GĨCUNJĨ KĨA WĨRUTI GĨA 5
RWĨMBO NA. 108 Wendo Mwĩhokeku wa Ngai
Ũrĩa Tũgunĩkaga Kuumana na Wendo wa Jehova
“Kristo Jesu ookire thĩinĩ wa thĩ kũhonokia ehia.”—1 TIM. 1:15.
ŨNDŨ ŨRĨA WARĨRĨIRIO
Nĩ tũkuona ũrĩa tũgunĩkaga kuumana na ũkũũri, na ũrĩa tũngĩonania ngatho citũ harĩ Jehova.
1. Nĩ atĩa tũbatiĩ gwĩka nĩguo tũkenie Jehova?
TA HŨŨRA mbica ũheete mũndũ wendete kĩheo kĩa goro na kĩngĩmũteithia. Na githĩ to ũigue ũũru mũno ũngĩmenya atĩ mũndũ ũcio aathiire akĩiga kĩheo kĩu handũ na ndatindanagĩra nakĩo? Ngũrani na ũguo, no ũkene mũno ũngĩmenya atĩ nĩ arahũthĩra kĩheo kĩu ũrĩa kwagĩrĩire na akonania ngatho nĩ ũndũ wakĩo. Ngerekano ĩyo ĩratũruta atĩa? Jehova nĩ aarutire Mũrũ wake akue nĩ ũndũ witũ. Kwoguo no mũhaka akorũo Jehova nĩ akenaga mũno rĩrĩa ona tũkĩonania ngatho nĩ ũndũ wa kĩheo kĩu kĩa goro, na nĩ ũndũ wa wendo wake ũrĩa wamũtindĩkire kũruta ũkũũri.—Joh. 3:16; Rom. 5:7, 8.
2. Tũkwarĩrĩria maũndũ marĩkũ gĩcunjĩ-inĩ gĩkĩ?
2 No o ũrĩa mahinda marathiĩ, no twĩkore tũkĩambĩrĩria kũhũthia kĩheo kĩu gĩa ũkũũri. Gwĩka ũguo no kũringithanio na kũiga kĩheo kĩu handũ tũtarakĩona, na kwoguo tũkaga gũtindanĩra nakĩo. Nĩgetha tũtigekore ta hau, no mũhaka tũikare tũkĩrurumũraga ngatho citũ nĩ ũndũ wa ũrĩa Jehova na Jesu matwĩkĩire. Gĩcunjĩ gĩkĩ nĩ gĩgũtuonia ũrĩa tũngĩka ũguo. Tũkwarĩrĩria ũrĩa tũgunĩkaga kuumana na ũkũũri ihinda-inĩ rĩrĩ na ũrĩa tũkaagunĩka kuumana naguo ihinda rĩũkĩte. Ningĩ nĩ tũkuona ũrĩa tũngĩonania ngatho citũ nĩ ũndũ wa wendo wa Jehova, makĩria ihinda-inĩ rĩrĩ rĩa Kĩririkano.
ŨRĨA TŨGUNĨKAGA IHINDA-INĨ RĨRĨ
3. Nĩ na njĩra ĩrĩkũ ĩmwe tũgunĩkaga kuumana na ũkũũri ihinda-inĩ rĩrĩ?
3 Ihinda-inĩ rĩrĩ nĩ tũgunĩkaga kuumana na igongona rĩa ũkũũri rĩa Jesu. Kwa ngerekano, Jehova atuohagĩra mehia nĩ ũndũ wa ũkũũri. Ũrĩa kũrĩ nĩ atĩ to nginya atuohere mehia, no ekaga ũguo na kwĩyendera. Mwandĩki wa Thaburi aaugire ũũ arĩ na ngatho nyingĩ: “Nĩ gũkorũo wee Jehova ũrĩ mwega na ũkoragwo wĩhaarĩirie kuohanĩra.”—Thab. 86:5; 103:3, 10-13.
