1. Jehova erĩte athathaiya ake mekage atĩa? (Ningĩ rora mbica.)

 NŨŨ tũngĩhoya ũteithio rĩrĩa tũrabatara ũtongoria na kũũmĩrĩrio? Nĩ tũũĩ macokio ma kĩũria kĩu. No tũhoe Jehova Ngai ũteithio. Jehova nĩ atwĩrĩte twĩkage ũguo. Bibilia ĩtwĩraga ‘tũhoyage hingo ciothe,’ kwoguo nĩ tũũĩ atĩ endaga tũmũhoyage kaingĩ. (1 Thes. 5:17) No tũmũhoe tũrĩ na wĩyathi tũmũũrie atũtongorie maũndũ-inĩ mothe ma ũtũũro witũ. (Thim. 3:5, 6) Tondũ Jehova nĩ Ngai mũtaana mũno, ndatũthimagĩra maita marĩa tũngĩmũhoya.

2. Tũkwarĩrĩria maũndũ marĩkũ gĩcunjĩ-inĩ gĩkĩ?

² Nĩ tũcokagĩria Jehova ngatho mũno nĩ ũndũ wa kĩheo kĩa mahoya. No nĩ ũndũ wa gũkorũo na maũndũ maingĩ ma gwĩka, no ũkorũo ũtarĩ ũndũ mũhũthũ kuona mahinda ma kũhoya. Ningĩ no tuone atĩ nĩ tũrabatara kwagagĩria mahoya maitũ. Ũhoro-inĩ ũcio, Maandĩko no matwĩkĩre ngoro na matũhe ũtongoria ũrĩa tũrabatara. Gĩcunjĩ-inĩ gĩkĩ, nĩ tũkuona ũrĩa tũngĩka nĩguo tuone mahinda ma kũhoya na njĩra ya gũthuthuria kĩonereria kĩa Jesu. Ningĩ nĩ tũkwarĩrĩria ũrĩa tũngĩagagĩria mahoya maitũ na njĩra ya kũhoyaga igũrũ rĩgiĩ maũndũ matano ma bata.

3. Nĩ ũndũ ũrĩkũ Jesu aataũkagĩrũo wĩgiĩ mahoya?

³ Jesu nĩ aataũkagĩrũo atĩ Jehova nĩ onaga mahoya marĩ ma bata. Ihinda iraya mbere ya okĩte gũkũ thĩ, nĩ oonaga Ithe agĩcokeria ndungata ciake njĩhokeku mahoya. Kwa ngerekano,  Jesu aarĩ hamwe na Ithe rĩrĩa Ithe aacokirie mahoya ma kuuma ngoro ma Hana, Daudi, Elija, na andũ angĩ aingĩ ehokeku. (1 Sam. 1:10, 11, 20; 1 Ath. 19:4-6; Thab. 32:5) Nĩkĩo Jesu eerire arutwo ake mahoyage kaingĩ marĩ na ma atĩ Jehova nĩ ekũmaigua.—Mat. 7:7-11.

4. Tũreruta atĩa igũrũ rĩgiĩ mahoya kuumana na Jesu?

⁴ Jesu nĩ aaigĩire arũmĩrĩri ake kĩonereria gĩa kũrũmĩrĩra kũgerera mahoya marĩa aahoire Jehova. Ũtungata-inĩ wake wothe, Jesu nĩ aahoyaga kaingĩ. Nĩ aabataraga kũbanga mahinda ma kũhoya tondũ kaingĩ aakoragwo athiũrũrũkĩirio nĩ andũ aingĩ na aakoragwo na maũndũ maingĩ ma gwĩka. (Mar. 6:31, 45, 46) Nĩ ookagĩra rũcinĩ tene nĩguo akorũo na ihinda arĩ wiki rĩa kũhoya. (Mar. 1:35) Bibilia nĩ ĩtaaragĩria hĩndĩ ĩmwe aahoire ũtukũ mũgima atanatua itua rĩa bata. (Luk. 6:12, 13) Na ũtukũ wake wa mũico atanakua, Jesu nĩ aahoire maita maingĩ nĩguo ahote kũhingia gĩcunjĩ kĩrĩa kĩarĩ kĩritũ mũno kĩa ũtungata wake gũkũ thĩ.—Mat. 26:39, 42, 44.

