1-2. Mũndũ agĩrĩirũo gwĩka atĩa atanabatithio?

 IHINDA-INĨ rĩa mĩaka ĩtano mĩhĩtũku, andũ makĩria ma milioni ĩmwe nĩ mabatithĩtio magatuĩka Aira a Jehova. Aingĩ ao matariĩ o ta Timotheo ũrĩa warutirũo ũhoro wa ma ‘kuuma arĩ o gakenge.’ (2 Tim. 3:14, 15) Angĩ nao merutĩte ũhoro wa Jehova marĩ andũ agima, o na amwe marĩ akũrũ. Ihinda ihĩtũku, mũtumia ũmwe nĩ eerutire Bibilia na Aira a Jehova na akĩbatithio arĩ na mĩaka 97.

² Angĩkorũo ũrĩ mũrutwo wa Bibilia kana ũrarererũo ũhoro-inĩ wa ma-rĩ, hihi nĩ ũreciria ũhoro wa kũbatithio? Ũcio nĩ muoroto mwega mũno. No ũtanabatithio, nĩ ũrabatara kwĩyamũrĩra Jehova. Gĩcunjĩ gĩkĩ nĩ gĩgũtaarĩria kwĩyamũrĩra Jehova nĩ kuuga atĩa. Ningĩ nĩ gĩgũgũteithia kuona atĩ ndũrabatara kũmaĩrĩria kuoya ikinya rĩu na kũbatithio angĩkorũo nĩ wĩhaarĩirie gwĩka ũguo.

KWĨYAMŨRĨRA JEHOVA NĨ KUUGA ATĨA?

3. Heana ngerekano cia andũ magwetetwo Bibilia-inĩ arĩa meeyamũrĩire Jehova.

³ Thĩinĩ wa Bibilia, kwĩyamũrĩra Jehova kuoonanagia atĩ mũndũ nĩ athuurĩtwo nĩguo ahingie wĩra wa mwanya. Aisiraeli maarĩ rũrĩrĩ rweyamũrĩire Jehova. No Aisiraeli amwe nĩ meeyamũragĩra Jehova na njĩra ya mwanya. Kwa ngerekano, Haruni nĩ eehumbaga kĩremba kĩarĩ na kabaati kaahenagia ga thahabu mwena wa mbere, na gaakoragwo karĩ ‘rũũri rũtheru rwa kwamũrũo.’ Kabaati kau ga thahabu koonanagia atĩ nĩ aathuurĩtwo atungate na njĩra ya mwanya arĩ mũthĩnjĩri-Ngai  ũrĩa mũnene wa Isiraeli. (Alaw. 8:9) O na Anaziri nĩ meeyamũragĩra Jehova na njĩra ya mwanya. Kiugo “Mũnaziri” kĩrĩa kiumanĩte na kiugo gĩa Kĩhibirania nazirʹ, kiugĩte “Ũrĩa Mũtigithũkanie,” kana “Ũrĩa Mwamũre.” Anaziri nĩ maabataraga kũrũmĩrĩra mawatho marĩa maakonainie na mwĩhĩtwa wao kũringana na Watho wa Musa.—Ndar. 6:2-8.

4. (a) Andũ arĩa meyamũrĩire Jehova makoragwo mehaarĩirie gwĩka atĩa? (b) ‘Kwĩrega’ nĩ kuuga atĩa? (Ningĩ rora mbica.)

⁴ Rĩrĩa weyamũrĩra Jehova, ũtuĩkaga mũrutwo wa Jesu Kristo, na ũndũ ũrĩa ũrĩkoragwo ũrĩ wa bata makĩria ũtũũro-inĩ waku nĩ gwĩka wendi wa Ngai. Gwĩka ũguo kũhutĩtie maũndũ marĩkũ? Jesu aaugire: “Mũndũ o wothe angĩenda kũnũmĩrĩra, nĩ erege.” (Mat. 16:24) Ciugo cia Kĩngiriki iria itaũrĩtwo “nĩ erege,” ningĩ no ciuge “nĩ atige gũtũũra nĩ ũndũ wake mwene.” Weyamũrĩra Jehova, nĩ wagĩrĩirũo kũregana na ũndũ o wothe ũtaratwarana na wendi wake. (2 Kor. 5:14, 15) Ũndũ ũcio nĩ ũhutĩtie kũregana na “ciĩko cia kĩĩmwĩrĩ” ta ngomanio itagĩrĩire. (Gal. 5:19-21; 1 Kor. 6:18) Hihi gwĩka ũguo nĩ kũrĩkũritũhagĩria ũtũũro? Mũndũ wendete Jehova na ũrĩ na ma atĩ mawatho make nĩ ma kũmũguna, ndangĩkorũo na mawoni ta macio. (Thab. 119:97; Isa. 48:17, 18) Mũrũ wa Ithe witũ ũmwe wĩtagwo Nicholas aaugire ũũ: “Mũndũ no athuure kuona ithimi cia Jehova itariĩ ta cuma cia njera iria iramũgirĩrĩria gwĩka ũrĩa arenda, kana itariĩ ta cuma cia kũhingĩra mĩrũthi nĩguo ndĩkamũrĩe.”