4. Jehova aarutire ũkũũri nĩ ũndũ wa andũ arĩkũ? (Luka 5:32; 1 Timotheo 1:15)
4 Andũ amwe no maigue ta matagĩrĩire kuoherũo mehia mao. Ma nĩ atĩ, gũtirĩ o na ũmwe witũ wĩ na kĩhooto gĩa kuoherũo mehia. O na mũtũmwo Paulo aaugire atĩ “[ndaagĩrĩire] gwĩtwo mũtũmwo.” No ningĩ aacokire akiuga: “Nduĩkĩte ũguo ndariĩ kũgerera ũtugi mũnene wa Ngai.” (1 Kor. 15:9, 10) Rĩrĩa twerira mehia maitũ, Jehova nĩ atuohagĩra. No ndatuohagĩra atĩ tondũ nĩ tũragĩrĩra, ĩndĩ ekaga ũguo tondũ nĩ atwendete. Kwoguo angĩkorũo nĩ ũiguaga ta ũtagĩrĩire kuoherũo, ririkanaga atĩ Jehova ndaarutire ũkũũri nĩ ũndũ wa andũ akinyanĩru, no aaũrutire nĩ ũndũ wa andũ ehia arĩa mehaarĩirie kwĩrira.—Thoma Luka 5:32; 1 Timotheo 1:15.
5. Hihi harĩ mũndũ wagĩrĩirũo kuona ta arĩ o mũhaka Jehova amuohere? Taarĩria.
5 Gũtirĩ o na ũmwe witũ wagĩrĩirũo kuona ta arĩ o mũhaka Jehova amuohere atĩ tondũ hihi nĩ amũtungatĩire mĩaka mĩingĩ. Ũrĩa kũrĩ nĩ atĩ, Jehova ndangĩriganĩrũo nĩ maũndũ marĩa twanamwĩkĩra. (Ahib. 6:10) O na kũrĩ ũguo, ũkũũri nĩ kĩheo Jehova aatũheire o ũguo tũhũ, no ti marĩhi ma ũtungata ũrĩa tũmũrutagĩra. Kwoguo mũndũ angĩĩra atĩ arĩ na kĩhooto gĩa kuoherũo mehia atĩ tondũ nĩ atungatĩire Jehova ihinda iraihu, angĩkorũo akĩonania atĩ hatiarĩ bata wa Jesu gũtũkuĩra.—Ringithania Agalatia 2:21.
6. Nĩ kĩĩ gĩatũmaga Paulo atungatĩre Jehova na kĩyo?
6 Paulo nĩ aamenyaga atĩ gwĩkĩra kĩyo ũtungata-inĩ wa Jehova tikuo kũngĩatũmire etĩkĩrĩke nĩwe. No nĩ kĩĩ gĩagĩtũmaga erutanĩrie ũguo wothe gũtungatĩra Jehova? Ndeekaga ũguo nĩgetha onanie atĩ nĩ aragĩrĩra, no eekaga ũguo nĩguo onanie ngatho nĩ ũndũ wa ũtugi mũnene wa Jehova. (Ef. 3:7) O ta Paulo, o na ithuĩ tũthiaga na mbere gũtungatĩra Jehova na kĩyo nĩgetha tuonanie ngatho citũ nĩ ũndũ wa wohanĩri wake, no ti nĩguo tuonanie atĩ nĩ tũragĩrĩra kuoherũo.
7. Nĩ njĩra ĩrĩkũ ĩngĩ tũgunĩkaga nayo ihinda-inĩ rĩrĩ kuumana na ũkũũri? (Aroma 5:1; Jakubu 2:23)
7 Njĩra ĩngĩ tũgunĩkaga nayo ihinda-inĩ rĩrĩ kuumana na ũkũũri, nĩ gũkorũo na ũrata wa hakuhĩ hamwe na Jehova. a O ta ũrĩa gĩcunjĩ kĩrĩa kĩhĩtũku kĩoonanirie, gũtirĩ mũndũ ũciaragwo arĩ na ũrata hamwe na Ngai. No nĩ ũndũ wa ũkũũri, no tũkorũo na “thayũ hamwe na Ngai” na tũtuĩke arata ake.—Thoma Aroma 5:1; Jakubu 2:23.