5. Tũngĩĩgerekania na Jesu atĩa ũhoro-inĩ wĩgiĩ mahoya?

⁵ Kĩonereria kĩa Jesu kĩratũruta atĩ o na tũngĩkorũo na maũndũ maingĩ atĩa ma gwĩka nĩ tũrabatara kũbanga mahinda ma kũhoyaga. O ta Jesu, no tũbatare kũbanga ihinda rĩa kũhoyaga rũcinĩ tene kana hwaĩ-inĩ tũtanathiĩ toro. Rĩrĩa tweka ũguo, nĩ tũrĩonagia Jehova atĩ nĩ tũcokagia ngatho nĩ ũndũ wa kĩheo kĩu kĩa mwanya. Mwarĩ wa Ithe witũ ũmwe wĩtagwo Lynne nĩ ataarĩirie ũrĩa aaiguire ahutio ngoro thutha wa kwĩruta ũhoro wĩgiĩ kĩheo kĩa mahoya. Aaugire ũũ: “Rĩrĩa nderutire atĩ no njarie na Jehova hĩndĩ o yothe, ũndũ ũcio nĩ wandeithirie kuona Jehova arĩ mũrata wakwa wa hakuhĩ na kwenda kwagagĩria mahoya makwa.” Hatarĩ nganja ũguo nĩguo aingĩ aitũ tũiguaga. Nĩ ũndũ ũcio, rekei twarĩrĩrie maũndũ matano ma bata tũngĩhoya igũrũ rĩamo.

6. Kũringana na Kũguũrĩrio 4:10, 11, nĩ kĩĩ Jehova agĩrĩire kwamũkĩra?

⁶ Kũgooca Jehova. Kĩoneki-inĩ kĩmwe gĩa kũgegania, mũtũmwo Johana nĩ oonire arũme 24 marĩ kũrĩa igũrũ magĩthathaiya Jehova. Maagoocaga Ngai makiugaga atĩ nĩ agĩrĩire kwamũkĩra “riri na gĩtĩo o na hinya.”  (Thoma Kũguũrĩrio 4:10, 11.) Araika ehokeku o nao nĩ makoragwo na itũmi nyingĩ cia kũgooca Jehova. Makoragwo nake kũrĩa igũrũ na kwoguo nĩ mamũĩ wega. Nĩ monaga ngumo ciake kũgerera maũndũ marĩa ekaga. Rĩrĩa mona ciĩko cia Jehova nĩ matindĩkagwo kũmũgooca.—Ayub. 38:4-7.

7. Nĩ maũndũ marĩkũ tũngĩgooca Jehova nĩ ũndũ wamo?

⁷ O na ithuĩ no twende kũgoocaga Jehova mahoya-inĩ maitũ, tũkamwĩra maũndũ marĩa matũkenagia mamwĩgiĩ na kĩrĩa gĩtũmaga tũmwende. Rĩrĩa ũrathoma Bibilia, geragia kũrora nĩ ngumo irĩkũ Jehova onanĩtie iragũkenia mũno. (Ayub. 37:23; Rom. 11:33) Ũgacoka ũkera Jehova ũrĩa ũraigua igũrũ rĩgiĩ ngumo icio. Ningĩ no tũgooce Jehova nĩ ũndũ wa maũndũ marĩa atwĩkagĩra na agekĩra aarĩ na ariũ a Ithe witũ. Hingo ciothe nĩ atũrũmbũyagia na agatũgitĩra.—1 Sam. 1:27; 2:1, 2.

8. Nĩ itũmi irĩkũ imwe itũmaga tũcokerie Jehova ngatho? (1 Athesalonike 5:18)

⁸ Gũcokeria Jehova ngatho. Tũrĩ na itũmi nyingĩ cia gũcokeria Jehova ngatho kũgerera mahoya. (Thoma 1 Athesalonike 5:18.) No tũmũcokerie ngatho nĩ ũndũ wa kĩndũ o gĩothe kĩega tũrĩ nakĩo tondũ iheo ciothe njega ciumaga kũrĩ we. (Jak. 1:17) Kwa ngerekano, no tũmũcokerie ngatho nĩ ũndũ wa thĩ ĩno itũ thaka na nĩ ũndũ wa indo cia magegania iria ombĩte. Ningĩ no tũmũcokerie ngatho nĩ ũndũ wa muoyo, famĩlĩ citũ, arata aitũ, na kĩĩrĩgĩrĩro gitũ. Na no twende gũcokeria Jehova ngatho nĩ ũndũ wa gũtwĩtĩkĩria gũkorũo na ũrata wa hakuhĩ hamwe nake.

