1. Nĩ nganja irĩkũ ndungata imwe njĩhokeku cia Jehova ingĩgĩa nacio?

 NĨ ŨNDŨ wa gwĩkĩra ngoro kũmenya atĩ nĩ twĩtĩkĩrĩkaga harĩ Jehova tũrĩ gĩkundi. Bibilia yugaga ũũ: “Jehova nĩ akenagio nĩ andũ ake.” (Thab. 149:4) O na kũrĩ ũguo, rĩmwe na rĩmwe athathaiya amwe a Jehova nĩ maiguaga makuĩte ngoro mũno, nginya makagĩa nganja kana o ene nĩ metĩkĩrĩkĩte harĩ Jehova. O na mahinda-inĩ ma Bibilia, kũrĩ hĩndĩ ndungata njĩhokeku cia Jehova ciakoragwo na nganja ta icio.—1 Sam. 1:​6-10; Ayub. 29:​2, 4; Thab. 51:11.

2. Nĩa metĩkĩrĩkaga harĩ Jehova?

² Bibilia nĩ yonanagia wega atĩ andũ matarĩ akinyanĩru no metĩkĩrĩke harĩ Jehova. Nĩguo twĩtĩkĩrĩke nĩwe, no mũhaka tuonanagie wĩtĩkio harĩ Jesu Kristo na tũbatithio. (Joh. 3:16) Rĩrĩa tweka ũguo tuonagia arĩa angĩ atĩ nĩ twĩrirĩte mehia maitũ, na tũkerĩra Ngai atĩ tũrĩkaga wendi wake. (Atũm. 2:38; 3:19) Jehova nĩ akenaga rĩrĩa tuoya makinya macio marĩa matũteithagia gũkũria ũrata hamwe nake. Tũngĩthiĩ na mbere kwĩrutanĩria gũtũũra kũringana na wĩyamũrĩri witũ, nĩ tũrĩtĩkĩrĩkaga harĩ Jehova na agatuona tũrĩ arata ake a hakuhĩ.—Thab. 25:14.

3. Nĩ ciũria irĩkũ ithatũ tũkwarĩrĩria?

³ No nĩ kĩĩ gĩtũmaga rĩmwe andũ amwe maigue ta matetĩkĩrĩkĩte harĩ Jehova? Jehova atuonagia atĩa atĩ nĩ twĩtĩkĩrĩkĩte harĩ we? Na Mũkristiano angĩkorũo na ma atĩa atĩ nĩ etĩkĩrĩkĩte harĩ Jehova?

KĨRĨA KĨNGĨTŨMA ANDŨ AMWE MAIGUE TA MATETĨKĨRĨKĨTE HARĨ JEHOVA

4-5. Nĩ ũndũ ũrĩkũ tũngĩkorũo na ma naguo o na angĩkorũo rĩmwe nĩ tũiguaga twĩyagĩire kĩene?

⁴ Aingĩ aitũ kuuma marĩ anini matũire meyonaga ta matarĩ kĩene. (Thab. 88:15) Mũrũ wa Ithe witũ ũmwe wĩtagwo Adrián  aaugire: “Ndatũire ndĩyonaga ta itarĩ kĩene. Nĩ ngũririkana ndĩ kamwana kanini nĩ ndahoyaga famĩlĩ itũ ĩkaaingĩra Paradiso, o na gũtuĩka ndarĩ na ma atĩ niĩ ndingĩagĩrĩra gũkorũo kuo.” Nake Tony, ũrĩa ũtaarereirũo ũhoro-inĩ wa ma, aaugire: “Gũtirĩ hĩndĩ aciari akwa maanjĩraga atĩ nĩ manyendete kana atĩ nĩ marakenio nĩ niĩ. Ũndũ ũcio watũmaga nyone ta gũtarĩ ũndũ ingĩka ndĩmakenie.”

