1. Nĩ mbica ĩrĩkũ yũkaga meciria-inĩ maku weciria ũhoro wĩgiĩ Jehova?

 HIHI nĩ ũrĩ wageria kũhũũra mbica ũrĩa Jehova akoragwo ahaana? Nĩ ũndũ ũrĩkũ ũkaga meciria-inĩ maku rĩrĩa ũraria nake kũgerera mahoya? O na gũtuĩka Jehova ndangĩoneka na maitho, Bibilia nĩ ĩmũtaaragĩria na njĩra itiganĩte. Kwa ngerekano nĩ etĩtwo “riũa na ngo” na akerũo atĩ we nĩ “mwaki ũniinanaga.” (Thab. 84:11; Ahib. 12:29) Ezekieli agĩtaarĩria muonekanĩre wa Jehova, aaugire atĩ atariĩ ta ihiga rĩa safia, cuma ĩrahenia, na mũkũnga-mbura ũrakenga. (Ezek. 1:​26-28) Njĩra imwe Jehova ataarĩirio nacio no itũme tũgege kana o na itũme twĩyagĩre kĩene.

2. Nĩ kĩĩ kĩngĩtũma andũ amwe maritũhĩrũo gũkuhĩrĩria Jehova?

² Tondũ tũtingĩhota kuona Jehova, no ũkorũo ũtarĩ ũndũ mũhũthũ gwĩtĩkia atĩ nĩ atwendete. Andũ amwe nĩ ũndũ wa maũndũ marĩa magereire ũtũũro-inĩ, no mecirie atĩ Jehova ndamendete. Rĩngĩ no gũkorũo baba wao ndaamendete. Jehova nĩ ataũkagĩrũo ũrĩa maũndũ ta macio matũmaga tũigue na ũrĩa matũhutagia. Nĩ ũndũ ũcio, nĩ atũteithĩtie kũmenya ũrĩa atariĩ kũgerera Kiugo gĩake.

3. Twagĩrĩirũo gũthuthuria makĩria igũrũ rĩgiĩ wendo wa Jehova nĩkĩ?

³ Kiugo kĩmwe tũngĩhũthĩra gũtaarĩria Jehova wega nĩ wendo. Bibilia yugaga atĩ “Ngai nĩ wendo.” (1 Joh. 4:8) Wendo nĩguo ũmũtindĩkaga gwĩka ũndũ o wothe ekaga. Wendo wa Ngai nĩ mũingĩ ũũ atĩ awonanagia nginya kũrĩ andũ arĩa matamwendete. (Mat. 5:​44, 45) Gĩcunjĩ-inĩ gĩkĩ, tũgũthuthuria makĩria ũhoro wĩgiĩ Jehova na wendo ũrĩa onanagia. O ũrĩa tũreruta makĩria ũhoro wĩgiĩ Ngai witũ, noguo tũrĩmwendaga makĩria.

 JEHOVA NĨ ATWENDETE MŨNO

4. Wendo muororo wa Jehova ũtũmaga ũigue atĩa? (Ningĩ rora mbica.)

⁴ “Jehova [nĩ] arĩ wendo muororo mũno.” (Jak. 5:11) Thĩinĩ wa Bibilia, eringithanagia na mũtumia wendete mwana wake. (Isa. 66:​12, 13) Ta wĩcirie ũrĩa mũtumia arũmbũyagia kaana gake na wendo. Agacũgacũgagĩria maru-inĩ make na wororo na agakaarĩria na mũgambo mũhooreru. Na rĩrĩa karaigua ruo kana gakarĩra, atigagĩrĩra nĩ akahe kĩrĩa karabatara. O na ithuĩ rĩrĩa tũratangĩka, no tũkorũo na ma atĩ Jehova nĩ egũtũrũmbũiya na wendo. Mwandĩki wa Thaburi aaugire ũũ: “Rĩrĩa mĩtangĩko yandooretie, nĩ wanyũmĩrĩirie na ũkĩhooreria.”—Thab. 94:19.

