1-2. Ndungata njĩhokeku cia Jehova icemanagia na moritũ ta marĩkũ?

 ŨTŨŨRO witũ no ũcenjie o rĩmwe rĩrĩa maũndũ moru matũkora. Kwa ngerekano, mũrũ wa Ithe witũ ũmwe wĩtagwo Luis a nĩ eerirũo atĩ arĩ na kansa. Ndagĩtarĩ aamwĩrire atĩ aatigĩtie mĩeri mĩnini akue. Mwarĩ wa Ithe witũ ũmwe wĩtagwo Monika nĩ maakoragwo na kĩyo hamwe na mũthuri wake ũtungata-inĩ wa Jehova. No mũthenya ũmwe Monika nĩ aamenyire atĩ mũthuri wake, ũrĩa watungataga arĩ mũthuri wa kĩũngano nĩ eeingĩranagia na mĩthiĩre ĩtagĩrĩire kwa ihinda iraihu ehithanĩtie. Nake mwarĩ wa Ithe witũ ũtarĩ kĩhiko-inĩ wĩtagwo Olivia nĩ aabatarire gũthaama gwake tondũ nĩ kũngĩagĩire kĩhuhũkanio kĩnene. Rĩrĩa aacokire, aakorire nyũmba yake ĩthũkangĩtio nĩ kĩhuhũkanio kĩu. Ũtũũro wa Akristiano acio wacenjirie o rĩmwe o ta kũbucia kwa riitho. Hihi wee nĩ ũrĩ wacemania na ũndũ mũritũ ũgĩcenjia ũtũũro waku o rĩmwe?

² O na tũrĩ ndungata njĩhokeku cia Jehova, nĩ tũcemanagia na moritũ na tũkarwara o ta andũ arĩa angĩ. Ningĩ no tũbatare gũkirĩrĩria gũkarario kana kũnyarirũo nĩ andũ arĩa mathũire andũ a Ngai. O na gũtuĩka Jehova ndatũgitagĩra tũtigakorũo nĩ moritũ ta macio, nĩ atwĩrĩire atĩ nĩ arĩtũteithagia. (Isa. 41:10) Kũgerera ũteithio wake, no tũhote gũtũũria gĩkeno, gũtua matua mega, na gũtũũra tũrĩ ehokeku harĩ we nginya rĩrĩa twacemania na maũndũ maritũ mũno. Gĩcunjĩ-inĩ gĩkĩ, tũkwarĩrĩria njĩra inya Jehova atũteithagia nacio rĩrĩa twacemania na moritũ ũtũũro-inĩ witũ. Ningĩ nĩ tũkwarĩrĩria ũrĩa tũrabatara  gwĩka nĩguo tũgunĩke kuumana na ũteithio ũrĩa atũheaga.

JEHOVA NĨ ARĨKŨGITAGĨRA

3. Nĩ maũndũ marĩkũ tũngĩritũhĩrũo gwĩka rĩrĩa tũragerera ũndũ mũritũ?

³ Ũritũ ũrĩa ũkoragwo ho. Rĩrĩa tũragerera ũndũ mũritũ, no ũkorũo ũtarĩ ũndũ mũhũthũ gwĩciria wega na gũtua matua mega. Nĩkĩ? Tondũ no tũkorũo na ruo rũingĩ rwa ngoro, na meciria maitũ no makorũo magũmĩirũo nĩ mĩtangĩko. No tũigue ta tũrĩ mũtitũ-inĩ mũtumanu, tũtekũmenya kũrĩa tũkuumĩrĩra. Ta rora ũrĩa aarĩ a Ithe witũ acio erĩ mekũgwetetwo maaiguaga rĩrĩa maageragĩra moritũ macio. Olivia aaugire, “Rĩrĩa nyũmba yakwa yaanangirũo nĩ kĩhuhũkanio kĩu, ndaiguire ndukanĩirũo na ndĩ mũritũhĩre mũno.” Nake Monika aaugire ũũ igũrũ rĩgiĩ ũrĩa mũthuri wake aagire wĩhokeku: “Ndaiguire njũragĩtwo ngoro mũno. Ndarĩ na ruo rwatũmaga njigue ta ndĩrathecangwo na kũu thĩinĩ. Ndaritũhagĩrũo nginya nĩ maũndũ marĩa ndaamenyerete gwĩka o mũthenya. Ndirĩ ndakira ũguo ngeciria atĩ ũndũ ta ũcio no ũngore.” Hihi Jehova atwĩrĩire arĩtũteithagia atĩa rĩrĩa tũraigua tũritũhĩirũo?