8. Twagĩrĩirũo gũcokeria Jehova ngatho nĩkĩ nĩ ũndũ wa gũtũhe kĩheo kĩa mahoya?
8 Gũkorũo na ũrata wa hakuhĩ na Jehova nĩ gũtũheaga mweke wa mwanya wa kwaranĩria nake kũgerera mahoya. Jehova ndaiguaga o mahoya marĩa tũhoyaga tũgomanĩte hamwe, ĩndĩ nĩ nginya marĩa tũhoyaga tũrĩ mũndũ kĩũmbe. Na mahoya to kũhooreria mahooragĩria ngoro citũ na gũtũhe thayũ wa meciria, no ningĩ nĩ mekĩraga hinya ũrata witũ na Jehova. (Thab. 65:2; Jak. 4:8; 1 Joh. 5:14) Rĩrĩa Jesu aarĩ gũkũ thĩ, nĩ aahoyaga kaingĩ tondũ nĩ aamenyaga atĩ Jehova nĩ aamũthikagĩrĩria, na atĩ mahoya make nĩ meekĩraga hinya ũrata wao hamwe na Ithe. (Luk. 5:16) Nĩ tũcokagia ngatho tondũ igongona rĩa Jesu nĩ rĩtũhotithagia gũtuĩka arata a Jehova na kwaranĩria nake kũgerera mahoya.
ŨRĨA TŨKAAGUNĨKA IHINDA-INĨ RĨŨKĨTE
9. Tũkaagunĩka atĩa ihinda-inĩ rĩũkĩte kuumana na ũkũũri?
9 Tũkaagunĩka atĩa ihinda-inĩ rĩũkĩte kuumana na ũkũũri? Nĩ tũkaaheo muoyo wa tene na tene. Andũ aingĩ monaga ta ũndũ ũcio ũtangĩhoteka tondũ andũ matũũrĩte makuĩte. No muoroto wa Jehova kuuma o kĩambĩrĩria warĩ andũ matũũre tene na tene. Korũo Adamu ndehirie, gũtirĩ mũndũ ũngĩritũhagĩrũo gwĩtĩkia atĩ no tũtũũre tene na tene. O na gũtuĩka no ũkorũo ũtarĩ ũndũ mũhũthũ gwĩtĩkia atĩ no tũtũũre tene na tene, tũngĩciria ũhoro wa thogora mũnene ũrĩa Jehova aarĩhire rĩrĩa aarutire Mũrũ wake wa mũmwe, no tũkorũo na ma atĩ ũndũ ũcio no ũhoteke.—Rom. 8:32.
10. Nĩ kĩĩrĩgĩrĩro kĩrĩkũ arĩa aitĩrĩrie maguta na arĩa a ngʼondu ingĩ merĩgagĩrĩra?
10 O na gũtuĩka tũkaaheo muoyo wa tene na tene ihinda rĩũkĩte, Jehova nĩ endaga tũhũũrage mbica ihinda-inĩ rĩrĩ ũrĩa ũtũũro ũcio ũgaakorũo ũhaana. Akristiano arĩa aitĩrĩrie maguta nĩ merĩgagĩrĩra gũgaakenera ũtũũro kũrĩa igũrũ magĩthamaka hamwe na Kristo igũrũ rĩa thĩ. (Kũg. 20:6) Nao arĩa a ngʼondu ingĩ nĩ merĩgagĩrĩra gũgaatũũra thĩinĩ wa paradiso gũkũ thĩ gũtarĩ na mathĩna kana ruo. (Kũg. 21:3, 4) Hihi kĩĩrĩgĩrĩro gĩaku nĩ gĩa gũgaatũũra tene na tene gũkũ thĩ? Ndũbatiĩ kuona ta ĩyo arĩ ngerenwa ya gĩkĩro gĩa thĩ ĩringithanĩtio na ya gũthiĩ igũrũ. Ririkana atĩ Jehova oombĩte andũ matũũre gũkũ thĩ, kwoguo no tũkorũo na ma atĩ nĩ tũgaakenera gũtũũra gũkũ thĩ tene na tene.
11-12. Nĩ irathimo ta irĩkũ twĩrĩgagĩrĩra gũgaakenera thĩinĩ wa Paradiso? (Ningĩ rora mbica.)
11 Ta hũũra mbica ũrĩa ũtũũro waku ũgaakorũo ũhaana thĩinĩ wa Paradiso. Ndũkaabatara gwĩtigĩra atĩ nĩ ũkũrwara kana ũkue. (Isa. 25:8; 33:24) Jehova nĩ agaakũhingĩria merirĩria mothe mega ũkoragwo namo. Nĩ maũndũ ta marĩkũ wĩriragĩria kwĩruta ũhoro wamo? Hihi nĩ ũhoro wĩgiĩ ũũmbi, ũini, kana ũcori? Hatarĩ nganja nĩ tũkaabatara andũ me na ũmenyeru wa ũcori wa mĩako, ũmenyeru wa gwaka, na wa kũrĩma. Ningĩ nĩ tũkaabatara andũ a kũruta mawĩra ta kũruga, gũthondeka indo itiganĩte, na kũrũmbũiya marĩa matũrigicĩirie. (Isa. 35:1; 65:21) Tondũ ũgaatũũra tene na tene, nĩ ũgaakorũo na mahinda ma kwĩruta maũndũ marĩa mothe wĩriragĩria.
