ĩhocetie harĩ ũhoro ũrĩa tũheetwo nĩ ithondeka rĩa Jehova. (1 Kor. 1:10)—w23.02, kar. 16.

Ngũrani ya ũbatithio wa Jesu na ũbatithio wa arũmĩrĩri ake nĩ ĩrĩkũ?

Tondũ Jesu aaciarĩirũo rũrĩrĩ-inĩ rwaamũrĩirũo Ngai, ndaabataraga kwĩyamũrĩra Jehova ta ũrĩa twĩkaga. Jesu aarĩ mũkinyanĩru na ndaarĩ na mehia, kwoguo ndaabataraga kwĩrira mehia.—w23.03, kar. 5.

Tũngĩka atĩa nĩguo tũhe andũ arĩa angĩ mweke wa kũruta macokio mĩcemanio-inĩ?

No tũrutage macokio makuhĩ nĩguo tũkahe andũ arĩa angĩ ihinda rĩa kũruta macokio. Ningĩ no twĩtheme kwaragĩrĩria maũndũ maingĩ, nĩguo andũ arĩa angĩ mone ũndũ mangĩcokia.—w23.04, kar. 23.

“Barabara ya Ũtheru” ĩrĩa ĩgwetetwo thĩinĩ wa Isaia 35:8 ĩrũgamĩrĩire kĩĩ?

Barabara ĩyo ya mũhaano kĩambĩrĩria-inĩ yarũgamagĩrĩra njĩra ĩrĩa Ayahudi maagereire makiuma Babuloni magĩthiĩ bũrũri wao. Ĩ namo mahinda-inĩ maya? Mĩaka magana maingĩ mbere ya 1919, nĩ kwarutirũo wĩra wa kũhaarĩria barabara ĩyo ya mũhaano na njĩra ya gũtaũra Bibilia na gũcicaba, o hamwe na mawĩra mangĩ. Andũ a Ngai thĩinĩ wa paradiso ya kĩĩroho makoretwo makĩgerera ‘Barabara ĩyo ya Ũtheru,’ ĩrĩa ĩkaamakinyia harĩ irathimo cia Ũthamaki.—w23.05, kar. 15-19.

Thimo mũrango wa 9 ĩheanaga ũtaaro igũrũ rĩgiĩ atumia arĩkũ erĩ a mũhaano?

Ibuku rĩa Thimo nĩ rĩarĩtie ũhoro wa “mũtumia mũkĩgu” ũrĩa rĩĩtana rĩake rĩerekagĩria andũ “thĩinĩ wa Mbĩrĩra,” na rĩkaria ũhoro wa mũtumia ũngĩ wa mũhaano wĩtĩtwo “ũũgĩ wa ma,” ũrĩa rĩĩtana rĩake rĩerekagĩria andũ “njĩra-inĩ ya ũtaũku” na muoyo-inĩ. (Thim. 9:​1, 6, 13, 18)—w23.06, kar. 22-24.

Wĩnyihia wa Ngai na ũigananĩru wake cioonekire wega atĩa rĩrĩa aarũmbũyanagia na Loti?

Jehova eerire Loti aume Sodomu orĩre irĩma-inĩ. Rĩrĩa Loti aathaithire Jehova etĩkĩrio kũũrĩra Zoari, Jehova nĩ aamwĩtĩkĩririe athiĩ kuo.—w23.07, kar. 21.

Mũtumia angĩka atĩa angĩkorũo mũthuri wake nĩ eroragĩra ponografĩ?

Nĩ agĩrĩirũo kũririkana atĩ tiwe wagĩrĩirũo gũcokererio mahĩtia. Agĩrĩirũo kũiga meciria harĩ ũrata wake na Ngai na ecũranie igũrũ rĩgiĩ atumia magwetetwo thĩinĩ wa Bibilia arĩa maarĩ na mĩtangĩko, no Ngai akĩmateithia gũcokererũo nĩ hinya wao. No ateithie mũthuri wake gwĩthema maũndũ mangĩmũingĩria mũtego-inĩ.—w23.08, kar. 14-17.

Ũtaũku ũngĩtũteithia atĩa gũcokia na ũhooreri rĩrĩa wĩtĩkio witũ wokĩrĩrũo?

No twĩcirie ũrĩa kĩũria kĩrĩa tuorio kĩngĩtũteithia kũmenya mwĩcirĩrie wa mũndũ ũcio kana maũndũ marĩa ma bata harĩ we. Ũndũ ũcio no ũtũteithie gũcokia na njĩra ya ũhooreri.—w23.09, kar. 17.

Tũngĩĩruta atĩa kuumana na Mariamu ũhoro-inĩ wĩgiĩ gwĩkĩrũo hinya?

Mariamu nĩ eekĩrirũo hinya nĩ arĩa angĩ rĩrĩa aamenyire atĩ nĩwe ũngĩatuĩkire nyina wa Mesia. Gaburieli na Elizabethi nĩ meekĩrire Mariamu ngoro kũgerera Maandĩko. O na ithuĩ no twĩkĩrũo hinya nĩ Akristiano arĩa angĩ.—w23.10, kar. 15.

Hihi Jehova angĩcokia mahoya maitũ atĩa?

Eranĩire atĩ nĩ arĩthikagĩrĩria mahoya maitũ na nĩ aroraga ũrĩa marahutania na muoroto wake. (Jer. 29:12) No acokie mahoya mahaanaine na njĩra itiganĩte, no ma nĩ atĩ hingo ciothe nĩ arĩtũteithagia.—w23.11, kar. 21-22.

Tondũ Aroma 5:2 nĩ ĩgwetete ‘kĩĩrĩgĩrĩro-rĩ,ʼ nĩ kĩĩ gĩatũmire ũndũ ũcio warĩrĩrio rĩngĩ mũhari-inĩ wa 4?

Thutha wa kũigua ũhoro ũrĩa mwega, mũndũ no agĩe na kĩĩrĩgĩrĩro gĩa gũgaakenera ũtũũro thĩinĩ wa paradiso gũkũ thĩ. No o ũrĩa aracemania na mathĩna, akamakirĩrĩria, na agakorũo na ma atĩ nĩ etĩkĩrĩkĩte harĩ Ngai, noguo kĩĩrĩgĩrĩro gĩake kĩngĩthiĩ kĩgĩte hinya makĩria na gĩtuĩke kĩa ma biũ harĩ we.—w23.12, kar. 12-13.