GĨCUNJĨ KĨA WĨRUTI KĨA 23
RWĨMBO NA. 28 Gũtuĩka Mũrata wa Jehova
Jehova nĩ Atũnyitĩte Ũgeni Hema-inĩ Yake
“Hema yakwa ĩgaakorũo hamwe nao, na niĩ nĩ ngaatuĩka Ngai wao.”—EZEK. 37:27.
ŨNDŨ ŨRĨA WARĨRĨIRIO
Nĩ tũkuona kũnyitwo ũgeni hema-inĩ ya Jehova nĩ kuuga atĩa, na ũrĩa atũrũmbũyagia tũrĩ ageni ake.
1-2. Nĩ mweke ũrĩkũ wa mwanya Jehova aheete athathaiya ake ehokeku?
HIHI wee wonaga Jehova atĩa? Kwahoteka no uuge, ‘Jehova nĩ Baba, Ngai wakwa, na Mũrata wakwa.’ Kũrĩ o na marĩĩtwa mangĩ ũngĩhũthĩra gũtaarĩria Jehova. No hihi nĩ ũrĩ weciria atĩ no ũkorũo ũrĩ mũgeni wake?
2 Mũthamaki Daudi aaringithanirie ũrata ũrĩa ũkoragwo ho gatagatĩ ka Jehova na athathaiya ake ehokeku, na ũrata gatagatĩ ka mũndũ na ageni ake. Ooririe ũũ: “Atĩrĩrĩ Jehova, nũũ ũngĩtuĩka mũgeni hema-inĩ yaku? Nũũ ũngĩtũũra kĩrĩma-inĩ gĩaku kĩamũre?” (Thab. 15:1) Ciugo icio ciatongoririo nĩ roho, itũrutaga atĩ no tũtuĩke ageni a Jehova, na ũguo nĩ kuuga arata ake. Na githĩ ũcio ti mweke wa mwanya Jehova atũheete?
JEHOVA ENDAGA TŨTUĨKE AGENI AKE
3. Nũũ warĩ wa mbere gũtuĩka mũgeni wa Jehova, na ũndũ ũcio watũmire Jehova na mũgeni ũcio wake maigue atĩa?
3 Jehova aarĩ o wiki atanambĩrĩria wĩra wa ũũmbi. No ihinda nĩ rĩakinyire rĩrĩa aanyitire ũgeni Mũrũ wake wa irigithathi hema-inĩ yake ya mũhaano. Jehova nĩ aakeneire mũno itemi rĩu rĩa kũnyitana ũgeni, tondũ Bibilia yugaga atĩ ‘nĩ aakenagio mũno’ nĩ Mũrũwe. O nake Mũrũwe nĩ ‘aakenaga arĩ mbere ya Jehova hĩndĩ ciothe.’—Thim. 8:30.
4. Nĩa angĩ Jehova aanyitire ũgeni hema-inĩ yake?
4 Jehova nĩ aacokire akĩũmba ciũmbe ingĩ cia roho, na o nacio agĩcinyita ũgeni hema-inĩ yake. Bibilia ĩtaga araika “ariũ a Ngai,” na ĩkonania atĩ nĩ makenaga gũkorũo hamwe na Jehova. (Ayub. 38:7; Dan. 7:10) Kwa ihinda iraihu, ageni a Jehova maarĩ o ciũmbe cia roho iria cikaraga nake kũrĩa igũrũ. Nĩ aacokire akĩũmba andũ, na o nao nĩ mangĩatuĩkire ageni hema-inĩ yake. Andũ amwe arĩa aanyitire ũgeni nĩ Enoko, Nuhu, Iburahimu, na Ayubu. Bibilia yonanagia atĩ maatuĩkire arata a Jehova tondũ nĩ maatwaranaga “na Ngai ũrĩa wa ma.”—Kĩam. 5:24; 6:9; Ayub. 29:4; Isa. 41:8.