⁵ Angĩkorũo rĩmwe nĩ tũiguaga tũtarĩ kĩene, nĩ wega tũririkane atĩ Jehova we mwene nĩwe watũgucĩrĩirie harĩ we. (Joh. 6:44) Nĩ onaga ngumo citũ njega iria tũngĩkorũo tũtegũciona, na nĩ oĩ ngoro citũ. (1 Sam. 16:7; 2 Maũ. 6:30) Kwoguo no tũmwĩtĩkie rĩrĩa atwĩra atĩ tũrĩ a bata harĩ we.—1 Joh. 3:​19, 20.

6. Mũtũmwo Paulo aaiguaga atĩa nĩ ũndũ wa mehia marĩa eekĩte na hau kabere?

⁶ Amwe aitũ mataneruta ũhoro wa ma, nĩ meekaga maũndũ mangĩtũma maigue marĩ na thamiri ĩrĩ na ũcuke nginya ũmũthĩ ũyũ. (1 Pet. 4:3) O na Akristiano ehokeku nĩ marũaga na mĩerekera ya kwĩhia. Hihi rĩmwe wee nĩ ũiguaga ngoro yaku ĩgĩgũciirithia? Angĩkorũo nĩ ũiguaga ũguo, no ũmĩrĩrio nĩ kũmenya atĩ o na ndungata ingĩ njĩhokeku cia Jehova nĩ ciguaga ũguo. Kwa ngerekano, mũtũmwo Paulo nĩ aaiguaga akuĩte ngoro eciria ũhoro wa mawathe make ma kwaga gũkinyanĩra. (Rom. 7:24) Hatarĩ nganja Paulo nĩ eerirĩte mehia make na akabatithio, ĩndĩ aaugire atĩ nĩwe “mũnini mũno harĩ atũmwo,” na atĩ nĩwe “wa mbere” harĩ andũ ehia.—1 Kor. 15:9; 1 Tim. 1:15.

7. Twagĩrĩirũo kũririkana ũndũ ũrĩkũ wĩgiĩ mehia maitũ ma tene?

⁷ Ithe witũ wa igũrũ atwĩrĩire atĩ nĩ arĩtuohagĩra angĩkorũo nĩ twĩrirĩte mehia maitũ. (Thab. 86:5) Kwoguo angĩkorũo nĩ twĩrirĩte biũ mehia twĩkĩte, no tũkorũo na ma atĩ Jehova nĩ atuoheire ta ũrĩa atwĩrĩire.—Kol. 2:13.

8-9. Tũngĩka atĩa nĩguo tweherie mwĩcirĩrie wa atĩ tũtingĩhota gũkenia Jehova biũ?

⁸ Twendaga gwĩka ũrĩa wothe tũngĩhota tũgĩtungatĩra Jehova. No andũ amwe maiguaga ta matangĩhota kũhingia maũndũ marĩa marabatarania nĩguo metĩkĩrĩke nĩwe. Mwarĩ wa Ithe witũ ũmwe wĩtagwo Amanda aaugire ũũ: “Kaingĩ ndĩciragia atĩ nĩguo he Jehova kĩrĩa kĩega biũ, no mũhaka hingie maũndũ maingĩ makĩria. Kwoguo maita maingĩ njĩrĩgagĩrĩra kũhingia maũndũ maingĩ makĩrĩte ũhoti wakwa. Rĩrĩa ndaremwo kũhingia maũndũ macio, ndĩyonaga ta itagĩrĩire na ngeciria atĩ noguo Jehova aranyona.”