4. Jehova atwĩrĩire atĩa kũringana na Afilipi 4:​6, 7?

⁴ Jehova atũteithagia atĩa? Atwĩrĩire atĩ nĩ arĩtũheaga kĩrĩa Bibilia ĩtaga “thayũ wa Ngai.” (Thoma Afilipi 4:​6, 7.) Thayũ ũcio nĩ gũkorũo mũndũ ahooreire ngoro na meciria nĩ ũndũ wa kũgĩa na ũrata wa hakuhĩ hamwe na Jehova. Thayũ ũcio nĩ “ũkĩrĩte ũtaũku wothe,” ũguo nĩ kuuga nĩ mwega gũkĩra ũrĩa tũngĩĩcirĩria. Hihi kũrĩ hĩndĩ ũrĩ waigua ũhooreire na njĩra ũtangĩecirĩirie thutha wa kũhoya Jehova na kĩyo? “Thayũ wa Ngai” nĩguo watũmire ũigue ũhooreire na njĩra ĩyo.

5. Thayũ wa Ngai ũgitagĩra atĩa meciria na ngoro citũ?

⁵ Mĩhari ĩyo ningĩ nĩ yugaga atĩ thayũ wa Ngai “nĩ ũrĩgitagĩra ngoro cianyu na ũhoti wanyu wa gwĩciria.” Kiugo kĩrĩa gĩtaũrĩtwo ‘kũgitĩra,’ kĩahũthagĩrũo gũtaarĩria thigari iria ciagitagĩra itũũra nĩguo rĩtigatharĩkĩrũo. Aikari a itũũra rĩgitĩre nĩ maakomaga na thayũ tondũ nĩ maamenyaga atĩ kũrĩ na thigari ihingo-inĩ. Na njĩra o ta ĩyo, rĩrĩa thayũ wa Ngai wagitĩra ngoro na meciria maitũ, tũiguaga tũhooreire nĩ ũndũ wa kũmenya atĩ tũrĩ na ũgitĩri. (Thab. 4:8) O na angĩkorũo maũndũ maitũ matigũcenjia o rĩo ta gwathiire harĩ Hana, no tũrĩiguaga tũrĩ na thayũ. (1 Sam. 1:​16-18) Na rĩrĩa twaigua tũhooreire, no ũkorũo ũrĩ ũndũ mũhũthũ harĩ ithuĩ gwĩciria na njĩra njega na gũtua matua ma ũũgĩ.

6. Tũngĩka atĩa nĩguo tũgĩe na thayũ wa Ngai? (Ningĩ rora mbica.)

⁶ Ũrĩa tũrabatara gwĩka. Rĩrĩa ũrĩ na mĩtangĩko, caria ũgitĩri na njĩra ya gũitũrũrĩra  Jehova ngoro yaku nginya rĩrĩa ũrĩigua ũrĩ na thayũ wa Ngai. (Luk. 11:9; 1 Thes. 5:17) Luis ũrĩa ũkũgwetetwo na hau kabere, nĩ aataarĩirie ũndũ ũrĩa wamateithirie marĩ na mũtumia wake Ana, rĩrĩa maamenyire atĩ atigĩtie mĩeri mĩnini akue. Aaugire: “Ihinda-inĩ ta rĩu, ndũkoragwo ũrĩ ũndũ mũhũthũ o na hanini gũtua matua megiĩ ũrigitani na maũndũ mangĩ. No mahoya nĩ matũteithĩtie gũkorũo na thayũ ihinda-inĩ rĩrĩ iritũ.” Luis na mũtumia wake maaugire atĩ maahoyaga mategũtigithĩria, makera Jehova amahe thayũ wa meciria na wa ngoro, na amahe ũũgĩ wa gũtua matua mega. Na Jehova nĩ aamateithirie. Angĩkorũo nĩ ũrahiũrania na ũndũ mũritũ, hoya ũtegũtigithĩria, na Jehova nĩ arĩkũheaga thayũ wake ũrĩa ũrĩgitagĩra ngoro yaku na meciria maku.—Rom. 12:12.