5. (a) Mũndũ eyamũragĩra Jehova atĩa? (b) Kwĩyamũrĩra Jehova nĩ ngũrani atĩa na kũbatithio? (Ningĩ rora mbica.)

⁵ Mũndũ eyamũragĩra Jehova atĩa? Na njĩra ya kwaria na Jehova kũgerera mahoya, akamwĩra atĩ arĩmũthathayagia o we wiki na atĩ arĩigaga wendi wa Ngai mbere ũtũũro-inĩ wake. Mũndũ eragĩra Jehova atĩ egũthiĩ na  mbere kũmwenda na ‘ngoro yake yothe na muoyo wake wothe na meciria make mothe na hinya wake wothe.’ (Mar. 12:30) Mũndũ eyamũragĩra Jehova hatarĩ andũ angĩ, tiga o we na Jehova. O na kũrĩ ũguo, mũndũ abatithagio harĩ na andũ angĩ nĩguo onanie atĩ nĩ arĩkĩtie kwĩyamũrĩra Jehova. Kwĩyamũrĩra Jehova nĩ mwĩhĩtwa wagĩrĩire kuoywo na ũritũ. Kwoguo nĩ wagĩrĩirũo kwĩigĩra muoroto wa gũtũũra kũringana na mwĩhĩtwa ũcio, tondũ ũguo nĩguo Jehova erĩgagĩrĩra wĩke.—Koh. 5:4, 5.

WAGĨRĨIRŨO KWĨYAMŨRĨRA JEHOVA NĨKĨ?

6. Nĩ kĩĩ kĩbatiĩ gũtũma mũndũ eyamũrĩre Jehova?

⁶ Wendo waku harĩ Jehova nĩguo ũndũ ũrĩa mũnene ũbatiĩ gũtũma ũmwĩyamũrĩre. Wendo ũcio ndũbatiĩ kwĩhocia tu harĩ ũrĩa ũraigua ngoro-inĩ. Handũ ha ũguo, ũbatiĩ kuumana na “ũmenyo ũrĩa wa ma” na “ũtaũku wa kĩĩroho,”—nĩmo maũndũ marĩa wĩrutĩte megiĩ Jehova marĩa matũmĩte wendo waku harĩ we ũkũre. (Kol. 1:9) Kwĩruta Maandĩko nĩ gũtũmĩte ũkorũo na ma atĩ (1) Jehova e kuo, (2) atĩ Bibilia nĩ Kiugo gĩake gĩtongoretio nĩ roho, na (3) atĩ nĩ ahũthagĩra ithondeka rĩake kũhingia wendi wake.

7. Nĩ atĩa tũbatiĩ gũkorũo tũgĩka tũtaneyamũrĩra Jehova?

⁷ Andũ arĩa meyamũragĩra Jehova magĩrĩirũo gũkorũo moĩ morutani ma mũthingi ma Kiugo kĩa Ngai na makorũo magĩtũũra kũringana na ithimi ciakĩo. Nĩ merutanagĩria ũrĩa wothe mangĩhota kũhunjĩria andũ arĩa angĩ maũndũ marĩa merutĩte. (Mat. 28:​19, 20) Wendo wao harĩ Jehova nĩ ũthiĩte ũkũrĩte, na wendi wao ũrĩa mũnene nĩ kũhe Jehova wĩrutĩri wa ngoro yothe. Hihi ũguo  nĩguo wee ũtariĩ? Ũngĩkorũo na wendo ta ũcio, ndũkwĩyamũrĩra Jehova na ũbatithio nogetha tu ũkenie mwarimũ waku wa Bibilia kana aciari aku, kana wĩke ũguo atĩ tondũ arata aku nĩguo mekĩte.