⁹ Tũngĩka atĩa nĩguo tweherie mwĩcirĩrie wa atĩ tũtingĩhota gũkenia Jehova biũ? Ririkana atĩ Jehova nĩ arĩ ũigananĩru na ndangĩrĩgĩrĩra twĩke makĩria ma ũhoti witũ. Nĩ akenagio nĩ kĩrĩa gĩothe twamũhe angĩkorũo kĩraringana na ũhoti witũ. Ningĩ no wĩcũranie ngerekano cia andũ arĩa magwetetwo Bibilia-inĩ, arĩa maatungatĩire Jehova na ngoro yao yothe. Ta wĩcirie ũhoro wa Paulo. Nĩ eerutanĩirie mũno kwa ihinda rĩa mĩaka mĩingĩ, agĩthiĩ ngʼendo ndaihu na akĩambĩrĩria ciũngano nyingĩ. No hihi nĩ aagaga gwĩtĩkĩrĩka harĩ Ngai rĩrĩa maũndũ mataamwĩtĩkagĩria kũhunjia na gĩkĩro kĩnene? Aca. Aathiiaga na mbere gwĩka ũrĩa angĩahotire, na Jehova nĩ aamũrathimaga. (Atũm. 28:​30, 31) O na ithuĩ rĩmwe maũndũ maitũ no macenjie na tũremwo kũhingia maũndũ maingĩ ũtungata-inĩ wa Jehova ta hau kabere. O na kũrĩ ũguo, ũndũ ũrĩa wa bata harĩ Jehova nĩ muoroto witũ wa kũmũtungatĩra. Reke rĩu tuone njĩra imwe Jehova onanagia nacio atĩ nĩ twĩtĩkĩrĩkĩte harĩ we.

 JEHOVA ATUONAGIA ATĨA ATĨ NĨ TWĨTĨKĨRĨKĨTE HARĨ WE?

10. Nĩ na njĩra ĩrĩkũ tũiguaga Jehova agĩtwĩra atĩ nĩ twĩtĩkĩrĩkĩte harĩ we? (Johana 16:27)

¹⁰ Kũgerera Bibilia. Jehova nĩ acaragia njĩra cia kuonia andũ ake atĩ nĩ amendete, na atĩ nĩ metĩkĩrĩkĩte harĩ we. Maandĩko nĩ monanagia mahinda merĩ marĩa eerire Jesu atĩ nĩ Mũrũ wake endete, na nĩ etĩkĩrĩkĩte harĩ we. (Mat. 3:17; 17:5) Hihi wee no wende kũigua Jehova agĩkwĩra atĩ nĩ wĩtĩkĩrĩkĩte harĩ we? Jehova ndatwaragĩria ĩmwe kwa ĩmwe, no atwaragĩria kũgerera Kiugo gĩake. No tũigue Jehova agĩtwĩra atĩ nĩ twĩtĩkĩrĩkĩte harĩ we rĩrĩa twathoma ciugo cia Jesu mabuku-inĩ ma Injiri. (Thoma Johana 16:27.) Ningĩ Jesu nĩ eegerekanagia na Ithe na njĩra nginyanĩru. Kwoguo rĩrĩa twathoma ũrĩa Jesu eeraga arũmĩrĩri ake o na matarĩ akinyanĩru atĩ nĩ metĩkĩrĩkĩte harĩ we, no tũhote kũhũũra mbica Jehova agĩtwĩra ciugo icio.—Joh. 15:​9, 15.

11. Nĩkĩ gũcemania na magerio ti kuuga atĩ nĩ tũtigĩte gwĩtĩkĩrĩka harĩ Jehova? (Jakubu 1:12)

¹¹ Kũgerera ciĩko. Jehova nĩ akoragwo ehaarĩirie gũtũteithia. Kwa ngerekano, nĩ atũhingagĩria mabataro maitũ. No rĩmwe Jehova no etĩkĩrie tũcemanie na moritũ, o ta ũrĩa gwathiire harĩ Ayubu. (Ayub. 1:​8-11) Rĩrĩa twacemania na magerio, ũguo ti kuuga atĩ nĩ tũtigĩte gwĩtĩkĩrĩka harĩ Jehova. Handũ ha ũguo, magerio macio matũheaga mweke wa kuonania ũrĩa twendete Jehova na ũrĩa tũmwĩhokete. (Thoma Jakubu 1:12.) Magerio-inĩ macio nĩ tũrĩonaga ũrĩa Jehova aratũrũmbũiya na wendo na agatũteithia gũkirĩrĩria.

