1-2. Nĩ ũndũ ũrĩkũ tũngĩrigwo wĩgiĩ mahoya?

 HIHI nĩ ũrĩ warigwo kana Jehova nĩ aracokia mahoya maku? Angĩkorũo nĩguo, ndũrĩ wiki. Aarĩ na ariũ a Ithe witũ aingĩ manauga atĩ kũrĩ hĩndĩ maarigagwo kana Jehova nĩ aracokia mahoya mao, makĩria makĩgerera maũndũ maritũ. O na ithuĩ angĩkorũo nĩ tũranyamarĩka, no ũkorũo ũrĩ ũndũ mũritũ kuona ũrĩa Jehova aracokia mahoya maitũ.

² Nĩ tũkuona kĩrĩa kĩngĩtũma tũkorũo na ma atĩ Jehova nĩ acokagia mahoya ma athathaiya ake. (1 Joh. 5:15) Ningĩ nĩ tũkwarĩrĩria ciũria ici: Nĩ kĩĩ kĩngĩtũma rĩmwe na rĩmwe tuone ta Jehova ataracokia mahoya maitũ? Jehova acokagia mahoya maitũ na njĩra irĩkũ ũmũthĩ?

3. Jehova endaga tũmũhoe nĩkĩ?

³ Maandĩko nĩ matũheaga ũũma atĩ Jehova nĩ atwendete mũno, na atĩ tũrĩ a bata harĩ we. (Hag. 2:7; 1 Joh. 4:10) Nĩkĩo atwĩraga tũmũhoe ũteithio kũgerera mahoya. (1 Pet. 5:6, 7) Nĩ endaga gũtũteithia tũikare hakuhĩ nake, na gũtũteithia gũkirĩrĩria moritũ marĩa tũracemania namo.

4. Tũmenyaga atĩa atĩ Jehova nĩ acokagia mahoya ma athathaiya ake? (Ningĩ rora mbica.)

⁴ Thĩinĩ wa Bibilia, kaingĩ nĩ tũthomaga ũrĩa Jehova aacokirie mahoya ma athathaiya ake. Ngerekano ĩmwe nĩ ya Mũthamaki Daudi. Nĩ aarĩ na thũ nyingĩ mũno ũtũũro-inĩ wake, na maita maingĩ nĩ aahoyaga Jehova ũteithio kũgerera mahoya. Hĩndĩ ĩmwe aathaithire Jehova akĩmwĩra: “Atĩrĩrĩ Jehova, igua ihoya rĩakwa; thikĩrĩria ithaithana rĩakwa rĩa kũhoya ũteithio.  Njigua nĩ ũndũ wa wĩhokeku waku o na ũthingu waku.” (Thab. 143:1) Jehova nĩ aacokirie mahoya ma Daudi na akĩmũhonokia. (1 Sam. 19:10, 18-20; 2 Sam. 5:17-25) Nĩkĩo Daudi aaugire ũũ arĩ na ũũma: “Jehova akoragwo hakuhĩ na arĩa othe mamũkayagĩra.” O na ithuĩ no tũkorũo na ũũma o ta ũcio.—Thab. 145:18.

5. Hihi Jehova aacokagia mahoya ma ndungata ciake cia tene ta ũrĩa ingĩerĩgĩrĩire hingo ciothe? Heana ngerekano. (Ningĩ rora mbica.)

⁵ Jehova no age gũcokia mahoya maitũ na njĩra ĩrĩa tũrerĩgĩrĩra. Ũguo nĩguo gwathiire harĩ mũtũmwo Paulo. Nĩ aahoire Ngai amwehererie “mũigua thĩinĩ wa mwĩrĩ.” Paulo aahoire igũrũ rĩgiĩ ũndũ ũcio mũritũ maita matatũ. Hihi Jehova nĩ aacokirie mahoya macio? Ĩĩ nĩ aacokirie, no ti na njĩra ĩrĩa Paulo eerĩgagĩrĩra. Handũ ha kũmwehereria thĩna ũcio, Jehova aamũheire hinya ũrĩa aabataraga nĩguo ahote gũthiĩ na mbere kũmũtungatĩra arĩ mwĩhokeku.—2 Kor. 12:7-10.

