GĨCUNJĨ KĨA WĨRUTI GĨA 4
RWĨMBO NA. 18 Gũcokia Ngatho nĩ Ũndũ wa Ũkũũri
Tũngĩĩruta Atĩa Kuumana na Ũkũũri?
“Wendo wa Ngai waguũririo ũhoro-inĩ witũ na njĩra ĩno, atĩ Ngai nĩ aatũmire Mũrũ wake wa mũmwe gũkũ thĩ.”—1 JOH. 4:9.
ŨNDŨ ŨRĨA WARĨRĨIRIO
Nĩ tũkuona ũrĩa ũkũũri ũguũragia ngumo cia Jehova Ngai na cia Jesu Kristo.
1. Tũgunĩkaga atĩa rĩrĩa twathiĩ gĩkũngũĩro-inĩ kĩa o mwaka gĩa Kĩririkano gĩa gĩkuũ kĩa Jesu?
HATARĨ nganja no twĩtĩkanĩrie atĩ igongona rĩa ũkũũri nĩ kĩheo kĩa goro mũno. (2 Kor. 9:15) Nĩ ũndũ wa Jesu kũruta muoyo wake ũrĩ igongona, rĩu no ũhote kũgĩa na ũrata wa hakuhĩ hamwe na Jehova Ngai. O na no ũgĩe na kĩĩrĩgĩrĩro gĩa gũgaatũũra tene na tene. Tũrĩ na itũmi nyingĩ cia gũcokeria Jehova ngatho nĩ ũndũ wa kũruta igongona rĩa ũkũũri, tondũ aarĩrutire atindĩkĩtwo nĩ wendo. (Rom. 5:8) Jesu aambĩrĩirie gĩkũngũĩro kĩa o mwaka gĩa Kĩririkano gĩa gĩkuũ gĩake nĩguo gĩtũteithagie gũtũũra tũrĩ na ngatho na kwaga kũhũthagĩrĩria igongona rĩu rĩa ũkũũri.—Luk. 22:19, 20.
2. Nĩ kĩĩ tũkwarĩrĩria gĩcunjĩ-inĩ gĩkĩ?
2 Mwaka ũyũ, Kĩririkano gĩgeekwo mũthenya wa Njuuma, Ĩpuro 12, 2025. Hatarĩ nganja, ithuothe nĩ tũbangĩte gũgaathiĩ Kĩririkano kĩu. No tũgunĩke mũno angĩkorũo ihinda-inĩ rĩa Kĩririkano nĩ tũgũcaria mahinda ma gwĩcũrania a ũrĩa Jehova na Mũrũwe Jesu matwĩkĩire. Gĩcunjĩ-inĩ gĩkĩ, tũkwarĩrĩria ũrĩa ũkũũri ũtũrutaga igũrũ rĩgiĩ Jehova na Mũrũwe. Na gĩcunjĩ-inĩ kĩrĩa kĩrũmĩrĩire, nĩ tũgateithio gũtaũkĩrũo nĩ ũrĩa tũngĩgunĩka kuumana na ũkũũri na ũrĩa tũngĩonania ngatho citũ nĩ ũndũ waguo.
ŨKŨŨRI ŨTŨRUTAGA ATĨA IGŨRŨ RĨGIĨ JEHOVA?
