1-2. Kaingĩ gũthiaga atĩa rĩrĩa andũ marabatithio, na nĩ maũndũ marĩkũ tũkwarĩrĩria?

 HIHI nĩ ũrĩ werorera andũ makĩbatithio? Ũkaigua ũrĩa marĩ na ũũma magĩcokia ciũria iria igĩrĩ ciũragio andũ mbere ya mabatithĩtio. Ũkoona andũ a famĩlĩ ciao na arata ao macanjamũkĩte. Arĩa marabatithio marĩkia kuuma maĩ-inĩ, ũkoona mothiũ mao macanjamũkĩte na ũkaigua andũ makĩhũũra hĩ makenete. O kiumia, andũ ngiri nyingĩ nĩ meyamũragĩra Jehova na makabatithio magatuĩka aira ake.

² Ĩ wee hihi nĩ ũreciria ũhoro wa kũbatithio? Angĩkorũo nĩ ũreciria ũguo, ũrĩ wa mwanya thĩinĩ wa thĩ ĩno njũru tondũ nĩ “ũcaragia Jehova.” (Thab. 14:1, 2) Gĩcunjĩ gĩkĩ kĩhaarĩrĩirio nĩ ũndũ waku, ũrĩ mwĩthĩ kana ũrĩ mũkũrũ. No o na ithuĩ arĩa tũbatithĩtio, no twende gwĩkĩra hinya itua ritũ rĩa gũtungatĩra Jehova tene na tene. Kwoguo rekei twarĩrĩrie itũmi ithatũ iria itũmaga tũtungatĩre Jehova o na gũtuĩka nĩ kũrĩ ingĩ nyingĩ.

3. Ndungata cia Jehova ciendete ũhoro wa ma na ũthingu nĩkĩ? (Thaburi 119:128, 163)

³ Jehova eerĩte andũ ake ‘mendage ũhoro wa ma.’ (Zek. 8:19) Nake Jesu eerire arũmĩrĩri ake mathingatage maũndũ ma ũthingu. (Mat. 5:6) Ũguo nĩ kuuga atĩ mũndũ nĩ agĩrĩirũo gũkorũo na wendi mũnene wa gwĩka ũndũ ũrĩa wagĩrĩire, ũrĩa mwega, na ũrĩa mũtheru maitho-inĩ ma Ngai. Hihi nĩ wendete ũhoro wa ma na ũthingu? Twĩ na ma nĩ wendete. Nĩ ũthũire maheeni na maũndũ mothe moru. (Thoma Thaburi 119: 128, 163.) Mũndũ ũrĩa ũheenanagia akoragwo akĩĩgerekania na Shaitani, mũnene wa thĩ ĩno. (Joh. 8:44; 12:31) Muoroto ũmwe wa Shaitani, nĩ gũcambia rĩĩtwa itheru rĩa Jehova Ngai. Shaitani akoretwo agĩtheremia maheeni megiĩ Ngai witũ kuuma hĩndĩ ya ũremi wa Edeni. Aageririe gũtũma andũ mecirie atĩ Jehova nĩ Mwathani ũrĩ mwĩyendo na ũtarĩ mwĩhokeku ũrĩa ũimaga andũ maũndũ mega. (Kĩam. 3:1, 4, 5) Maheeni ma Shaitani megiĩ Jehova nĩ mathiĩte na mbere gũthũkia meciria na ngoro cia andũ. Rĩrĩa andũ mathuura kwaga kwenda “ũhoro wa ma,” Shaitani no amatongorie gwĩka maũndũ mothe matarĩ ma ũthingu na maũndũ moru ma mĩthemba yothe.—Rom. 1:25-31.

4. Jehova onanĩtie atĩa atĩ nĩ “Ngai wa ũhoro wa ma”? (Ningĩ rora mbica.)

⁴ Jehova nĩ “Ngai wa ũhoro wa ma” na nĩ arutaga arĩa mamwendete ũhoro ũcio. (Thab. 31:5) Nĩ ũndũ wa kũmaruta ũhoro wa ma nĩ amateithagia matigetĩkie maheeni ma Shaitani. Ningĩ Jehova nĩ arutaga andũ ake gũkorũo marĩ ehokeku na marĩ athingu. Ũndũ ũcio nĩ ũmateithagia kwĩhe gĩtĩo na magakorũo na thayũ wa ngoro. (Thim. 13:5, 6) Hihi Jehova nĩ agwĩkĩire ũguo ũkĩĩruta Bibilia? Nĩ wĩrutĩte atĩ njĩra ciake nĩcio njega biũ harĩ wee mwene na harĩ andũ othe. (Thab. 77:13) Kwoguo no wende gwĩka ũrĩa Ngai onaga nĩguo kwagĩrĩire. (Mat. 6:33) Nĩ wendaga gũtetera ũhoro wa ma na kuonania atĩ maũndũ marĩa Shaitani augaga megiĩ Jehova Ngai witũ, nĩ ma maheeni. Ũngĩka ũguo atĩa?