12 Ũndũ ũngĩ nĩ atĩ nĩ ũgaakorũo na mweke wa kũnyita ũgeni arĩa makaariũkio. (Atũm. 24:15) Ningĩ ta wĩcirie maũndũ marĩa mothe ũkeeruta megiĩ Jehova kũgerera ũũmbi wake. (Thab. 104:24; Isa. 11:9) Na ũndũ wa bata o na makĩria nĩ atĩ ũgaathathayagia Jehova ũrĩ na thamiri theru tondũ ndũkehagia. Gũkĩrĩ ũguo-rĩ, hihi no ũkũũranie irathimo icio cia ihinda rĩũkĩte na “gũkenera mehia gwa kahinda kanini”? (Ahib. 11:25) Twĩ na ma ndũngĩka ũguo. Irathimo icio nĩ ikĩrĩte ũndũ o wothe tũngĩima ihinda-inĩ rĩrĩ. Ririkana atĩ tũtigũtũũra twetereire Paradiso; kũrĩ hĩndĩ kĩĩranĩro kĩu gĩgaakinyanĩra. No maũndũ macio mothe makaahinga nĩ ũndũ wa ũrĩa Jehova aatuonirie wendo na njĩra ya kũruta Mũrũwe akue nĩ ũndũ witũ.
Nĩ irathimo irĩkũ wĩrĩgagĩrĩra mũno gũgaakenera thĩinĩ wa Paradiso? (Rora kĩbungo gĩa 11-12)
ONANAGIA NGATHO NĨ ŨNDŨ WA WENDO WA JEHOVA
13. Tũngĩonania ngatho atĩa nĩ ũndũ wa ũrĩa Jehova atuonetie wendo? (2 Akorintho 6:1)
13 Tũngĩonania ngatho atĩa nĩ ũndũ wa ũrĩa Jehova aarutire ũkũũri? Na njĩra ya kũigaga ũtungata wake mbere ũtũũro-inĩ witũ. (Mat. 6:33) Bibilia ĩtwĩraga atĩ Jesu aakuire “nĩguo arĩa matũũraga muoyo matigatũũre rĩngĩ nĩ ũndũ wao ene, no matũũre nĩ ũndũ wa ũcio wakuire nĩ ũndũ wao na akĩriũkio.” (2 Kor. 5:15) Hatarĩ nganja tũtingĩenda kwaga kuonanagia ngatho nĩ ũndũ wa ũtugi mũnene ũrĩa Jehova atuonetie.—Thoma 2 Akorintho 6:1.
14. Tũngĩonania atĩa atĩ nĩ twĩhokaga ũtongoria wa Jehova?
14 Ningĩ no tuonanagie ngatho nĩ ũndũ wa wendo wa Jehova na njĩra ya kwĩhokaga ũtongoria wake na kũũrũmĩrĩra. Tũngĩka ũguo atĩa? Na njĩra ya gwĩcũranagia mawoni ma Jehova rĩrĩa tũratua matua, ta ũhoro-inĩ wĩgiĩ gĩthomo kana wĩra ũrĩa tũgwĩtĩkĩra. (1 Kor. 10:31; 2 Kor. 5:7) Rĩrĩa twarũmĩrĩra ũtongoria wake, wĩtĩkio witũ nĩ ũgĩaga na hinya makĩria o hamwe na ũrata witũ na Jehova, na kĩĩrĩgĩrĩro gitũ gĩkarũma.—Rom. 5:3-5; Jak. 2:21, 22.