3. Gĩkuũ kĩa mũndũ ũmwe kĩngĩahotire atĩa gũkũũra andũ aingĩ kuuma mehia-inĩ na gĩkuũ? (Ningĩ rora mbica.)
3 Ũkũũri nĩ ũtũrutaga atĩ Jehova nĩ arĩ kĩhooto. (Gũcok. 32:4) Ta wĩcirie ũndũ ũyũ: Nĩ ũndũ wa ũremi wa Adamu, nĩ twagaire mehia marĩa matũmaga tũkue. (Rom. 5:12) Nĩguo Jehova atũkũũre kuuma mehia-inĩ na gĩkuũ, nĩ aatũmire Jesu nĩgetha arute muoyo wake ũrĩ ũkũũri. No gĩkuũ kĩa mũndũ ũmwe kĩngĩahotire atĩa gũkũũra andũ aingĩ kuuma mehia-inĩ na gĩkuũ? Mũtũmwo Paulo aataarĩirie ũũ: “O ta ũrĩa kwaga gwathĩka kwa mũndũ ũcio ũmwe [Adamu] gwatũmire andũ aingĩ matuwo ehia, no taguo gwathĩka kwa mũndũ ũcio ũmwe [Jesu] gũgaatũma andũ aingĩ matuwo athingu.” (Rom. 5:19; 1 Tim. 2:6) Ũguo nĩ kuuga atĩ, kwaga gwathĩka kwa mũndũ ũmwe mũkinyanĩru nĩkuo gwatũmire tũingĩre ũkombo-inĩ wa mehia na gĩkuũ. Kwoguo kwabataranagia gwathĩka kwa mũndũ ũmwe mũkinyanĩru nĩguo tũkũũrũo.
Mũndũ ũmwe nĩwe watũmire tũingĩre ũkombo-inĩ wa mehia na gĩkuũ. Na njĩra o ta ĩyo, mũndũ ũmwe nĩwe watũkũũrire (Rora kĩbungo gĩa 3)
4. Nĩ kĩĩ gĩatũmire Jehova age kũreka njiarũa njathĩki cia Adamu itũũre tene na tene?
4 Hihi no nginya Jesu angĩakuire nĩguo atũhonokie? Na githĩ Jehova ndangĩatuire itua rĩa kũreka njiarũa njathĩki cia Adamu itũũre tene na tene? No twĩcirie atĩ ĩyo nĩyo ĩngĩarĩ njĩra njega ya kũhiũrania na thĩna ũcio. No ũndũ ũcio ndũratwarana na kĩhooto gĩkinyanĩru kĩa Jehova. Tondũ Jehova nĩ arĩ kĩhooto, gũtirĩ hĩndĩ angĩahũthirie ũremi ũcio wa Adamu.
5. Nĩ kĩĩ kĩngĩtũma tũkorũo na ma atĩ hingo ciothe Jehova ekaga ũndũ ũrĩa wagĩrĩire?
5 No hihi kũngĩathiire atĩa korũo Jehova ndaarutire ũkũũri, na handũ ha ũguo agarare kĩhooto na njĩra ya kũreka ciana cia Adamu itarĩ nginyanĩru itũũre tene na tene? Kwahoteka andũ nĩ mangĩeyũririe kana Ngai nĩ angĩagararire kĩhooto maũndũ-inĩ mangĩ. Kwa ngerekano, nĩ mangĩarigirũo kana hihi nĩ angĩagire kũhingia maũndũ mamwe eranĩire. No rĩu tũtirabatara gũtangĩka nĩ ũndũ ũcio, tondũ Jehova nĩ aarũmĩrĩire kĩhooto o na gũtuĩka ũndũ ũcio wabatarire arute Mũrũ wake arĩ igongona. Kwoguo no tũkorũo na ma atĩ hingo ciothe Jehova ekaga ũndũ ũrĩa wagĩrĩire.
6. Nĩ na njĩra ĩrĩkũ ũkũũri wonanagia atĩ Jehova nĩ atwendete? (1 Johana 4:9, 10)
6 O na gũtuĩka ũkũũri nĩ ũtũteithagia gũtaũkĩrũo atĩ Jehova nĩ arĩ kĩhooto, ningĩ nĩ ũtũteithagia kũmenya ũndũ ũngĩ wa bata, atĩ nĩ atwendete mũno. (Joh. 3:16; thoma 1 Johana 4:9, 10.) Ũkũũri nĩ wonanagia atĩ Jehova endaga tũtũũre tene na tene, na makĩria ma ũguo tũkorũo thĩinĩ wa famĩlĩ yake. Ta wĩcirie ũndũ ũyũ: Rĩrĩa Adamu eehirie, Jehova nĩ aamũingatire famĩlĩ-inĩ yake. Nĩ ũndũ ũcio, ithuothe tũciaragwo tũtarĩ famĩlĩ-inĩ ya Jehova. No kũgerera ũkũũri, Jehova nĩ atuohagĩra mehia maitũ, na mũthia-inĩ andũ arĩa othe monanagia wĩtĩkio na makamwathĩkĩra nĩ magaatuĩka a famĩlĩ yake. O na ihinda-inĩ rĩrĩ no tũkorũo na ũrata wa hakuhĩ na Jehova o hamwe na athathaiya arĩa angĩ. Hatarĩ nganja Jehova nĩ atwendete mũno.—Rom. 5:10, 11.