6. Nĩ kĩĩ kĩngĩtũma rĩmwe na rĩmwe kuoneke ta Jehova ataracokia mahoya maitũ?

⁶ O na ithuĩ rĩmwe no tũheo macokio ngũrani na marĩa tũrerĩgĩrĩra. No tũkorũo na ma atĩ Jehova nĩ amenyaga njĩra ĩrĩa njega biũ ya gũtũteithia. No ahote “gwĩka o na [akĩrĩrĩrie] mũno makĩria maũndũ marĩa tũmũhoyaga kana tũngĩĩcirĩria.” (Ef. 3:20) Nĩ ũndũ ũcio, no acokie mahoya maitũ hĩndĩ ĩrĩa tũterĩgĩrĩire kana na njĩra ĩrĩa tũterĩgĩrĩire.

7. Nĩkĩ rĩmwe no tũbatare gũcenjia ũndũ ũrĩa tũrahoya? Heana ngerekano.

⁷ No tũbatare gũcenjia ũndũ ũrĩa tũrahoya rĩrĩa twataũkĩrũo nĩ wendi wa Jehova wega makĩria. Ta wĩcirie kĩonereria kĩa mũrũ wa Ithe witũ Martin Poetzinger. Ihinda inini thutha wa kũhikania, mũrũ wa Ithe witũ Poetzinger nĩ oohirũo kambĩ-inĩ ĩmwe ya kũnyarirĩrũo ya Nazi. Kĩambĩrĩria-inĩ, aahoire Jehova amũteithie arekererio kuuma kambĩ-inĩ ĩyo nĩguo athiĩ akarũmbũiye mũtumia wake, na acokerere wĩra wake wa kũhunjia. O na kũrĩ ũguo, thutha wa ciumia igĩrĩ, ndoonete ũndũ o na ũmwe wonanagia atĩ Jehova nĩ angĩamũteithirie arekererio. Kwoguo akĩambĩrĩria kũhoya ũũ: “Jehova, ndeithia kũmenya ũndũ ũrĩa ũrenda njĩke.” Thutha ũcio akĩambĩrĩria gwĩciria igũrũ rĩgiĩ maũndũ marĩa ariũ a Ithe witũ acio angĩ maageragĩra kũu kambĩ-inĩ. Aingĩ ao nĩ maatangĩkaga mũno nĩ ũndũ wa atumia ao na ciana ciao. Kwoguo mũrũ wa Ithe witũ Poetzinger akĩhoya akiuga ũũ: “Jehova, nĩ ngatho nĩ ũndũ wa kũhe wĩra ũyũ  mwerũ. Ndeithia kũũmĩrĩria na gwĩkĩra ngoro ariũ a Ithe witũ.” Nĩ aahũthĩrire mĩaka kenda ĩrĩa yarũmĩrĩire arĩ kambĩ-inĩ cia kũnyarirĩrũo gwĩka ũguo!

8. Nĩ ũndũ ũrĩkũ wa bata twagĩrĩirũo kũririkana rĩrĩa tũrahoya?

⁸ No mũhaka tũririkanage atĩ Jehova nĩ akoragwo na muoroto, na akaaũhingia ihinda rĩrĩa abangĩte. Ũndũ ũmwe ageeka kũhingia muoroto ũcio, nĩ kweheria biũ mathĩna mothe marĩa matũmaga andũ manyamarĩke ũmũthĩ ta icanjama cia ndũire, mĩrimũ, na gĩkuũ. Jehova akaahingia muoroto wake kũgerera Ũthamaki wake. (Dan. 2:44; Kũg. 21:3, 4) No kamũira ihinda rĩu rĩkinye, Jehova nĩ etĩkĩrĩtie Shaitani gũkorũo agĩathana thĩinĩ wa thĩ. b (Joh. 12:31; Kũg. 12:9) Jehova angĩeheria mathĩna mothe ma andũ ihinda-inĩ rĩrĩ, no kuoneke ta wathani wa Shaitani ũragaacĩra. No o na gũtuĩka nĩ tũrabatara gweterera Jehova ahingie ciĩranĩro ciake, ũguo ti kuuga atĩ nĩ atũtiganĩirie. Rekei twarĩrĩrie njĩra imwe iria Jehova atũteithagia nacio.