5. Wendo mwĩhokeku wa Jehova ũkũgunaga atĩa?

⁵ Jehova nĩ mwĩhokeku. (Thab. 103:8) Ndatũtiganagĩria nginya rĩrĩa twamũhĩtĩria. Kwa ngerekano, rũrĩrĩ rwa Isiraeli nĩ rwatuurithagia Jehova maita maingĩ, no rĩrĩa merira nĩ aamonagia wendo mwĩhokeku. Aameerire: ‘Nĩ mwatuĩkire kĩndũ kĩa goro maitho-inĩ makwa, nĩ mũtĩĩkĩte, na nĩ ndĩmwendete.’ (Isa. 43:​4, 5) O na ithuĩ no tũkorũo na ma atĩ Jehova nĩ atwendete. O na angĩkorũo nĩ twĩkĩte mehia maritũ, Jehova ndangĩtũtiganĩria. Tũngĩĩrira na tũcokerere Jehova, nĩ tũkwĩyonera atĩ no atwendete. Eranĩire atĩ nĩ ‘arĩtuohagĩra na njĩra nene.’ (Isa. 55:7) Bibilia yugaga atĩ wohanĩri ũcio nĩ ũtũmaga tũgĩe na “mahinda ma gũcanjamũra moimĩte kũrĩ Jehova we mwene.”—Atũm. 3:19.

6. Zekaria 2:8 ĩratũruta atĩa igũrũ rĩgiĩ Jehova?

⁶ Thoma Zekaria 2:8. Tondũ Jehova nĩ atwendete, nĩ ahutagio mũno nĩ ũrĩa tũiguaga na nĩ akoragwo ehaarĩirie gũtũgitĩra. Nĩ atangĩkaga rĩrĩa ona tũgĩtangĩka. Kwoguo no tũkorũo na ma nĩ egũtũigua rĩrĩa twamũhoya ũũ: “Ngitĩra o ta kĩũma kĩa riitho rĩaku.” (Thab. 17:8) Riitho nĩ kĩĩga kĩa bata kĩa mwĩrĩ kĩbataraga kũmenyererũo mũno. Kwoguo rĩrĩa Jehova atũringithania na kĩũma kĩa riitho rĩake, nĩ ta akoragwo akiuga ũũ, ‘Mũndũ o wothe ũngĩmũtharĩkĩra inyuĩ andũ akwa, angĩkorũo agĩtharĩkĩra kĩndũ gĩakwa kĩa bata.’

7. Nĩkĩ nĩ ũndũ wa bata gũkorũo na ma atĩ Jehova nĩ atwendete?

⁷ Jehova endaga tũkorũo na ma atĩ nĩ atwendete tũrĩ mũndũ ũmwe ũmwe. No nĩ oĩ atĩ nĩ ũndũ wa maũndũ marĩa twanacemania namo  ũtũũro-inĩ, no tũkorũo na nganja kana nĩ atwendete. Ningĩ ihinda-inĩ rĩrĩ no tũkorũo tũkĩhĩtũkĩra maũndũ mangĩtũma tuone ta Jehova atatwendete. Nĩ kĩĩ kĩngĩtũteithia gũkorũo na ma atĩ nĩ atwendete? Nĩ gũthuthuria ũrĩa Jehova onanagia atĩ nĩ endete Jesu, arĩa aitĩrĩrie maguta, na ithuĩ ithuothe.