7. Mĩnyamaro ĩrĩa Jesu aagereire yonanagia atĩa ũrĩa Jehova atwendete?
7 No tũtaũkĩrũo wega ũrĩa Jehova atwendete tũngĩcũrania ruo rũrĩa aagereire akĩĩrorera Mũrũ wake akĩnyamarĩka nĩguo arute ũkũũri. Shaitani augaga atĩ gũtirĩ ndungata ya Jehova ĩngĩikara ĩrĩ njĩhokeku rĩrĩa arĩ ũndũ mũritũ gwĩka ũguo. Nĩguo Jehova onanie atĩ thitango ĩyo nĩ ya maheeni, nĩ aarekire Jesu anyamarĩke atanakua. (Ayub. 2:1-5; 1 Pet. 2:21) Jehova nĩ eeyoneire Jesu akĩnyũrũrio nĩ andũ, akĩhũũrũo iboko nĩ thigari, na akĩhũũrĩrĩrũo mũtĩ-inĩ na mĩcumarĩ. Agĩcoka akĩyonera Mũrũ wake endete agĩkua gĩkuũ kĩa ruo. (Mat. 27:28-31, 39) Jehova aarĩ na hinya wa kũgirĩrĩria maũndũ macio. Kwa ngerekano, rĩrĩa akararia acio maaugaga ũũ: “Ngai nĩ akĩmũhonokie angĩkorũo nĩ aramwenda,” Jehova nĩ angĩamũhonokirie. (Mat. 27:42, 43) No Jehova angĩekire ũguo, ũkũũri ndũngĩarutirũo na kwoguo tũtingĩrĩ na kĩĩrĩgĩrĩro. Kwoguo Jehova nĩ aarekire Mũrũ wake anyamarĩke nginya rĩrĩa aakuire.
8. Hihi Jehova nĩ aatuurirũo rĩrĩa oonire Mũrũwe akĩnyamario? Taarĩria. (Ningĩ rora mbica.)
8 Tũtibatiĩ gwĩciria atĩ tondũ Ngai nĩ mwene hinya wothe, ndahutagio ngoro-inĩ nĩ maũndũ marĩa arona. Tũũmbĩtwo na mũhianĩre wake, na kwoguo tondũ nĩ tũhutagio ngoro-inĩ nĩ maũndũ marĩa tũrona, no tũkorũo na ma atĩ ũguo noguo kũrĩ harĩ we. Bibilia nĩ yonanagia mahinda ‘anaiguithio ũũru’ na ‘akanyitwo nĩ kĩeha.’ (Thab. 78:40, 41) Ningĩ ta wĩcirie ũhoro wa Iburahimu na Isaaka. Kũrĩ hĩndĩ Jehova eerire Iburahimu arute mũrũ wake wa mũmwe arĩ igongona. (Kĩam. 22:9-12; Ahib. 11:17-19) No tũhũũre mbica kĩeha kĩrĩa Iburahimu aarĩ nakĩo akĩĩhaarĩria kũruta mũrũwe Isaaka muoyo. No mũhaka akorũo Jehova aarĩ na kĩeha kĩnene o na makĩria akĩĩrorera Mũrũwe akĩnyamario na akĩũragwo.—Wĩrorere video ya Wĩgerekanie na Wĩtĩkio Wao—Iburahimu, Gĩcunjĩ gĩa 2 thĩinĩ wa jw.org/ki.