8. Gũkorũo na ngatho kũngĩgũtindĩka atĩa kwĩyamũrĩra Jehova? (Thaburi 116:​12-14)

⁸ Nĩ ũndũ mũhũthũ gũtua itua rĩa kwĩyamũrĩra Jehova, mũndũ angĩciria maũndũ marĩa mothe Jehova amwĩkĩire. (Thoma Thaburi 116:12-14.) Bibilia yugaga atĩ Jehova nĩ Mũheani wa “kĩheo o gĩothe kĩega na gĩkinyanĩru.” (Jak. 1:17) Kĩheo kĩrĩa kĩnene biũ anaheana nĩ igongona rĩa Mũrũwe Jesu. Ta wĩcirie ũrĩa kĩheo kĩu kĩrĩ kĩa mwanya. Igongona rĩu rĩa ũkũũri nĩ rĩkũhotithĩtie kũgĩa na ũrata wa hakuhĩ hamwe na Jehova. Ningĩ nĩ akũheete kĩĩrĩgĩrĩro gĩa gũgaatũũra tene na tene. (1 Joh. 4:9, 10, 19) Kwĩyamũrĩra Jehova nĩ njĩra ĩmwe ũngĩonania ngatho nayo nĩ ũndũ wa wendo ũcio mũnene wonetio, o hamwe na irathimo iria ciothe wamũkĩrĩte kuuma kũrĩ Jehova. (Gũcok. 16:17; 2 Kor. 5:15) Ibuku rĩa Kenera Ũtũũro Tene na Tene! nĩ rĩonanĩtie ũrĩa ũngĩonania ngatho ta icio, thĩinĩ wa ithomo rĩa 46 ũndũ wa 4, harĩa harĩ nginya na video ya ndagĩka ithatũ ya Kũrutĩra Ngai Iheo Ciaku.

HIHI NĨ WĨHAARĨIRIE KWĨYAMŨRĨRA JEHOVA NA KŨBATITHIO?

9. Nĩkĩ mũndũ ndagĩrĩirũo kũigua agĩtindĩkĩrĩrio kwĩyamũrĩra Jehova?

⁹ No gũkorũo ũiguaga ta ũtehaarĩirie kwĩyamũrĩra Jehova na kũbatithio, tondũ rĩngĩ harĩ o na mogarũrũku ũrabatara gwĩka nĩguo ũikare kũringana na ithimi cia Jehova, kana hihi nĩ ũrabatara ihinda makĩria nĩguo wĩkĩre wĩtĩkio waku hinya. (Kol. 2:​6, 7) Ma nĩ atĩ, arutwo a Bibilia matikũraga kĩĩroho na ihinda rĩiganaine, na o na andũ ethĩ matikoragwo mehaarĩirie kwĩyamũrĩra Jehova na kũbatithio marĩ na mĩaka ĩiganaine. Kwoguo wĩthuthurie ũrĩa ũrakũra kĩĩroho kũringana na maũndũ marĩa ũrahota gwĩka ũtekwĩringithania na mũndũ ũngĩ.—Gal. 6:​4, 5.

10. Ũngĩka atĩa ũngĩona atĩ ndwĩhaarĩirie kwĩyamũrĩra Jehova na kũbatithio? (Ningĩ rora gathandũkũ, “ Arĩa Mararererũo Ũhoro-inĩ wa Ma.”)

¹⁰ O na ũngĩona atĩ ndwĩhaarĩirie kwĩyamũrĩra Jehova, thiĩ na mbere gũthingata muoroto ũcio. Hoya Jehova arathime kĩyo gĩaku gĩa gwĩka mogarũrũku marĩa marabatarania. (Afil. 2:13; 3:16) No ũkorũo na ma atĩ nĩ ekũigua mahoya maku na amacokie.—1 Joh. 5:14.

