KIUGO kĩrĩa gĩtaũrĩtwo ‘ngaari ya mbarathi’ Bibilia-inĩ ya New World Translation no kĩhũthĩrũo kwarĩrĩria ngaari cia mĩthemba ĩtiganĩte. (Atũm. 8:28, 29, 38) O na kũrĩ ũguo, kuonekaga atĩ Mũethiopia ũcio aakuuĩtwo nĩ ngaari nene ya mbarathi no ti ngaari nini ya mbarathi ta iria ciahũthagĩrũo mbaara-inĩ kana macindano-inĩ ma mahenya. Reke twarĩrĩrie itũmi imwe ingĩtũma tuuge ũguo.

Mũethiopia ũcio aarĩ mũndũ warĩ na ũnene na aathiĩte rũgendo rũraihu. “Aarĩ mũndũ warĩ na wathani rungu rwa Kandake, mũtumia ũrĩa warĩ mũthamaki wa Ethiopia, na nĩwe warũgamagĩrĩra kĩgĩna gĩake gĩothe.” (Atũm. 8:27) Ethiopia ya tene yahutĩtie gĩcigo kĩa bũrũri ũrĩa wĩtagwo Sudan ũmũthĩ na mwena wa mũhuro biũ wa bũrũri ũrĩa wĩtagwo Misiri ũmũthĩ. O na gũtuĩka no kũhoteke Mũethiopia ũcio ndaakuuirũo nĩ ngaari ĩmwe rũgendo rũu ruothe, no mũhaka akorũo nĩ aarĩ na mĩrigo nĩ ũndũ wa rũgendo rũu rũraihu. Ngaari imwe iria ciahũthagĩrũo gũkuua andũ karine-inĩ ya mbere, ciakoragwo irĩ ngaari cia gũkururio irĩ na magũrũ mana. Ibuku rĩmwe rĩtaaragĩria ibuku rĩa Atũmwo riugaga ũũ: “Ngaari ta icio cia mbarathi nĩ ciarĩ na kũndũ kũnene gwa kũiga mĩrigo, igatũma andũ makenere rũgendo, na hihi ikahotithia andũ gũthiĩ rũgendo rũraiharaihu.

Mũethiopia ũcio nĩ gũthoma aathomaga rĩrĩa Filipu aathiire harĩ we. Bibilia yugaga: “Filipu agĩthiĩ, agĩtwarana nayo atengʼerete arĩ mwena-inĩ na [akĩigua Mũethiopia ũcio] agĩthoma na kayũ ibuku rĩa mũnabii Isaia.” (Atũm. 8:30) Ngaari icio cia gũkururio nĩ mbarathi itiathondeketwo ũndũ ingĩthiĩ na ihenya. Tondũ ngaari ĩyo yathiaga kahora, Mũethiopia ũcio nĩ angĩahotire gũthoma, na Filipu nĩ angĩahotire kũmĩkinyĩra atengʼerete.

Mũethiopia ũcio aathaithire “Filipu ahaice aikare thĩinĩ hamwe nake.” (Atũm. 8:31) Ngaari ya mbarathi ya macindano ma mahenya yatwarithagio mũndũ arũgamĩte. No ngaari ya mbarathi ya gũthiĩ rũgendo nĩ yakoragwo na handũ ha gũikarĩrũo harĩa Mũethiopia ũcio na Filipu mangĩaikarĩire.

Nĩ ũndũ wa ũrĩa Atũmwo mũrango wa 8 yugĩte na ũira ũngĩ wĩgiĩ historĩ, mabuku maitũ rĩu monanagia mbica ya Mũethiopia ũcio akuuĩtwo nĩ ngaari nene ya mbarathi no ti ngaari nini ya mbarathi ta iria ciahũthagĩrũo mbaara-inĩ kana macindano-inĩ ma mahenya.