1. Nĩ ũritũ ũrĩkũ aingĩ aitũ tũcemanagia naguo?

 HIHI nĩ ũrĩ weigĩra muoroto wa kĩĩroho no ũkaremwo kũũkinyĩra? b Angĩkorũo nĩguo, ndũrĩ wiki. Kwa ngerekano, mũrũ wa Ithe witũ Philip nĩ eerutanagĩria kwagagĩria mahoya make na kũhoyaga kaingĩ, no nĩ aaritũhagĩrũo kuona mahinda ma kũhoya. Mwarĩ wa Ithe witũ Erika nĩ eeigĩire muoroto wa gũkinyaga tene mũcemanio-inĩ wa ũtungata, ĩndĩ no aaceragĩrũo hakuhĩ hĩndĩ ciothe. Nake mũrũ wa Ithe witũ Tomáš nĩ aageretie maita maigana ũna gũthoma Bibilia ĩrĩ yothe. Aaugire ũũ: “Ndiakenagĩra gũthoma Bibilia. Ndageririe maita matatũ, no hĩndĩ ciothe ndakinyaga ibuku-inĩ rĩa Maũndũ ma Alawii ngaremwo nĩ gũthiĩ na mbere.”

2. Nĩkĩ tũtiagĩrĩirũo gũkua ngoro angĩkorũo nĩ twĩigĩire muoroto wa kĩĩroho no tũtihotete kũũkinyĩra?

² Angĩkorũo ũrĩ na muoroto wa kĩĩroho wĩigĩire na ndũhotete kũũkinyĩra, ndũgakue ngoro. O na gũkinyĩra muoroto mũhũthũ kaingĩ nĩ kũbataraga mahinda na kwĩrutanĩria. Gũkorũo atĩ no ũrerutanĩria gũkinyĩra muoroto waku kũronania atĩ nĩ ũtĩĩte ũrata waku hamwe na Jehova, na atĩ nĩ wendaga kũmũhe kĩrĩa kĩega biũ. Jehova nĩ akenagio nĩ kwĩrutanĩria gwaku. Na ma nĩ atĩ ndangĩĩrĩgĩrĩra wĩke maũndũ ũtangĩhota kũhingia. (Thab. 103:14; Mik. 6:8) Kwoguo tigĩrĩra atĩ ũrathuura muoroto ũngĩhota gũkinyĩra. Ũngĩka atĩa nĩguo ũkinyĩre muoroto ũrĩa wathuura? Reke twarĩrĩrie maũndũ mamwe ũngĩka.

3. Nĩkĩ nĩ ũndũ wa bata gũkorũo na wendi mũnene wa gũkinyĩra mĩoroto yaku?

³ Nĩ ũndũ wa bata mũno gũkorũo na wendi mũnene wa gũkinyĩra muoroto waku. Ũngĩkorũo na wendi mũnene wa gũkinyĩra muoroto waku nĩ ũrĩĩrutanagĩria kũũkinyĩra. No tũringithanie wendi ũcio na rũhuho rũrĩa rũteithagĩrĩria gatarũ gũkinya kũrĩa karathiĩ. Rũhuho rũngĩthiĩ na mbere kũhurutana mũtwarithia wa gatarũ no ahote gũkinya kũrĩa arathiĩ. Na rũhuho rũngĩkorũo rũrĩ rũnene, o na no akinye na ihenya. Na njĩra o ta ĩyo, o ũrĩa tũngĩkorũo na wendi mũnene, noguo tũngĩhota gũkinyĩra mĩoroto itũ. Mũrũ wa Ithe witũ David kuuma El Salvador aaugire ũũ: “Rĩrĩa ũrĩ na wendi mũnene nĩ wĩrutanagĩria makĩria. Nĩ ũtigagĩrĩra atĩ ndũretĩkĩria kĩndũ o na kĩmwe gĩkũgirĩrĩrie gũkinyĩra muoroto waku.” No hihi ũngĩka atĩa nĩguo ũgĩe na wendi makĩria?