12. Tũreruta atĩa kuumana na rũgano rwa Dmitrii?

¹² Ta wĩcirie ũhoro wa mũrũ wa Ithe witũ ũmwe wĩtagwo Dmitrii kuuma Asia. Nĩ oorirũo nĩ wĩra na agĩikara mĩeri mĩingĩ atarĩ ona wĩra ũngĩ. Aatuire itua rĩa kuongerera ũtungata wake, na kwoguo akĩonania nĩ ehokete Jehova. No mĩeri mĩingĩ nĩ yahĩtũkire atarĩ ona wĩra. Agĩcoka akĩrwara mũno ũndũ atangĩahotire kuuma ũrĩrĩ. Akĩambĩrĩria kuona ta atarĩ mũthuri mwega na mũciari mwega, na akona ta atigĩte gwĩtĩkĩrĩka harĩ Jehova. Hwaĩ-inĩ ũmwe kairĩtu gake nĩ kaandĩkire karatathi-inĩ ciugo ici cia Isaia 30:15: “Hinya wanyu ũkoimana na inyuĩ gũikara mũhooreire na kuonania mwĩhoko.” Gagĩcoka gakĩmũtwarĩra ũrĩrĩ-inĩ, gakĩmwĩra ũũ: “Baba, rĩrĩa waigua ũũru, ririkanaga rĩandĩko rĩrĩ.” Dmitrii ecũrania nĩ oonire atĩ Jehova nĩ  aatigagĩrĩra atĩ famĩlĩ yake ĩrĩ na irio cia kũigana, nguo, na handũ ha gũikara. Aaugire ũũ: “Ũndũ ũrĩa ndabataraga gwĩka nĩ gũikara hooreire na thiĩ na mbere kwĩhoka Ngai wakwa.” Angĩkorũo nĩ ũragerera ũndũ mũritũ ta ũcio, no ũkorũo na ma atĩ Jehova nĩ akũrũmbũyagia na nĩ arĩgũteithagia gũkirĩrĩria.

13. Nĩa Jehova angĩhũthĩra gũtuonia atĩ nĩ twĩtĩkĩrĩkĩte harĩ we, na angĩka ũguo atĩa?

¹³ Kũgerera Akristiano arĩa angĩ. Jehova nĩ ahũthagĩra aarĩ na ariũ a Ithe witũ gũtuonia atĩ nĩ twĩtĩkĩrĩkĩte harĩ we. Kwa ngerekano, no ahũthĩre andũ arĩa angĩ gũtwĩra ciugo cia gũtwĩkĩra ngoro ihinda-inĩ rĩrĩa tũracibatara mũno. Mwarĩ wa Ithe witũ ũmwe kuuma Asia nĩ eeyoneire ũndũ ũcio hĩndĩ aarĩ na mĩtangĩko mĩingĩ. Nĩ oorĩtwo nĩ wĩra na akarwara mũno, na thutha ũcio mũthuri wake agĩka mehia maritũ maatũmire atigithio gũkorũo arĩ mũthuri wa kĩũngano. Aaugire ũũ: “Ndiataũkagĩrũo nĩ kĩĩ gĩathiaga na mbere. Ndeciragia atĩ no gũkorũo harĩ ũndũ mũũru njĩkĩte ngatiga gwĩtĩkĩrĩka harĩ Jehova.” Mwarĩ wa Ithe witũ ũcio nĩ aathaithire Jehova amũteithie kũmenya atĩ no etĩkĩrĩkĩte harĩ we. Jehova eekire ũguo atĩa? Aaugire: “Nĩ twaaranĩirie na athuri a kĩũngano na makĩndeithia gũkorũo na ma atĩ Jehova no anyendete.” Thutha ũcio nĩ aahoire Jehova o rĩngĩ amũteithie. Aaugire ũũ: “Mũthenya oro ũcio nĩ ndamũkĩrire marũa maaumĩte kũrĩ aarĩ na ariũ a Ithe witũ a kĩũngano gitũ. Ngĩthoma ciugo ciao cia kũnyũmĩrĩria, nĩ ndonire atĩ Jehova nĩ aaiguĩte mahoya makwa.” Hatarĩ nganja, kaingĩ Jehova nĩ atuonagia kũgerera ciugo njega cia andũ arĩa angĩ atĩ nĩ twĩtĩkĩrĩkĩte harĩ we.—Thab. 10:17.