JEHOVA NĨ ARĨGŨTEITHAGIA GŨIKARA ŨRŨMĨTE WEGA

7. Rĩmwe tũiguaga atĩa rĩrĩa tũrahiũrania na moritũ?

⁷ Ũritũ ũrĩa ũkoragwo ho. Rĩrĩa tũrahiũrania na moritũ, mwĩcirĩrie witũ, ũrĩa tũraigua ngoro-inĩ, na mĩĩkĩre itũ ya maũndũ no ihutio na njĩra nene mũno. Meciria maitũ no macũgacũgio nĩ moritũ macio o ta ũrĩa meri ĩcũgacũgagio mwena na mwena nĩ makũmbĩ. Ana aaugire atĩ rĩrĩa Luis aakuire, nĩ eekoraga arĩ na meciria maingĩ. Aaugire ũũ: “Rĩrĩa ndagũmagĩrũo mũno nĩ mĩtangĩko, ndambagĩrĩria o kwĩiguĩra tha. Ningĩ nĩ ndaiguaga ndakarĩte nĩ gũkorũo atĩ Luis ndarĩ ho.” Makĩria ma ũguo, Ana nĩ aaiguaga arĩ na ihooru na akaigua akĩremererũo gũtua matua megiĩ maũndũ marĩa oonaga Luis akĩhota kũrũmbũiya wega. Rĩmwe aaiguaga ta arĩ iria-inĩ rĩrĩ na kĩhuhũkanio. Hihi Jehova atũteithagia atĩa rĩrĩa twaigua ta tũgũtoorio nĩ mĩtangĩko?

8. Nĩ ũndũ ũrĩkũ Jehova atwĩrĩire kũringana na Isaia 33:6?

⁸ Jehova atũteithagia atĩa? Atwĩrĩire atĩ nĩ arĩtũteithagia gũikara tũrũmĩte wega. (Thoma Isaia 33:6.) Rĩrĩa kwagĩa kĩhuhũkanio iria-inĩ, meri no yambĩrĩrie gũcũgacũgio mwena na mwena ũndũ ĩngĩrehe ũgwati. Nĩ ũndũ ũcio, meri nyingĩ nĩ ikoragwo na cuma icomokete mĩena yerĩ rungu rwa maĩ, cia kũmĩteithia gũikara ĩrũmĩte wega. Cuma icio nĩ iteithagia meri ndĩgacũgio mũno, na ũndũ ũcio ũgatũma arĩa marĩ thĩinĩ wayo maigue marĩ na ũgitĩri na matarĩ na wagagu. O na kũrĩ ũguo, cuma icio irutaga wĩra wega rĩrĩa meri ĩrathiĩ. Na njĩra o ta ĩyo, Jehova atũteithagia gũikara tũrũmĩte wega rĩrĩa twathiĩ na mbere kũmũtungatĩra tũrĩ ehokeku hĩndĩ ya moritũ.

