GĨCUNJĨ KĨA WĨRUTI KĨA 31
“Ikaragai Mũrũmĩte, Mũtegũthengeka”
“Ariũ a Ithe witũ [nyendete], ikaragai mũrũmĩte, mũtegũthengeka.”—1 KOR. 15:58.
RWĨMBO NA. 122 Ikaragai Mwĩrũmĩtie, Mũtegũthengeka!
GĨCUNJĨ-INĨ GĨKĨ a
1-2. Mũkristiano angĩkorũo atariĩ ta nyũmba ndaihu ya ngoroba na njĩra ĩrĩkũ? (1 Akorintho 15:58)
MWAKA-INĨ wa 1978 nĩ gwakirũo nyũmba ĩmwe ndaihu ya ngoroba 60 taũni-inĩ ya Tokyo, Japan. Andũ nĩ maarigagwo kana nyũmba ĩyo nĩ ĩngĩahotire gwĩtiiria ithingithia iria igũmagĩra taũni ĩyo kaingĩ. Hihi mainjinia meekire atĩa nĩguo nyũmba ĩyo ĩhote gwĩtiiria ithingithia? Maakire nyũmba ĩyo ũndũ ĩngĩakorirũo ĩrĩ nũmu, na o hĩndĩ ĩyo ĩkorũo na ũhoti wa kwĩgonya hanini nĩguo ndĩkagwe rĩrĩa yainainio nĩ ithingithia. Akristiano matariĩ ta nyũmba ĩyo ndaihu. Na njĩra ĩrĩkũ?
2 No mũhaka Mũkristiano akorũo na ũigananĩru harĩ gũikara arũmĩte na o hĩndĩ ĩyo akorũo ehaarĩirie kũgarũrĩra rĩrĩa kwaumĩra mogarũrũku. Nĩ agĩrĩirũo gũkorũo arĩ mũrũmu na aikare ategũthengeka ũhoro-inĩ wĩgiĩ kũrũmia mawatho ma Jehova na ithimi ciake. (Thoma 1 Akorintho 15:58.) Nĩ akoragwo ‘ehaarĩirie gwathĩka’ na ndaregeragia itua rĩake. Na o hĩndĩ ĩyo, nĩ agĩrĩirũo gũkorũo arĩ na “ũigananĩru” kana akorũo ehaarĩirie kũgarũrĩra kũngĩhoteka kana rĩrĩa kwabatarania. (Jak. 3:17) Mũkristiano ũrĩa wĩrutĩte gũkorũo na ũigananĩru ta ũcio, nĩ ethemaga kũnyitĩrĩra mũno mawoni make kana kũheeneka na ihenya. Gĩcunjĩ-inĩ gĩkĩ, nĩ tũkuona ũrĩa tũngĩikara tũtegũthengeka. Ningĩ nĩ tũkuona njĩra ithano iria Shaitani ahũthagĩra kũgeria gũthũkia itua ritũ rĩa gũikara tũrũmĩte na twĩrute ũrĩa tũngĩregana nake.
TŨNGĨKA ATĨA NĨGUO TŨIKARE TŨRŨMĨTE?
3. Nĩ mawatho marĩkũ ma Mũheani Watho Ũrĩa Mũnene monanĩtio thĩinĩ wa Atũmwo 15:28, 29?
3 Jehova arĩ we Mũheani Watho Ũrĩa Mũnene, nĩ akoretwo akĩhe andũ ake mawatho marataũkĩka wega. (Isa. 33:22) Kwa ngerekano, kĩama kĩrĩa gĩatongoragia karine-inĩ ya mbere nĩ kĩoonanirie maũndũ matatũ Akristiano mangĩka nĩguo maikare marũmĩte: (1) kũregana na ũhoi mĩhianano, na gũthathaiya Jehova o we wiki, (2) gũtĩa watho wa Jehova wĩgiĩ thakame, na (3) gwathĩkĩra ithimi cia Jehova cia mĩtugo. (Thoma Atũmwo 15:28, 29.) Akristiano ũmũthĩ mangĩka atĩa nĩguo maikare mategũthengeka maũndũ-inĩ macio matatũ?
