MŨTHENYA wa Njumatano, Janũarĩ 18, 2023, nĩ gwekĩrirũo kĩmenyithia kĩa mwanya thĩinĩ wa jw.org, kĩrĩa kĩoonanagia atĩ Ariũ a Ithe Witũ Gage Fleegle na Jeffrey Winder nĩ mamũrĩtwo gũtungata thĩinĩ wa Kĩama Kĩrĩa Gĩtongoragia kĩa Aira a Jehova. Ariũ a Ithe witũ acio eerĩ nĩ makoretwo magĩtungatĩra Jehova kwa ihinda iraihu marĩ ehokeku.

Mũrũ wa Ithe Witũ Fleegle aarerirũo nĩ aciari metigĩrĩte Ngai, na maaikaraga mwena wa ithũĩro wa Pennsylvania, U.S.A. Arĩ tinĩnja, famĩlĩ yao nĩ yathamĩire gataũni-inĩ kanini, gĩcagi-inĩ kĩmwe kĩarĩ na bata mũnene wa ahunjia. Kahinda kanini thutha ũcio mweri-inĩ wa Novemba 20, 1988, nĩ aabatithirio.

Aciari a Mũrũ wa Ithe Witũ Fleegle maaikaraga makĩmwĩkĩraga ngoro aingĩre ũtungata-inĩ wa mahinda mothe. Kaingĩ nĩ maanyitaga ũgeni arori a mũthiũrũrũko na arĩa matungataga Betheli kwao mũciĩ, na Mũrũ wa Ithe Witũ Fleegle nĩ eeyoneire ũrĩa aarĩ na ariũ a Ithe witũ acio maakoragwo na gĩkeno. Thutha wa kũbatithio, ndaaikarire mũno atatuĩkĩte painia wa hĩndĩ ciothe, tondũ aambĩrĩirie ũpainia mweri-inĩ wa Septemba 1, 1989. Mĩaka ĩĩrĩ thutha ũcio, akĩhingia muoroto wa gũtungata Betheli, ũrĩa eeigĩire kuuma arĩ na mĩaka 12. Aambĩrĩirie ũtungata ũcio Betheli-inĩ ya Brooklyn, mweri wa Oktomba 1991.

Mũrũ wa Ithe Witũ Fleegle arĩ kũu Betheli, nĩ aarutire wĩra mĩaka ĩnana Kĩganda-inĩ gĩa Kũnyitithania Mabuku, na thutha ũcio agĩtwarũo Rũhonge-inĩ rwa Ũtungata. Ihinda-inĩ rĩu, nĩ aanyitanĩire na kĩũngano kĩa rũthiomi rwa Russia ihinda-inĩ rĩa mĩaka ĩigana ũna. Mwaka-inĩ wa 2006, nĩ maahikanirie na mũtumia wake, Nadia, na o nake akĩambĩrĩria gũtungata Betheli. Marĩ hamwe nĩ matungatĩte kĩũngano-inĩ kĩa rũthiomi rwa Gĩĩportuguese, na kwa ihinda rĩa makĩria ma mĩaka ikũmi magatungata kĩũngano-inĩ kĩa rũthiomi rwa Gĩĩspanish. Thutha wa Mũrũ wa Ithe  Witũ Fleegle kũruta wĩra Rũhonge-inĩ rwa Ũtungata mĩaka mĩingĩ, nĩ eerirũo agatungate Wabici-inĩ ya Kamĩtĩ ya Ũrutani na thutha ũcio Wabici-inĩ ya Kamĩtĩ ya Ũtungata. Kũrĩ Machi 2022 nĩ aamũrirũo agĩtuĩka mũteithia wa Kamĩtĩ ya Ũtungata ya Kĩama Kĩrĩa Gĩtongoragia.

Mũrũ wa Ithe Witũ Winder aarereirũo taũni-inĩ ya Murrieta, gĩcigo-inĩ gĩa California, U.S.A. Aarereirũo ũhoro-inĩ wa ma nĩ aciari ake na akĩbatithio Machi 29, 1986. Mweri ũrĩa warũmĩrĩire, agĩtuĩka painia wa gũteithĩrĩria. Nĩ aakeneire ũtungata ũcio mũno, nginya agĩtua itua rĩa gũthiĩ na mbere naguo. Thutha wa gũtungata arĩ painia wa gũteithĩrĩria mĩeri ĩigana ũna, nĩ aatuĩkire painia wa hĩndĩ ciothe mweri-inĩ wa Oktomba 1, 1986.

Mũrũ wa Ithe Witũ Winder arĩ tinĩnja nĩ aaceereire ariũ a nyina erĩ akũrũ kũmũkĩra arĩa maatungataga Betheli hĩndĩ ĩyo. Iceera rĩu nĩ rĩatũmire erirĩrie kũiyũria fomu ya gũthiĩ Betheli anenaneneha. Na mweri-inĩ wa Mĩĩ 1990, nĩ eetirũo agatungate Betheli ya Wallkill.

Mũrũ wa Ithe Witũ Winder arĩ Betheli nĩ aarutire wĩra honge-inĩ itiganĩte, ta Rũhonge-inĩ rwa Ũtheru, Rũhonge-inĩ wa Kũhaarĩria Irio, na rwa Wabici ya Betheli. Nĩ maahikanirie na Angela mwaka-inĩ wa 1997, na makoretwo magĩtungata hamwe Betheli kuuma hĩndĩ ĩyo. Mwaka-inĩ wa 2014 nĩ maathamĩire Warwick, kũrĩa Mũrũ wa Ithe Witũ Winder aateithĩrĩirie mwako-inĩ wa wabici nene ya Aira a Jehova. Na mwaka-inĩ wa 2016 magĩthamĩra thĩinĩ wa Gĩikaro Kĩnene kĩa Ũrutani kĩrĩa kĩrĩ Patterson, kũrĩa Mũrũ wa Ithe Witũ Winder aarutire wĩra Rũhonge-inĩ rwa Video na Mĩgambo. Mĩaka ĩna thutha ũcio nĩ maacokire Warwick, na Mũrũ wa Ithe Witũ Winder akĩĩrũo atungate Wabici-inĩ ya Kamĩtĩ ya Erutĩri. Na mweri-inĩ wa Machi 2022 nĩ aamũrirũo agĩtuĩka Mũteithia wa Kamĩtĩ ya Erutĩri ya Kĩama Kĩrĩa Gĩtongoragia.

Nĩ ihoya ritũ atĩ Jehova nĩ ekũrathima ‘arũme acio matariĩ ta iheo’ magĩthiĩ na mbere kwĩrutanĩria wĩra-inĩ wa Ũthamaki.—Ef. 4:8.