Nĩ kĩĩ gĩatũmire mũndũ ũrĩa wetagwo “Ngʼania-wa-ngʼania” auge atĩ nĩ ‘angĩathũkirie’ igai rĩake angĩahikirie Ruthu? (Ruth 4:1, 6)

Mahinda-inĩ ma Bibilia, mũthuri ũhikanĩtie angĩakuire atarĩ ciana, nĩ harĩ ciũria ciabataraga gũcokio. Kwa ngerekano: Kũngĩathiire atĩa harĩ mũgũnda wake? Hihi rĩĩtwa rĩake nĩ rĩngĩahukire biũ famĩlĩ-inĩ yao? Watho wa Musa nĩ wateithagia gũcokia ciũria ta icio.

Gwathiaga atĩa harĩ mũgũnda wa mũndũ angĩakuire kana athĩne nginya endie mũgũnda wake? Mũrũ wa nyina kana mũndũ wa famĩlĩ wa hakuhĩ nĩ angĩaũkũũrire kana aũgũre. Ũndũ ũcio nĩ ũngĩateithirie mũgũnda ũcio ũikare famĩlĩ-inĩ yao.—Alaw. 25:23-28; Ndar. 27:8-11.

Rĩĩtwa rĩa mũndũ ũcio ũkuĩte rĩagitagĩrũo atĩa famĩlĩ-inĩ yao? Mũrũ wa nyina na mũthuri ũcio ũkuĩte aagĩrĩire kũhikia mũtumia ũcio watigwo na magĩe mwana, ũrĩa ũngĩagaire indo cia mũthuri ũcio ũkuĩte. Mũbango ũcio nĩ wateithagia gũtigĩrĩra atĩ o na mũtumia ũcio watigwo nĩ ararũmbũiyo.—Gũcok. 25:5-7; Mat. 22:23-28.

Ta wĩcirie ũhoro wa Naomi. Aahikĩtio nĩ mũthuri wetagwo Elimeleku. Rĩrĩa mũthuri ũcio na ariũ ake erĩ maakuire, Naomi aatigirũo atarĩ na mũndũ wa kũmũrũmbũiya. (Ruth 1:1-5) Thutha wa Naomi gũcoka Juda marĩ na Ruthu mũtumia wa mũrũwe, Naomi nĩ eerire Ruthu orie Boazu akũũre mũgũnda wao. Aarĩ mũndũ wa hakuhĩ wa famĩlĩ ya Elimeleku. (Ruth 2:1, 19, 20; 3:1-4) No Boazu nĩ aamenyaga atĩ haarĩ na mũndũ ũngĩ wa mbarĩ ciao wa hakuhĩ mũno kũmũkĩra, ũrĩa Bibilia ĩtĩte “Ngʼania-wa-ngʼania.” Na kwoguo mũndũ ũcio nĩwe warĩ na mweke wa mbere wa gũtua kana nĩ angĩendire gũtuĩka mũkũũri.—Ruth 3:9, 12, 13.

Kĩambĩrĩria-inĩ, “Ngʼania-wa-ngʼania” nĩ eendaga gũteithia. (Ruth 4:1-4) O na gũtuĩka nĩ angĩahũthĩrire mbeca nyingĩ gwĩka ũguo, nĩ aamenyaga atĩ Naomi ndangĩahotire kũgĩa mwana, ũrĩa ũngĩagaire mũgũnda wa Elimeleku. Kwoguo mũgũnda ũcio ũngĩongereirũo harĩ igai rĩa Ngʼania-wa-ngʼania, na ũcio nĩ ũngĩonekire ũrĩ mweke mwega.

No Ngʼania-wa-ngʼania nĩ eericũkirũo, rĩrĩa aamenyire atĩ nĩ aagĩrĩirũo kũhikia nginya Ruthu. Aaugire ũũ: “Niĩ ndikũhota kũũkũũra, tondũ ndahota gũthũkia igai rĩakwa niĩ mwene.” (Ruth 4:5, 6) Eericũkirũo nĩkĩ?

Ngʼania-wa-ngʼania kana mũndũ ũngĩ o wothe angĩahikirie Ruthu na magĩe mwana wa kahĩĩ, mwana ũcio nĩwe ũngĩagaire mũgũnda wa Elimeleku. Ũndũ ũcio ‘ũngĩathũkirie igai’ rĩa Ngʼania-wa-ngʼania atĩa? Bibilia ndiugĩte, no rekei tuone itũmi imwe ingĩatũmire gũthiĩ ũguo.

• Wa mbere, angĩonire ta arĩ kwananga mbeca tondũ mũgũnda wa Elimeleku ndũngĩatuĩkire wake. Ũngĩatuĩkire wa mwana ũrĩa Ruthu angĩagĩire.

• Wa kerĩ, nĩwe ũngĩarĩ na ũigĩrĩrĩki wa kũrũmbũiya Naomi na Ruthu na kũmahe gĩa kũrĩa.

• Wa gatatũ, Ruthu angĩagĩire ciana ingĩ na Ngʼania-wa-ngʼania, ciana icio ingĩagayanire igai rĩa Ngʼania-wa-ngʼania hamwe na ciana ingĩ iria Ngʼania-wa-ngʼania angĩakorirũo nacio.

• Wa kana, angĩkorũo Ngʼania-wa-ngʼania ndaarĩ na ciana ingĩ, mwana wa kahĩĩ ũrĩa mangĩagĩire na Ruthu nĩwe ũngĩagĩire na kĩhooto gĩa kũgaya mũgũnda wa Elimeleku, o hamwe na wa Ngʼania-wa-ngʼania. Kwoguo angĩakuire, mũgũnda wake ũngĩagairũo nĩ mwana ũretanio na rĩĩtwa rĩa Elimeleku no ti rĩake. Ngʼania-wa-ngʼania ndangĩendire kũũrũo nĩ igai rĩake agĩteithia Ruthu. Oonire kaba etĩkĩrie Boazu aũkũũre, tondũ nĩwe warĩ wa kerĩ kuuma harĩ we. Boazu nĩ eetĩkĩrire gwĩka ũguo, tondũ nĩ endaga ‘gũcokia rĩĩtwa rĩa mũndũ ũcio mũkuũ harĩ igai rĩake.’—Ruth 4:10.

Ngʼania-wa-ngʼania eendaga mũno gũtũũria rĩĩtwa rĩake na igai rĩake. Meciria make maatongoragio nĩ mwĩyendo. No handũ ha gũtũũria rĩĩtwa rĩake, rĩĩtwa rĩa Ngʼania-wa-ngʼania rĩtitũire. Ningĩ nĩ oorirũo nĩ mweke wa mwanya ũrĩa Boazu aagĩire naguo, wa gũkorũo arĩ ũmwe wa andũ a rũciaro rũrĩa Mesia, nĩwe Jesu Kristo, aaumanire naruo. Ũcio warĩ ũndũ wa kĩeha mũno harĩ Ngʼania-wa-ngʼania nĩ ũndũ wa kwĩyenda akĩaga gũteithia mũndũ warĩ na thĩna!—Mat. 1:5; Luk. 3:23, 32.