9. Nĩkĩ no tũbatare gũkũria mwerekera wa gũcokagĩria Jehova ngatho?

⁹ No tũbatare gwĩciria na kinyi nĩguo tũkorũo na itũmi citũ ithuĩ ene cia gũcokeria Jehova ngatho. Andũ aingĩ ũmũthĩ maticokagia ngatho. Andũ kaingĩ meciragia o ũrĩa mangĩona kĩrĩa marenda handũ ha mecirie ũrĩa mangĩcokia ngatho nĩ ũndũ wa kĩrĩa marĩ nakĩo. Tũngĩambĩrĩria gũkorũo na mwerekera ta ũcio, no tũkore atĩ ũndũ ũrĩa tũrekĩrĩra mahoya-inĩ maitũ no gwĩtia kĩrĩa tũrenda. Nĩguo tũgirĩrĩrie ũndũ ta ũcio ndũgekĩke, nĩ twagĩrĩirũo gũthiĩ na mbere gũkũria mwerekera wa gũcokagia ngatho nĩ ũndũ maũndũ marĩa mothe Jehova atwĩkagĩra.—Luk. 6:45.

10. Gũkorũo na mwerekera wa gũcokia ngatho gwateithirie mwarĩ wa Ithe witũ ũmwe atĩa gũkirĩrĩria? (Ningĩ rora mbica.)

¹⁰ Mwerekera wa gũcokia ngatho no ũtũteithie gũkirĩrĩria moritũ. Ta wĩcirie ngerekano ya mwarĩ wa Ithe witũ Kyung-sook. Ũhoro wake nĩ ũheanĩtwo thĩinĩ wa ngathĩti ya Mũrangĩri ya Janũarĩ 15, 2015. Nĩ oonekire atĩ aarĩ na kansa ya mahũri. Aaugire ũũ: “Mũrimũ ũcio nĩ watũmire hahũke mũno. Ndonire ta ũtũũro wakwa wothe wathũka, na ngĩigua guoya mũno.” Nĩ kĩĩ gĩateithirie mwarĩ wa Ithe witũ ũcio kũhiũrania na thĩna ũcio?  Aaugire atĩ o mũthenya atanathiĩ toro, aambaga gũthiĩ igũrũ rĩa nyũmba yao akahoya Jehova na kayũ kanene nĩ ũndũ wa maũndũ matano marĩa akeneire mũthenya ũcio. Ũndũ ũcio watũmaga acokwo nĩ hinya, na ũkamũtindĩka kuonia Jehova atĩ nĩ amwendete. Nĩ eeyoneire ũrĩa Jehova atiiragĩrĩra ndungata ciake njĩhokeku hĩndĩ ya magerio na akĩmenya atĩ ũtũũro-inĩ witũ irathimo nĩcio ikoragwo irĩ nyingĩ gũkĩra magerio. O ta Kyung-sook, twĩ na itũmi nyingĩ cia gũcokeria Jehova ngatho o na angĩkorũo nĩ tũrahiũrania na magerio. Kũmũcokeria ngatho mahoya-inĩ no gũtũteithie gũkirĩrĩria na gũtũũria gĩkeno.

11. Arutwo a Jesu maagĩrĩire gũkorũo na ũmĩrĩru nĩkĩ thutha wa Jesu gũcoka igũrũ?

¹¹ Kũhoya Jehova akũhe ũmĩrĩru rĩrĩa ũrahunjia. Ihinda inini Jesu atanacoka igũrũ, nĩ aaririkanirie arutwo ake ũhoro wĩgiĩ wĩra ũrĩa aamaheete wa kũruta ũira ũmwĩgiĩ “thĩinĩ wa Jerusalemu, Judea guothe, Samaria, o nginya ituri ciothe cia thĩ.” (Atũm. 1:8; Luk. 24:46-48) Kahinda kanini thutha ũcio, atongoria a ndini ya Kĩyahudi nĩ maanyitire mũtũmwo Petero na Johana makĩmatwara mbere ya Sanhedrini, na magĩatha arũme acio ehokeku matige kũhunjia na o na makĩmehĩtĩra. (Atũm. 4:18, 21) Petero na Johana meekire atĩa?

12. Kũringana na Atũmwo 4:29, 31, arutwo meekire atĩa?

¹² Thutha wa kwĩhĩtĩrũo nĩ atongoria acio a ndini ya Kĩyahudi, Petero na Johana maamacokeirie ũũ: “Tuai arĩ inyuĩ kana nĩ kwagĩrĩire maitho-inĩ ma Ngai tũmũthikĩrĩrie inyuĩ handũ ha gũthikĩrĩria Ngai. Ĩndĩ ithuĩ-rĩ, tũtingĩtiga kwaria ũhoro wa maũndũ marĩa tuonete na tũkaigua.” (Atũm. 4:19, 20) Rĩrĩa Petero na Johana maarekereirio, arutwo nĩ maahoire Jehova igũrũ rĩgiĩ gwĩka wendi wake. Maahoire ũũ: “[Ĩtĩkĩria] ngombo ciaku ithiĩ na mbere kwaria ũhoro waku irĩ na ũcamba.” Jehova nĩ aacokirie ihoya rĩu rĩa kuuma ngoro.—Thoma Atũmwo 4:29, 31.

