Aciari akwa maaumire Estonia hĩndĩ ya Mbaara ya Kerĩ ya Thĩ magĩthiĩ Njĩrĩmani, kũrĩa ndaciarĩirũo. Ndaciarũo, nĩrĩo maambĩrĩirie kwĩhaarĩria gũthamĩra Canada. Mũciĩ witũ wa mbere warĩ kanyũmba kanini karĩa twaikaranagia na ngũkũ, na warĩ hakuhĩ na taũni ya Ottawa, kũu Canada. O na gũtuĩka twarĩ athĩni mũno, nĩ twakenagĩra kũrĩa matumbĩ rũcinĩ.

Mũthenya ũmwe, Aira a Jehova nĩ maathomeire mami Kũguũrĩrio 21:3, 4. Nĩ aakenirio mũno nĩ ũndũ ũrĩa eerutire nginya akĩambĩrĩria kũrĩra. Mami na baba nĩ maathiire na mbere kwĩruta Bibilia na thutha wa kahinda kanini mũno makĩbatithio.

O na gũtuĩka aciari akwa matioĩ Gĩthũngũ wega, nĩ meerutanagĩria gũtungatĩra Jehova. Hakuhĩ mĩthenya yothe ya Njuuma thutha wa baba kũruta wĩra ũtukũ mũgima kĩganda-inĩ gĩa gũtwekũra cuma, thĩinĩ wa Sudbury, Ontario, nĩ aatũtwaraga ũtungata tũrĩ na Sylvia, mwarĩ wa maitũ ũrĩa mũnini. Na o kiumia nĩ twerutaga ngathĩti ya Mũrangĩri tũrĩ famĩlĩ. Mami na baba nĩ maandeithirie kwenda Ngai. Ũndũ ũcio nĩ wandeithirie kwĩyamũrĩra Jehova mwaka-inĩ wa 1956, ndĩ na mĩaka ikũmi. Hĩndĩ ciothe ndecũrania ũrĩa meendete Jehova, ũndũ ũcio nĩ ũnjĩkĩraga ngoro gũthiĩ na mbere kũmũtungatĩra.

Thutha wa kũrĩkia cukuru ya sekondarĩ, nĩ ndambĩrĩirie kũhwererekera kĩĩroho. Ndeciragia atĩ ingĩatuĩkire painia, ndingĩahotire gũthũkũma mbeca cia kũigana cia kũhingia merirĩria makwa ma gũkuuo nĩ ndege na kwĩyonera mabũrũri mangĩ. Nĩ ndonire wĩra wa gũtuĩka DJ ceceni-inĩ ĩmwe ya redio na nĩ ndaũkenagĩra mũno. No ndarutaga wĩra hwaĩ-inĩ na kwoguo ndingĩahotire gũthiĩ mĩcemanio kaingĩ, na ndanyitanagĩra na arata matendete Ngai. Mũthia-inĩ, thamiri yakwa ĩrĩa yamenyeretio nĩ Bibilia nĩ yandindĩkire gwĩka mogarũrũku.

Nĩ ndathamĩire taũni-inĩ ya Oshawa, Ontario, kũrĩa ndacemanirie na Ray Norman, mwarĩ wa nyina Lesli, na mapainia angĩ. Othe nĩ maanyitire ũgeni wega. Kuona ũrĩa maarĩ na gĩkeno nĩ kwandeithirie gwĩcũrania ũrĩa ingĩahũthĩrire ũtũũro wakwa. Nĩ maanjĩkĩrire ngoro nyambĩrĩrie ũpainia, na ngĩka ũguo mweri-inĩ wa Septemba, 1966. Ndarĩ na gĩkeno, na ũtũũro wakwa nĩ wathiaga wega. O na kũrĩ ũguo, kũrĩ mogarũrũku iteerĩgĩrĩire maarĩ hakuhĩ gwĩkĩka.