4. Nĩ ũndũ ũrĩkũ tũngĩhoya igũrũ rĩaguo? (Afilipi 2:13) (Ningĩ rora mbica.)

⁴ Hoya ũheo wendi makĩria. Jehova no ahũthĩre roho wake mũtheru gũkũhe wendi wa gũkinyĩra muoroto waku. (Thoma Afilipi 2:13.) Rĩmwe nĩ twĩigagĩra muoroto tondũ nĩ tũũĩ nĩ twagĩrĩirũo gwĩka ũguo, na ũcio nĩ ũndũ mwega. No no twage gũkorũo na wendi wa gũkinyĩra muoroto ũcio. Ũguo nĩguo kwarĩ harĩ mwarĩ wa Ithe witũ wĩtagwo Norina kuuma Uganda. Nĩ eeigĩire muoroto wa kwambĩrĩria wĩruti wa Bibilia na andũ, no ndaaiguaga arĩ na wendi mũnene tondũ ndeeyonaga arĩ mwarimũ mwega. Nĩ kĩĩ kĩamũteithirie? Aaugire ũũ: “Nĩ ndambĩrĩirie kũhoyaga Jehova o mũthenya andeithie kuongerera wendi wakwa wa kwĩruta Bibilia na andũ. Ihinda-inĩ o rĩu, nĩ nderutanĩirie kwagagĩria ũhoti wakwa wa kũrutana. Thutha wa mĩeri mĩnini, nĩ ndonire atĩ wendi wakwa wa kwĩruta Bibilia na andũ nĩ wongererekete. Mwaka-inĩ o ũcio nĩ ndambĩrĩirie wĩruti wa Bibilia na andũ erĩ.”

5. Tũngĩĩcũrania igũrũ rĩgiĩ maũndũ ta marĩkũ nĩguo tũhote gũkũria wendi mũnene wa gũkinyĩra mĩoroto itũ?

⁵ Wĩcũranie igũrũ rĩgiĩ maũndũ marĩa Jehova agwĩkĩire. (Thab. 143:5) Mũtũmwo Paulo nĩ eecũranagia igũrũ rĩgiĩ ũtugi mũnene ũrĩa Jehova aamuonetie, na ũndũ ũcio nĩ wamũheaga wendi mũnene wa kũrutĩra Jehova wĩra na kĩyo. (1 Kor. 15:9, 10; 1 Tim. 1:12-14) O ũndũ ũmwe na ũcio, o ũrĩa ũrĩĩcũranagia igũrũ rĩgiĩ maũndũ marĩa Jehova agwĩkĩire, noguo ũrĩiguaga ũrĩ na wendi mũnene wa gũkinyĩra muoroto waku. (Thab. 116:12) Ta wĩcirie kĩrĩa gĩateithirie mwarĩ wa Ithe witũ ũmwe kuuma Honduras gũkinyĩra muoroto wake wa gũtuĩka painia wa hĩndĩ ciothe. Aaugire ũũ: “Nĩ ndecũranirie igũrũ rĩgiĩ ũrĩa Jehova anyendete. Nĩ aandeithirie kuona andũ ake. Nĩ anũmbũyagia na akangitĩra. Gwĩcũrania igũrũ rĩgiĩ maũndũ ta macio nĩ gwatũmire ndĩmwende makĩria na ngĩongerera wendi wakwa wa gũkinyĩra muoroto wa gũtuĩka painia.”

6. Nĩ kĩĩ kĩngĩ kĩngĩtũteithia kuongerera wendi wa gũkinyĩra muoroto witũ?

⁶ Wĩcirie igũrũ rĩgiĩ ũguni ũrĩa ũngĩgĩa wakinyĩra muoroto waku. Ta wĩcirie kĩrĩa gĩateithirie mwarĩ wa Ithe witũ Erika ũrĩa ũkũgwetetwo  na hau kabere gũkinyĩra muoroto wake wa kwaga gũceragĩrũo. Aaugire ũũ: “Nĩ ndonire atĩ nĩ ndahĩtũkagwo nĩ maũndũ maingĩ nĩ ũndũ wa gũcererũo mũcemanio-inĩ wa ũtungata. No ingĩakinyire tene, nĩ ingĩahotire kũgeithia aarĩ na ariũ a Ithe witũ na kũhũthĩra mahinda hamwe nao. Ningĩ nĩ ingĩahotire gũthikĩrĩria motaaro mangĩandeithirie kwagagĩria ũtungata wakwa na kũũkenera.” Erika eecũranirie igũrũ rĩgiĩ ũguni wa gũkinya tene na akĩhota gũkinyĩra muoroto wake. Nĩ ũguni ũrĩkũ ũngĩĩcũrania igũrũ rĩaguo? Angĩkorũo muoroto waku nĩ wa kwagagĩria ũthomi waku wa Bibilia kana mahoya maku, wĩcirie ũrĩa gwĩka ũguo kũngĩkĩra hinya ũrata waku hamwe na Jehova. (Thab. 145:18, 19) Angĩkorũo muoroto waku nĩ gũkũria ngumo ya Gĩkristiano, wĩcirie ũrĩa ngumo ĩyo ĩngĩgũteithia kwagagĩria ũrata waku hamwe na arĩa angĩ. (Kol. 3:14) Ningĩ no wandĩke itũmi ciaku cia kwenda gũkinyĩra muoroto ũcio, na ũikare ũkĩroraga itũmi icio. Tomáš, ũrĩa ũkũgwetetwo na hau kĩambĩrĩria-inĩ, aaugire ũũ: “Ingĩkorũo na itũmi nyingĩ cia kwenda gũkinyĩra muoroto mũna, nĩ ndĩrutanagĩria makĩria nĩguo ndĩũkinyĩre.”