4. Tũheaga Jehova wĩrutĩri wa ngoro yothe na njĩra ĩrĩkũ? (Kũguũrĩrio 4:11)
4 Nĩ twagĩrĩirũo kũregana na ũhoi mĩhianano, tũgathathaiya o Jehova wiki. Jehova aathĩte Aisiraeli mamũheage wĩrutĩri wa ngoro yothe. (Gũcok. 5:6-10) Na rĩrĩa Jesu aageragio nĩ Mũcukani, nĩ oonanirie wega atĩ no mũhaka tũthathayagie Jehova o we wiki. (Mat. 4:8-10) Nĩ ũndũ ũcio, tũtithathayagia mĩhianano. Ningĩ tũtithathayagia andũ ta atongoria a ndini, atongoria a gĩũteti, na andũ arĩa marĩ igweta mathaako-inĩ, ũini-inĩ, na maũndũ-inĩ mangĩ ta macio na njĩra ya kũmatuga ta arĩ ngai. Tũrũgamaga mwena wa Jehova na tũkamũthathaiya o we wiki ũrĩa “wombire indo ciothe.”—Thoma Kũguũrĩrio 4:11.
5. Nĩ kĩĩ gĩtũmaga twathĩkĩre watho wa Jehova wĩgiĩ ũtheru wa muoyo na thakame?
5 Nĩ twathĩkagĩra watho wa Jehova wĩgiĩ ũtheru wa muoyo na thakame. Gĩtũmi nĩ tondũ Jehova augĩte atĩ thakame ĩrũgamĩrĩire muoyo, ũrĩa nĩ kĩheo kĩa goro kuuma kũrĩ we. (Alaw. 17:14) Hĩndĩ ĩrĩa Jehova eetĩkĩririe andũ marĩage nyama, aameerire matikanarĩe thakame. (Kĩam. 9:4) Nĩ aacokerire rĩathani rĩu rĩrĩa aaheire Aisiraeli Watho kũgerera harĩ Musa. (Alaw. 17:10) Na aatongoririe kĩama kĩrĩa gĩatongoragia karine-inĩ ya mbere kĩre Akristiano othe ‘methemage thakame.’ (Atũm. 15:28, 29) Nĩ twĩrutanagĩria gwathĩkĩra watho ũcio rĩrĩa tũratua matua megiĩ ũrigitani. b
6. Twĩkaga atĩa nĩguo tũhote gwathĩkĩra ithimi cia Jehova ciĩgiĩ mĩtugo?
6 Nĩ twathĩkagĩra biũ ithimi cia Jehova ciĩgiĩ mĩtugo. (Ahib. 13:4) Mũtũmwo Paulo atwĩrĩte ‘tũrage’ ciĩga citũ cia mwĩrĩ, na ũguo nĩ kuuga tuoe makinya marũmu ma kweheria merirĩria moru ma mwĩrĩ. Nĩ twĩthemaga kwĩrorera kana gwĩka ũndũ o wothe ũngĩtũma twĩingĩrie ngomanio-inĩ itagĩrĩire. (Kol. 3:5; Ayub. 31:1) Rĩrĩa twacemania na igerio, o na ihenya nĩ tũreganaga na rĩciria kana gĩĩko o gĩothe kĩngĩthũkia ũrata witũ na Ngai.
7. Twagĩrĩirũo gũtua itua rĩrĩkũ, na nĩkĩ?
7 Jehova endaga “[tũmwathĩkagĩre] kuuma ngoro-inĩ.” (Rom. 6:17) Maũndũ marĩa atwĩraga twĩke makoragwo marĩ ma gũtũguna hingo ciothe, na mawatho make matingĩcenjia. (Isa. 48:17, 18; 1 Kor. 6:9, 10) Nĩ twĩrutanagĩria gũkenia Jehova na gũkorũo na mwerekera o ta wa mwandĩki wa Thaburi ũrĩa waugire ũũ: “Nĩ nduĩte itua rĩa gwathĩkagĩra mawatho maku hĩndĩ ciothe, o nginya mũthia.” (Thab. 119:112) O na kũrĩ ũguo, Shaitani no arĩgeragia gũtũma tũregerie itua ritũ. Ahũthagĩra njĩra ta irĩkũ?