Nĩ ndaihũrĩtie fomu ya gũtungata Betheli taũni-inĩ ya Toronto, Canada o ndĩ cukuru ya sekondarĩ. Thutha ũcio, hĩndĩ ĩyo ndatungataga ndĩ painia, nĩ ndetirũo ngatungate Betheli ihinda rĩa mĩaka ĩna. No nĩ ndendete Lesli mũno na nĩ ndetigagĩra atĩ ingĩetĩkĩrire  gũthiĩ Betheli no kũhoteke tũtingĩonanire nake rĩngĩ. Thutha wa kũhoya mũno ihinda iraihu, nĩ ndetĩkĩrire gũthiĩ Betheli na ngiugĩra Lesli ũhoro ndĩ na kĩeha kĩingĩ.

Ndarutaga wĩra wa kũhũũra nguo kũu Betheli, na thutha-inĩ ngĩruta wa karani. Ihinda-inĩ o rĩu, Lesli agĩtuĩka painia wa mwanya taũni-inĩ ya Gatineau, Quebec. Kaingĩ nĩ ndamwĩciragia na ngarigwo kana nĩ ndatuĩte itua rĩrĩa rĩagĩrĩire. Ngĩcoka ngĩamũkĩra ũhoro mwega itangĩerĩgĩrĩire o na hanini. Ray, mũrũ wa nyina na Lesli, nĩ eetĩtwo atungate Betheli. Twaikaraga nake rumu ĩmwe. Ũndũ ũcio nĩ wandeithĩrĩirie gũcokia ũrata wakwa na Lesli. Twahikanirie mũthenya wa mũico wa ũtungata wakwa wa mĩaka ĩna Betheli, Februarĩ 27, 1971.

Tũrĩ na Lesli twatũmirũo tũgatungate kĩũngano-inĩ kĩa rũthiomi rwa Kĩfaranja gĩcigo-inĩ gĩa Quebec. Thutha wa mĩaka ĩigana ũna, nĩ ndaheirũo mweke wa gũtuĩka mũrori wa mũthiũrũrũko ndĩ na mĩaka 28 na ũcio warĩ ũndũ itangĩerĩgĩrĩire. Ndaiguaga ta itagĩrĩire tondũ ndarĩ mwĩthĩ, no ciugo cia Jeremia 1:7, 8 nĩ cianjĩkĩrire ngoro. O na kũrĩ ũguo, Lesli nĩ aagĩte na aksidenti cia ngaari maita maigana ũna, na ndaahotaga gũkoma wega. Kwoguo nĩ tuoonaga ta ũngĩarĩ ũndũ mũritũ harĩ ithuĩ kũruta wĩra wa gũceerera ciũngano. No Lesli akiuga, “Jehova angĩtũhe wĩra-rĩ, githĩ ti kaba kũgeria kũũruta?” Nĩ twetĩkĩrire mweke ũcio na tũgĩkenera gũceerera ciũngano kwa ihinda rĩa mĩaka 17.

Wĩra wa gũceerera ciũngano nĩ wooyaga mahinda maingĩ na rĩmwe ndiahotaga kũhũthĩra mahinda ma kũigana hamwe na Lesli. Nĩ ndabataraga kwĩruta ũndũ ũngĩ. Njumatatũ ĩmwe rũcinĩ, ngengere ya mũrango witũ nĩ yahũũrirũo. Twarora tũtionire mũndũ, no haarĩ na gakabu kaarĩ na gĩtambaya, matunda, cheese, mĩgate, ndibei, ngirathi, na karatathi gataandĩkĩtwo rĩĩtwa no kaaugaga, “Thiĩ ũgaceerie mũtumia waku.” Kwarĩ na rĩera rĩega, no nderire Lesli atĩ nĩ ndabataraga kũhaarĩria mĩario na ndingĩahotire gũthiĩ. Lesli nĩ aaiguire ũũru, no nĩ aataũkĩirũo. Njikarĩte thĩ metha-inĩ, thamiri yakwa ĩkĩambĩrĩria gũũthumbũra. Ngĩririkana Aefeso 5:25, 28. Ngĩona atĩ Jehova aahũthagĩra mĩhari ĩyo kũndirikania bata wa kũrũmbũiya mabataro ma ngoro ma mũtumia wakwa. Thutha wa kũhoya, nderire Lesli, “Nĩ tũthiĩ,” ũndũ ũrĩa wamũkenirie. Tuoire ngaari itũ tũgĩthiĩ handũ hathaka hakuhĩ na rũũĩ, tũkĩara gĩtambaya, na nĩ twakeneire mũno mũthenya ũcio. Na no ndahaarĩirie mĩario yakwa.