7. Nĩ kĩĩ gĩateithirie Julio na mũtumia wake gũkinyĩra muoroto wao?

⁷ Hũthagĩra mahinda hamwe na arĩa mangĩgwĩkĩra ngoro gũkinyĩra muoroto waku. (Thim. 13:20) Ta wĩcirie kĩrĩa gĩateithirie Julio na mũtumia wake gũkinyĩra muoroto wao wa kwandandũra ũtungata. Aaugire ũũ: “Twathuurire arata arĩa mangĩatũteithirie gũkinyĩra muoroto witũ, na nĩ tũngĩarĩrĩirie muoroto ũcio hamwe nao. Aingĩ ao nĩ maahotete gũkinyĩra mĩoroto o ta ĩyo, na nĩ maatũheaga motaaro mangĩatũteithirie. Arata acio aitũ ningĩ nĩ maatũũragia ũrĩa mĩbango itũ yathiaga na mbere, na nĩ maatwĩkĩraga ngoro rĩrĩa twabatara gwĩkĩrũo ngoro.”

8. Kũngĩthiĩ atĩa angĩkorũo tũrĩrutagĩra muoroto witũ wĩra o rĩrĩa tũraigua tũrĩ na wendi? (Ningĩ rora mbica.)

⁸ Ma nĩ atĩ nĩ kũrĩ hĩndĩ tũtarĩiguaga tũrĩ na wendi wa kũrutĩra wĩra muoroto witũ. No hihi ũguo nĩ kuuga atĩ tũtingĩhota kũũrutĩra wĩra? Aca. Kwa ngerekano, rũhuho no rũteithie mũno harĩ gũtindĩka gatarũ gakinye kũrĩa karathiĩ. O na kũrĩ ũguo, rĩmwe rũhuho no rũkorũo rũtarĩ na hinya mũnene, na rĩngĩ gũkorũo o na gũtirĩ na rũhuho o na rũnini. Hihi ũguo nĩ kuuga atĩ mũtwarithia wa gatarũ ndangĩhota gũthiĩ kũrĩa egũthiaga? To mũhaka. Kwa ngerekano, tũtarũ tũmwe nĩ tũkoragwo na injini na tũngĩ mĩiko. Mũtwarithia wa gatarũ no ahũthĩre injini kana mĩiko nĩguo akinye kũrĩa egũthiaga. Wendi witũ no ũringithanio na rũhuho, rĩmwe no tũkorũo na wendi mũnene na rĩngĩ wendi mũnini. Na rĩrĩa rĩngĩ no tũigue tũtarĩ na wendi o na mũnini wa kũrutĩra wĩra muoroto witũ. Kwoguo angĩkorũo tũrĩrutagĩra muoroto witũ wĩra o rĩrĩa tũraigua tũrĩ na wendi, no twage gũkaũkinyĩra. No o ta ũrĩa mũtwarithia wa gatarũ ahũthagĩra njĩra ingĩ nĩguo akinye kũrĩa egũthiaga, o na ithuĩ no tũrutĩre wĩra muoroto witũ o na rĩrĩa tũraigua ta tũtarĩ na wendi. O na gũtuĩka  ũndũ ũcio no ũkorũo ũtarĩ mũhũthũ, maumĩrĩro makoragwo marĩ mega. Tũtanarĩrĩria ũrĩa tũngĩka hĩndĩ ta ĩyo, reke twambe twarĩrĩrie kĩũria kĩrĩa kĩngĩyumĩria.

9. Hihi nĩ ũũru gũthiĩ na mbere kwĩrutanĩria gũkinyĩra muoroto witũ o na angĩkorũo nĩ tũraigua tũtarĩ na wendi wa kũũkinyĩra? Taarĩria.

