Nĩ ũthomete na kinyi icunjĩ cia mwaka ũyũ cia Mũrangĩri? Ta rora kana no ũhote gũcokia ciũria ici:

Jehova aigĩte kĩonereria kĩrĩkũ kĩega harĩ kũrũmbũyania na atumia?

Ndamathutũkanagia, na kwoguo ndonaga arũme marĩ a bata gũkĩra atumia. Ngai nĩ athikagĩrĩria atumia, na akarũmbũiya ũrĩa maraigua ngoro-inĩ na mĩtangĩko ĩrĩa marĩ nayo. Ningĩ nĩ amehokagĩra mawĩra matiganĩte.—w24.01, kar. 15-16.

Tũngĩrũmĩrĩra atĩa ũtaaro ũyũ wa Aefeso 5:7: “Mũtikanyitanagĩre nao”?

Mũtũmwo Paulo nĩ mũkaana aatũheaga wĩgiĩ kwaga kũgĩa ũrata na andũ arĩa mangĩtũma ũkorũo ũrĩ ũndũ mũritũ harĩ ithuĩ kũrũmia ithimi cia Ngai. Arata ta acio matarĩ ega mahutĩtie arĩa tuonanaga nao ũthiũ kwa ũthiũ o hamwe na arĩa tũnyitanagĩra nao nenda-inĩ cia ũkinyanĩria.—w24.03, kar. 22-23.

Tũbatiĩ kwĩmenyerera ngʼano irĩkũ cia maheeni?

Nĩ tũbatiĩ kwĩmenyerera ngʼano itaramenyeka kĩhumo gĩacio iria tũngĩkinyĩrio nĩ arata, ndũmĩrĩri cia nginyanĩrio kuuma kũrĩ andũ tũtoĩ, na aregenyũki arĩa metuaga nĩ marakenio nĩ ũhoro wa ma.—w24.04, kar. 12.

Nĩ maũndũ marĩkũ tũĩ na nĩ marĩkũ tũtoĩ megiĩ ũrĩa Jehova agaatuĩra Mũthamaki Suleimani o hamwe na andũ arĩa maakuire matũũra-inĩ ma Sodomu na Gomora na hĩndĩ ya Mũiyũro?

Tũtingiuga tũrĩ na ma biũ atĩ Jehova aatuĩrĩire andũ acio maniinwo tene na tene. No nĩ tũĩ atĩ nĩ oĩ maũndũ mothe megiĩ andũ acio na nĩ arĩ tha nyingĩ.—w24.05, kar. 3-4.

Gũkorũo Ngai arĩ “Rwaro rwa Ihiga” gũtũheaga ũũma ũrĩkũ? (Gũcok. 32:4)

No tũtue Jehova rĩũrĩro ritũ. We nĩ wa kwĩhokeka, tondũ hingo ciothe nĩ ahingagia ciĩranĩro ciake. Ningĩ we ndangĩenyenyeka, tondũ ngumo ciake o hamwe na mĩoroto yake iticenjagia.—w24.06, kar. 26-28.

Nĩ kĩĩ kĩngĩgũteithia kũhiũrania na moritũ ma gũthamĩra kĩũngano kĩngĩ?

Wĩhokage Jehova, tondũ nĩ egũgũteithia o ta ũrĩa anateithia ndungata ciake mahinda-inĩ mahĩtũku. Wĩtheme kũringithania kĩũngano kĩrĩa ũthamĩire na kĩrĩa ũrarĩ. Nyitanagĩra na arĩa angĩ kĩũngano-inĩ kĩu wathamĩra, na ũmatue arata.—w24.07, kar. 26-28.

Nĩ maũndũ marĩkũ tũngĩĩruta kuumana na ngerekano ithatũ iria irĩ thĩinĩ wa Mathayo mũrango wa 25?

Ngerekano ya ngʼondu na mbũri yonanagia bata wa gũikara tũrĩ ehokeku. Ngerekano ya airĩtu ogĩ na akĩgu ĩtĩtĩrithagia bata wa gũikara twĩiguĩte na twĩhaarĩirie. Na ngerekano ya taranda yonanagia bata wa gũkorũo na kĩyo.—w24.09, kar. 20-24.

Gĩthaku kĩa hekarũ ya Suleimani kĩarĩ na ũraihu ũigana atĩa?

Thĩinĩ wa 2 Maũndũ ma Matukũ ma Tene 3:4, maandĩko mamwe ma tene ma Bibilia magwetete atĩ kĩarĩ na ũraihu wa na igũrũ wa “mĩkono 120,” na ũguo nĩ kuuga mita 53 (fiti 175). No maandĩko mangĩ ma kwĩhokeka magwetete ũraihu wa “mĩkono 20,” ũguo nĩ kuuga mita kenda (fiti 30). Kũringana na wariĩ wa thingo cia hekarũ, kuonekaga atĩ gĩthaku kĩu kĩarĩ na ũraihu wa mĩkono 20.—w24.10, kar. 31.

Ndungata ya kĩũngano gũkorũo arĩ “mũthuri wa mũtumia ũmwe” nĩ kuuga atĩa? (1 Tim. 3:12)

Ciugo icio ironania atĩ abatiĩ kũhikia mũtumia ũmwe na ndagĩrĩirũo kwĩingĩrania na ngomanio itagĩrĩire. Makĩria ma ũguo, ndagĩrĩirũo gũthaakanĩra kĩĩwendo na mũtumia ũngĩ.—w24.11, kar. 19.

Nĩ kĩĩ kĩngĩtũma tuuge atĩ ciugo cia Johana 6:53 itionanagia ũrĩa gĩkũngũĩro kĩa Irio cia Hwaĩ-inĩ cia Mwathani kĩbatiĩ gwĩkwo?

Johana 6:53 yonanagia bata wa kũrĩa mwĩrĩ wa Jesu na kũnyua thakame yake. Jesu aaririe ciugo icio mwaka wa 32 M.M. arĩ Galili, na aaragĩria Ayahudi arĩa mataakoretwo mamwĩtĩkĩtie. No aambĩrĩirie gĩkũngũĩro kĩa Irio cia Hwaĩ-inĩ cia Mwathani mwaka ũmwe thutha ũcio arĩ Jerusalemu. Hĩndĩ ĩyo Jesu aaragia na andũ arĩa magaathamaka nake kũrĩa igũrũ.—w24.12, kar. 10-11.