13. Tũreruta atĩa kuumana na kĩonereria kĩa Jin-hyuk?

¹³ No twĩgerekanie na arutwo acio na njĩra ya gũthiĩ na mbere kũhunjia o na rĩrĩa thirikari yatwatha tũtige kũhunjia. Ta wĩcirie kĩonereria kĩa mũrũ wa Ithe witũ Jin-hyuk ũrĩa woohetwo nĩ ũndũ wa kũrega kũingĩra njeshi-inĩ. Arĩ njera, nĩ aaheirũo wĩra wa gũtwarĩra ohwo amwe irio o hamwe na indo ingĩ, no ndeetĩkĩrĩtio kwaria nao ũndũ ũngĩ o wothe ũtaahutanĩtie na wĩra ũrĩa aahetwo, nginya kwarĩrĩria Bibilia. Nĩ aahoire aheo ũmĩrĩru na ũũgĩ nĩguo ahote kũhunjia mweke o wothe ũngĩeyumĩririe. (Atũm. 5:29) Aaugire ũũ: “Jehova nĩ aacokirie mahoya makwa na njĩra ya kũhe ũmĩrĩru na ũũgĩ, ngĩhota kwambĩrĩria kwĩruta Bibilia na ohwo aingĩ mũrango-inĩ wa thero o mũndũ ndagĩka ithano. Ningĩ ũtukũ nĩ ndandĩkaga marũa marĩa ingĩaheire ohwo mũthenya ũrĩa ũngĩarũmĩrĩire.” O na ithuĩ no tũkorũo na ma atĩ Jehova nĩ arĩtũteithagia kũhingia ũtungata witũ. O ta Jin-hyuk, no tũhoe tũheo ũmĩrĩru na ũũgĩ.

14. Nĩ kĩĩ kĩngĩtũteithia rĩrĩa tũrahiũrania na mathĩna? (Thaburi 37:3, 5)

¹⁴ Kũhoya Jehova agũteithie kũhiũrania na mathĩna. Aingĩ aitũ nĩ tũragerera moritũ ta mathĩna ma mwĩrĩ kana ma kĩĩmeciria, gũkuĩrũo nĩ mũndũ twendete, kũhiũrania na ũndũ mũritũ thĩinĩ wa famĩlĩ, kũnyarirũo, kana thĩna ũngĩ. Na maũndũ ta kĩngʼũki na mbaara nĩ matũmĩte mathĩna ta macio maritũhe o na makĩria. Itũrũragĩra Jehova ngoro yaku. Mũtaarĩrie igũrũ rĩgiĩ maũndũ marĩa  ũragerera o ta ũrĩa ũngĩtaarĩria mũrata waku wa hakuhĩ. Korũo na ma atĩ Jehova “nĩ arĩgũteithagia.”—Thoma Thaburi 37:3, 5.

15. Mahoya mangĩtũteithia atĩa ‘gũkirĩrĩria rĩrĩa tũrĩ na mathĩna’? Heana ngerekano.

¹⁵ Kũhoya tũtegũtigithĩria no gũtũteithie ‘gũkiragĩrĩria rĩrĩa tũrĩ na mathĩna.’ (Rom. 12:12) Jehova nĩ oĩ maũndũ marĩa athathaiya ake maragerera, na “nĩ aiguaga kĩrĩro kĩao gĩa kũhoya ũteithio.” (Thab. 145:18, 19) Painia wĩtagwo Kristie ũrĩ na mĩaka 29, nĩ eeyoneire atĩ ũndũ ũcio nĩ wa ma. Nĩ aambĩrĩirie kũgĩa na mathĩna manene ma mwĩrĩ aterĩgĩrĩire. Ũndũ ũcio nĩ watũmire agĩe na mũrimũ mũnene wa depression. Thutha-inĩ, nĩ aamenyire atĩ mami wao arĩ na mũrimũ ũtangĩhonwo. Kristie aaugire ũũ: “Ndahoyaga Jehova itegũtigithĩria nĩguo ahe hinya wa gũkirĩrĩria o mũthenya. Nĩ ndarũmirie mũtaratara mwega wa maũndũ ma kĩĩroho ta gũthiaga mĩcemanio na gwĩka wĩruti wakwa kĩũmbe.” Oongereire ũũ: “Mahoya nĩ maandeithagia gũkirĩrĩria mahinda-inĩ marĩa ndaiguaga nditũhĩirũo mũno. Nĩ ndamenyaga atĩ Jehova arĩ hamwe na niĩ hĩndĩ ciothe na ũndũ ũcio nĩ wanyũmagĩrĩria mũno. O na gũtuĩka mathĩna makwa ma mwĩrĩ matiathirire o rĩo, Jehova nĩ aacokirie mahoya makwa na njĩra ya kũũhe thayũ wa ngoro na wa meciria.” Ndũkanariganĩrũo atĩ “Jehova nĩ oĩ kũhonokia andũ arĩa makoragwo na wĩrutĩri Ngai kuuma igerio-inĩ.”—2 Pet. 2:9.