KĨRĨA GĨTŨMAGA ANDŨ AMWE MAMAĨRĨRIE KWĨYAMŨRĨRA JEHOVA

11. Jehova atũteithagia atĩa gũikara tũrĩ ehokeku harĩ we?

¹¹ Andũ amwe no makorũo mehaarĩirie gũtua itua rĩa kwĩyamũrĩra Jehova na kũbatithio, ĩndĩ makamaĩrĩria. Mahota kuona ta thutha wa kũbatithio mangĩka mehia maritũ na meherio kĩũngano-inĩ. Angĩkorũo wĩ na guoya ta ũcio, korũo na ma atĩ Jehova nĩ arĩkũheaga kĩrĩa gĩothe ũrabatara nĩgetha ‘ũthiage na mĩthiĩre ĩrĩa yaganĩrĩire nake nĩguo ũmũkenagie biũ.’ (Kol. 1:10) Ningĩ nĩ arĩkũheaga hinya wa gwĩka ũrĩa kwagĩrĩire. No ũkorũo na ũũma ũcio tondũ nĩ ateithĩtie andũ angĩ aingĩ gwĩka ũguo. (1 Kor. 10:13) Na nĩkĩo no andũ anini tu meheragio kĩũngano-inĩ gĩa Gĩkristiano. Jehova nĩ ateithagia andũ ake gũikara marĩ ehokeku.

12. Tũngĩĩthema atĩa gwĩka mehia maritũ?

¹² Tondũ ithuothe tũtirĩ akinyanĩru, nĩ tũgucagĩrĩrio nĩ merirĩria matagĩrĩire. (Jak. 1:14) O na kũrĩ ũguo, mũndũ no ahote kwaga gwĩka kũringana na merirĩria macio. Ma nĩ  atĩ, o mũndũ arĩ na ũhoti wa gũthuura ũtũũro ũrĩa egũikara. No ũhote kũregana na merirĩria matagĩrĩire, o na gũtuĩka andũ amwe no mage gwĩtĩkania na ũndũ ũcio. Kwoguo o na rĩrĩa wagucĩrĩrio gwĩka ũndũ ũtagĩrĩire, no ũthuure kwaga kũhingia merirĩria macio. Maũndũ maya no magũteithie kwaga kũingĩra mehia-inĩ: Kũhoyaga o mũthenya, gũtũũria mũtaratara mwega wa kwĩruta Kiugo kĩa Ngai, gũthiaga mĩcemanio ya Gĩkristiano, na kũhunjĩria andũ arĩa angĩ. Gwĩkaga maũndũ macio ũtegũtĩrĩria nĩ kũrĩkũheaga hinya wa gũtũũra kũringana na mwĩhĩtwa waku wa kwĩyamũrĩra Jehova. Ningĩ ririkanaga atĩ Jehova nĩ arĩgũteithagia gũtũũria mwĩhĩtwa ũcio.—Gal. 5:16.

13. Jusufu aatũigĩire kĩonereria kĩrĩkũ kĩega?

¹³ No ũkorũo ũrĩ ũndũ mũhũthũ harĩ wee gũikara ũrĩ mwĩhokeku, ũngĩbanga kabere ũrĩa ũngĩka ũngĩcemania na igerio. Bibilia nĩ ĩkoragwo na cionereria cigana ũna cia andũ maahotire gwĩka ũguo o na gũtuĩka o nao maarĩ andũ matarĩ akinyanĩru. Kwa ngerekano, mũtumia wa Potifa nĩ aageririe maita maigana ũna kũingĩria Jusufu magerio-inĩ. No Jusufu nĩ ooĩ wega ũrĩa aabatiĩ gwĩka. Bibilia ĩtwĩraga atĩ nĩ ‘aareganire’ na mũtumia ũcio na akiuga: “Ingĩkĩhota atĩa gwĩka ũndũ ũcio mũũru ũguo njĩhĩrie Ngai?” (Kĩam. 39:​8-10) Ũndũ ũcio ũronania wega atĩ Jusufu nĩ ooĩ ũrĩa aabatiĩ gwĩka o na mbere ya mũtumia ũcio kũmũgeria. Nĩ ũndũ ũcio ndwarĩ ũndũ mũritũ harĩ we kũregana na igerio rĩu.

14. Tũngĩhota atĩa kũregana na magerio?

¹⁴ Ũngĩĩgerekania atĩa na Jusufu? No ũtue kabere ũrĩa ũngĩka ũngĩcemania na igerio. Wĩrute kũreganaga o rĩo na maũndũ marĩa Jehova athũire nginya kwaga kũmaiga meciria-inĩ. (Thab. 97:10; 119:165) Weka ũguo nĩ ũrĩhotaga gwĩthema kũgwa mehia-inĩ rĩrĩa wacemania na igerio. Ũrĩkoragwo ũmenyete kabere ũrĩa wagĩrĩirũo gwĩka na kwoguo ũkahota gwĩtiiria.