9. Indo citũ cia gwĩka ũthuthuria ingĩtũteithia atĩa gũikara tũrũmĩte wega? (Ningĩ rora mbica.)

⁹ Ũrĩa tũrabatara gwĩka. Rĩrĩa ũgũmĩirũo  nĩ mĩtangĩko, wĩrutanĩrie gũtũũria mũtaratara waku wa maũndũ ma kĩĩroho. Ma nĩ atĩ, no ũremwo nĩ kũhingia maũndũ mothe marĩa ũrahotaga kũhingia na hau kabere, no Jehova nderĩgagĩrĩra tũhingie maũndũ makĩrĩte ũhoti witũ. (Ringithania Luka 21:​1-4.) Ningĩ caragia mahinda ma gwĩka wĩruti waku kĩũmbe na gwĩcũrania. Nĩkĩ? Tondũ kũgerera ithondeka rĩake, Jehova nĩ atũheete irio nyingĩ cia kĩĩroho iria ingĩtũteithia gũikara tũrũmĩte wega. Nĩguo wone ũhoro ũrĩa ũrabatara, no ũhũthĩre indo cia gwĩka ũthuthuria iria ironeka na rũthiomi rwanyu, ta JW Library^®, Ũteithio wa Ũthuthuria Harĩ Aira a Jehova, na Fahirisi. Monika, ũrĩa ũkũgwetetwo na hau kabere, aaugire atĩ rĩrĩa aaiguaga agũmĩirũo nĩ mĩtangĩko, aahũthagĩra indo cia gwĩka ũthuthuria nĩguo one ũtaaro ũrĩa aabataraga. Kwa ngerekano, nĩ aathuthuragia ũhoro wĩgiĩ “marakara,” na rĩmwe agathuthuria ũhoro wĩgiĩ “kwaga wĩhokeku” kana “wĩhokeku.” Agacoka agathoma ũhoro ũcio nginya rĩrĩa arĩigua ahoorera. Aaugire: “Ngĩambĩrĩria gwĩka ũthuthuria ndaiguaga ndĩ na mĩtangĩko, no ndathiĩ na mbere gũthoma, ngaigua ta Jehova arahĩmbĩria. Ngĩthoma nĩ ndonaga atĩ Jehova nĩ aataũkagĩrũo nĩ ũrĩa ndĩraigua ngoro-inĩ na akandeithia.” Jehova no agũteithie na njĩra o ta ĩyo gũikara ũrũmĩte wega nginya rĩrĩa ũrĩigua wahoorera.—Thab. 119:​143, 144.

JEHOVA NĨ ARĨGŨTIIRAGĨRĨRA

10. Rĩmwe tũiguaga atĩa rĩrĩa tũragerera ũndũ mũritũ?

¹⁰ Ũritũ ũrĩa ũkoragwo ho. Rĩrĩa tũragerera ũndũ mũritũ, rĩmwe no tũigue tũũrĩtwo nĩ hinya na tũkuĩte ngoro. No tũigue ta ũrĩa mũtengʼeri njorua angĩigua angĩgurario kũgũrũ. No tũremererũo kũhingia maũndũ marĩa tũrahotaga kũhingia na hau kabere, kana tũigue tũtarĩ na wendi wa gwĩka maũndũ marĩa tũrakenagĩra. O ta Elija, no tũigue gũtirĩ ũndũ ũngĩ tũrenda tiga o gũkoma. (1 Ath. 19:​5-7) Jehova eranĩire arĩtũteithagia atĩa rĩrĩa tũtarĩ na hinya?

11. Nĩ njĩra ĩrĩkũ ĩngĩ Jehova atũteithagia nayo? (Thaburi 94:18)

¹¹ Jehova atũteithagia atĩa? Eranĩire atĩ nĩ arĩtũtiiragĩrĩra. (Thoma Thaburi 94:18.) O ta ũrĩa mũtengʼeri ũgurarĩtio abataraga gũtiirĩrĩrũo nĩguo ahote gũthiĩ, o na ithuĩ no tũbatare gũtiirĩrĩrũo nĩguo tũhote gũthiĩ na mbere gũtungatĩra Jehova. Hĩndĩ ta ĩyo, Jehova atwĩrĩire ũũ: “Niĩ Jehova Ngai waku, nĩ nyitĩte guoko gwaku kwa ũrĩo, na ngakwĩra atĩrĩ, ‘Ndũgetigĩre. Nĩ ngũgũteithia.’” (Isa. 41:13) Mũthamaki Daudi nĩ aateithirio na njĩra ta  ĩyo. Rĩrĩa aahiũranagia na magerio na agokĩrĩrũo nĩ thũ, eerire Jehova ũũ: “Guoko gwaku kwa ũrĩo nĩ kũndiiragĩrĩra.” (Thab. 18:35) No hihi Jehova atũtiiragĩrĩra atĩa?

