Mary na mũthuri wake, John, a nĩ makenaga kũhunjĩria andũ a kuuma Philippines arĩa mokaga kũruta wĩra bũrũri-inĩ wao. Hĩndĩ ya kĩngʼũki gĩa COVID-19, Mary nĩ aambĩrĩirie kwĩruta Bibilia na andũ bũrũri-inĩ ũrĩa aikaraga o hamwe na andũ a mabũrũri mangĩ. Hihi aahotire gwĩka ũguo atĩa?

Mary ooragia mũrutwo wake wa Bibilia ũũ, “Hihi nĩ ũĩ mũndũ ũngĩ ũngĩenda kwĩruta Bibilia?” Angĩaugire ĩĩ, Mary aamũũragia kana no amũmenyithanie nake. Kaingĩ kĩũria kĩu kĩhũthũ nĩ gĩkoragwo na maumĩrĩro mega. Nĩkĩ? Tondũ andũ arĩa makenagĩra maũndũ marĩa mareruta kuuma Bibilia-inĩ kaingĩ nĩ mendaga o na andũ ao a famĩlĩ na arata mamenye maũndũ macio. Hihi gwathiaga atĩa Mary oria arutwo ake a Bibilia kĩũria kĩu?

Mũrutwo ũmwe wa Mary wĩtagwo Jasmin nĩ aamũmenyithanirie na andũ ana arĩa meendaga kwĩruta Bibilia. Ũmwe wao aarĩ Kristine, ũrĩa wakenagĩra wĩruti ũcio mũno nginya akĩũria Mary kana no merutage maita merĩ harĩ kiumia. Rĩrĩa Mary aamũũririe kana nĩ harĩ mũndũ ũngĩ oĩ ũngĩenda kwĩruta Bibilia, Kristine aamwĩrire, “Ĩĩni, nĩ ngũkũmenyithania na arata akwa.” Ihinda-inĩ rĩa ciumia cigana ũna, Kristine nĩ aamenyithanirie Mary na arata ake ana arĩa meendaga kwĩruta Bibilia. Thutha ũcio Kristine nĩ aamenyithanirie Mary na arata angĩ ake, na amwe ao makĩmũmenyithania na andũ angĩ.

Ningĩ Kristine nĩ eendaga andũ a famĩlĩ yake arĩa maarĩ Philippines merute Bibilia. Nĩ ũndũ ũcio akĩmenyithia mũirĩtu wake wĩtagwo Andrea. Kĩambĩrĩria-inĩ Andrea eeciragia atĩ ndini ya Aira a Jehova nĩ ndini ngʼeni, ĩtetĩkĩtie Jesu, na atĩ ĩhũthagĩra o Kĩrĩkanĩro Kĩrĩa Gĩkũrũ. No thutha wa kwĩruta riita rĩmwe tu, nĩ oonire atĩ mawoni macio aarĩ namo maarĩ mahĩtanu. Rĩrĩa rĩothe eruta kaũndũ kerũ aaugaga, “Tondũ Bibilia nĩyo yugĩte ũguo, no mũhaka akorũo nĩ ũhoro wa ma!”

Thutha wa ihinda, Andrea nĩ aamenyithanirie Mary na arata ake erĩ hamwe na mũndũ marutaga wĩra nake, na makĩambĩrĩria kwĩruta Bibilia. Ningĩ tata wa Andrea ũkoragwo arĩ mũtumumu wĩtagwo Angela nĩ aathikagĩrĩria makĩĩruta, no Mary ndaamenyaga. Mũthenya ũmwe, Angela nĩ eerire Andrea orie Mary kana o nake no amũrute Bibilia. Angela nĩ aakenagio nĩ maũndũ marĩa eerutaga. Ihinda-inĩ rĩa mweri ũmwe, nĩ aaigĩte meciria-inĩ maandĩko maingĩ na eendaga merutage maita mana harĩ kiumia! Nĩ aambĩrĩirie kũingĩraga mĩcemanio ategũtĩrĩria  kũgerera mĩtambo ya video agĩteithĩrĩrio nĩ Andrea.

Rĩrĩa Mary aamenyire atĩ Joshua mũthuri wa Kristine aaikaraga o hau hakuhĩ makĩĩruta na Kristine, nĩ aamũũririe kana no ende kwĩruta. Joshua aamwĩrire, “Nĩ ngũthikĩrĩria, no ndũkanjũũrie kĩũria o na kĩmwe; wanjũũria, no gũthiĩ ngũthiĩ.” Ihinda-inĩ rĩa ndagĩka ithano nĩ oorĩtie ciũria nyingĩ gũkĩra Kristine, na o nake akĩenda kwambĩrĩria kwĩruta Bibilia.

Kĩũria kĩu kĩhũthũ Mary ooragia nĩ gĩatũmire agĩe na arutwo aingĩ a Bibilia. Nĩ aabangire ũrĩa aingĩ ao mangĩarutirũo Bibilia nĩ Akristiano angĩ. Mary aarĩ na arutwo a Bibilia 28 kuuma mabũrũri-inĩ mana.

Jasmin, ũrĩa uuma mũrutwo wa mbere wa Bibilia kũgwetwo gĩcunjĩ-inĩ gĩkĩ, aabatithirio Ĩpuro 2021. Kristine aabatithirio Mĩĩ 2022 na rĩu nĩ acokete Philippines kũrĩ famĩlĩ yake. Arutwo angĩ erĩ arĩa maamenyithanirio na Mary nĩ Kristine o nao nĩ maabatithirio. Angela nake aabatithirio mĩeri ĩigana ũna thutha wa Kristine kũbatithio, na rĩu atungataga arĩ painia wa hĩndĩ ciothe. Nake Joshua mũthuri wa Kristine na mũirĩtu wao Andrea, o hamwe na arutwo angĩ a Bibilia nĩ marathiĩ na mbere gũkũra kĩĩroho.

Karine-inĩ ya mbere, andũ aingĩ nĩ meeraga andũ ao a famĩlĩ na arata maũndũ marĩa meerutĩte megiĩ Jesu. (Joh. 1:​41, 42a; Atũm. 10:​24, 27, 48; 16:​25-33) Tũragwĩkĩra ngoro ũkoragia arutwo aku a Bibilia na arĩa marakenio nĩ ũhoro kĩũria gĩkĩ kĩhũthũ: “Hihi nĩ ũĩ mũndũ ũngĩ ũngĩenda kwĩruta Bibilia?” Ũngĩũragia kĩũria kĩu, no kũhoteke wone andũ aingĩ marenda kwĩruta Bibilia.