⁹ Jehova endaga tũmũtungatĩre tũrĩ na gĩkeno na twĩyendeire. (Thab. 100:2; 2 Kor. 9:7) Kwoguo-rĩ, hihi nĩ twagĩrĩirũo gũthiĩ na mbere kũrutĩra muoroto witũ wĩra angĩkorũo nĩ tũraigua tũtirĩ na wendi? Wĩcirie ngerekano ya mũtũmwo Paulo. Aaugire ũũ: “Nĩ kũhũũra hũũraga mwĩrĩ wakwa na ngaũtongoria ta ngombo.” (1 Kor. 9:25-27) O na rĩrĩa Paulo aaiguaga atarĩ na wendi wa gwĩka ũrĩa Jehova eendaga eke, nĩ eeringagĩrĩria gwĩka ũguo. Hihi Jehova nĩ aakenagio nĩ ũtungata wa Paulo? Hatarĩ nganja nĩ aakenagio. Na Jehova nĩ aamũrathimire nĩ ũndũ wa kĩyo gĩake.—2 Tim. 4:7, 8.

10. Tũngĩgunĩka atĩa tũngĩthiĩ na mbere kũrutĩra muoroto witũ wĩra o na rĩrĩa tũraigua tũtarĩ na wendi?

¹⁰ Ũndũ ũmwe na ũcio, Jehova nĩ akenaga rĩrĩa ona tũkĩĩrutanĩria gũkinyĩra muoroto witũ o na rĩrĩa tũtaraigua tũrĩ na wendi wa gwĩka ũguo. Nĩ akenaga tondũ o na gũtuĩka tũtireka ũndũ ũcio tondũ nĩ tũwendete, nĩ amenyaga tũrawĩka tondũ nĩ tũmwendete. O ta ũrĩa Jehova aarathimire Paulo, nĩ arĩtũrathimaga nĩ ũndũ wa kĩyo gitũ. (Thab. 126:5) Na tuona irathimo cia Jehova, o na no twambĩrĩrie kũigua tũrĩ na wendi. Mwarĩ wa Ithe witũ ũmwe kuuma Poland wĩtagwo Lucyna aaugire ũũ: “Rĩmwe ndiguaga ndĩ na wendi wa gũthiĩ ũtungata, makĩria rĩrĩa ndĩraigua ndĩ mũnogu. No gĩkeno kĩrĩa njiguaga ndĩ nakĩo thutha wa gũthiĩ, gĩkoragwo kĩrĩ kĩheo kĩa mwanya.” Kwoguo rekei tuone ũrĩa tũngĩka rĩrĩa twaigua tũtarĩ na wendi.

11. Jehova angĩtũteithia atĩa gwĩkĩra hinya ngumo ya kwĩgirĩrĩria?

¹¹ Hoya ũhote kwĩgirĩrĩria. Kwĩgirĩrĩria nĩ ũhoti wa gũtongoria meciria maitũ na ciĩko citũ. Kiugo kĩu kaingĩ kĩhũthagĩrũo ũhoro-inĩ wĩgiĩ kwĩgirĩrĩria gwĩka ũndũ mũũru. O na kũrĩ ũguo, kwĩgirĩrĩria ningĩ nĩ kũbataranagia rĩrĩa tũrenda gwĩka ũndũ mwega, makĩria angĩkorũo ũndũ ũcio tũrenda gwĩka nĩ mũritũ kana tũtirĩ na wendi wa kũwĩka. Ririkana atĩ kwĩgirĩrĩria nĩ gĩcunjĩ kĩa maciaro ma roho, kwoguo hoya Jehova akũhe roho wake mũtheru nĩguo ũgũteithie gũkũria ngumo ĩyo ya bata. (Luk. 11:13; Gal. 5:22, 23) David, ũrĩa ũkũgwetetwo na hau kabere, nĩ aataarĩirie ũrĩa mahoya maamũteithirie. Nĩ eendaga gwĩkaga wĩruti wake kĩũmbe ategũtĩrĩria. Aaugire ũũ: “Nĩ ndahoyaga Jehova andeithie gũkũria ngumo ya kwĩgirĩrĩria. Nĩ ũndũ wa ũteithio wake, nĩ ndahotire kwambĩrĩria mũbango mwega wa wĩruti na ngĩhota kũũrũmĩrĩra itegũtĩrĩria.”

12. Ũtaaro ũrĩa ũrĩ thĩinĩ wa Kohelethu 11:4 ũngĩtũteithia atĩa gũkinyĩra mĩoroto itũ?