SHAITANI AGERAGIA ATĨA GŨTŨMA TŨREGERIE ITUA RITŨ?
8. Shaitani ahũthagĩra mĩnyamaro atĩa kũgeria gũtũma tũregerie itua ritũ?
8 Mĩnyamaro. Mũcukani nĩ ahũthagĩra tharĩkĩro cia ĩmwe kwa ĩmwe na hatĩka kũgeria gũtũma tũregerie itua ritũ. Muoroto wake nĩ ‘gũtũtambura’ nĩguo tũthũkie ũrata witũ hamwe na Jehova. (1 Pet. 5:8) Akristiano a karine ya mbere nĩ meehĩtĩirũo, makĩhũũrũo, na makĩũragwo nĩ ũndũ wa itua rĩao rĩa gũikara marũmĩte. (Atũm. 5:27, 28, 40; 7:54-60) Shaitani no anyariraga ndungata cia Jehova nginya ũmũthĩ. Nĩ tuonaga ũira wa ũndũ ũcio kuumana na ũrĩa aarĩ na ariũ a Ithe witũ manyariragwo thĩinĩ wa Russia na mabũrũri-inĩ mangĩ, na ũrĩa akararia matharĩkagĩra aarĩ na ariũ a Ithe witũ na njĩra ingĩ.
9. Heana ngerekano ĩronania bata wa kwĩmenyerera tharĩkĩro cia wara.
9 Tharĩkĩro cia wara. Makĩria ma kũhũthĩra tharĩkĩro cia ĩmwe kwa ĩmwe, Shaitani nĩ ahũthagĩra “mawara.” (Ef. 6:11) Kwa ngerekano, ta wĩcirie ũhoro wa mũrũ wa Ithe witũ wĩtagwo Bob, ũrĩa wakomete thibitarĩ nĩ ũndũ wa gũthĩnjwo. Nĩ eerire mandagĩtarĩ atĩ ndangĩetĩkĩrire o na hanini gwĩkĩrũo thakame. Ndagĩtarĩ ũrĩa wamũthĩnjaga nĩ eetĩkĩrire gũtĩa itua rĩake. O na kũrĩ ũguo, Bob atanaroka gũthĩnjwo, ndagĩtarĩ ũngĩ nĩ ookire kũmuona hwaĩ-inĩ andũ ao a famĩlĩ mainũka. Eerire Bob atĩ no kũhoteke mandagĩtarĩ matingĩamwĩkĩrire thakame, no nĩ mangĩamĩigire hau hakuhĩ nĩguo mamĩhũthĩre yabatarania. No gũkorũo ndagĩtarĩ ũcio eeciragia atĩ Bob nĩ angĩacenjirie meciria thutha wa andũ a famĩlĩ yake kwehera. No Bob ndaaregeririe mũrũgamo wake na aaugire atĩ ndangĩetĩkĩrire gwĩkĩrũo thakame o na kũngĩathiire atĩa.
10. Nĩ kĩĩ kĩngĩtũma tuuge atĩ mwĩcirĩrie wa andũ nĩ mũtego? (1 Akorintho 3:19, 20)
10 Mwĩcirĩrie wa andũ. Tũngĩambĩrĩria kuona maũndũ kũringana na mwĩcirĩrie wa andũ no twĩkore tũgĩtiganĩria Jehova na ithimi ciake. (Thoma 1 Akorintho 3:19, 20.) “Ũũgĩ wa thĩ ĩno” kaingĩ ũtũmaga andũ matigathĩkĩre Ngai. Akristiano amwe thĩinĩ wa kĩũngano kĩa Perigamo na gĩa Thiatira nĩ maakũrĩtie muonere wa andũ arĩa maamathiũrũrũkĩirie wĩgiĩ kũhoya mĩhianano na ngomanio itagĩrĩire. Jesu nĩ aaheire ciũngano icio cierĩ ũtaaro mũritũ nĩ ũndũ wa gũkirĩrĩria ngomanio itagĩrĩire. (Kũg. 2:14, 20) Ũmũthĩ, nĩ tũhatĩkagwo gwĩtĩkĩra mawoni matagĩrĩire ma andũ arĩa matũthiũrũrũkĩirie. Andũ a famĩlĩ na arata no matwĩre atĩ nĩ tũnyitagĩrĩra mũno mũrũgamo witũ makĩenda tũũregerie. Kwa ngerekano, no matwĩre atĩ ti ũndũ wa bata gũtũũria ũtheru wa kĩĩmĩtugo na atĩ ithimi cia Bibilia nĩ hĩtũke nĩ mahinda.
