1-2. Nĩ irathimo irĩkũ mũndũ agĩaga nacio thutha wa kũbatithio?

 MŨNDŨ nĩ akenaga mũno abatithio tondũ atuĩkaga wa famĩlĩ ya Jehova. Arĩa magĩte na mweke ũcio no metĩkanie na ciugo ici cia Daudi: “Gũkena nĩ mũndũ ũrĩa wee [Jehova] ũthuuraga na ũkamũrehe hakuhĩ nawe nĩguo aikarage kũu nja-inĩ ciaku.”—Thab. 65:4.

² Jehova ndagĩaga ũrata na mũndũ o wothe. O ta ũrĩa gĩcunjĩ kĩrĩa kĩhĩtũku kĩonanĩtie, Jehova akuhagĩrĩria andũ arĩa monanagia atĩ nĩ marenda kũgĩa na ũrata wa hakuhĩ hamwe nake. (Jak. 4:8) Rĩrĩa weyamũrĩra Jehova na wabatithio, nĩ ũmũkuhagĩrĩria na njĩra ya mwanya. No ũkorũo na ma atĩ thutha wa kũbatithio nĩ arĩgũitũrũragĩra “kĩrathimo nginya gũtuĩke atĩ gũtirĩ kĩndũ kĩraga.”—Mal. 3:10; Jer. 17:​7, 8.

3. Akristiano arĩa meyamũrĩire Jehova na makabatithio merĩgagĩrĩrũo meke atĩa? (Kohelethu 5:​4, 5)

³ Ũrĩa kũrĩ nĩ atĩ kũbatithio no kĩambĩrĩria tu. Thutha wa kũbatithio, nĩ ũkũbatara kwĩrutanĩria gũtũũra kũringana na wĩyamũrĩri waku, o na rĩrĩa wacemania na moritũ kana wĩtĩkio waku wagerio. (Thoma Kohelethu 5:​4, 5.) Tondũ ũgũtuĩka mũrutwo wa Jesu, nĩ ũbatiĩ kwĩrutanagĩria biũ kũrũmĩrĩra kĩonereria gĩake o hamwe na mawatho make. (Mat. 28:​19, 20; 1 Pet. 2:21) Gĩcunjĩ gĩkĩ nĩ gĩgũgũteithia gwĩka ũguo.

 THIĨ NA MBERE KŨRŨMĨRĨRA JESU O NA KŨRĨ NA MORITŨ NA MAGERIO

4. Nĩ na njĩra ĩrĩkũ arutwo a Jesu makuuaga ‘mũtĩ wa kũnyarirĩrũo’? (Luka 9:23)

⁴ O na thutha wa kũbatithio, no ũrĩcemanagia na mathĩna. Jesu oonanirie wega atĩ arutwo ake nĩ marĩbataraga gũkuua ‘mũtĩ wa kũnyarirĩrũo,’ na mekage ũguo “mũthenya o mũthenya.” (Thoma Luka 9:23.) Hihi Jesu eendaga kuuga atĩ arũmĩrĩri ake marĩnyamarĩkaga hĩndĩ ciothe? Aca. No gũtĩtĩrithia aatĩtĩrithagia atĩ o na akorũo nĩ marĩkenagĩra irathimo, nĩ marĩcemanagia na moritũ. Na moritũ mamwe no magũmĩre mũndũ na njĩra nene.—2 Tim. 3:12.