¹² Ndũgeterere nginya rĩrĩa maũndũ marĩkorũo marĩ mega biũ. Thĩinĩ wa thĩ ĩno, no kũhoteke gũtirĩ hĩndĩ maũndũ mangĩkorũo marĩ mega biũ. Tũngĩeterera nginya rĩrĩa maũndũ makaagĩra biũ, no twage gũgaakinyĩra muoroto witũ. (Thoma Kohelethu 11:4.) Mũrũ wa Ithe witũ ũmwe wĩtagwo Dayniel aaugire ũũ: “Gũtirĩ hĩndĩ maũndũ makoragwo marĩ mega biũ. Kwoguo tũtiagĩrĩirũo gweterera, twagĩrĩirũo kuoya ikinya rĩa mbere.” Mũrũ wa Ithe witũ ũngĩ wĩtagwo Paul kuuma Uganda nĩ agwetete gĩtũmi kĩngĩ gĩa kwaga gũtĩrĩria. Aaugire ũũ: “Tũngĩambĩrĩria ũndũ o na kũrĩ na moritũ, nĩ tũheaga Jehova kĩndũ angĩrathima.”—Mal. 3:10.

13. Nĩkĩ nĩ wega kwambĩrĩria na tũũndũ tũrĩa tũhũthũ?

¹³ Ambĩrĩria na tũũndũ tũrĩa tũhũthũ. No tũkorũo tũtarĩ na wendi tondũ rĩngĩ muoroto witũ nĩ ũroneka ũrĩ mũritũ gũkinyĩra. Angĩkorũo muoroto waku nĩ mũritũ gũkinyĩra, geria kũũgayania. Angĩkorũo ũrenda kũrutĩra ngumo na ya Gĩkristiano wĩra, no wambĩrĩrie kũmĩonania tũmaũndũ-inĩ tũnini. Angĩkorũo  muoroto waku nĩ gũthoma Bibilia ĩrĩ yothe, no wambĩrĩrie na kũbanga ihinda rĩnini rĩa gũthoma. Tomáš, ũrĩa ũkũgwetetwo kĩambĩrĩria-inĩ, nĩ aaremagwo kũhingia muoroto wake wa gũthoma Bibilia na mwaka ũmwe. Aaugire ũũ: “Nĩ ndonire atĩ nĩ ndathuurĩte gũthoma Bibilia na ihenya mũno ũndũ itangĩahotire. Kwoguo ngĩtua itua rĩa kũgeria rĩngĩ, no riita rĩrĩ ndabangire gũthomaga gacunjĩ kanini o mũthenya na ngecũrania igũrũ rĩako. Maumĩrĩra nĩ atĩ nĩ ndambĩrĩirie gũkenera ũthomi wakwa.” O ũrĩa Tomáš aathiire na mbere gũkenera ũthomi wake, nĩ aambĩrĩirie gũthomaga ihinda inenanene. Mũthia-inĩ, nĩ aahotire gũthoma Bibilia ĩrĩ yothe. c

14. Nĩ maũndũ ta marĩkũ mangĩtũma tũremererũo?

¹⁴ Ũndũ wa kĩeha nĩ atĩ o na tũngĩkorũo tũkĩĩrutanĩria atĩa kana tũkorũo na wendi mũnene atĩa, no twĩkore tũkĩremererũo. Kwa ngerekano, “maũndũ materĩgĩrĩirũo” no matũme twage ihinda rĩa kũrutĩra muoroto witũ wĩra. (Koh. 9:11) No tũcemanie na ũndũ mũritũ ũngĩtũma tũigue tũkuĩte ngoro kana tũtarĩ na hinya. (Thim. 24:10) Tondũ tũtirĩ akinyanĩru, no twĩke mahĩtia mangĩtũma ũkorũo ũrĩ ũndũ mũritũ gũkinyĩra muoroto witũ. (Rom. 7:23) Kana o na tũigue tũnogete. (Mat. 26:43) Nĩ kĩĩ kĩngĩtũteithia tũngĩĩkora tũremereirũo?