Jehova nĩ aatuurirũo mũno rĩrĩa oonire Mũrũwe akĩnyamario (Rora kĩbungo gĩa 8)
9. Aroma 8:32, 38, 39 ĩtũrutaga atĩa igũrũ rĩgiĩ wendo wa Jehova?
9 Ũkũũri nĩ ũtũrutaga atĩ gũtirĩ mũndũ ũtwendete ta ũrĩa Jehova atwendete, nginya andũ aitũ a famĩlĩ kana arata aitũ a hakuhĩ. (Thoma Aroma 8:32, 38, 39.) Ningĩ no tũkorũo na ma atĩ Jehova nĩ atwendete gũkĩra ũrĩa twĩyendete. Angĩkorũo nĩ wendaga gũgaatũũra tene na tene, hatarĩ nganja Jehova akwendagĩra ũndũ ũcio o na makĩria. Angĩkorũo nĩ wendaga kuoherũo mehia maku, hatarĩ nganja Jehova nĩ endaga o na makĩria gũkuohera. Ũndũ ũrĩa tu endaga wĩke nĩ wĩtĩkĩre kĩheo kĩu gĩa ũkũũri na njĩra ya kuonania wĩtĩkio harĩ we na kũmwathĩkĩra. Ma nĩ atĩ ũkũũri nĩ wonanagia atĩ Jehova nĩ atwendete mũno. Na rĩrĩa tũkaingĩra thĩinĩ wa thĩ njerũ, nĩ tũkeeruta maũndũ mangĩ maingĩ maronania ũrĩa atwendete.—Koh. 3:11.
ŨKŨŨRI ŨTŨRUTAGA ATĨA IGŨRŨ RĨGIĨ JESU?
10. (a) Nĩ kĩĩ gĩatũmire Jesu atangĩke mũno nĩ ũndũ wa mahĩtia marĩa aathitangĩirũo? (b) Jesu aatheririe rĩĩtwa rĩa Jehova na njĩra irĩkũ? (Ningĩ rora gathandũkũ, “ Jesu nĩ Aatheririe Rĩĩtwa rĩa Jehova.”)
10 Jesu ndangĩendire o na hanini rĩĩtwa rĩa Ithe rĩhakwo gĩko. (Joh. 14:31) Rĩrĩa Jesu aathitangĩirũo mahĩtia ma kũruma Ngai na gũũkĩrĩra thirikari, nĩ aatangĩkire mũno nĩ gũkorũo ũndũ ũcio nĩ ũngĩathũkĩirie Ithe rĩĩtwa. Nĩkĩo aahoire ũũ: “Awa, angĩkorũo no kũhoteke, reke gĩkombe gĩkĩ kĩnjeherere.” (Mat. 26:39) Tondũ Jesu nĩ aatũũririe wĩkindĩru wake harĩ Jehova nginya gĩkuũ, nĩ aatheririe rĩĩtwa rĩa Ithe biũ.
11. Jesu oonanirie atĩa atĩ nĩ endete andũ mũno? (Johana 13:1)
11 Ningĩ ũkũũri nĩ ũtũrutaga atĩ Jesu nĩ arũmbũyagia andũ mũno, makĩria arutwo ake. (Thim. 8:31; thoma Johana 13:1.) Kwa ngerekano, Jesu nĩ aamenyaga atĩ maũndũ mamwe aabataraga gwĩka arĩ gũkũ thĩ matingĩarĩ mahũthũ, ta ũhoro wĩgiĩ gũkua gĩkuũ kĩa ruo. No nĩ aahingirie maũndũ macio mothe eyendeire, ti tondũ tu nĩ aathĩtwo ameke. Jesu nĩ eeheanire na ngoro yothe wĩra-inĩ wa kũhunjia, kũrutana, na gũtungatĩra arĩa angĩ. O na mũthenya wa mũico atanoragwo, nĩ aathambirie atũmwo ake magũrũ, akĩmomĩrĩria, na akĩmaruta maũndũ maingĩ. (Joh. 13:12-15) Na rĩrĩa aacuurĩtio mũtĩ-inĩ, nĩ aaheire mwĩki-naĩ ũrĩa wacuurĩtio hakuhĩ nake mwĩhoko na akĩbanga ũrĩa nyina angĩarũmbũyirio. (Luk. 23:42, 43; Joh. 19:26, 27) Kwoguo kũgerera gĩkuũ gĩake na maũndũ marĩa eekire arĩ gũkũ thĩ, Jesu nĩ oonanirie atĩ nĩ endete andũ mũno.