ŨRĨA JEHOVA ONANAGIA WENDO

8. Nĩ kĩĩ gĩatũmaga Jesu akorũo na ma atĩ Ithe nĩ amwendete?

⁸ Jehova na Mũrũ wake Jesu makoretwo hamwe kwa ihinda rĩa mĩaka bilioni nyingĩ, na kwoguo makoretwo na ũrata wa hakuhĩ na nĩ mendaine mũno. Ũrata wao nĩguo ũtũũrĩte ihinda iraihu gũkĩra ũngĩ o wothe. Jehova nĩ oonanirie wega atĩ nĩ endete Jesu, kũgerera ciugo iria aaugire thĩinĩ wa Mathayo 17:5. Jehova nĩ angĩaugire, ‘Ũyũ nĩwe njĩtĩkĩrĩte.’ No tondũ nĩ eendaga tũmenye atĩ nĩ endete Jesu mũno, aamwĩtire “Mũrũ wakwa, ũrĩa nyendete.” Jehova nĩ aakenagio nĩ Jesu, makĩria nĩ ũndũ wa gũkorũo ehaarĩirie kũruta muoyo wake. (Ef. 1:7) Jesu aarĩ na ma biũ atĩ Ithe nĩ aamwendete. O na nĩ aaugire maita maigana ũna atĩ Ithe nĩ aamwendete.—Joh. 3:35; 10:17; 17:24.

9. Nĩ kiugo kĩrĩkũ kĩronania ũrĩa Jehova endete arĩa aitĩrĩrie maguta? Taarĩria. (Aroma 5:5)

⁹ Ningĩ Jehova nĩ onanagia atĩ nĩ endete arĩa aitĩrĩrie maguta. (Thoma Aroma 5:5.) Mũhari ũcio ũronania atĩ wendo wa Ngai nĩ “ũitĩrĩirũo” ngoro-inĩ ciao. Ibuku rĩmwe rĩkĩaria ũhoro wa kiugo kĩu “ũitĩrĩirũo,” rĩonanagia nĩ ta wendo ũcio ũratherera ta karũũĩ. Na githĩ ĩyo ti ngerekano njega ĩronania ũrĩa Jehova endete arĩa aitĩrĩrie maguta! Akristiano acio aitĩrĩrie maguta nĩ moĩ atĩ nĩ “mendetwo nĩ Ngai.” (Jud. 1) Mũtũmwo Johana nĩ oonanirie ũrĩa maiguaga rĩrĩa aaugire ũũ: “Onei wendo mũnene ũrĩa Ithe witũ atuonetie, atĩ tũgetwo ciana cia Ngai!” (1 Joh. 3:1) No hihi Jehova endete o arĩa aitĩrĩrie maguta tu? Aca, nĩ onanĩtie atĩ atwendete ithuothe.

10. Nĩ njĩra ĩrĩkũ nene Jehova oonanirie nayo atĩ nĩ akwendete?

¹⁰ Nĩ njĩra ĩrĩkũ nene Jehova onanĩtie wendo nayo? Nĩ kũgerera ũkũũri. Gũtirĩ ũngĩ ũrĩ wonania wendo mũnene ta ũcio! (Joh. 3:16; Rom. 5:8) Jehova aarutire Mũrũ wake endete, agĩtĩkĩria akue nĩ ũndũ wa andũ othe nĩgetha tuoherũo mehia maitũ na tũtuĩke arata ake. (1 Joh. 4:10) O ũrĩa tũrecũrania thogora ũrĩa Jehova na Jesu maarĩhire, noguo tũrĩtaũkagĩrũo makĩria ũrĩa mendete o ũmwe witũ. (Gal. 2:20) Ũkũũri ndwarutirũo no ũndũ tu wa kũhingia kĩhooto kĩa Jehova. Nĩ kĩheo kĩarutirũo na wendo mũnene. Jehova nĩ oonanirie ũrĩa atwendete na njĩra ya kũruta kĩndũ kĩrĩa kĩa goro mũno harĩ we—Jesu Kristo. Jehova nĩ eetĩkĩririe Mũrũ wake anyamarĩke na akue nĩ ũndũ witũ.

11. Tũreruta atĩa kuumana na Jeremia 31:3?

¹¹ O ta ũrĩa tuona, Jehova to kũigua aiguaga atwendete, no ningĩ nĩ atwĩraga ũrĩa atwendete. (Thoma Jeremia 31:3.) Jehova aatũgucĩrĩirie harĩ we tondũ nĩ atwendete. (Ringithania Gũcokerithia Maathani 7:​7, 8.) Gũtirĩ mũndũ kana kĩndũ kĩngĩtũtigithũkania na wendo wake. (Rom. 8:​38, 39) Hihi wee ũiguaga atĩa nĩ ũndũ wa ũrĩa Jehova akwendete? Thoma Thaburi 23, wone ũrĩa Daudi aaiguaga nĩ ũndũ wa ũrĩa Jehova aamwendete na akamũrũmbũiya, na wone ũrĩa ũndũ ũcio ũngĩkũhutia.