5. Ũngĩonania atĩa atĩ ũrũgamaga na ũhoro ũrĩa wa ma na ũthingu?

⁵ No ũtũũre na njĩra ĩronia andũ othe atĩ nĩ ũreganĩte na maheeni ma Shaitani, na atĩ ũrũgamaga na ũhoro wa ma. No wonanie atĩ wendaga Jehova akorũo arĩ we Mwathani waku na atĩ wendaga gwĩka maũndũ marĩa augĩte atĩ nĩmo magĩrĩire. Ũngĩhota gwĩka ũguo atĩa? Wĩyamũrĩre Jehova kũgerera mahoya na wonanie wĩyamũrĩri ũcio kũrĩ andũ othe na njĩra ya kũbatithio. Kwenda ũhoro wa ma na ũthingu nĩ gũtũtindĩkaga twende kũbatithio.

6. Thaburi 45:4 ĩtũheaga itũmi irĩkũ cia kwenda Jesu Kristo?

⁶ Wendete Jesu Kristo nĩkĩ? Ta rora itũmi  imwe njega iheanĩtwo thĩinĩ wa Thaburi 45:4. (Thoma.) Jesu nĩ endete ũhoro wa ma, wĩnyihia, na ũthingu. Angĩkorũo nĩ wendete ũhoro wa ma na ũthingu, hatarĩ nganja nĩ wendete Jesu Kristo o nake. Wĩcirie ũrĩa Jesu aarũĩrĩire ũhoro wa ma na ũthingu arĩ na ũmĩrĩru. (Joh. 18:37) No Jesu atũrutaga atĩa kwĩnyihia?

7. Nĩ ũndũ ũrĩkũ ũgũkenagia wĩgiĩ wĩnyihia wa Jesu?

⁷ Jesu atũrutaga kwĩnyihia kũgerera kĩonereria gĩake. Kwa ngerekano, erekagĩria rũgooco ruothe harĩ Ithe no ti harĩ we mwene. (Mar. 10:17, 18; Joh. 5:19) Wĩnyihia wa Jesu ũtũmaga ũigue atĩa? Hatarĩ nganja, nĩ ũgũtindĩkaga kwenda Mũrũ ũcio wa Ngai na kũrũmĩrĩra kĩonereria gĩake. Jesu enyihagia nĩkĩ? Tondũ nĩ endete Ithe na nĩ egerekanagia na kĩonereria gĩake kĩa wĩnyihia. (Thab. 18:35; Ahib. 1:3) Githĩ ũndũ ũcio ndũratũma ũgucĩrĩrio harĩ Jesu tondũ egerekanagia biũ na ngumo cia Ithe!

8. Nĩ kĩĩ gĩtũmaga tũkene nĩ ũndũ wa Jesu gũkorũo arĩ we Mũthamaki witũ?

⁸ Nĩ tũkenaga nĩ ũndũ wa Jesu gũkorũo arĩ we Mũthamaki witũ tondũ nĩwe Mwathani ũrĩa mwega biũ. Jehova we mwene nĩ aamenyeririe Mũrũ wake na akĩmwamũra atuĩke Mũthamaki. (Isa. 50:4, 5) Ningĩ wĩcirie ũrĩa Jesu onanĩtie wendo wa kwĩima. (Joh. 13:1) Tondũ Jesu nĩwe Mũthamaki witũ, hatarĩ nganja nĩ twagĩrĩirũo kũmwenda. Aaugire atĩ etaga andũ arĩa mamwendete arata ake, na atĩ monanagia nĩ mamwendete na njĩra ya gwathĩkĩra maathani make. (Joh. 14:15; 15:14, 15) Na githĩ ti gĩtĩo kĩnene gũkorũo ũrĩ mũrata wa Mũrũ wa Jehova!

9. Ũbatithio wa Akristiano ũhaanaine atĩa na wa Kristo?