12. Nĩa Jehova angĩhũthĩra gũtũteithia rĩrĩa tũũrĩtwo nĩ hinya?

¹² Kaingĩ Jehova nĩ ahũthagĩra andũ angĩ gũtũtiirĩrĩra. Kwa ngerekano, hĩndĩ ĩmwe Daudi aaiguaga orĩtwo nĩ hinya, mũrata wake Jonathani nĩ aamũceereire nĩguo amwĩkĩre hinya na amũũmĩrĩrie. (1 Sam. 23:​16, 17) Jehova ningĩ nĩ aahũthĩrire Elisha kũhe Elija ũteithio ũrĩa aabataraga. (1 Ath. 19:​16, 21; 2 Ath. 2:2) O na mahinda-inĩ maya, Jehova no ahũthĩre andũ a famĩlĩ, arata, kana athuri a kĩũngano gũtũtiirĩrĩra. O na kũrĩ ũguo, rĩrĩa tũrĩ na mĩtangĩko, no tũigue tũkĩenda kwĩyamũrania na arĩa angĩ, tũkenda o kwĩikaria. Andũ aingĩ nĩ maiguaga ũguo. Tũngĩka atĩa nĩguo twamũkĩre ũteithio wa Jehova?

13. Twagĩrĩirũo gwĩka atĩa nĩguo tũgunĩke kuumana na ũteithio wa Jehova? (Ningĩ rora mbica.)

¹³ Ũrĩa tũrabatara gwĩka. Wĩtheme kwĩyamũrania na arĩa angĩ. Rĩrĩa tweyamũrania na arĩa angĩ, kaingĩ mwĩcirĩrie witũ nĩ ũkunderaga, tũkaambĩrĩria gwĩciria o ũhoro witũ ene na mathĩna marĩa tũragerera. Mwĩcirĩrie ta ũcio no ũtũme tũtue matua matarĩ mega. (Thim. 18:1) O na gũtuĩka rĩmwe nĩ wega gũkorũo na mahinda tũrĩ oiki makĩria rĩrĩa tũragerera ũndũ mũritũ, tũngĩĩyamũrania na arĩa angĩ kwa ihinda iraihu, tũngĩkorũo tũkĩeherera ũteithio ũrĩa Jehova arahũthĩra gũtũtiirĩrĩra. Kwoguo o na angĩkorũo ti hahũthũ gwĩka ũguo rĩrĩa ũragerera ũndũ mũritũ, koragwo wĩhaarĩirie gwĩtĩkĩra ũteithio wa andũ a famĩlĩ, arata, na athuri a kĩũngano. Onaga atĩ nĩo Jehova arahũthĩra gũgũtiirĩrĩra.—Thim. 17:17; Isa. 32:​1, 2.

JEHOVA NĨ ARĨKŨŨMAGĨRĨRIA

14. Nĩ maũndũ ta marĩkũ tũngĩcemania namo matũme tũigue guoya?

¹⁴ Ũritũ ũrĩa ũkoragwo ho. Rĩmwe no tũcemanie na maũndũ mangĩtũma tũigue guoya. Bibilia nĩ yaragia ũhoro wa ndungata njĩhokeku cia Jehova ciagwetire mahinda ciarĩ na mĩtangĩko na ikaigua guoya nĩ ũndũ wa thũ kana mathĩna mangĩ. (Thab. 18:4; 55:​1, 5) O na ithuĩ no tũcemanie na ũkararia tũrĩ cukuru, wĩra-inĩ, kuuma kũrĩ andũ a famĩlĩ, kana kuuma kũrĩ anene a thirikari. O na no tũngʼethanĩre na gĩkuũ nĩ ũndũ wa mũrimũ. Mahinda-inĩ ta macio no tũigue guoya, ta ũrĩa kaana kanini getigagĩra maũndũ. Jehova atũteithagia atĩa hĩndĩ ta ĩyo?