WENDO WA JEHOVA ŨTŨMAGA ŨIGUE ATĨA?

12. Thaburi 23 yaragĩrĩria ũndũ ũrĩkũ?

¹² Thoma Thaburi 23:​1-6. Thĩinĩ wa Thaburi 23, Daudi nĩ oonanirie aarĩ na ma atĩ Jehova nĩ aamwendete na nĩ aamũrũmbũyagia. Nĩ aataarĩirie ũrata mũnene ũrĩa maarĩ naguo  hamwe na Jehova Mũrĩithi wake. Daudi nĩ aaiguaga arĩ na ũgitĩri nĩ ũndũ wa kũreka Jehova amũtongorie, na akĩĩneana biũ moko-inĩ make. Daudi nĩ aamenyaga atĩ Jehova nĩ angĩamuonirie wendo matukũ-inĩ mothe ma ũtũũro wake. Nĩ kĩĩ gĩatũmaga akorũo na ũũma ũcio?

13. Nĩ kĩĩ gĩatũmaga Daudi akorũo na ma atĩ Jehova nĩ aamũrũmbũyagia?

¹³ “Gũtirĩ kĩndũ ingĩaga.” Daudi nĩ oonaga atĩ Jehova nĩ aamũrũmbũyagia tondũ hingo ciothe nĩ aamũheaga kĩrĩa aabataraga. Ningĩ Daudi nĩ eetĩkĩrĩkĩte harĩ Jehova na maarĩ na ũrata wa hakuhĩ nake. Nĩkĩo gĩatũmaga akorũo na ma atĩ o na angĩacemanirie na maũndũ mahaana atĩa ihinda rĩũkĩte, Jehova nĩ angĩathiire na mbere kũmũrũmbũiya. Tondũ Daudi aarĩ na ma atĩ Jehova nĩ aamwendete na nĩ aamũrũmbũyagia, nĩ aahotaga kũhiũrania na mĩtangĩko, agakorũo na gĩkeno na akaiganĩra.—Thab. 16:11.

14. Nĩ na njĩra ta ĩrĩkũ Jehova atũrũmbũyagia na wendo?

¹⁴ Jehova nĩ atũrũmbũyagia na njĩra ya wendo, makĩria rĩrĩa tũracemania na maũndũ maritũ ũtũũro-inĩ. Claire, a ũrĩa ũtungatĩte Betheli makĩria ma mĩaka 20, nĩ aaiguire orũo nĩ hinya rĩrĩa famĩlĩ yao yacemanirie na thĩna ũmwe thutha wa ũrĩa ũngĩ. Baba wao nĩ aahũũrirũo nĩ mũrimũ wa stroke, mwarĩ wa nyina ũmwe akĩeherio kĩũngano-inĩ, kabiacara kao gakĩharagana, na mũciĩ wao ũgĩtahwo. Hihi Jehova aamarũmbũirie atĩa? Claire aaugire: “Jehova nĩ aatigagĩrĩra atĩ o mũthenya famĩlĩ itũ nĩ yona kĩrĩa yabataraga. O na kaingĩ Jehova aatũheaga makĩria ma kĩrĩa twabataraga. Kaingĩ nĩ ndĩciragia ũhoro  wa mahinda macio Jehova aatũrũmbũirie na wendo, na ndirĩ hĩndĩ ngariganĩrũo. Kũririkana mahinda macio nĩ kũndeithagia gũkirĩrĩria rĩrĩa ndĩracemania na moritũ.”