⁹ Ũndũ ũmwe Jesu aathanire nĩ atĩ arũmĩrĩri ake mabatithagio. (Mat. 28:19, 20) Nĩ aaigire kĩonereria ũndũ-inĩ ũcio. Ũbatithio wa Jesu nĩ ngũrani na wa arũmĩrĩri ake na njĩra imwe na nĩ ũhaanaine na njĩra ingĩ. (Rora gathandũkũ “ Ngũrani ya Ũbatithio wa Jesu na Ũbatithio wa Arũmĩrĩri Ake.”) Rĩrĩa Jesu aabatithirio, nĩ kwĩneana eeneanire nĩguo eke wendi wa Ithe. (Ahib. 10:7) Na njĩra o ta ĩyo, rĩrĩa arũmĩrĩri a Kristo mabatithio, nĩ monanagia mbere ya andũ atĩ nĩ meyamũrĩire Jehova Ngai. Ũndũ ũrĩa rĩu maigaga mbere ũtũũro-inĩ wao nĩ gwĩka wendi wa Jehova no ti wao ene. Kwoguo nĩ marũmagĩrĩra kĩonereria kĩa Mwathi wao.

10. Kwenda Jesu kwagĩrĩirũo gũgũtindĩka kũbatithio nĩkĩ?

¹⁰ Nĩ wĩtĩkĩtie atĩ Jesu nĩ Mũrũ wa mũmwe wa Jehova na nĩ ũkenaga tondũ nĩwe Ngai amũrĩte atuĩke Mũthamaki wa gũtũthamakĩra. Nĩ ũĩ atĩ Jesu nĩ mwĩnyihia na atĩ egerekanagia na Ithe biũ. Nĩ wĩrutĩte atĩ nĩ aahũnirie arĩa maarĩ ahũtu, akĩũmĩrĩria arĩa maakuĩte ngoro, na o na akĩhonia arĩa maarĩ arwaru. (Mat. 14:14-21) Nĩ wĩyoneire ũrĩa atongoragia kĩũngano gĩake ũmũthĩ. (Mat. 23:10) Na nĩ ũĩ atĩ arĩ Mũthamaki wa Ũthamaki wa Ngai nĩ ageeka maũndũ ma magegania o na gũkĩra macio ihinda rĩũkĩte. Ũngĩonania atĩa atĩ nĩ ũmwendete? Na njĩra ya kũrũmĩrĩra kĩonereria gĩake. (Joh. 14:21) Ũndũ ũmwe wa mbere ũngĩka nĩguo ũrũmĩrĩre kĩonereria gĩake, nĩ kwĩyamũrĩra Jehova na kũbatithio.

11. Ũngiuga gĩtũmi kĩrĩa kĩnene mũno gĩa kũbatithio nĩ kĩrĩkũ?

¹¹ Gĩtũmi kĩrĩa kĩnene mũno gĩa kũbatithio nĩ kĩrĩkũ? Jesu nĩ oonanirie rĩathani rĩrĩa inene rĩa Ngai nĩ rĩrĩkũ, rĩrĩa aaugire ũũ: “No mũhaka wende Jehova Ngai waku na ngoro yaku yothe na muoyo waku wothe na meciria  maku mothe na hinya waku wothe.” (Mar. 12:30) Hihi ũguo nĩguo wee wendete Ngai?

12. Wendete Jehova nĩkĩ? (Ningĩ rora mbica.)

¹² Kũrĩ na itũmi nyingĩ cia kwenda Jehova. Kwa ngerekano, nĩ ũmenyete atĩ nĩwe “kĩhumo kĩa muoyo” na atĩ nĩwe mũheani wa “kĩheo o gĩothe kĩega na gĩkinyanĩru.” (Thab. 36:9; Jak. 1:17) Kĩndũ o gĩothe kĩega ũkenagĩra, kiumaga kũrĩ Ngai witũ mũtaana na ũrĩ wendo.