Icigo citũ cia mũthiũrũrũko ciarĩ nyingĩ na nĩ twakenagĩra, kuuma British Columbia nginya Newfoundland. Merirĩria makwa ma gũceera nĩ maahingire. Nĩ ndecirĩtie ũhoro wa gũthiĩ Cukuru ya Gileadi, no ndieendaga gũthiĩ gũtungata bũrũri-inĩ ũngĩ. Ndonaga ta amishonarĩ marĩ andũ a mwanya, na ndioonaga ta ingĩagĩrĩire gũtuĩka mũmishonarĩ. Ningĩ nĩ ndetigagĩra tũtigatũmwo Afrika kũrĩa kwarĩ na mĩrimũ na mbaara. Nĩ ndakenagĩra gũkorũo Canada.

Mwaka-inĩ wa 1992, rĩrĩa wĩra wa kũhunjia wacokereirũo mabũrũri-inĩ marĩa maakoretwo thĩinĩ wa Soviet Union, nĩ tuoririo kana no twende gũthiĩ Estonia tũrĩ amishonarĩ. Twaiguire twamaka mũno, no tũkĩhoya igũrũ rĩgiĩ ũndũ ũcio. O rĩngĩ tũkiuga, “Jehova angĩtũhe wĩra-rĩ, githĩ ti kaba kũgeria kũũruta?” Tũgĩtĩkĩra mweke ũcio, na ngiuga, ‘Wega nĩ atĩ tũtirathiĩ Afrika.ʼ

Twambĩrĩirie kwĩruta rũthiomi rwa Kĩestonia o rĩo. Thutha wa mĩeri ĩigana ũna tũrĩ kũu Estonia, nĩ twambĩrĩirie wĩra wa gũceerera ciũngano. Twaceeragĩra ciũngano ta 46 na ikundi, iria ciarĩ mabũrũri-inĩ matatũ ma Baltic nĩmo Estonia, Latvia, na Lithuania, na gĩcigo-inĩ gĩa Kaliningrad, Russia. Kwoguo nĩ twabataraga kwĩruta rũthiomi rwa Kĩlatvia, Kĩlithuania, na Kĩrussia. Ndwarĩ ũndũ mũhũthũ, no aarĩ na ariũ a Ithe witũ nĩ maakenagio nĩ kĩyo gitũ gĩa kwĩruta rũthiomi rwao, na nĩ maatũteithagĩrĩria. Mwaka-inĩ wa 1999, nĩ kwagĩire na wabici ya rũhonge Estonia, na ngĩgĩa mweke wa gũtungata kamĩtĩ-inĩ ya wabici ya rũhonge tũrĩ na Toomas Edur, Lembit Reile, na Tommi Kauko.

Nĩ twamenyanire na aarĩ na ariũ a Ithe witũ aingĩ arĩa maatwarĩtwo ithamĩrio Siberia mbere ĩyo. O na gũtuĩka nĩ maakirĩrĩirie gũikio njera na kwamũranio na famĩlĩ ciao, matiaigĩte marakara ngoro. Nĩ maatũũrĩtie gĩkeno kĩao na kĩyo ũtungata-inĩ. Ũndũ ũcio nĩ watũteithirie kũmenya no tũhote gũkirĩrĩria na tũgĩe na gĩkeno o na tũrĩ na moritũ.