14. Nĩ njĩra ĩrĩkũ ĩngĩ Jehova atuonagia nayo atĩ nĩ twĩtĩkĩrĩkĩte harĩ we?

¹⁴ Ningĩ Jehova nĩ atuonagia atĩ nĩ twĩtĩkĩrĩkĩte  harĩ we na njĩra ya kũhũthĩra Akristiano arĩa angĩ gũtũhe ũtaaro ũrĩa tũrabatara. Kwa ngerekano, karine-inĩ ya mbere, Jehova nĩ aahũthĩrire mũtũmwo Paulo kwandĩka marũa 14 kũrĩ Akristiano arĩa angĩ. Marũa macio maarĩ nginya na ũtaaro mũrũmu ũheanĩtwo na njĩra ya wendo. Hihi nĩ kĩĩ gĩatũmire Jehova atongorie Paulo kwandĩka ũtaaro ũcio? Tondũ Jehova nĩ mũciari mwega, na nĩ arũngaga ciana ciake ‘iria akenagio nĩcio.’ (Thim. 3:​11, 12) Kwoguo tũngĩheo ũtaaro uumĩte Maandĩko-inĩ, twagĩrĩirũo kũwona ũrĩ ũira wa atĩ nĩ twĩtĩkĩrĩkĩte harĩ Jehova no ti atĩ nĩ tũtigĩte gwĩtĩkĩrĩka harĩ we. (Ahib. 12:6) Nĩ maũndũ marĩkũ mangĩ monanagia atĩ nĩ twĩtĩkĩrĩkĩte harĩ Jehova?

MAŨNDŨ MANGĨ MONANAGIA ATĨ NĨ TWĨTĨKĨRĨKĨTE HARĨ JEHOVA

15. Nĩa Jehova aheaga roho wake mũtheru, na ũndũ ũcio ũratũteithia gũkorũo na ũũma ũrĩkũ?

¹⁵ Jehova nĩ aheanaga roho wake mũtheru kũrĩ arĩa metĩkĩrĩkĩte harĩ we. (Mat. 12:18) No twĩyũrie, ‘Hihi nĩ hotete kuonania ngumo imwe cia maciaro ma roho wa Ngai ũtũũro-inĩ wakwa?’ Hihi nĩ wonanagia wetereri makĩria gũkĩra ũrĩa warĩ ũtaneruta ũhoro wa Jehova? Hatarĩ nganja, o ũrĩa ũgũthiĩ na mbere kuonania maciaro ma roho wa Ngai, noguo ũgũkorũo na ma atĩ nĩ wĩtĩkĩrĩkĩte harĩ Jehova.—Rora gathandũkũ ““ Maciaro ma Roho Nĩ . . . ”