13. Nĩ kĩĩ gĩtũmaga ũkũũri ũkorũo ũrĩ kĩheo kĩa magegania?

¹³ Ũkũũri nĩ kĩheo kĩa magegania Jehova atũheete. Tũngiuga ũguo nĩkĩ? Ta wĩcirie ũhoro wa ũrata wa hakuhĩ ũrĩa Jehova na Mũrũwe makoragwo naguo. Jesu aaugire ũũ: “Awa [nĩ] anyendete,” na “nĩ nyendete Awa.” (Joh. 10:17; 14:31) Ũrata wao wathiire ũkũrĩte ihinda-inĩ rĩa mĩaka bilioni nyingĩ ĩrĩa maarĩ hamwe. (Thim. 8:22, 23, 30) Rĩu ta wĩcirie ruo rũrĩa Ngai aaiguire rĩrĩa eetĩkĩririe Mũrũ wake anyarirũo na akue. Jehova nĩ eehaarĩirie kũruta Mũrũwe arĩ igongona nĩguo wee hamwe na andũ arĩa angĩ mũgaatũũra tene na tene, tondũ nĩ endete andũ othe nginya wee. (Joh. 3:16; Gal. 2:20) Kĩu nĩkĩo gĩtũmi kĩrĩa kĩnene mũno gĩa kwenda Ngai.

14. Muoroto ũrĩa mwega biũ ũngĩĩigĩra ũtũũro-inĩ nĩ ũrĩkũ?

 ¹⁴ Wendo waku harĩ Jehova nĩ wongererekete o ũrĩa wĩrutĩte makĩria igũrũ rĩmwĩgiĩ. Hatarĩ nganja no wende kũmũkuhĩrĩria makĩria, ihinda-inĩ rĩrĩ na tene na tene. Na no ũhote gwĩka ũguo. Agwĩkĩrĩte ngoro ũkenagie ngoro yake. (Thim. 23:15, 16) No ũhote gwĩka ũguo kũgerera ciugo o hamwe na ciĩko ciaku. Kũgerera ũtũũro waku, no wonanie atĩ nĩ wendete Jehova biũ. (1 Joh. 5:3) Ũcio nĩguo muoroto ũrĩa mwega biũ ũngĩĩigĩra ũtũũro-inĩ.

15. Ũngĩonania atĩa atĩ nĩ wendete Jehova?

¹⁵ Ũngĩonania atĩa atĩ nĩ wendete Jehova? Mũndũ ambagĩrĩria na kũhoya ihoya rĩa mwanya rĩa kwĩyamũrĩra Ngai ũrĩa ũmwe wa ma. (Thab. 40:8) Agacoka akonania wĩyamũrĩri ũcio kũrĩ andũ arĩa angĩ na njĩra ya kũbatithio. O ta ũrĩa tũkuonete na hau kĩambĩrĩria-inĩ, kũbatithio nĩ ikinya rĩa bata mũno ũtũũro-inĩ waku na nĩ rĩrehaga gĩkeno. Wambagĩrĩria ũtũũro mwerũ wa gũtũũra nĩ ũndũ wa Jehova no ti tondũ waku mwene. (Rom. 14:8; 1 Pet. 4:1, 2) Rĩu no rĩoneke rĩrĩ ikinya inene, na nĩguo kũrĩ. No nĩ rĩkũhingũragĩra njĩra ya kũgĩa na ũtũũro ũrĩa mwega biũ. Na njĩra ĩrĩkũ?

16. Rĩandĩko rĩa Thaburi 41:12 rĩonanagia Jehova arathimaga atĩa arĩa mahũthagĩra ũtũũro wao kũmũtungatĩra?

¹⁶ Gũtirĩ mũndũ ũngĩ mũtaana ta Jehova. Gũtekũmakania kĩrĩa gĩothe tũngĩmũhee, hingo ciothe atũrĩhaga na njĩra nene makĩria. (Mar. 10:29, 30) No akũhe ũtũũro ũrĩa mwega biũ ũrĩ na gĩkeno na irathimo nginya thĩinĩ wa thĩ ĩno njũru. Na kĩu no kĩambĩrĩria. Ũtũũro ũrĩa wambagĩrĩria rĩrĩa wabatithio no wage gũthira. No ũtũũre ũtungatagĩra Ithe witũ wa igũrũ tene na tene. Ũrata wanyu na Jehova nĩ ũgũthiĩ na mbere kuongerereka, na no ũtũũre ihinda rĩrĩa rĩothe egũtũũra, ũguo nĩ kuuga tene na tene.—Thoma Thaburi 41:12.