11. Nĩ kĩĩ twagĩrĩirũo gwĩthema nĩguo tũikare tũrũmĩte?
11 Rĩmwe na rĩmwe no tuone ũtongoria ũrĩa Jehova atũheaga ta ũtarĩ mũiganu. Rĩmwe o na no tũgucĩrĩrio “[kwagarara] maũndũ marĩa maandĩke.” (1 Kor. 4:6) Ũguo nĩguo atongoria a ndini matukũ-inĩ ma Jesu meekaga. Nĩ moongagĩrĩra mawatho mao harĩ Watho, na ũndũ ũcio ũgatũma ũkorũo ũrĩ ũndũ mũritũ harĩ andũ arĩa angĩ gwathĩka. (Mat. 23:4) Jehova nĩ atũheaga ũtongoria ũrataũkĩka wega kũgerera Kiugo gĩake na ithondeka rĩake. Tũtirabatara kuongerera kĩndũ harĩ motaaro marĩa atũheaga. (Thim. 3:5-7) Kwoguo nĩ twagĩrĩirũo gwĩthema kwagarara maũndũ marĩa mandĩkĩtwo thĩinĩ wa Bibilia kana gwĩkĩrĩra aarĩ na ariũ a Ithe witũ mawatho maũndũ-inĩ megiĩ matua ma mũndũ kĩũmbe.
12. Shaitani ahũthagĩra atĩa “maheeni ma tũhũ”?
12 Maheeni. Shaitani ahũthagĩra “maheeni ma tũhũ” na “maũndũ ma mũthingi ma thĩ ĩno” nĩguo agayũkanie andũ na amahĩtithie. (Kol. 2:8) Hĩndĩ ya karine ya mbere, maheeni macio maaumanaga na ũũgĩ wa andũ, morutani ma maheeni ma Kĩyahudi, na ũrutani wa atĩ Akristiano no mũhaka marũmĩrĩre Watho wa Musa. Macio maarĩ maheeni tondũ nĩ maatũmaga andũ meherie meciria mao harĩ Jehova, o we Kĩhumo kĩa ũũgĩ. Ũmũthĩ, Shaitani ahũthagĩra nyũmba cia mohoro na nenda cia ũkinyanĩria gũtheremia mĩhuhu na mohoro ma maheeni marĩa matheremagio nĩ atongoria a gĩũteti. Hĩndĩ ya kĩngʼũki gĩa COVID-19 kwarĩ na mohoro maingĩ ta macio ma maheeni. c Aira a Jehova arĩa maathikĩrĩirie ũtaaro ũrĩa twaheagwo nĩ ithondeka rĩa Jehova nĩ meethemire kũgĩa na mĩtangĩko mĩingĩ ĩrĩa yarĩ na andũ arĩa maathikagĩrĩria ũhoro wa maheeni.—Mat. 24:45.