15. Mũndũ angĩonania atĩa atĩ nĩ ‘aracaria Jehova na kĩyo’? (Ahibirania 11:6)

¹⁵ No gũkorũo wĩ na ma atĩ nĩ wonete ũhoro wa ma na nĩ wendaga gũtungatĩra Jehova na ngoro yaku yothe, ĩndĩ hakorũo harĩ o na ũndũ ũratũma ũmaĩrĩrie kwĩyamũrĩra Jehova na kũbatithio. No wĩke o ta Mũthamaki Daudi ũrĩa wathaithire Jehova ũũ: “Thuthuria, wee Ngai, ũmenye ngoro yakwa. Nduĩria,  ũmenye mĩtangĩko ya meciria makwa. Rora wone kana nĩ kũrĩ mĩthiĩre mĩũru thĩinĩ wakwa, na ũndongorie njĩra-inĩ ĩrĩa ya tene na tene.” (Thab. 139:​23, 24) Jehova nĩ arathimaga “arĩa mamũcaragia na kĩyo.” Gũkorũo atĩ nĩ ũrerutanĩria gũkinyĩra muoroto wa kwĩyamũrĩra Jehova na kũbatithio, kũronania atĩ nĩ ũramũcaria na kĩyo.—Thoma Ahibirania 11:6.

THIĨ NA MBERE GŨKUHĨRĨRIA JEHOVA

16-17. Jehova agucagĩrĩria atĩa andũ arĩa mararererũo ũhoro-inĩ wa ma? (Johana 6:44)

¹⁶ Jesu aaugire atĩ Jehova nĩwe ũgucagĩrĩria arutwo ake harĩ we. (Thoma Johana 6:44.) Ta wĩcirie ũrĩa ũndũ ũcio ũrĩ wa mwanya na ũrĩa ũrakũhutia. Jehova akoragwo onete ũndũ mwega harĩ mũndũ o wothe agucagĩrĩria harĩ we. Onaga mũndũ ũcio arĩ “kĩndũ gĩake kĩa mwanya” kana “kĩndũ gĩake kĩa goro.” (Gũcok. 7:6; kohoro ka magũrũ-inĩ.) Kwoguo o nawe noguo akuonaga.

¹⁷ Ĩ angĩkorũo wee ũrĩ mũndũ mwĩthĩ ũrarererũo ũhoro-inĩ wa ma? No ũigue ta ũkoragwo ũhoro-inĩ wa ma no ũndũ tu wa aciari aku. O na kũrĩ ũguo, Bibilia yugaga: ‘Kuhĩrĩria Ngai, nake nĩ egũgũkuhĩrĩria.’ (Jak. 4:8; 1 Maũ. 28:9) Kwoguo rĩrĩa woya ikinya rĩa gũkuhĩrĩria Jehova, o nake nĩ agũkuhagĩrĩria. Jehova ndaroraga andũ marĩ gĩkundi, no agucagĩrĩria mũndũ ũmwe ũmwe, nginya mũndũ ũrĩa ũrarererũo ũhoro-inĩ wa ma. Rĩrĩa mũndũ ta ũcio oya ikinya rĩa gũkuhĩrĩria Jehova, o nake nĩ amũkuhagĩrĩria o ta ũrĩa tuona thĩinĩ wa Jakubu 4:8.—Ringithania 2 Athesalonike 2:13.

18. Nĩ ũndũ ũrĩkũ tũkaarĩrĩria gĩcunjĩ-inĩ kĩrĩa kĩrũmĩrĩire? (Thaburi 40:8)

¹⁸ Mũndũ angĩĩyamũrĩra Jehova na abatithio, akoragwo akĩonania mwerekera ta wa Jesu. Nĩ eeneanire eyendeire harĩ Ithe nĩguo eke wendi wake. (Thoma Thaburi 40:8; Ahib. 10:7) Gĩcunjĩ-inĩ kĩrĩa kĩrũmĩrĩire, nĩ tũkaarĩrĩria kĩrĩa kĩngĩteithia mũndũ gũthiĩ na mbere gũtungatĩra Jehova arĩ mwĩhokeku thutha wa kũbatithio.