5. Nĩ irathimo irĩkũ Jesu eerĩire arĩa marĩĩimaga maũndũ nĩgetha matungatĩre Jehova?

⁵ No kũhoteke nĩ ũkoretwo ũgĩkarario nĩ andũ a famĩlĩ kana ũkeima maũndũ mamwe ma kĩĩmwĩrĩ nĩgetha ũige maũndũ ma Ũthamaki mbere. (Mat. 6:33) Angĩkorũo nĩguo, no ũkorũo na ma atĩ Jehova nĩ onaga kĩyo gĩaku gĩa kũmũtungatĩra. (Ahib. 6:10) Kwahoteka nĩ wĩyoneire ũũma wa ciugo ici cia Jesu: “Gũtirĩ mũndũ ũtigĩte nyũmba kana ariũ a nyina kana aarĩ a nyina kana nyina kana ithe kana ciana kana mĩgũnda nĩ ũndũ wakwa na nĩ ũndũ wa ũhoro ũrĩa mwega ũtekwamũkĩra maita 100 makĩria, ihinda-inĩ rĩrĩ—nyũmba, ariũ a nyina, aarĩ a nyina, nyina, ciana, na mĩgũnda, hamwe na mĩnyamaro—na mũtabarĩre-inĩ wa maũndũ ũrĩa ũroka, aheo muoyo wa tene na tene.” (Mar. 10:​29, 30) Irathimo iria ũgĩte nacio nĩ nyingĩ ikĩringithanio na maũndũ marĩa ũngĩkorũo wĩimĩte.—Thab. 37:4.

6. Ũkũbatara gũthiĩ na mbere kũrũa na “merirĩria ma mwĩrĩ” o na thutha wa kũbatithio nĩkĩ?

⁶ O na thutha wa kũbatithio no ũrĩbataraga kũrũa na “merirĩria ma mwĩrĩ.” (1 Joh. 2:16) Gĩtũmi nĩ tondũ ũrĩ o mũndũ ũtarĩ mũkinyanĩru. Rĩmwe wahota kũigua o ta ũrĩa mũtũmwo Paulo aaiguaga rĩrĩa aaugire ũũ: “Nĩ ngenagĩra mũno watho wa Ngai kũringana na mũndũ wakwa wa na thĩinĩ, no nĩ nyonaga watho ũngĩ thĩinĩ wa mwĩrĩ wakwa ũkĩrũa na watho wa meciria makwa na ũkandongoria ta mũndũ mũnyite mĩgwate harĩ watho wa mehia ũrĩa ũrĩ thĩinĩ wa mwĩrĩ wakwa.” (Rom. 7:​22, 23) No ũigue ũgĩkua ngoro nĩ ũndũ wa gũkorũo na mwerekera wa kwĩhia. O na kũrĩ ũguo, gwĩcũrania ũrĩa werĩire Jehova ũkĩmwĩyamũrĩra nĩ kũrĩkĩraga hinya itua rĩaku rĩa kũregana na magerio. Ma nĩ atĩ mwĩhĩtwa wa wĩyamũrĩri waku nĩ ũrĩtũmaga ũkorũo ũrĩ ũndũ mũhũthũ harĩ wee kũhiũrania na magerio. Na njĩra ĩrĩkũ?

7. Kwĩyamũrĩra Jehova kũrĩgũteithagia atĩa gũikara ũrĩ mwĩhokeku harĩ we?

⁷ Rĩrĩa mũndũ eyamũrĩra Jehova, akoragwo eregete. Ũguo nĩ kuuga no nginya aregane na merirĩria na mĩoroto yake ĩrĩa ĩtakenagia Jehova. (Mat. 16:24) Kwoguo rĩrĩa wacemania na igerio, ndũrĩambaga kũhindahinda ũrigĩtwo nĩ ũrĩa ũgwĩka. Ũrĩkoragwo ũtuĩte itua kabere rĩa gũikara ũrĩ mwĩhokeku harĩ Jehova. Na njĩra ĩngĩ, ũrĩkoragwo ũtuĩte itua irũmu rĩa gũkenia Jehova o ta Ayubu. O na gũtuĩka nĩ aacemanirie na magerio maritũ mũno, aaugire ũũ arĩ na ũũma: “Gũtirĩ hĩndĩ ngaatiganĩria wĩkindĩru wakwa!”—Ayub. 27:5.

8. Gwĩcũrania ũrĩa werĩire Jehova mahoya-inĩ ũkĩmwĩyamũrĩra kũngĩgũteithia atĩa kũregana na magerio?

⁸ Ũngĩĩcũranagia ũrĩa werĩire Jehova mahoya-inĩ ũkĩmwĩyamũrĩra, nĩ ũrĩgĩaga na hinya wa kũregana na igerio o rĩothe. Kwa ngerekano, nĩ ũrĩĩthemaga gũthaakanĩra kĩĩwendo na mũndũ ũrĩ kĩhiko-inĩ, tondũ ũrĩkoragwo ũtuĩte itua kabere atĩ ndũngĩka ũndũ ta ũcio. Ũndũ ũcio nĩ ũrĩkũgitagĩra kuumana na ruo rwa kũhiũrania na merirĩria matarĩ mega thutha wa gũkorũo makũrĩte ngoro-inĩ.  Nĩ ‘ũrĩĩthemaga’ kũgera “gacĩra-inĩ ka andũ arĩa aganu.”—Thim. 4:​14, 15.