13. Twagĩrĩirũo gwĩthema maũndũ ma gũtũhĩngĩca nĩkĩ?
13 Maũndũ ma gũtũhĩngĩca. Twagĩrĩirũo kũiga meciria maitũ harĩ “maũndũ marĩa ma bata makĩria.” (Afil. 1:9, 10) Rĩrĩa twahĩngĩcĩka nĩ tũteangaga mahinda maitũ maingĩ na hinya mũingĩ. Maũndũ ma o mũthenya ma ũtũũro, ta kũrĩa, kũnyua, gwĩkenia, na wĩra, no matũhĩngĩce tũngĩreka matuĩke nĩmo ma bata mũno ũtũũro-inĩ witũ. (Luk. 21:34, 35) Makĩria ma ũguo, o mũthenya nĩ gũkoragwo na mohoro maingĩ megiĩ mĩrũrũngano na ngucanio cia gĩũteti. Tũtingĩtĩkĩra kũhĩngĩcwo nĩ ndeereti ciĩgiĩ maũndũ macio. Tũngĩaga kwĩmenyerera no twĩkore tũkĩnyita mbaru mwena ũmwe ngoro-inĩ citũ na meciria-inĩ maitũ. Shaitani ahũthagĩra njĩra icio ciothe twarĩrĩria arĩ na muoroto wa gũtũma tũregerie itua ritũ rĩa gwĩka ũndũ ũrĩa wagĩrĩire. Rekei twarĩrĩrie ũrĩa tũngĩregana na njĩra ciake na tũikare tũrũmĩte.
TŨNGĨKA ATĨA NĨGUO TŨIKARE TŨRŨMĨTE?
Nĩguo ũikare ũrũmĩte, wĩcũranagie kĩrĩa gĩatũmire wĩyamũrĩre Jehova na ũbatithio, wĩrutage Kiugo kĩa Ngai na ũgecũrania igũrũ rĩakĩo, ũkũrie ngoro ĩĩkindĩire, na wĩhokage Jehova (Rora kĩbungo gĩa 14-18)
14. Nĩ ũndũ ũrĩkũ ũmwe ũngĩtũteithia gũikara tũrũmĩte mwena wa Jehova?
14 Wĩcũranagie kĩrĩa gĩatũmire wĩyamũrĩre Jehova na ũbatithio. Wooire makinya macio tondũ nĩ weendaga kũrũgama mwena wa Jehova. Ririkanaga kĩrĩa gĩagũteithirie gwĩtĩkia biũ atĩ nĩ wonete ũhoro wa ma. Nĩ wagĩire na ũmenyo wa ma wĩgiĩ Jehova na ũkĩambĩrĩria kũmũtĩa na kũmwenda arĩ we Ithe witũ wa igũrũ. Nĩ wakũririe wĩtĩkio na ũkĩĩrira mehia maku. Nĩ watigire gwĩka maũndũ marĩa matakenagia Jehova na ũkĩambĩrĩria gwĩka marĩa mamũkenagia. Nĩ waiguire ũhũthĩirũo nĩ kũmenya atĩ Jehova nĩ akuoheire mehia maku. (Thab. 32:1, 2) Nĩ waambĩrĩirie gũthiaga mĩcemanio ya Gĩkristiano na kwĩra andũ arĩa angĩ maũndũ marĩa werutĩte. Ũrĩ Mũkristiano wĩyamũrĩire Jehova na akabatithio, rĩu nĩ ũragerera njĩra-inĩ ya muoyo na nĩ ũtuĩte itua rĩa gwĩka ũndũ o wothe nĩguo ũthiĩ na mbere kũmĩgerera.—Mat. 7:13, 14.