12. Jesu eheanaga atĩa nĩ ũndũ witũ?
12 O na gũtuĩka Jesu aakuire “riita rĩmwe rĩa kũigana,” no athiaga na mbere kwĩheana nĩ ũndũ witũ. (Rom. 6:10) Na njĩra ĩrĩkũ? No arahũthĩra mahinda na hinya wake nĩguo tũgunĩke nĩ maũndũ marĩa mahotithĩtio nĩ ũkũũri. Kwa ngerekano nĩ aratungata arĩ Mũthamaki, Mũthĩnjĩri-Ngai Ũrĩa Mũnene, na mũtwe wa kĩũngano. (1 Kor. 15:25; Ef. 5:23; Ahib. 2:17) Ningĩ nĩ aratongoria wĩra-inĩ wa gũcokanĩrĩria arĩa aitĩrĩrie maguta na andũ a kĩrĩndĩ kĩrĩa kĩnene, na wĩra ũcio ũkaarĩka mũthia-inĩ wa thĩna ũrĩa mũnene. b (Mat. 25:32; Mar. 13:27) Ningĩ nĩ atigagĩrĩra atĩ ndungata ciake njĩhokeku nĩ iraheo irio cia kĩĩroho matukũ-inĩ maya ma kũrigĩrĩria. (Mat. 24:45) Na hĩndĩ ya wathani wake wa mĩaka ngiri, no agaathiĩ na mbere gũtũrũmbũiya. Kwoguo Jehova ndaaheanire Mũrũ wake nogetha arute muoyo wake ũrĩ ũkũũri, ĩndĩ nĩ nginya atũtungatĩre na njĩra ingĩ nyingĩ.
THIĨ NA MBERE KWĨRUTA
13. Ũngĩka atĩa nĩguo ũthiĩ na mbere kwĩruta igũrũ rĩgiĩ wendo ũrĩa Jehova na Jesu makoragwo naguo gũtwerekera?
13 No ũthiĩ na mbere kwĩruta igũrũ rĩgiĩ wendo ũrĩa Jehova na Jesu makoragwo naguo gũtwerekera, ũngĩĩcũranagia maũndũ marĩa matwĩkĩire. Kwa ngerekano, ihinda-inĩ rĩa Kĩririkano kĩa mwaka ũyũ, no ũthome na kinyi ibuku rĩmwe kana makĩria ma Injiri. Handũ ha gũthoma mĩrango mĩingĩ riita rĩmwe, thoma kahora ũkĩroraga maũndũ mangĩ mangĩtũma wende Jehova na Jesu makĩria. Thutha ũcio, ĩraga andũ arĩa angĩ maũndũ marĩa weruta.
14. Gwĩka ũthuthuria kũngĩtũteithia atĩa kwĩruta makĩria igũrũ rĩgiĩ ũkũũri na morutani mangĩ ta macio? (Thaburi 119:97) (Ningĩ rora mbica.)
14 Angĩkorũo ũkoretwo ũhoro-inĩ wa ma ihinda-inĩ rĩa mĩaka mĩingĩ, no wone ta hatarĩ ũndũ mwerũ ũngĩĩruta ũhoro-inĩ wĩgiĩ maũndũ ta kĩhooto kĩa Ngai, wendo wake, na ũkũũri. Ma nĩ atĩ tũtingĩkinya mũthia wa kwĩruta maũndũ merũ megiĩ morutani ta macio. Nĩguo ũhote gwĩka ũguo, wĩrutage na kinyi ũhoro ũrĩa ũrĩ mabuku-inĩ maitũ. Ũngĩthoma ũndũ na wage gũtaũkĩrũo nĩguo biũ, ĩka ũthuthuria. Na mũthenya ũcio wothe no wĩcũranie maũndũ marĩa weruta na ũrĩa marakũruta igũrũ rĩgiĩ Jehova, Mũrũwe, na wendo wao harĩ ithuĩ.—Thoma Thaburi 119:97 na kohoro ka magũrũ-inĩ.
