Mũtũmwo Paulo aandĩkire ũũ kũrĩ Timotheo, ũrĩa warĩ mũthuri wa kĩũngano o take: “Ndagwatha mbere ya Ngai na Kristo Jesu na araika arĩa athuure atĩ ũrũmagĩrĩre motaaro macio ũtarĩ na kĩmenyano kana mũthutũkanio.”—1 Tim. 5:21.

Ũndũ ũmwe nĩ atĩ, araika acio ti Akristiano aitĩrĩrie maguta arĩa 144,000. Twĩ na ma na ũndũ ũcio tondũ rĩrĩa Paulo aandĩkagĩra Timotheo ciugo icio, arĩa aitĩrĩrie maguta matiaambĩtie kũriũkio nĩguo mathiĩ igũrũ. Kwoguo tondũ atũmwo na arĩa angĩ maaitĩrĩirio maguta matiatuĩkĩte ciũmbe cia roho, matingĩkorũo nĩo metĩtwo “araika arĩa athuure.”—1 Kor. 15:​50-54; 1 Thes. 4:​13-17; 1 Joh. 3:2.

Ningĩ “araika arĩa athuure” matingĩkorũo nĩ araika arĩa maaremeire Jehova hĩndĩ ya Mũiyũro. Araika acio maatuĩkire ndaimono nĩ ũndũ wa kũnyita Shaitani mbaru, na kwoguo maarĩ thũ cia Jesu. (Kĩam. 6:2; Luk. 8:​30, 31; 2 Pet. 2:4) Ihinda rĩũkĩte nĩ magaikio irima-inĩ rĩtarĩ gĩturi kwa ihinda rĩa mĩaka 1,000, na thutha ũcio maniinwo hamwe na Shaitani.—Jud. 6; Kũg. 20:​1-3, 10.

Kwoguo no mũhaka akorũo “araika arĩa athuure” nĩ araika ehokeku kũrĩa igũrũ na nĩ manyitaga mbaru “Ngai na Kristo Jesu,” arĩa o nao magwetetwo mũhari-inĩ ũcio.

Gũkoragwo na araika ngiri nyingĩ. (Ahib. 12:​22, 23) No nginya akorũo araika othe matikoragwo mehokeirũo mawĩra mahaanaine. (Kũg. 14:​17, 18) Kwa ngerekano, kũrĩ hĩndĩ mũraika ũmwe aaheirũo wĩra wa kũniina thigari 185,000 cia Aashuri. (2 Ath. 19:35) Ningĩ no kũhoteke nĩ araika maigana ũna maheetwo wĩra wa “[gũgaacokanĩrĩria] kĩrĩa gĩothe kĩhĩngithagia andũ na andũ arĩa mekaga maũndũ ma uuni-watho, mameherie Ũthamaki-inĩ” wa Jesu. (Mat. 13:​39-41) Angĩ nao no kũhoteke nĩ “magaacokanĩrĩria andũ ake arĩa athuure” nĩguo mathiĩ igũrũ. (Mat. 24:31) Na nĩ kũrĩ angĩ maheetwo wĩra wa ‘gũtũgitĩra njĩra-inĩ citũ ciothe.’—Thab. 91:11; Mat. 18:10; ringithania Mathayo 4:11; Luka 22:43.

No kũhoteke “araika arĩa athuure” magwetetwo thĩinĩ wa 1 Timotheo 5:21 nĩ arĩa maheetwo mawĩra ma mwanya mahutanĩtie na andũ a Jehova. Ũhoro-inĩ ũrĩa ũthiũrũrũkĩirie, Paulo nĩ aheete athuri a kĩũngano ũtaaro wĩgiĩ ũrĩa mabatiĩ kũhingia mawĩra marĩa mehokeirũo na akauga atĩ kĩũngano nĩ kĩbatiĩ kũmahe gĩtĩo. Athuri a kĩũngano merĩtwo atĩ magĩrĩirũo kũhingia mawĩra macio matarĩ na “kĩmenyano kana mũthutũkanio,” na atĩ matanatua itua mabatiĩ kwamba kũrĩciria na njĩra ndikĩru. Gĩtũmi kĩnene gĩa kũrũmĩrĩra ũtaaro ũcio nĩ atĩ matungataga marĩ “mbere ya Ngai na Kristo Jesu na araika arĩa athuure.” Ũndũ ũcio nĩ ũronania wega atĩ araika amwe nĩ maheetwo wĩra wa gũteithia kĩũngano, ta wa kũgitĩra andũ a Jehova, kũmateithĩrĩria wĩra-inĩ wa kũhunjia, na kũmenyithia Jehova ũrĩa kũrathiĩ na mbere.—Mat. 18:10; Kũg. 14:6.