15. Nĩkĩ kwĩruta na gwĩcũrania nĩ kwa bata?
15 Wĩrutage Kiugo kĩa Ngai na ũgecũranagia ũhoro wakĩo. O ta ũrĩa mũtĩ ũkoragwo ũrĩ mũrũmu nĩ ũndũ wa gũkorũo na mĩri mĩrikĩru, no taguo o na ithuĩ tũngĩikara tũrũmĩte tũngĩkorũo na wĩtĩkio mũrũmu harĩ Jehova. O ũrĩa mũtĩ ũrakũra noguo mĩri yaguo ĩrikagĩra na ĩgatherema kũraihu. Rĩrĩa tweruta na twecũrania, nĩ twĩkagĩra wĩtĩkio witũ hinya na tũgakorũo na ũũma atĩ njĩra cia Jehova nĩcio njega makĩria. (Kol. 2:6, 7) Wĩcũranagie ũrĩa motaaro ma Jehova, ũtongoria wake, na ũgitĩri wake, ciateithirie ndungata ciake mahinda-inĩ ma tene. Kwa ngerekano, Ezekieli nĩ eeroreire na kinyi rĩrĩa mũraika aathimaga hekarũ ĩrĩa Ezekieli oonire kĩoneki-inĩ. Kĩoneki kĩu nĩ gĩekĩrire Ezekieli hinya na nĩ gĩtũrutaga maũndũ ma bata megiĩ ũrĩa tũngĩrũmia ithimi cia Jehova ciĩgiĩ ũthathaiya mũtheru. d (Ezek. 40:1-4; 43:10-12) O na ithuĩ nĩ tũgunĩkaga rĩrĩa tuoya ihinda kwĩruta na gwĩcũrania maũndũ marikĩru ma Kiugo kĩa Ngai.
16. Gũkorũo na ngoro ĩĩkindĩire kwagitĩrire Bob atĩa? (Thaburi 112:7)
16 Kũria ngoro ĩĩkindĩire. Mũthamaki Daudi nĩ oonanirie ũrĩa eendete Jehova na ngoro yothe rĩrĩa aaugire ũũ: “Atĩrĩrĩ Ngai, ngoro yakwa nĩ ĩĩkindĩire.” (Thab. 57:7) O na ithuĩ no tũkorũo na ngoro ĩĩkindĩire na tũhote kwĩhoka Jehova biũ. (Thoma Thaburi 112:7.) Ũndũ ũcio wateithirie Bob atĩa ũrĩa ũkũgwetetwo na hau kabere? Rĩrĩa eerirũo atĩ thakame nĩ ĩngĩaigirũo hau hakuhĩ nĩguo ĩhũthĩrũo kũngĩabataranirie, o rĩo aaugire atĩ angĩkorũo nĩ kũrĩ ũndũ kũngĩathiire ekĩrũo thakame, no kuuma angĩaumire thibitarĩ ĩyo o rĩo. Thutha ũcio Bob aaugire ũũ: “Ndiarĩ na nganja o na hanini na ndietigagĩra ũrĩa kũngĩathiire.”
Tũngĩkũria wĩtĩkio mũrũmu no tũhote gũikara twĩhandĩte, gũtekũmakania igerio rĩrĩa tũngĩcemania narĩo (Rora kĩbungo gĩa 17)
17. Tũreruta atĩa kuumana na rũgano rwa Bob? (Ningĩ rora mbica.)
17 Bob aahotire kwĩhanda wega tondũ nĩ aatuĩte itua irũmu mbere ya athiĩte thibitarĩ. Wa mbere, nĩ eendaga gũkenia Jehova. Wa kerĩ, nĩ eerutĩte na kinyi ũrĩa Bibilia na mabuku maitũ irutanaga igũrũ rĩgiĩ ũtheru wa muoyo na thakame. Wa gatatũ, aarĩ na ma atĩ nĩ angĩagunĩkire angĩarũmĩrĩire ũtongoria wa Jehova. O na ithuĩ no tũkorũo na ngoro ĩĩkindĩire gũtekũmakania magerio marĩa tũracemania namo.
Baraki na arũme ake maatengʼeririe mbũtũ ya Sisera marĩ na ũmĩrĩru (Rora kĩbungo gĩa 18)