15. Nĩ kĩĩ gĩateithagia Daudi gũcokwo nĩ hinya? (Ningĩ rora mbica.)

¹⁵ “Nĩ atũmaga njokwo nĩ hinya.” Rĩmwe Daudi nĩ aaiguaga arĩ na mĩtangĩko nĩ ũndũ wa mathĩna na magerio marĩa aacemanagia namo. (Thab. 18:​4-6) No tondũ Jehova nĩ aamuonagia wendo muororo na akamũrũmbũiya, nĩ aaiguaga acokwo nĩ hinya. Rĩrĩa Daudi ooragwo nĩ hinya, Jehova nĩ aamũtongoragia “ũrĩithio-inĩ ũrĩ na nyeki nduru” na akamũtwara “kũndũ gwa kũhurũka kũrĩ na maĩ maingĩ.” Nĩ ũndũ ũcio, Daudi nĩ aacokagwo nĩ hinya na akahota gũthiĩ na mbere gũtungatĩra Jehova arĩ na gĩkeno.—Thab. 18:28-32.

16. Wendo wa Jehova ũgũteithĩtie atĩa gũcokwo nĩ hinya?  

¹⁶ O na ũmũthĩ, ‘wendo mwĩhokeku wa Jehova nĩguo ũtũmaga tũtigathire’ rĩrĩa tũracemania na magerio na moritũ ũtũũro-inĩ. (Maca. 3:22; Kol. 1:11) Ta wĩcirie ũhoro wa Rachel. Nĩ aatuurirũo mũno rĩrĩa mũthuri wake aamũtigire na agĩtiga Jehova hĩndĩ ya kĩngʼũki gĩa Korona. Hihi Jehova aamũteithirie atĩa? Aaugire: “Jehova nĩ aatigĩrĩire atĩ nĩ ndaigua atĩ no nyendetwo. Arata aingĩ nĩ mookaga tũkahũthĩra mahinda hamwe, makandehera irio, makandũmĩra ndũmĩrĩri kana rĩandĩko rĩa kũnjĩkĩra ngoro, makandora macanjamũkĩte, na magaikara makĩndirikanagia atĩ Jehova nĩ anũmbũyagia. Nĩ njokagĩria Jehova ngatho kaingĩ nĩ ũndũ wa kũhe famĩlĩ nene ĩrĩ wendo.”

17. Daudi aagaga ‘gwĩtigĩra ũũru o wothe’ nĩkĩ?

¹⁷ “Ndiĩtigagĩra ũũru o wothe, tondũ wee ũrĩ hamwe na niĩ.” Kaingĩ Daudi nĩ aakoragwo ũgwati-inĩ, na aarĩ na thũ nyingĩ irĩ na hinya. No wendo wa Jehova nĩ watũmaga aigue arĩ na ũgitĩri. Daudi nĩ eeyonagĩra atĩ Jehova aarĩ hamwe nake maũndũ-inĩ mothe, na ũndũ ũcio nĩ wamwĩkagĩra hinya. Nĩkĩo aaugire ũũ: “[Jehova nĩ] aahonokirie kuuma harĩ maũndũ mothe marĩa maanjĩkĩraga guoya.” (Thab. 34:4) O na gũtuĩka rĩmwe Daudi nĩ aaiguaga guoya, nĩ aahotaga gũtooria guoya ũcio tondũ nĩ aamenyaga atĩ Jehova nĩ aamwendete.