15. Nĩkĩ tũtiagĩrĩirũo gũkua ngoro o na angĩkorũo nĩ tũraremererũo gũkinyĩra muoroto witũ? (Thaburi 145:14)

¹⁵ Ririkana atĩ gũkorũo nĩ ũraremererũo ti kuuga atĩ ndũngĩhota. Bibilia yugaga atĩ nĩ tũrĩcemanagia na moritũ kaingĩ. O na kũrĩ ũguo, ningĩ no ĩtaaragĩria atĩ no tũhote gũũkĩra rĩngĩ angĩkorũo nĩ tũremereirũo, makĩria tũrĩ na ũteithio wa Jehova. (Thoma Thaburi 145:14.) Mũrũ wa Ithe witũ Philip, ũrĩa ũkũgwetetwo na hau kabere, aaugire ũũ: “Ndigaga meciria makwa harĩ maita marĩa nemereirũo kũhingia muoroto wakwa. Handũ ha ũguo, njigaga meciria makwa harĩ maita marĩa hotete gũcokerera kũrutĩra  muoroto wakwa wĩra.” David, ũrĩa ũkũgwetetwo na hau kabere, aaugire ũũ: “Ndionaga maita marĩa nemereirũo marĩ mũhĩnga, no nyonaga marĩ mweke wa kuonia Jehova ũrĩa ndĩmwendete.” Hatarĩ nganja, rĩrĩa wathiĩ na mbere kwĩrutanĩria gũkinyĩra muoroto waku o na ũrĩ na moritũ, nĩ wonagia Jehova atĩ nĩ ũrenda kũmũkenia. Na no mũhaka Jehova akorũo nĩ akenaga rĩrĩa ona ũkĩĩrutanĩria gũkinyĩra muoroto waku.

16. Rĩmwe na rĩmwe kũremererũo kũngĩtũruta ũndũ ũrĩkũ?

¹⁶ Wĩrute kuumana na maita marĩa ũremereirũo. Wĩcirie kĩrĩa kĩratũmire ũremererũo na wĩyũrie, ‘Ingĩka atĩa nĩguo ndikaremererũo rĩngĩ?’ (Thim. 27:12) O na kũrĩ ũguo, rĩmwe na rĩmwe kũremererũo no kuonanie atĩ muoroto ũrĩa ũreigĩire nĩ mũritũ harĩ we gũkinyĩra. Ũngĩĩkora ũndũ-inĩ ta ũcio, thuthuria muoroto waku rĩngĩ nĩguo wone kana no ũgũthiĩ na mbere kũũkinyĩra. d Jehova ndekuona ũrĩ mũũru atĩ tondũ nĩ waremwo gũkinyĩra muoroto ũrarĩ mũritũ harĩ we gũkinyĩra.—2 Kor. 8:12.

17. Nĩkĩ nĩ twagĩrĩirũo kũririkanaga mĩoroto ĩrĩa tũrĩkĩtie kũhingia?

¹⁷ Ririkanaga maũndũ marĩa ũrĩkĩtie kũhingia. Bibilia yugaga atĩ “Ngai ndagĩte ũthingu nĩguo ariganĩrũo nĩ wĩra [waku].” (Ahib. 6:10) Kwoguo o nawe ndwagĩrĩirũo kũriganĩrũo nĩ maũndũ marĩa ũhingĩtie. Wĩcũranagie igũrũ rĩgiĩ mĩoroto ĩrĩa ũhingĩtie ta gũkũria ũrata hamwe na Jehova, kwaria na andũ arĩa angĩ igũrũ rĩmwĩgiĩ, kana kũbatithio. O ta ũrĩa wahotire gũkũra na ũgĩkinyĩra mĩoroto yaku ya kĩĩroho ya hau kabere, no ũhote gũthiĩ na mbere gũkinyĩra muoroto waku wa ihinda rĩrĩ.—Afil. 3:16.

18. Nĩ ũndũ ũrĩkũ twagĩrĩirũo kũririkanaga gwĩka o tũgĩkinyagĩra muoroto witũ? (Ningĩ rora mbica.)

¹⁸ No ũhote gũkinyĩra muoroto waku nĩ ũndũ wa gũteithio nĩ Jehova, o ta ũrĩa mũtwarithia wa gatarũ akenaga nĩ gũkinya kũrĩa egũthiaga. No ririkanaga atĩ atwarithia aingĩ a tũtarũ nĩ makenagĩra rũgendo rwao o ũrĩa marathiĩ. O ũndũ ũmwe na ũcio, geragia hingo ciothe kũrora ũrĩa Jehova aragũteithia, na ũndũ ũcio nĩ ũrĩgũteithagia gũkorũo na gĩkeno ũgĩkinyĩra mĩoroto yaku. (2 Kor. 4:7) Na ũngĩaga gũkua ngoro, nĩ ũkaamũkĩra irathimo nene o na makĩria.—Gal. 6:9.