16. Nĩkĩ nĩ tũrabatara kũhoya ũteithio wa Jehova nĩguo tũhote kũregana na igerio?

¹⁶ Kũhoya Jehova agũteithie kũregana na magerio. Tondũ tũtirĩ akinyanĩru, hingo ciothe nĩ tũbataraga kũrũa na merirĩria ma gwĩka ũrĩa gũtagĩrĩire. Shaitani nĩ ekaga ũrĩa wothe angĩhota nĩguo atũme ũkorũo ũrĩ ũndũ mũritũ harĩ ithuĩ kũrũa na merirĩria macio. Njĩra ĩmwe ahũthagĩra gũthũkia mwĩcirĩrie witũ nĩ kũgerera maũndũ matarĩ matheru  ma gwĩkenia. Maũndũ ta macio ma gwĩkenia no matũiyũrie meciria matagĩrĩire marĩa mangĩtũma tũkorũo tũtarĩ atheru maitho-inĩ ma Jehova, na no matũme tũingĩre rĩhia-inĩ rĩritũ.—Mar. 7:21-23; Jak. 1:14, 15.

17. Thutha wa kũhoya-rĩ, nĩ atĩa arĩ o mũhaka twĩke nĩguo twĩtheme magerio? (Ningĩ rora mbica.)

¹⁷ Nĩguo tũhote kũregana na merirĩria ma gwĩka ũndũ mũũru nĩ tũrabatara ũteithio wa Jehova. Jesu aahoire ũũ ihoya-inĩ rĩa kĩonereria: “Ndũgatũtware magerio-inĩ, no ũtũhonokagie kuuma harĩ ũrĩa mũũru.” (Mat. 6:13) Jehova nĩ endaga gũtũteithia, no no mũhaka tũmũhoe ũteithio. Ningĩ no mũhaka twĩke kũringana na mahoya maitũ. No twĩke ũrĩa wothe tũngĩhota nĩguo twĩtheme gũthoma na gũthikĩrĩria mawoni moru marĩa marĩ thĩinĩ wa thĩ ĩno ya Shaitani. (Thab. 97:10) No tũiyũrie meciria maitũ maũndũ mega na njĩra ya gũthoma na kwĩruta Bibilia. Gũthiĩ mĩcemanio na kũnyita itemi ũtungata-inĩ o nakuo nĩ kũgitagĩra mwĩcirĩrie witũ. Na Jehova atwĩrĩire atĩ ndangĩreka tũgerio ũndũ tũtangĩhota gwĩtiiria.—1 Kor. 10:12, 13.

18. Ithuothe tũrabatara gwĩka atĩa ũhoro-inĩ wĩgiĩ mahoya?

¹⁸ O ũmwe witũ nĩ arabatara kũhoyaga kaingĩ nĩguo atũũrie wĩhokeku harĩ Jehova mahinda-inĩ maya maritũ ma kũrigĩrĩria. O mũthenya, bangaga mahinda ma kũhoya mahoya ma kuuma ngoro. Jehova endaga ‘tũmũitũrũragĩre ngoro citũ’ kũgerera mahoya. (Thab. 62:8) Goocaga Jehova na ũmũcokagĩrie ngatho nĩ ũndũ wa maũndũ mothe marĩa ekaga. Mũhoe agũteithie gũkoragwo na ũmĩrĩru ũtungata-inĩ. Mũthaithe agũteithie gũkirĩrĩria mathĩna na kũregana na magerio o mothe marĩa ũngĩcemania namo. Ndũkareke kĩndũ o gĩothe kana mũndũ o wothe akũgirĩrĩrie kũhoyaga Jehova kaingĩ. No Jehova acokagia mahoya maitũ atĩa? Nĩ tũkaarĩrĩria kĩũria kĩu gĩa bata gĩcunjĩ-inĩ kĩrĩa kĩrũmĩrĩire.