Thutha wa kũruta wĩra mĩaka mĩingĩ tũtekuona ihinda rĩa kũhurũka, Lesli nĩ aambĩrĩirie kũigua anogete mũno. Tũtiamenyire o rĩo atĩ aaiguaga ũguo tondũ aarĩ na mũrimũ wa fibromyalgia. Tũkĩambĩrĩria gwĩciria gũcoka Canada. Rĩrĩa twetirũo cukuru ya arĩa matungataga kamĩtĩ-inĩ cia wabici cia honge thĩinĩ wa Patterson, New York, U.S.A., ndieciragia nĩ tũngĩahotire gũthiĩ. No thutha wa kũhoya mũno, nĩ twetĩkĩrire gũthiĩ. Jehova nĩ aarathimire itua ritũ tondũ tũrĩ cukuru ĩyo nĩguo Lesli aahotire kuona ũrigitani ũrĩa aabataraga. Kwoguo nĩ twahotire gũcokerera ũtungata witũ.

Hwaĩ-inĩ ũmwe mwaka-inĩ wa 2008 tũrĩ o kũu Estonia, nĩ ndahũũrĩirũo thimũ kuuma wabici nene ya Aira a Jehova ngĩũrio kana no tũthiĩ tũgatungate bũrũri-inĩ wa Congo. Nĩ ndamakire mũno, makĩria tondũ ndabataraga kũheana macokio mũthenya ũrĩa warũmĩrĩire. Kĩambĩrĩria-inĩ ndierire Lesli tondũ nĩ ndamenyaga atĩ ndangĩakomire ũtukũ ũcio. No niĩ nĩ niĩ itaakomire ngĩhoya Jehova igũrũ rĩgiĩ maũndũ marĩa ndetigagĩra megiĩ Afrika.

Mũthenya ũrĩa warũmĩrĩire nĩ nderire Lesli, na tũkĩĩra: “Jehova nĩwe ũratũtũma tũthiĩ Afrika. Tũngĩmenya atĩa atĩ tũtingĩhota gũthiĩ na tũkenere tũtangĩgeria?” Kwoguo, thutha wa gũikara Estonia mĩaka 16, tũkĩũmbũka tũgĩthiĩ Kinshasa, Congo. Wabici ya rũhonge yarĩ handũ hathaka na hahooreru. Kĩndũ kĩa mbere kĩrĩa Lesli aaigire nyũmba-inĩ itũ nĩ kandi ĩmwe ĩrĩa aaigĩte kuuma rĩrĩa twaumire Canada. Kandi ĩyo yarĩ na ciugo “Theremaga harĩa wahandwo.”  Thutha wa kũmenyana na aarĩ na ariũ a Ithe witũ, kwĩruta Bibilia na andũ, na kuona ũrĩa twakenagĩra ũtungata wa ũmishonarĩ, gĩkeno gitũ ũtungata-inĩ wa Jehova nĩ kĩoongererekire. Thutha wa ihinda, nĩ twagĩire na mweke wa gũceerera wabici cia honge mabũrũri-inĩ mangĩ 13 ma Afrika, tũtũmĩtwo nĩ wabici nene. Nĩ twahotire kũmenyana na andũ aingĩ ega maumĩte kũndũ gũtiganĩte. Guoya ũrĩa ndarĩ naguo kwerekera Afrika nĩ wathirire na tũgĩcokeria Jehova ngatho nĩ ũndũ wa gũtũtũma tũgatungate kuo.

Bũrũri-inĩ wa Congo, nĩ tuoonirio kũrĩa irio cia mĩthemba mĩingĩ, nginya imwe iria ndeciragia atĩ tũtingĩahotire kũrĩa. No kuona ũrĩa aarĩ na ariũ a Ithe witũ maacikenagĩra nĩ gwatũmire tũgerie gũcirĩa na tũgĩcienda.

