Tuohagĩrũo mehia maitũ o kũgerera tu harĩ igongona rĩa ũkũũri rĩrĩa Jesu aarĩhire na thakame yake. (Ef. 1:7) O na kũrĩ ũguo, Bibilia yugaga ũũ: “Ngai nĩ ũndũ wa ũkirĩrĩria wake, nĩ kuohera oohagĩra mehia marĩa meekirũo tene.” Ũguo nĩ kuuga Jehova nĩ oohanagĩra o na mbere ya Jesu kũruta ũkũũri. (Rom. 3:25) Jehova angĩekire ũguo atĩa na o hĩndĩ ĩyo akorũo akĩrũmia ithimi ciake nginyanĩru cia kĩhooto?

Jehova eeranĩire atĩ nĩ angĩkaaruta “mbeũ” ĩrĩa ĩngĩkaahonokia andũ arĩa mamwĩtĩkĩtie. Kuuma hĩndĩ ĩyo eeranĩire kĩĩranĩro kĩu, oonaga ta ũkũũri ũrĩkĩtie kũrutwo. (Kĩam. 3:15; 22:18) Ngai aarĩ na ma biũ atĩ ihinda rĩrĩa aabangĩte rĩakinya, Mũrũ wake wa mũmwe nĩ angĩarutire ũkũũri eyendeire. (Gal. 4:4; Ahib. 10:7-10) Rĩrĩa Jesu aarĩ gũkũ thĩ, Jehova nĩ aamũheete rũtha rwa kuohanĩra mehia o na mbere ya ũkũũri ũrutĩtwo. Jesu nĩ aangĩoheire arĩa maarĩ na wĩtĩkio tondũ nĩ aamenyaga atĩ igongona rĩrĩa angĩarutire nĩ rĩngĩahumbĩrire mehia mao.—Mat. 9:2-6.