O na angĩkorũo tũkoretwo ũhoro-inĩ wa ma ihinda-inĩ rĩa mĩaka mĩingĩ, no tuongerere ngatho citũ tũngĩĩruta makĩria igũrũ rĩgiĩ ũkũũri (Rora kĩbungo gĩa 14)
15. Twagĩrĩirũo gũthiĩ na mbere gũcaria maũndũ merũ wĩruti-inĩ witũ wa Bibilia nĩkĩ?
15 Ndũgakue ngoro angĩkorũo ti hingo ciothe wonaga ũndũ mwerũ kana wa gũcanjamũra rĩrĩa ũrathoma kana ũreka ũthuthuria. Ũtariĩ ta mũndũ ũracaria thahabu. Kaingĩ mũndũ ũracaria thahabu nĩ aikaraga mathaa maingĩ kana matukũ maingĩ angĩkona nginya gacunjĩ kanini ga thahabu. O na kũrĩ ũguo ndakuaga ngoro, ĩndĩ athiaga na mbere kũmĩcaria tondũ nĩ oĩ thogora wayo. Maũndũ merũ marĩa twĩrutaga thĩinĩ wa Bibilia nĩ ma thogora mũnene o na gũkĩra thahabu. (Thab. 119:127; Thim. 8:10) Kwoguo koragwo na wetereri na ũthiĩ na mbere gũcaria maũndũ merũ wĩruti-inĩ waku wa Bibilia.—Thab. 1:2.
16. Tũngĩĩgerekania atĩa na Jehova na Jesu?
16 Ũkĩĩruta, wĩciragie nĩ na njĩra irĩkũ ũngĩhũthĩra maũndũ marĩa ũreruta. Kwa ngerekano, no wĩgerekanie na Jehova harĩ kuonania kĩhooto na njĩra ya kũrũmbũyania na arĩa angĩ ũtarĩ na mũthutũkanio. Ningĩ no wĩgerekanie na ũrĩa Jesu endete Ithe na andũ arĩa angĩ, na njĩra ya gũkoragwo wĩhaarĩirie kũnyamarĩka nĩ ũndũ wa rĩĩtwa rĩa Jehova na ũkeheana biũ nĩguo ũteithie Akristiano arĩa angĩ. Makĩria ma ũguo no twĩgerekanie na Jesu na njĩra ya kũhunjagĩria arĩa angĩ, nĩguo o nao makorũo na mweke wa kwamũkĩra kĩheo kĩrĩa Jehova atũheete gĩa ũkũũri.
17. Gĩcunjĩ kĩrĩa kĩrũmĩrĩire kĩarĩrĩirie maũndũ marĩkũ?
17 Twathiĩ na mbere kwĩruta igũrũ rĩgiĩ ũkũũri, noguo tũkwenda Jehova na Jesu makĩria. Na nĩ ũndũ ũcio, o nao nĩ megũtwenda o na makĩria. (Joh. 14:21; Jak. 4:8) Kwoguo, rekei tũhũthagĩre indo ciothe iria Jehova atũheete nĩguo tũthiĩ na mbere kwĩruta igũrũ rĩgiĩ ũkũũri. Gĩcunjĩ kĩrĩa kĩrũmĩrĩire nĩ kĩarĩrĩirie njĩra imwe tũgunĩkaga nacio kuumana na ũkũũri, na ũrĩa tũngĩonania ngatho nĩ ũndũ wa wendo wa Jehova.
RWĨMBO NA. 107 Kĩonereria kĩa Ngai kĩa Wendo
a GŨTAARĨRIA KIUGO: “Gwĩcũrania” nĩ kũiga meciria harĩ ũndũ mũna na ũkawĩciria na njĩra ndikĩru.
b Gũcokanĩrĩrio kwa “indo iria irĩ igũrũ” kũrĩa Paulo aagwetire thĩinĩ wa Aefeso 1:10 nĩ ngũrani na gũcokanĩrĩrio kwa “arĩa athuure” kũrĩa Jesu aagwetire thĩinĩ wa Mathayo 24:31 na Mariko 13:27. Paulo aaragĩrĩria ihinda rĩrĩa Jehova angĩgathuura arĩa magaathana na Jesu na njĩra ya kũmaitĩrĩria roho mũtheru. Jesu nake aaragĩrĩria ihinda rĩrĩa Akristiano aitĩrĩrie maguta arĩa magaakorũo matigarĩte gũkũ thĩ magaacokanĩrĩrio hĩndĩ ya thĩna ũrĩa mũnene nĩguo mathiĩ igũrũ.