18. Gũkorũo na ma atĩ Jehova nĩ akwendete kũngĩgũteithia atĩa rĩrĩa ũraigua guoya?

¹⁸ Kũmenya atĩ Jehova nĩ atwendete gũtwĩkĩraga hinya atĩa rĩrĩa tũracemania na maũndũ mangĩtũma twĩtigĩre? Painia ũmwe wĩtagwo  Susi aaugire ũũ agĩtaarĩria ũrĩa we na mũthuri wake maaiguire rĩrĩa mũriũ wao eeyũragire: “Rĩrĩa ũndũ mũũru ta ũcio wekĩka, ũgũtigaga ũrĩtwo nĩ hinya na ũkeyũria kana nĩ kũrĩ maũndũ mangĩ moru megwĩkĩka. No wendo wa Jehova nĩ ũtũmĩte tũigue tũrĩ na ũgitĩri.” Rachel ũrĩa ũkũgwetetwo na hau kabere aaugire ũũ: “Ũtukũ ũmwe ndaiguaga ndĩ na ruo rũingĩ rwa ngoro na ndĩ na guoya mũingĩ, nĩ ndakaĩire Jehova na mũgambo mũnene. O rĩo akĩhooreria ngoro yakwa o ta ũrĩa mũtumia ahooragĩria kaana gake, na ngĩcokwo nĩ thayũ ngĩhota gũkoma. Ndikariganĩrũo nĩ ihinda rĩu.” Nake mũthuri ũmwe wa kĩũngano wĩtagwo Tasos nĩ oohirũo njera mĩaka ĩna nĩ ũndũ wa kũrega kũingĩra njeshi-inĩ. Hihi Jehova aamũrũmbũirie atĩa na wendo? Aaugire: “Jehova aaheire makĩria ma kĩrĩa ndabataraga. Ũndũ ũcio nĩ watũmire ngorũo na ma atĩ no ndĩmwĩhoke biũ. Ningĩ kũgerera roho wake, Jehova nĩ aandeithirie gũtũũria gĩkeno o na ngĩcemanagia na moritũ ma njera. Ũndũ ũcio ũgĩtũma ngorũo na ma atĩ o ũrĩa ngwĩrutanĩria kũrutithania wĩra hamwe nake, noguo ngwĩyonera wega wake. Kwoguo ngĩambĩrĩria gũtungata ndĩ painia wa hĩndĩ ciothe ndĩ o kũu njera.”

KUHĨRĨRIA NGAI WITŨ ŨRĨ WENDO MUORORO

19. (a) Kũmenya atĩ Ngai nĩ atwendete kũngĩhutia atĩa mahoya maitũ? (b) Nĩ ciugo irĩkũ cia gũtaarĩria wendo wa Jehova ikũhutagia mũno? (Rora gathandũkũ, “ Ciugo Ironania Ũrĩa Jehova Atwendete.”)

¹⁹ Maũndũ monetwo marĩa twarĩrĩria gĩcunjĩ-inĩ gĩkĩ nĩ maronania wega atĩ Jehova “Ngai mwene wendo” nĩ akoragwo hamwe na ithuĩ. (2 Kor. 13:11) Nĩ atũrũmbũyagia tũrĩ mũndũ ũmwe ũmwe. Tũrĩ na ma atĩ nĩ ‘tũthiũrũrũkĩirio nĩ wendo Wake mwĩhokeku.’ (Thab. 32:10) O ũrĩa tũrecũrania ũrĩa Jehova atuonetie wendo, noguo tuonaga ũrĩa aratũrũmbũiya, na tũkamũkuhĩrĩria o na makĩria. No tũmũhoe tũtegwĩtigĩra na tũmwĩre ũrĩa wendo wake ũrĩ wa bata harĩ ithuĩ. No tũmũitũrũrĩre mĩtangĩko itũ yothe, tũrĩ na ma atĩ nĩ ataũkagĩrũo nĩ ithuĩ na atĩ nĩ ehaarĩirie gũtũteithia.—Thab. 145:​18, 19.

20. Wendo wa Jehova ũtũgucagĩrĩria nĩkĩ?

²⁰ O ta ũrĩa mwaki ũtwĩkĩraga ũrugarĩ hĩndĩ ya heho, no taguo wendo wa Jehova ũtũũmagĩrĩria rĩrĩa tũracemania na magerio na moritũ. Kwoguo amũkagĩra wendo wake muororo, nĩguo ũkũũmagĩrĩrie na ũkũheage thayũ ũtũũro-inĩ waku. Na ũndũ ũcio ũrotũma o ũmwe witũ auge: “Nĩ nyendete Jehova”!—Thab. 116:1.