9. Jehova angĩtũteithia atĩa rĩrĩa tũrabatara gũtua matua? Heana ngerekano.

⁹ Nĩ atũheaga ũũgĩ. Jehova nĩ eranĩire atĩ nĩ arĩtũheaga ũũgĩ ũrĩa tũrabatara nĩguo tũhote gũtua matua mega. Nĩ tũbataraga ũũgĩ kuuma kũrĩ Jehova makĩria rĩrĩa tũratua matua mangĩhutia ũtũũro witũ, ta rĩrĩa tũratua kana nĩ tũkũingĩra kĩhiko-inĩ. (Jak. 1:5) Ta wĩcirie ũhoro wa mwarĩ wa Ithe witũ ũmwe ũtarĩ thĩinĩ wa kĩhiko wĩtagwo Maria. c Nĩ aakenagĩra gũtungata arĩ painia wa hĩndĩ ciothe rĩrĩa aamenyanire na mũrũ wa Ithe witũ ũmwe. Maria aaugire ũũ: “O ũrĩa ũrata witũ wakũraga, noguo twaiguaga tũkĩgucanĩrĩria. Nĩ ndamenyaga atĩ nĩ ndabataraga gũtua itua. Nĩ ndahoire mũno igũrũ rĩgiĩ ũndũ ũcio. O na gũtuĩka nĩ ndabataraga ũtongoria wa Jehova, nĩ ndamenyaga atĩ Jehova ndangĩanduĩrĩire itua.” Maria nĩ onaga atĩ Jehova nĩ aacokirie mahoya make na akĩmũhe ũũgĩ. Aamũheire ũũgĩ na njĩra ĩrĩkũ? Agĩka ũthuthuria mabuku-inĩ maitũ, Maria nĩ oonire icunjĩ ingĩamũteithirie kuona macokio ma ciũria ciake. Ningĩ nĩ aathikĩrĩirie ũtaaro wa ũũgĩ kuuma kũrĩ mami wao ũrĩa o nake nĩ Mũira wa Jehova. Ũtaaro ũcio nĩ wateithirie Maria gũthuthuria maũndũ na njĩra njega. Mũthia-inĩ, nĩ aahotire gũtua itua rĩa ũũgĩ.

10. Kũringana na Afilipi 4:13, Jehova ateithagia athathaiya ake atĩa? Heana ngerekano. (Ningĩ rora mbica.)

¹⁰ Nĩ atũheaga hinya wa gũkirĩrĩria. Jehova nĩ arĩtũheaga hinya ũrĩa tũrabatara wa gũkirĩrĩria magerio, o ta ũrĩa eekire harĩ mũtũmwo Paulo. (Thoma Afilipi 4:13.) Ta wĩcirie ũrĩa  Jehova aateithirie mũrũ wa Ithe witũ ũmwe wĩtagwo Benjamin gũkirĩrĩria maũndũ maritũ. Ihinda rĩrĩa inene rĩa wĩthĩ wake, Benjamin na famĩlĩ yao maaikaraga kambĩ-inĩ cia andũ arĩa metharĩte kwao thĩinĩ wa Afrika. Benjamin aaugire ũũ: “Nĩ ndahoyaga Jehova maita maingĩ, ngamũũria ahe hinya wa gwĩka maũndũ marĩa magĩrĩire maitho-inĩ make. Jehova nĩ aacokirie mahoya makwa na njĩra ya kũũhe thayũ wa meciria, ũmĩrĩru wa gũthiĩ na mbere kũhunjia, na mabuku marĩa ndabataraga nĩguo hote gũikara ndĩ na hinya kĩĩroho.” Aathiire na mbere kuuga ũũ: “Gũthoma maũndũ marĩa Aira a Jehova angĩ meyoneire na kuona ũrĩa Jehova aamateithirie gũkirĩrĩria, nĩ gwekĩrire hinya itua rĩakwa rĩa gũthiĩ na mbere gũikara ndĩ mwĩhokeku.”

11-12. Jehova angĩhũthĩra atĩa aarĩ na ariũ a Ithe witũ gũcokia mahoya maitũ? (Ningĩ rora mbica.)