15. Tũngĩonania ngatho citũ atĩa ihinda-inĩ rĩrĩ rĩa Kĩririkano?
15 Njĩra ĩngĩ tũngĩonania ngatho nĩ ũndũ wa wendo wa Jehova nĩ kũhũthĩra ihinda rĩrĩ rĩa Kĩririkano kuonania ũrĩa tuonaga kĩheo gĩa ũkũũri kĩrĩ kĩa bata. Makĩria ma kwĩhaarĩria nĩguo tũkaahota gũthiĩ Kĩririkano, no tũnyite arĩa angĩ ũgeni magooka. (1 Tim. 2:4) Ũkĩmanyita ũgeni, mataarĩrie maũndũ marĩa mageekwo hĩndĩ ĩyo ya Kĩririkano. O na no ũmonie video ya Jesu Aakuire Nĩkĩ? na ya Ririkana Gĩkuũ kĩa Jesu thĩinĩ wa jw.org/ki. Nao athuri a kĩũngano nĩ magĩrĩirũo gũtigĩrĩra nĩ manyita ũgeni Akristiano arĩa matigĩte kũhunjia na gũthiĩ mĩcemanio. Ta hũũra mbica gĩkeno kĩrĩa kĩngĩkorũo kũrĩa igũrũ na gũkũ thĩ ngʼondu imwe cia Jehova ingĩcoka rũũru-inĩ rwake! (Luk. 15:4-7) Na twathiĩ Kĩririkano, no twĩrutanĩrie kũgeithia andũ othe, makĩria arĩa mokĩte rĩa mbere na arĩa materĩga gũka mĩcemanio. Tũngĩenda othe maigue manyitĩtwo ũgeni!—Rom. 12:13.
16. Nĩkĩ nĩ wega kũrora kana no twandandũre ũtungata witũ ihinda-inĩ rĩa Kĩririkano?
16 Hihi no wandandũre ũtungata waku ihinda-inĩ rĩa Kĩririkano? Ĩyo nĩ njĩra ĩmwe ya kuonania ngatho nĩ ũndũ wa maũndũ marĩa Jehova na Jesu matwĩkĩire. O ũrĩa tũkwĩrutanĩria ũtungata-inĩ wa Jehova, noguo tũrĩĩyonagĩra ũteithio wake, na ũndũ ũcio ũgatũma tũmwĩhoke makĩria. (1 Kor. 3:9) Ningĩ tigĩrĩra nĩ warũmĩrĩra ũthomi wa Bibilia wa Kĩririkano ũrĩa ũrĩ thĩinĩ wa kabuku ka Gũthuthuria Maandĩko O Mũthenya kana ũrĩa ũrĩ thĩinĩ wa kabuku ka mũcemanio wa gatagatĩ-inĩ ga kiumia. O na no ũthuthurie mĩhari ĩyo ya Bibilia hĩndĩ ya wĩruti waku kĩũmbe.
17. Jehova akenagio nĩ kĩĩ? (Ningĩ rora gathandũkũ, “ Ũrĩa Ũngĩonania Ngatho nĩ Ũndũ wa Wendo wa Jehova.”)
17 Ũrĩa kũrĩ nĩ atĩ, maũndũ maku no mage gũgwĩtĩkĩria kũhingia maũndũ mothe marĩa marĩrĩrio gĩcunjĩ-inĩ gĩkĩ. O na kũrĩ ũguo, ririkana atĩ Jehova ndaringithanagia maũndũ marĩa ũhingagia na marĩa andũ arĩa angĩ mahingagia, ĩndĩ aroraga ngoro. Nĩ akenaga rĩrĩa ona ngatho ciaku cia kuuma ngoro nĩ ũndũ wa kĩheo kĩa goro kĩrĩa atũheete gĩa ũkũũri.—1 Sam. 16:7; Mar. 12:41-44.
18. Tũkoragwo na ngatho nĩ ũndũ wa Jehova Ngai na Jesu Kristo nĩkĩ?
18 Ũkũũri nĩguo ũtũhotithagia kuoherũo mehia maitũ, kũgĩa ũrata hamwe na Jehova, na gũkorũo na kĩĩrĩgĩrĩro gĩa gũgaatũũra tene na tene. Rekei hingo ciothe tuonanagie ngatho nĩ ũndũ wa wendo wa Jehova, ũrĩa ũtũmĩte atũhe irathimo icio. (1 Joh. 4:19) Ningĩ rekei tuonanagie ngatho citũ nĩ ũndũ wa ũrĩa Jesu aatwendire mũno nginya akĩruta muoyo wake nĩ ũndũ witũ!—Joh. 15:13.
RWĨMBO NA. 154 Wendo Ũtangĩthira
