Bibilia ndiugĩte, no nĩ ĩgwetete maũndũ ma bata marĩa mangĩkorũo maatũmire matue itua rĩa kwaga gũcoka Nazarethi hĩndĩ ĩyo.

Mũraika eerire Mariamu atĩ nĩ angĩagĩire nda na aciare mwana. Rĩrĩa mũraika aakinyirie ndũmĩrĩri ĩyo, Mariamu na Jusufu maaikaraga itũũra-inĩ rĩa Nazarethi thĩinĩ wa Galili. (Luk. 1:26-31; 2:4) Thutha ũcio, rĩrĩa maaumire Misiri maacokire Nazarethi. Kũu nĩkuo Jesu aakũrĩire na agĩtuĩka Mũnazarethi. (Mat. 2:19-23) Nĩkĩo rĩrĩa twaigua rĩĩtwa Nazarethi, twĩciragia ũhoro wa Jesu, Jusufu, na Mariamu.

Mariamu nĩ aarĩ na mũndũ wa famĩlĩ yao waikaraga Juda wetagwo Elizabethi. Elizabethi aarĩ mũtumia wa mũthĩnjĩri-Ngai wetagwo Zekaria, na nĩwe warĩ nyina wa Johana Mũbatithania. (Luk. 1:5, 9, 13, 36) Mariamu nĩ aathiĩte gũceerera Elizabethi na agaikara nake ihinda rĩa mĩeri ĩtatũ kũu Juda, na thutha ũcio agĩcoka Nazarethi. (Luk. 1:39, 40, 56) Kwoguo Mariamu nĩ ooĩ itũũra rĩu rĩa Juda.

Thutha wa ihinda, Jusufu nĩ aaumire Nazarethi na agĩthiĩ Bethilehemu, tondũ Aroma nĩ maathanĩte atĩ andũ othe “makeyandĩkithie, o mũndũ itũũra-inĩ rĩake mwene.” Ningĩ nĩ kwarathĩtwo atĩ Mesia angĩaciarĩirũo Bethilehemu, ‘itũũra rĩa Daudi.’ (Luk. 2:3, 4; 1 Sam. 17:15; 20:6; Mik. 5:2) Thutha wa Mariamu gũciarĩra Jesu kũu Bethilehemu, Jusufu ndangĩarekire athiĩ thabarĩ ndaihu ya gũcoka Nazarethi arĩ na gakenge. Maaikarire kũu Bethilehemu kũrĩa kwarĩ kĩndũ kilomita kenda kuuma Jerusalemu. Marĩ kũu, nĩ ũngĩarĩ ũndũ mũhũthũ harĩ o gũtwara kaana kao gakenge hekarũ-inĩ, na kũruta magongona marĩa maabataranagia.—Alaw. 12:2, 6-8; Luk. 2:22-24.

Mũraika wa Ngai eerĩte Mariamu mbere ĩyo atĩ mwana ũrĩa angĩagĩire, nĩ angĩkaaheo ‘gĩtĩ kĩa ũnene kĩa Daudi’ na nĩ ‘angĩgaathana arĩ Mũthamaki.’ No gũkorũo Jusufu na Mariamu nĩ moonaga ũrĩ ũndũ wa bata harĩ Jesu gũciarĩrũo itũũra-inĩ rĩa Daudi. (Luk. 1:32, 33; 2:11, 17) No kũhoteke moonire ũrĩ ũndũ wa ũũgĩ gũthiĩ na mbere gũikara kũu, meterere Ngai amahe ũtongoria makĩria.

Tũtiũĩ maaikarĩte kũu ihinda rĩigana atĩa mbere ya atuĩria a njata kũmaceerera. O na kũrĩ ũguo, gũkinyĩria hĩndĩ ĩyo, “mwana” wao ndaarĩ mũharatĩ-inĩ, aarĩ nyũmba na ndaarĩ gakenge. (Mat. 2:11) Kuonekaga atĩ handũ ha famĩlĩ ĩyo gũcoka Nazarethi, nĩ maaikarire Bethilehemu kwa ihinda na magĩgũtua mũciĩ.

Herode nĩ aathanire atĩ “tũhĩĩ tuothe twa mĩaka ĩĩrĩ gũcoka na thĩ tũũragwo thĩinĩ wa Bethilehemu.” (Mat. 2:16) Mũraika nĩ aamenyithirie Jusufu ũndũ ũcio, na kwoguo Jusufu na Mariamu makĩũrĩra Misiri marĩ na Jesu na magĩikara kuo nginya rĩrĩa Herode aakuire. Thutha ũcio, Jusufu agĩtwara famĩlĩ yake Nazarethi. Maagire gũcoka Bethilehemu nĩkĩ? Tondũ hĩndĩ ĩyo mũrũ wa Herode wetagwo Arikelau nĩwe waathanaga thĩinĩ wa Judea na aarĩ mũndũ ũtarĩ tha. Ningĩ mũraika nĩ aaheire Jusufu mũkaana o rĩngĩ ndagathiĩ kuo. Nazarethi kwarĩ na ũgitĩri na Jusufu nĩ angĩahotire kũrera Jesu arĩ mũthathaiya wa ma wa Ngai.—Mat. 2:19-22; 13:55; Luk. 2:39, 52.

Kuonekaga atĩ Jusufu aakuire mbere ya Jesu ahingũrĩte mweke wa andũ gũthiĩ igũrũ. Nĩ ũndũ ũcio, Jusufu akaariũkio atũũre gũkũ thĩ. Andũ aingĩ nĩ magaacemania nake na merute makĩria kuuma kũrĩ we igũrũ rĩgiĩ kĩrĩa gĩatũmire marĩ na Mariamu maikare Bethilehemu thutha wa Jesu gũciarũo.