5. Tũreruta atĩa kuumana na ũrathi ũrĩa ũrĩ thĩinĩ wa Ezekieli 37:26, 27?
5 Kwa ihinda rĩa mĩaka mĩingĩ, Jehova nĩ athiĩte na mbere kũnyita arata ake ũgeni hema-inĩ yake. (Thoma Ezekieli 37:26, 27.) Kwa ngerekano, ũrathi wa Ezekieli nĩ ũtũrutaga atĩ Jehova nĩ endaga mũno gũkorũo na ũrata wa hakuhĩ hamwe na athathaiya ake ehokeku. Eranĩire atĩ nĩ egũthondeka “kĩrĩkanĩro gĩa thayũ hamwe nao.” Ũrathi ũcio waragĩrĩria ihinda rĩrĩa arĩa marĩ na kĩĩrĩgĩrĩro gĩa gũthiĩ igũrũ hamwe na arĩa marĩ na kĩĩrĩgĩrĩro gĩa gũgaatũũra gũkũ thĩ magaakorũo hamwe hema-inĩ ya Jehova ya mũhaano marĩ “rũũru rũmwe.” (Joh. 10:16) Rĩrĩ nĩrĩo ihinda rĩu rĩarathĩtwo.
NGAI NĨ ATŨRŨMBŨYAGIA GŨTEKŨMAKANIA KŨRĨA TŨRĨ
6. Mũndũ angĩtuĩka mũgeni hema-inĩ ya Jehova atĩa, na hema ĩyo ĩkoragwo kũ?
6 Mahinda-inĩ ma Bibilia, hema yakoragwo ĩrĩ handũ ha kũhurũka na ha kwĩgitia mbura kana riũa. Mũndũ angĩanyitirũo ũgeni hema-inĩ, nĩ eerĩgagĩrĩra atĩ nĩ ekũrũmbũiyo wega nĩ ũcio ũmũnyitĩte ũgeni. Rĩrĩa tweyamũrĩra Jehova, tũtuĩkaga ageni hema-inĩ yake ya mũhaano. (Thab. 61:4) Nĩ tũkenagĩra irio nyingĩ cia kĩĩroho, na ũrata mwega hamwe na arĩa angĩ manyitĩtwo ũgeni nĩ Jehova. Hema yake ya mũhaano ndĩkoragwo o handũ hamwe tu. Kwahoteka wanaceera bũrũri ũngĩ ta hihi hĩndĩ ya kĩgomano kĩa mwanya, na ũgacemania na andũ angĩ arĩa manyitĩtwo ũgeni hema-inĩ ya Jehova. Hema ĩyo ĩkoragwo kũrĩa guothe athathaiya ehokeku a Jehova mangĩkorũo marĩ.—Kũg. 21:3.
7. Nĩ kĩĩ kĩngĩtũma tuuge atĩ athathaiya ehokeku arĩa makuĩte o nao no ageni hema-inĩ ya Jehova? (Ningĩ rora mbica.)
7 Ĩ nao athathaiya ehokeku a Jehova arĩa makuĩte? Hihi no tuuge atĩ o nao no ageni hema-inĩ ya Jehova? Ĩĩ. Tũngiuga ũguo nĩkĩ? Tondũ marĩ muoyo kĩririkano-inĩ kĩa Jehova. Jesu aaugire ũũ: “Ha ũhoro wa kũriũkio kwa arĩa akuũ, o na Musa nĩ aaũmenyithanirie ũhoro-inĩ wĩgiĩ kĩhinga kĩrĩa kĩa mĩigua, rĩrĩa eetire Jehova ‘Ngai wa Iburahimu na Ngai wa Isaaka na Ngai wa Jakubu.’ We ti Ngai wa arĩa makuĩte, no nĩ wa arĩa marĩ muoyo, nĩ gũkorũo harĩ we othe marĩ muoyo.”—Luk. 20:37, 38.