Nĩ twathiaga gĩcigo kĩa mwena wa irathĩro kĩa bũrũri ũcio gwĩkĩra aarĩ na ariũ a Ithe witũ ngoro na kũmatwarĩra indo iria maabataraga. Gĩcigo-inĩ kĩu nĩ kwarĩ na ikundi cia ũregani iria ciatharĩkagĩra matũũra na ikanyamaria atumia na ciana. Aarĩ na ariũ a Ithe witũ aingĩ kũu maarĩ athĩni. O na kũrĩ ũguo, kuona ũrĩa maarĩ na kĩĩrĩgĩrĩro kĩrũmu gĩa kũriũka, ũrĩa meendete Jehova, na ũrĩa maarĩ ehokeku harĩ ithondeka rĩake, nĩ gwatũhutagia ngoro mũno. Kĩonereria kĩao nĩ gĩatũtindĩkire gwĩthuthuria kĩrĩa gĩatũmaga tũtungatĩre Jehova, na gĩgĩtũtindĩka gwĩkĩra hinya wĩtĩkio witũ. Aarĩ na ariũ a Ithe witũ amwe nĩ moorĩtwo nĩ mĩciĩ yao na irio iria maahandĩte. Ũndũ ũcio nĩ wandeithirie gwĩciria ũrĩa indo cia gũkũ thĩ ingĩthira na ihenya na kuona atĩ ũrata witũ na Jehova nĩguo wa bata makĩria. O na aarĩ na ariũ a Ithe witũ acio magĩcemanagia na moritũ macio, matiatindaga makĩnuguna. Mwerekera wao nĩ watũteithirie o na ithuĩ kũhiũrania na moritũ maitũ na mathĩna ma mwĩrĩ tũrĩ na ũmĩrĩru.

Nĩ twamũkĩrire mweke ũngĩ tũteerĩgĩrĩire wa gũthiĩ gũtungata wabici-inĩ ya rũhonge ya Hong Kong. Tũtiaumĩte twĩcirĩtie atĩ no tũthiĩ Asia, no tondũ nĩ tuoonete ũrĩa Jehova aatũteithĩtie tũgĩtungata mabũrũri-inĩ marĩa mangĩ, nĩ twetĩkĩrire gũthiĩ kuo. Kwoguo mwaka-inĩ wa 2013, tũkiumagara tũtoĩ maũndũ marĩa tũngĩacemanirie namo, tũkiuma Afrika na tũkiugĩra arata aitũ ũhoro tũrĩ na kĩeha kĩingĩ.

 Hong Kong nĩ taũni nene na ĩkoragwo na andũ aingĩ kuuma kũndũ gũtiganĩte, kwoguo warĩ ũgarũrũku mũnene harĩ ithuĩ gũthiĩ kuo. Ndwarĩ ũndũ mũhũthũ kwĩruta rũthiomi rwa Gĩchaina. No aarĩ na ariũ a Ithe witũ nĩ maatũnyitire ũgeni wega na nĩ twakenagĩra irio cia kũu. Wĩra wa kũhunjia nĩ woongererekete, kwoguo wabici nĩ yabataraga handũ hanenanene. No thogora wa mĩgũnda na nyũmba o naguo no woongererekete mũno. Kwoguo Kĩama Kĩrĩa Gĩtongoragia gĩgĩtua itua rĩa gũthamĩria wĩra ũmwe kũndũ kũngĩ, na kwendia nyũmba nyingĩ iria ciahũthagĩrũo nĩ wabici ya rũhonge. Ihinda inini thutha ũcio, mwaka-inĩ wa 2015, tũgĩthamĩrio South Korea kũrĩa tũtungataga nginya ũmũthĩ. Nĩ twabatarire kwĩruta rũthiomi rũngĩ rũritũ, na o na gũtuĩka tũtirĩ twahota kũrwaria wega biũ, arata aitũ nĩ matwĩkĩraga ngoro magatwĩra no tũramenya Gĩkorea.