¹¹ Nĩ ahũthagĩra aarĩ na ariũ a Ithe witũ. Ũtukũ wa mũico Jesu atanaruta muoyo wake ũrĩ igongona, nĩ aahoire na kĩyo. Nĩ aahoire Jehova amwehererie gĩconoko gĩa kuonwo ta aarĩ mũrumi Ngai. Handũ ha gwĩka ũguo, Jehova aateithirie Jesu na njĩra ya gũtũma mũraika ũmwe amwĩkĩre hinya. (Luk. 22:42, 43) O na ithuĩ Jehova no atũteithie na njĩra ya gũtũma mũrũ kana mwarĩ wa Ithe witũ atũceerere kana atũhũũrĩre thimũ atwĩkĩre ngoro. Ithuothe no twethage mĩeke ya kũhe aarĩ na ariũ a Ithe witũ “kiugo kĩega.”—Thim. 12:25.

¹² Ta wĩcirie ũhoro wa mwarĩ wa Ithe witũ ũmwe wĩtagwo Miriam. Ciumia nini thutha wa mũthuri wake gũkua, Miriam aarĩ mũciĩ arĩ wiki arĩ na kĩeha na akuĩte ngoro. Nĩ aarĩraga mũno, na nĩ aabataraga kwaria na mũndũ. Aaugire ũũ: “Ndiarĩ na hinya wa kũhũũrĩra mũndũ o na ũmwe thimũ, kwoguo ngĩhoya Jehova. Ihinda-inĩ rĩu ndarĩraga ngĩhoyaga, ngĩhũũrĩrũo thimũ nĩ mũthuri ũmwe wa kĩũngano warĩ mũrata witũ.” Mũthuri ũcio wa kĩũngano na mũtumia wake nĩ moomĩrĩirie Miriam. Miriam nĩ akoragwo na ma atĩ Jehova nĩwe watindĩkire mũrũ wa Ithe witũ ũcio kũmũhũũrĩra thimũ.

13. Heana ngerekano ĩronania ũrĩa Jehova angĩhũthĩra andũ arĩa matamũthathayagia gũcokia mahoya maitũ.

¹³ No ahũthĩre andũ matarĩ athathaiya ake. (Thim. 21:1) Rĩmwe na rĩmwe, Jehova nĩ  ahũthagĩra andũ matarĩ athathaiya ake gũcokia mahoya ma ndungata ciake. Kwa ngerekano, nĩ aatindĩkire Mũthamaki Aritashashita kũhe Nehemia rũtha nĩguo acoke Jerusalemu, agateithĩrĩrie gwaka itũũra rĩu rĩngĩ. (Neh. 2:3-6) O na ũmũthĩ, Jehova no atindĩke o na andũ arĩa matamũthathayagia gũtũteithia rĩrĩa tũrabatara ũteithio.

14. Ũhoro wĩgiĩ Soo Hing ũrakũũmĩrĩria atĩa? (Ningĩ rora mbica.)

¹⁴ Mwarĩ wa Ithe witũ ũmwe wĩtagwo Soo Hing, nĩ oonire Jehova akĩmũteithia kũgerera harĩ ndagĩtarĩ wake. Mũriũ wa mwarĩ wa Ithe witũ ũcio nĩ akoragwo na mathĩna matiganĩte ma kĩĩmeciria. Mũriũ ũcio wao nĩ aagũire kuuma handũ igũrũ na akĩgurario mũno, na kwoguo mwarĩ wa Ithe witũ ũcio marĩ na mũthuri wake magĩtiga wĩra nĩguo mamũrũmbũiye. Ũndũ ũcio nĩ watũmire magĩe mathĩna ma kĩĩmbeca. Soo Hing aaugire atĩ aaiguaga akinyĩte mũico. Kwoguo agĩitũrũrĩra Jehova ngoro yake akĩmũhoya amũteithie. Ndagĩtarĩ ũrĩa wathondekaga mũriũ wao nĩ aatuire itua rĩa gwetha ũrĩa angĩmateithia. Nĩ ũndũ ũcio, nĩ maahotire kuona ũteithio wa thirikari na handũ hega ha gũikara. Thutha ũcio Soo Hing aaugire ũũ: “Nĩ tuoonire guoko kwa Jehova ũndũ-inĩ ũcio. Hatarĩ nganja nĩwe ‘Mũigua wa mahoya.’”—Thab. 65:2.