15. Thaburi 94:19 ĩratũhe ũũma ũrĩkũ?

 ¹⁵ Jehova atũteithagia atĩa? Nĩ atũũmagĩrĩria na agatũhooreria. (Thoma Thaburi 94:19.) Mũhari ũcio no ũtũme twĩcirie ũhoro wĩgiĩ kairĩtu kararemwo gũkoma nĩ ũndũ wa gwĩtigĩra marurumĩ manene, no ithe agoka agakahĩmbĩria nginya rĩrĩa karĩkoma. O na gũtuĩka marurumĩ no megũthiĩ na mbere kũgamba, karaigua komĩrĩirio na karĩ na ũgitĩri nĩ ũndũ wa kũhĩmbĩrio nĩ ithe. Rĩrĩa twacemania na magerio mangĩtũma tũigue guoya, no tũbatare kũhĩmbĩrio nĩ Ithe witũ wa igũrũ na njĩra ya mũhaano, nginya rĩrĩa tũrĩigua twahoorera. Tũngĩka atĩa nĩguo Jehova atũũmĩrĩrie na njĩra ta ĩyo?

16. Tũngĩka atĩa nĩguo Jehova atũũmĩrĩrie? (Ningĩ rora mbica.)

¹⁶ Ũrĩa tũrabatara gwĩka. Hũthagĩra mahinda hamwe na Jehova kaingĩ na njĩra ya kũmũhoyaga na gũthomaga Kiugo gĩake. (Thab. 77:1, 12-14) Ũngĩmenyera gwĩkaga ũguo, kwahoteka ũndũ ũrĩa ũrĩambaga gwĩka rĩrĩa wagĩa mĩtangĩko nĩ kũhoya Jehova agũteithie. Ĩraga Jehova maũndũ marĩa maragũtanga na marĩa maratũma ũigue guoya. Ũcoke ũmũhe mweke wa gũkwarĩria na gũkũũmĩrĩria kũgerera Maandĩko. (Thab. 119:28) Ũngĩka ũguo no ũkore nĩ wathoma mĩhari ya Bibilia ĩgũkũũmĩrĩria rĩrĩa waigua guoya. Kwa ngerekano, no ũmĩrĩrio ũngĩthoma mabuku ta Ayubu, Thaburi, Thimo, o hamwe na ciugo cia Jesu iria irĩ thĩinĩ wa Mathayo mũrango wa 6. Rĩrĩa wahoya Jehova na wathoma Kiugo gĩake, nĩ ũrĩiguaga womĩrĩrio nĩwe.

17. Nĩ ũũma ũrĩkũ tũngĩkorũo naguo?

¹⁷ No tũkorũo na ma atĩ hingo ciothe Jehova nĩ arĩtũteithagia rĩrĩa twacemania na moritũ ũtũũro-inĩ. Ndarĩ hĩndĩ angĩtũtiganĩria. (Thab. 23:4; 94:14) Jehova eranĩire atĩ nĩ arĩtũgitagĩra, agatũteithia gũikara tũrũmĩte wega, agatũtiirĩrĩra, na agatũũmĩrĩria. Isaia 26:3 yugaga ũũ igũrũ rĩgiĩ Jehova: “Wee nĩ ũkaagitĩra arĩa metiiragĩrĩra biũ harĩ wee; nĩ ũkaamahe thayũ wa gũtũũra, tondũ wee nĩwe mehokete.” Kwoguo wĩhoke Jehova, na ũgeekaga ũrĩa wothe ũngĩhota nĩgetha ũgunĩke kuumana na ũteithio wake. Weka ũguo, nĩ ũrĩcokagwo nĩ hinya nginya hĩndĩ ya moritũ.