Gũthondeka arata erũ ndũkoragwo ũrĩ ũndũ mũhũthũ hingo ciothe, no nĩ tũmenyete atĩ gũkorũo tũrĩ a mbere kũnyita ũgeni andũ moke gwitũ nĩ gũtũteithagia kũmamenya o na ihenya. Nĩ twĩrutĩte atĩ o na gũtuĩka aarĩ na ariũ a Ithe witũ nĩ ngũrani, makoragwo mahaanaine na njĩra nene, na Jehova aatũmbire tũrĩ na ũhoti wa kũhingũra ngoro citũ na kũgĩa na arata aingĩ.—2 Kor. 6:11.

Nĩ tuonete bata wa kuona andũ ta ũrĩa Jehova amonaga, na kũrora ũira wa atĩ Jehova nĩ atwendete na nĩ atũtongoragia. Hĩndĩ ciothe tũngĩaiguire tũkuĩte ngoro, kana tũkarigwo kana andũ arĩa angĩ nĩ matwendete, nĩ twekĩragwo ngoro nĩ gũthoma kandi na marũa marĩa twanatũmĩrũo nĩ arata. Hatarĩ nganja nĩ twĩyoneire ũrĩa Jehova acoketie mahoya maitũ, agatuonia atĩ nĩ atwendete, na agatũhe hinya wa gũthiĩ na mbere.

Ihinda-inĩ rĩa mĩaka ĩyo mĩhĩtũku, tũrĩ na Lesli nĩ twĩrutĩte bata wa kũbanga mahinda ma kũhũthĩraga hamwe, o na angĩkorũo tũrĩ na maũndũ maingĩ atĩa ma gwĩka. Ningĩ nĩ twĩrutĩte bata wa gwĩthekerera rĩrĩa twahĩtia, makĩria tũkĩĩruta rũthiomi rwerũ. Na o hwaĩ-inĩ, nĩ tũcaragia kaũndũ kega karĩa tũngĩcokeria Jehova ngatho nĩ ũndũ wako.

Ma nĩ atĩ, ndonaga ta itangĩhota gũtuĩka mũmishonarĩ kana gũikara mabũrũri-inĩ mangĩ. No nĩ ngĩte na gĩkeno gĩa kuona ũrĩa maũndũ mothe mahotekaga nĩ ũndũ wa ũteithio wa Jehova. Nĩ ndirikanaga ciugo ici cia mũnabii Jeremia: “Nĩ ũũheenereirie, wee Jehova.” (Jer. 20:7) Jehova nĩ atwĩkĩire maũndũ maingĩ mega tũtangĩerĩgĩrĩire na agatũhe irathimo tũtangĩeciririe, nginya kũhingia merirĩria makwa ma gũkuuo nĩ ndege. Nĩ tũthiĩte na ndege kũndũ kũingĩ o na gũkĩra ũrĩa ingĩecirĩirie ndĩ kamwana, tũgĩceerera wabici cia honge itarũ-inĩ ithano thĩinĩ wa thĩ. Nĩ njokagia ngatho mũno nĩ ũndũ wa Lesli gũkorũo ehaarĩirie kũũnyita mbaru na kũndeithĩrĩria mĩeke-inĩ ĩyo yothe ya ũtungata.

Nĩ tũikaraga tũkĩĩririkanagia atĩ twĩkaga maũndũ mothe tondũ nĩ twendete Jehova. Irathimo iria tũkenagĩra ũmũthĩ nĩ ituonagia ũrĩa tũgaakenera ũtũũro tene na tene, rĩrĩa Jehova ‘agaakumbatũra guoko gwake na ahingie merirĩria ma kĩndũ gĩothe kĩrĩ muoyo.ʼ—Thab. 145:16.