16. Nĩa Jehova ahũthagĩra kũhunjia ũhoro ũrĩa mwega, na ũndũ ũcio ũratũma ũigue atĩa? (1 Athesalonike 2:4)

¹⁶ Jehova nĩ ehokeire arĩa metĩkĩrĩkĩte harĩ we wĩra wa kũhunjia ũhoro ũrĩa mwega. (Thoma 1 Athesalonike 2:4.) Ta rora ũrĩa mwarĩ wa Ithe witũ Jocelyn aagunĩkire kuumana na kũhunjĩria andũ arĩa angĩ ũhoro ũrĩa mwega. Mũthenya ũmwe, Jocelyn ookĩrire arĩ na mĩtangĩko mĩingĩ. Aaugire ũũ: “Ndaiguaga itarĩ na hinya na itarĩ wa bata. Ndarĩ painia, na mũthenya ũcio warĩ wakwa wa gũthiĩ ũtungata. Kwoguo ngĩhoya Jehova na ngĩthiĩ ũtungata.” Rũcinĩ rũu Jocelyn nĩ aahunjĩirie mũtumia mwega wetagwo Mary, na agĩtĩkĩra wĩruti wa Bibilia. Thutha wa mĩeri ĩigana ũna Mary aaugire atĩ mũthenya ũrĩa Jocelyn aamũhunjĩirie, akoretwo ahoya Ngai amũteithie. Jocelyn ecũrania ũhoro ũcio, aaugire, “Ndaiguire ta Jehova aanjĩraga, ‘Nĩ wĩtĩkĩrĩkĩte harĩ niĩ.’” Ma nĩ atĩ, ti andũ othe marĩthikagĩrĩria ndũmĩrĩri ĩrĩa tũrahunjia. Ĩndĩ no tũkorũo  na ma atĩ Jehova nĩ arĩkenagio nĩ ithuĩ rĩrĩa twerutanĩria ũrĩa wothe tũngĩhota kũhunjia ũhoro ũrĩa mwega.

17. Ũreruta atĩa kuumana na ciugo cia Vicky igũrũ rĩgiĩ ũkũũri? (Thaburi 5:12)

¹⁷ Jehova nĩ onaga arĩa metĩkĩrĩkĩte harĩ we makĩagĩrĩra kũgunĩka kuumana na igongona rĩa ũkũũri. (1 Tim. 2:5, 6) Ĩ angĩkorũo no tũiguaga tũtetĩkĩrĩkĩte harĩ Jehova o na thutha wa kũgĩa na wĩtĩkio harĩ igongona rĩa ũkũũri na kũbatithio? Ririkana atĩ rĩmwe ngoro citũ no itũheenie, no Jehova nĩ wa kwĩhokeka hingo ciothe. Jehova onaga arĩa marĩ na wĩtĩkio harĩ igongona rĩa ũkũũri marĩ athingu, na eranĩire atĩ nĩ arĩmarathimaga. (Thoma Thaburi 5:12; Rom. 3:26) Mwarĩ wa Ithe witũ ũmwe wĩtagwo Vicky nĩ aagunĩkire mũno ecũrania na njĩra ndikĩru ũhoro wĩgiĩ igongona rĩa ũkũũri. Thutha wa gwĩcũrania aaugire ũũ: “Jehova nĩ anyonetie wetereri ihinda inene. . . . No nĩ ta ndamwĩraga ũũ: ‘Wendo waku ti mũnene ũndũ ũngĩnginyĩra. Igongona rĩa Mũrũ waku rĩtingĩigana kũhumbĩra mehia makwa.’” Nĩ ũndũ wa gwĩcũrania ũhoro wĩgiĩ kĩheo kĩu gĩa ũkũũri, nĩ aambĩrĩirie kũigua atĩ Jehova nĩ amwendete. O na ithuĩ tũngĩcũrania ũhoro wa kĩheo kĩu gĩa ũkũũri, no tuone atĩ Jehova nĩ atwendete na nĩ twĩtĩkĩrĩkĩte harĩ we.

18. Nĩ ũũma ũrĩkũ tũngĩkorũo naguo twathiĩ na mbere kwenda Ithe witũ wa igũrũ?

¹⁸ O na gũtuĩka no twĩrutanĩrie kũhũthĩra maũndũ marĩa tweruta gĩcunjĩ-inĩ gĩkĩ, rĩmwe no tũigue tũkuĩte ngoro na tũkarigwo kana no twĩtĩkĩrĩkĩte harĩ Jehova. Kũngĩthiĩ ũguo, ririkana atĩ arĩa metĩkĩrĩkĩte harĩ Jehova nĩ “arĩa mathiaga na mbere kũmwenda.” (Jak. 1:12) Kwoguo thiĩ na mbere gũkuhĩrĩria Jehova na ũkaroraga maũndũ marĩa maronania atĩ nĩ wĩtĩkĩrĩkĩte harĩ we. Hingo ciothe ririkanaga atĩ Jehova “ndarĩ haraya na o ũmwe witũ.”—Atũm. 17:27.