15. Nĩ kĩĩ gĩateithirie mwarĩ wa Ithe witũ ũmwe kũmenya atĩ Jehova nĩ aacokagia mahoya make?

¹⁵ Jehova ndacokagia mahoya maitũ na njĩra ya magegania. No atũheaga macokio o marĩa tũrabatara nĩguo tũhote gũikara tũrĩ ehokeku harĩ we. Kwoguo ikara ũkĩroraga ũrĩa Jehova aracokia mahoya maku. Mwarĩ wa Ithe witũ ũmwe wĩtagwo Yoko oonaga Jehova ta ataracokia mahoya make, no agĩcoka akĩambĩrĩria kwandĩkaga maũndũ marĩa ahoya Jehova. Thutha wa ihinda rĩna akĩrora harĩa aandĩkĩte, na akĩona atĩ Jehova nĩ aacoketie mahoya maingĩ ma marĩa aamũhoete, o na mangĩ ataaririkanaga. Rĩmwe na rĩmwe, o na ithuĩ nĩ tũrabatara gũkira na tũgecũrania ũrĩa Jehova aracokia mahoya maitũ.—Thab. 66:19, 20.

16. Tũngĩonania wĩtĩkio atĩa ũhoro-inĩ wĩgiĩ mahoya? (Ahibirania 11:6)

¹⁶ Nĩ tuonanagia wĩtĩkio rĩrĩa twahoya Jehova na rĩrĩa twetĩkĩra macokio ma mahoya maitũ gũtekũmakania mahaana atĩa.  (Thoma Ahibirania 11:6.) Wĩcirie ũhoro wa mũrũ wa Ithe witũ Mike na mũtumia wake Chrissy. Maarĩ na muoroto wa gũtungata Betheli. Mike aaugire ũũ: “Twaihũrĩtie fomu tũrĩ ithuerĩ kwa ihinda rĩa mĩaka mĩingĩ, na tũkahoya Jehova igũrũ rĩgiĩ muoroto ũcio rĩngĩ na rĩngĩ, no tũtiaumire twĩtĩtwo.” Mike na Chrissy maathiire o na mbere gũkorũo na ma atĩ Jehova nĩ oĩ wega ũrĩa angĩmahũthĩra ũtungata-inĩ wake. Maathiire na mbere gwĩka ũrĩa mangĩahotire na njĩra ya gũtungata marĩ mapainia a hĩndĩ ciothe kũrĩa kwarĩ na bata mũnene wa ahunjia, na gũteithĩrĩria mĩako-inĩ ya gĩtheokrasi. Rĩu matungataga wĩra-inĩ wa gũceerera ciũngano. Mike aaugire ũũ: “Ti hingo ciothe Jehova acokagia mahoya maitũ na njĩra ĩrĩa tũrerĩgĩrĩra, no nĩ amacokagia na ageka ũguo na njĩra njega o na gũkĩra ũrĩa tũngĩrecirĩirie.”

17-18. Nĩ ũndũ ũrĩkũ tũngĩkorũo na ma naguo kũringana na Thaburi 86:6, 7?

¹⁷ Thoma Thaburi 86:6, 7. Daudi mwandĩki wa Thaburi, aarĩ na ma atĩ Jehova nĩ aaiguaga mahoya make na akamacokia. O nawe no ũkorũo na ũũma o ta ũcio. Ngerekano iria twarĩrĩria gĩcunjĩ-inĩ gĩkĩ, nĩ iratũhe ũũma atĩ Jehova no atũhe ũũgĩ na hinya ũrĩa tũrabatara wa gũkirĩrĩria. No ahũthĩre aarĩ na ariũ a Ithe witũ kana o na andũ arĩa matarĩ athathaiya ake gũtũteithia na njĩra ĩmwe kana ĩrĩa ĩngĩ.

¹⁸ O na gũtuĩka ti hingo ciothe Jehova arĩcokagia mahoya maitũ na njĩra ĩrĩa tũrerĩgĩrĩra, nĩ tũĩ atĩ nĩ arĩmacokagia. Nĩ arĩtũheaga kĩrĩa tũrabatara o ihinda-inĩ rĩrĩa rĩagĩrĩire. Kwoguo thiĩ na mbere kũhoyaga ũrĩ na wĩtĩkio, ũrĩ na ma atĩ Jehova nĩ arĩkũrũmbũyagia ihinda-inĩ rĩrĩ, na atĩ nĩ ‘akaahingia merirĩria ma kĩndũ gĩothe kĩrĩ muoyo’ thĩinĩ wa thĩ njerũ ĩrĩa ĩroka.—Thab. 145:16.