17. Nĩ kĩĩ Jehova atarĩ nakĩo ũngĩmũhee?

¹⁷ Rĩrĩa woya ikinya rĩa kwĩyamũrĩra Jehova na kũbatithio, nĩ ũgĩaga na mweke wa kũmũhe kĩndũ kĩa goro mũno. Nĩ akũheete indo ciothe njega, na maũndũ marĩa mothe  ũkenagĩra, na marĩa mothe wanakenera. O nawe no ũhe Mwene igũrũ na thĩ kĩndũ atakoragwo nakĩo—ũtungata waku wa kwĩyendera na wa kuuma ngoro. (Ayub. 1:8; 41:11; Thim. 27:11) Hatarĩ nganja, gũtirĩ ũndũ ũngĩ mwega gũkĩra ũcio ũngĩka na ũtũũro waku. Nĩ ũndũ ũcio, kwenda Jehova nĩkĩo gĩtũmi kĩrĩa kĩnene mũno gĩa kũbatithio.

18. Nĩ ciũria irĩkũ ũngĩĩyũria?

¹⁸ Gũkinyĩria hau-rĩ, hihi wee nĩ ũkũbatithio? Wee nowe tu ũngĩcokia kĩũria kĩu. Ĩndĩ no ũteithĩke ũngĩĩyũria, ‘Nĩ kĩĩ kĩragiria batithio?’ (Atũm. 8:36) Ririkana maũndũ matatũ marĩa twarĩrĩria. Wa mbere, nĩ wendete ũhoro wa ma na nĩ wendete ũthingu. Wĩyũrie, ‘Hihi nĩ ndĩrenda gũkoona mũthenya ũrĩa andũ othe makaaragia ma na mageka maũndũ marĩa magĩrĩire.’ Wa kerĩ, nĩ wendete Jesu Kristo. Wĩyũrie, ‘Hihi nĩ ndĩrenda Mũrũ wa Ngai akorũo arĩ Mũthamaki wakwa, na nĩ ndĩrenda kũrũmĩrĩra kĩonereria gĩake?’ Wa gatatũ na nĩguo wa bata makĩria, nĩ wendete Jehova. Wĩyũrie, ‘Hihi nĩ ndĩrenda gũkenia ngoro ya Jehova Ngai na njĩra ya kũmũtungatĩra?’ Angĩkorũo macokio maku harĩ ciũria icio nĩ ĩĩ-rĩ, nĩ kĩĩ kĩrakĩgiria ũbatithio?—Atũm. 16:33.

19. Nĩkĩ ndwagĩrĩirũo kũmaĩrĩria kũbatithio? Heana ngerekano. (Johana 4:34)

¹⁹ Angĩkorũo nĩ ũramaĩrĩria kũbatithio, wĩcirie ũhoro wa ngerekano ĩmwe Jesu aahũthĩrire. (Thoma Johana 4:34.) Jesu aaringithanirie gwĩka wendi wa Ithe na irio. Nĩkĩ? Tondũ irio nĩ itũgunaga. Jesu nĩ aamenyaga atĩ maũndũ marĩa mothe Jehova atwĩraga twĩke nĩ matũgunaga. Jehova ndangĩenda twĩke ũndũ o na ũmwe ũngĩtũma tũingĩre ũgwati-inĩ. Hihi Jehova nĩ arenda ũbatithio? Ĩĩ. (Atũm. 2:38) Kwoguo no ũkorũo na ma atĩ gwathĩkĩra rĩathani rĩa kũbatithio nĩ gũgũkũguna. Angĩkorũo ndũngĩmaĩrĩria kũrĩa irio njega-rĩ, nĩ kĩĩ kĩngĩgĩtũma ũmaĩrĩrie kũbatithio?

20. Tũkaarĩrĩria ũndũ ũrĩkũ gĩcunjĩ-inĩ kĩrĩa kĩrũmĩrĩire?

²⁰ Nĩ kĩĩ gĩtũmaga andũ amwe mamaĩrĩrie kũbatithio? Amwe no mauge, “Niĩ ndiĩhaarĩirie.” Ma nĩ atĩ, itua rĩa kwĩyamũrĩra Jehova na kũbatithio nĩrĩo itua rĩrĩa rĩa bata mũno ũngĩtua. Kwoguo mũndũ no abatare kuoya ihinda, gwĩciria na njĩra ndikĩru, na gwĩkĩra kĩyo nĩguo agĩrĩre kũbatithio. No angĩkorũo ũrĩ na wendi wa kuuma ngoro wa kuoya ikinya rĩu-rĩ, nĩ atĩa ũngĩka ihinda-inĩ rĩrĩ nĩguo wĩhaarĩrie? Nĩ tũkaarĩrĩria macokio ma kĩũria kĩu gĩcunjĩ-inĩ kĩrĩa kĩrũmĩrĩire.