18. Kĩonereria kĩa Baraki kĩratũruta atĩa ũhoro-inĩ wĩgiĩ kwĩhoka Jehova? (Rora mbica ngothi-inĩ.)
18 Wĩhokage Jehova. Ta wĩcirie ũrĩa Baraki aagaacĩrire nĩ ũndũ wa kwĩhoka ũtongoria wa Jehova. O na gũtuĩka hĩndĩ ĩyo andũ a Isiraeli matiehaarĩirie nĩ ũndũ wa mbaara na matiarĩ na matharaita, Jehova eerire Baraki athiĩ akarũe na mbũtũ ya Akanaani ĩrĩa yatongoragio nĩ Sisera na yarĩ na matharaita maingĩ. (Atiir. 5:8) Mũnabii Debora eerire Baraki aikũrũke mũkuru-inĩ mwaraganu nĩguo agacemanie na Sisera na ngaari ciake 900 cia mbaara. Baraki nĩ aathĩkire o na gũtuĩka ũngĩarĩ ũndũ mũritũ harĩ Aisiraeli kũrũa na mbũtũ ĩyo marĩ kũndũ kũu kwaraganu. Rĩrĩa mbũtũ ĩyo yaikũrũkaga Kĩrĩma gĩa Taboru, Jehova nĩ ooiririe mbura nene kuuma igũrũ. Mbũtũ ya Sisera ĩkĩremerera ndoro-inĩ na Jehova akĩhe Baraki ũhootani. (Atiir. 4:1-7, 10, 13-16) O na ithuĩ, Jehova no atũhe ũhootani tũngĩmwĩhoka na twĩhoke ũtongoria ũrĩa atũheaga kũgerera ithondeka rĩake.—Gũcok. 31:6.
TUA ITUA RĨA GŨIKARA WĨHANDĨTE
19. Ũngĩenda gũikara wĩhandĩte nĩkĩ?
19 No mũhaka tũthiĩ na mbere kwĩrutanĩria nĩguo tũhote gũikara twĩhandĩte mũtabarĩre-inĩ ũyũ mũũru wa maũndũ. (1 Tim. 6:11, 12; 2 Pet. 3:17) Rekei tũtue itua rĩa kwaga gwĩtĩkĩra kwenyenyio nĩ mĩnyamaro, mawara, mwĩcirĩrie wa andũ, maheeni, na maũndũ ma gũtũhĩngĩca. (Ef. 4:14) Handũ ha ũguo, rekei tũikare twĩhandĩte, tũrũmĩte wega na tũtegũthengeka harĩ gũtungatĩra Jehova na gwathĩkĩra maathani make. Ihinda-inĩ o rĩu, nĩ tũrabatara gũkorũo na ũigananĩru. Gĩcunjĩ-inĩ kĩrĩa kĩrũmĩrĩire, nĩ tũkoona ũrĩa Jehova na Jesu matũigĩire kĩonereria kĩega ũhoro-inĩ wĩgiĩ gũkorũo na ũigananĩru.
RWĨMBO NA. 129 Tũthiĩi na Mbere Gũkirĩrĩria
a Kuuma o hĩndĩ ya Adamu na Hawa, Shaitani nĩ ageretie gũtheremia rĩciria rĩa atĩ andũ nĩo magĩrĩirũo gwĩtuĩra ũndũ ũrĩa mwega na ũrĩa mũũru. Endaga tũkorũo na mwerekera ta ũcio harĩ mawatho ma Jehova na harĩ ũtongoria o wothe tũraheo nĩ ithondeka rĩa Jehova. Gĩcunjĩ gĩkĩ nĩ gĩgũtũteithia gwĩthema mwerekera ũrĩa ũrĩ thĩinĩ wa thĩ ĩno ya Shaitani wa kwaga gũtindanĩra na ithimi cia Jehova, na gĩtũteithie gwĩkĩra hinya itua ritũ rĩa gũikara tũrũmĩte mwena-inĩ wa Jehova.
b Nĩguo wone ũhoro wĩgiĩ ũrĩa Mũkristiano angĩathĩkĩra watho wa Ngai wĩgiĩ thakame, rora ithomo rĩa 39 ibuku-inĩ rĩa Kenera Ũtũũro Tene na Tene!
c Rora gĩcunjĩ kĩrĩ na kĩongo “Jilinde Dhidi ya Habari za Uwongo” thĩinĩ wa jw.org/sw.
d Nĩguo wone ũhoro makĩria, rora gĩcunjĩ gĩa 13 na gĩa 14 ibuku-inĩ rĩa Ũthathaiya Mũtheru wa Jehova—Nĩ Ũcoketio!