O na athathaiya ehokeku arĩa makuĩte no monwo marĩ ageni hema-inĩ ya Ngai (Rora kĩbungo kĩa 7)
ŨGUNI NA ŨIGĨRĨRĨKI ŨRĨA TŨKORAGWO NAGUO
8. Ageni a Jehova magunĩkaga atĩa nĩ ũndũ wa gũikara hema-inĩ yake?
8 O ta ũrĩa hema ĩkoragwo ĩrĩ handũ ha kũhurũka na ha kwĩgitia mbura kana riũa, no taguo hema ya Jehova ya mũhaano ĩgitagĩra ageni ake matigathũkio kĩĩroho, na ĩkamahe kĩĩrĩgĩrĩro kĩa ma. Tũngĩtũũra hakuhĩ na Jehova, gũtirĩ ũndũ Shaitani angĩtwĩka ũngĩtũrehera mwanangĩko wa gũtũũra. (Thab. 31:23; 1 Joh. 3:8) Thĩinĩ wa thĩ njerũ, Jehova nĩ agaathiĩ na mbere kũgitĩra arata ake ehokeku matigathũkio kĩĩroho, na nginya amagitĩre na njĩra ya kũmehereria gĩkuũ.—Kũg. 21:4.
9. Jehova erĩgagĩrĩra ageni ake meke atĩa?
9 Hatarĩ nganja nĩ mweke wa mwanya gũtuĩka mũgeni hema-inĩ ya Jehova, tondũ nĩ tũgĩaga na ũrata wa hakuhĩ hamwe nake ũrĩa ũngĩtũũra tene na tene. Twagĩrĩirũo gwĩka atĩa nĩguo tũthiĩ na mbere gũkorũo tũrĩ ageni hema-inĩ yake? Ũngĩnyitwo ũgeni nĩ mũndũ gwake mũciĩ, no wende kũmenya maũndũ marĩa arerĩgĩrĩra wĩke. Kwa ngerekano, no erĩgĩrĩre ũrute iratũ ũtanaingĩra nyũmba, na ndũngĩona arĩ ũndũ mũritũ gwĩka ũguo. O ũndũ ũmwe na ũcio, nĩ twendaga kũmenya maũndũ marĩa Jehova erĩgagĩrĩra kuuma kũrĩ arĩa mangĩenda gũthiĩ na mbere gũikara hema-inĩ yake. Kwenda Jehova nĩ gũtũtindĩkaga gwĩka ũrĩa wothe tũngĩhota ‘nĩguo tũmũkenagie biũ.’ (Kol. 1:10) Na o na gũtuĩka nĩ tuonaga Jehova arĩ Mũrata witũ, nĩ tũririkanaga atĩ nĩwe Ngai witũ na Ithe witũ, na kwoguo nĩ twagĩrĩirũo kũmũhe gĩtĩo. (Thab. 25:14) Gũkĩrĩ ũguo, hingo ciothe twagĩrĩirũo gũkorũo na gĩtĩo kĩnene harĩ we. Ũndũ ũcio nĩ ũrĩtũteithagia kwaga gwĩka ũndũ o na ũmwe ũngĩmũrakaria. Wendi witũ ũrĩkoragwo ũrĩ ‘gũtwarana na Ngai witũ tũrĩ na wĩnyihia.’—Mik. 6:8.
JEHOVA NDAARĨ NA MŨTHUTŨKANIO MAHINDA-INĨ MA AISIRAELI
10-11. Njĩra ĩrĩa Jehova aarũmbũirie Aisiraeli nayo marĩ werũ-inĩ wa Sinai yonanagia atĩa atĩ ndarĩ mũthutũkanio?
10 Jehova arũmbũyanagia na ageni ake atarĩ na mũthutũkanio. (Rom. 2:11) Ũndũ ũcio nĩ wonekaga wega kuumana na ũrĩa aarũmbũyanirie na Aisiraeli marĩ werũ-inĩ wa Sinai.
11 Thutha wa Jehova kũruta andũ ake kuuma ũkombo-inĩ bũrũri-inĩ wa Misiri, nĩ aamũrire athĩnjĩri-Ngai matungatage gĩikaro-inĩ kĩrĩa kĩamũre. Alawii nĩ maaheirũo mawĩra mangĩ maakonainie na gĩikaro kĩu kĩamũre. Hihi arĩa maatungataga gĩikaro-inĩ kĩu kana arĩa maambĩte hema hakuhĩ nakĩo, nĩ maarũmbũyagio na njĩra ya mwanya gũkĩra arĩa angĩ? Aca. Jehova ndarĩ mũthutũkanio.
12. Nĩ maũndũ marĩkũ matũteithagia kuona atĩ Jehova aarũmbũyanirie na Aisiraeli atarĩ na mũthutũkanio? (Thama 40:38) (Ningĩ rora mbica.)
12 Mũisiraeli o wothe nĩ angĩagĩire na ũrata wa hakuhĩ hamwe na Jehova, gũtekũmakania kana nĩ aatungataga gĩikaro-inĩ kĩrĩa kĩamũre na kana nĩ aambĩte hema hakuhĩ nakĩo. Kwa ngerekano, Jehova nĩ aatigagĩrĩra atĩ rũrĩrĩ ruothe nĩ rwahotaga kuona gĩtugĩ gĩa itũ na kĩa mwaki iria ciakoragwo igũrũ rĩa gĩikaro kĩu kĩamũre. (Thoma Thama 40:38.) Itu rĩu rĩngĩambĩrĩirie gũthiĩ rĩerekeire handũ hangĩ, o na andũ arĩa maambĩte hema kũraihu na gĩikaro kĩrĩa kĩamũre nĩ maahotaga kuona itu rĩu, makambĩrĩria kũbanga indo ciao, makambũra hema, na makahota gũtwarana na andũ acio angĩ. (Ndar. 9:15-23) Andũ othe nĩ mangĩaiguire mũgambo mũnene wa tũrumbeta twĩrĩ twa betha, tũrĩa twamamenyithagia atĩ nĩ hĩndĩ ya kwambĩrĩria rũgendo. (Ndar. 10:2) Kwoguo gũikara hakuhĩ na gĩikaro kĩrĩa kĩamũre tikuo kuoonanagia atĩ mũndũ arĩ na ũrata wa hakuhĩ na Jehova. Handũ ha ũguo, Mũisiraeli o wothe nĩ angĩakorirũo arĩ mũgeni wa Jehova na agunĩke kuumana na ũtongoria na ũgitĩri wake. O na mahinda-inĩ maya, gũtekũmakania kũrĩa tũikaraga thĩinĩ wa thĩ, no tũgunĩke kuumana na wendo, ũtongoria, na ũgitĩri wa Jehova.
Mũbango wa Ngai wĩgiĩ gĩikaro kĩrĩa kĩamũre nĩ woonanagia atĩ ndarĩ mũthutũkanio (Rora kĩbungo gĩa 12)
O NA ŨMŨTHĨ JEHOVA NDARĨ MŨTHUTŨKANIO
13. Nĩ ũndũ ũrĩkũ ũmwe wonanagia atĩ o na ũmũthĩ Jehova ndarĩ mũthutũkanio?
13 Ũmũthĩ andũ amwe a Jehova maikaraga hakuhĩ na wabici nene ya Aira a Jehova, kana wabici ya rũhonge. Nao angĩ matungataga wabici-inĩ icio. Nĩ ũndũ ũcio, no mahote kũnyita itemi mawĩra-inĩ maingĩ marĩa marutagwo kuo, na manyitanĩre ĩmwe kwa ĩmwe na arĩa matongoragia maũndũ ithondeka-inĩ. Angĩ nao matungataga marĩ arori a mũthiũrũrũko kana ũtungata-inĩ ũngĩ wa mwanya wa mahinda mothe. O na angĩkorũo ihinda-inĩ rĩrĩ ndũranyitanĩra mĩeke-inĩ ta ĩyo, korũo na ma atĩ Jehova endete arĩa othe anyitĩte ũgeni hema-inĩ yake. Nĩ amoĩ othe na nĩ arũmbũyagia o ũmwe wao. (1 Pet. 5:7) Jehova nĩ aheaga ndungata ciake ciothe irio cia kĩĩroho, ũtongoria, na ũgitĩri ũrĩa irabatara.
14. Nĩ ũndũ ũrĩkũ ũngĩ wonanagia atĩ Jehova ndarĩ mũthutũkanio?
14 Ũndũ ũngĩ wonanagia atĩ Jehova ndarĩ mũthutũkanio nĩ atĩ nĩ atigĩrĩire andũ othe thĩinĩ wa thĩ no mahote gũthoma Bibilia. Kĩambĩrĩria-inĩ Maandĩko Marĩa Matheru maandĩkĩtwo na thiomi ithatũ tu, nĩcio Kĩhibirania, Kĩaramu, na Kĩngiriki. Hihi andũ arĩa mangĩhota gũthoma thiomi icio nĩ makoragwo na ũrata wa hakuhĩ na Jehova gũkĩra arĩa matangĩhota gũcithoma? Aca.—Mat. 11:25.
15. Nĩ ũira ũrĩkũ wonanagia atĩ Jehova ndarĩ mũthutũkanio? (Ningĩ rora mbica.)
15 Jehova agĩtũthuura tũtuĩke arata ake, ndaroraga gĩthomo kĩrĩa twĩ nakĩo, o na kana tũrĩ na ũhoti wa gũthoma thiomi itiganĩte. Atigagĩrĩra atĩ andũ othe thĩinĩ wa thĩ no mahote kũgunĩka kuumana na ũũgĩ wake gũtekũmakania kana marĩ na gĩthomo kĩa igũrũ kana matirĩ. Kiugo gĩake Bibilia nĩ gĩtaũrĩtwo na thiomi nyingĩ, na kwoguo andũ thĩinĩ wa thĩ yothe no magunĩke kuumana na morutani makĩo na merute ũrĩa mangĩtuĩka arata ake.—2 Tim. 3:16, 17.
Gũkorũo atĩ ũmũthĩ ũyũ Bibilia no yoneke na thiomi nyingĩ kuonanagia atĩa atĩ Ngai ndarĩ mũthutũkanio? (Rora kĩbungo gĩa 15)
TŨŨRA ‘WĨTĨKĨRĨKĨTE’ HARĨ JEHOVA
16. Kũringana na Atũmwo 10:34, 35, tũngĩka atĩa nĩguo tũtũũre twĩtĩkĩrĩkĩte harĩ Jehova?
16 Nĩ mweke wa mwanya kũnyitwo ũgeni nĩ Jehova hema-inĩ yake ya mũhaano. Gũtirĩ mũnyitani ũgeni ũngĩ ũrĩ ũtugi na wendo gũkĩra Jehova. Ningĩ ndarĩ mũthutũkanio tondũ atũnyitaga ũgeni ithuothe gũtekũmakania kũrĩa mũndũ aikaraga, mũrerere wake, gĩthomo gĩake, rangi wa ngothi yake, rũrĩrĩ rwake, ũkũrũ wake, na kana nĩ mũndũrũme kana nĩ mũtumia. Ĩndĩ andũ arĩa etĩkagĩra matuĩke ageni ake, no arĩa tu mamwathĩkagĩra.—Thoma Atũmwo 10:34, 35.
17. Nĩ ha tũngĩruta ũhoro makĩria wĩgiĩ gũtuĩka mũgeni hema-inĩ ya Jehova?
17 Thĩinĩ wa Thaburi 15:1, Daudi ooririe ciũria ici: “Atĩrĩrĩ Jehova, nũũ ũngĩtuĩka mũgeni hema-inĩ yaku? Nũũ ũngĩtũũra kĩrĩma-inĩ gĩaku kĩamũre?” Mwandĩki ũcio wa Thaburi nĩ aatongoririo nĩ roho gũcokia ciũria icio thĩinĩ wa Thaburi ĩyo ya 15. Gĩcunjĩ kĩrĩa kĩrũmĩrĩire nĩ kĩarĩrĩirie maũndũ mamwe twagĩrĩirũo gwĩka nĩguo tũtũũre twĩtĩkĩrĩkĩte harĩ Jehova.
RWĨMBO NA. 32 Rũgamai Mwena wa Jehova!