9. Gwĩcũrania ũrĩa werĩire Jehova mahoya-inĩ ũkĩmwĩyamũrĩra kũngĩgũteithia atĩa kũiga maũndũ ma kĩĩroho mbere?

⁹ Ĩ ũngĩrĩrũo wĩra ũrĩkũgiragĩrĩria gũthiĩ mĩcemanio ya Gĩkristiano ũtegũtĩĩrĩria? Nĩ ũrĩkoragwo ũĩ ũrĩa ũbatiĩ gwĩka tondũ o na ũtanerĩrũo wĩra ũcio nĩ watuĩte itua o kabere atĩ ndũngĩtĩkĩra wĩra ta ũcio. Kwoguo ndũngĩtĩkĩra wĩra ũcio ũkĩhoka atĩ no ũrĩhotaga kũiga maũndũ ma kĩĩroho mbere. Gwĩcũrania ũrĩa Jesu eehotorete gũkenia Ithe nĩ kũrĩgũteithagia kũregana o rĩo na ũndũ o wothe ũtangĩkenia Jehova, Ngai ũrĩa wĩyamũrĩire.—Mat. 4:10; Joh. 8:29.

10. Jehova arĩgũteithagia atĩa gũthiĩ na mbere kũrũmĩrĩra Jesu thutha wa kũbatithio?

¹⁰ Ũrĩa kũrĩ nĩ atĩ, moritũ na magerio nĩ ikũheaga mweke wa kuonania atĩ nĩ wĩhotorete gũthiĩ na mbere kũrũmĩrĩra Jesu. Na no ũkorũo na ma atĩ Jehova nĩ arĩgũteithagia gwĩka ũguo. Bibilia yugaga ũũ: “Ngai nĩ mwĩhokeku, na ndangĩreka mũgerio gũkĩra ũrĩa mũngĩhota gwĩtiiria, no hĩndĩ ya igerio nĩ arĩmũheaga njĩra ya kuumĩrĩra nĩguo mũkahota kũrĩkirĩrĩria.”—1 Kor. 10:13.

ŨRĨA ŨNGĨTHIĨ NA MBERE KŨRŨMĨRĨRA JESU

11. Ũndũ ũmwe wa bata ũngĩka nĩguo ũthiĩ na mbere kũrũmĩrĩra Jesu thutha wa kũbatithio nĩ ũrĩkũ? (Ningĩ rora mbica.)

¹¹ Jesu aatungatagĩra Jehova na ngoro yothe na akamũkuhĩrĩria kũgerera mahoya. (Luk. 6:12) Ũndũ ũmwe wa bata ũngĩgũteithia gũthiĩ na mbere kũrũmĩrĩra Jesu thutha wa kũbatithio nĩ gũkorũo na mũtaratara wa gwĩka maũndũ marĩa mangĩgũteithia gũkuhĩrĩria Jehova makĩria. Bibilia yugaga ũũ: “Harĩa tũrĩkĩtie gũkinya-rĩ, nĩ tũthiĩi na mbere na mĩthiĩre ĩrĩa yagĩrĩire na njĩra o ĩyo.” (Afil. 3:16)  Rĩmwe nĩ ũrĩiguaga aarĩ na ariũ a Ithe witũ arĩa mandandũrĩte ũtungata wao magĩtaarĩria maũndũ marĩa meyoneire. No makorũo mathiĩte Cukuru ya Ahunjia a Ũthamaki kana magathamĩra kũrĩa kũrĩ na bata mũnene wa ahunjia. Angĩkorũo no ũhote kwĩigĩra muoroto ta ũcio, tũragwĩkĩra ngoro wĩke guo. Andũ a Jehova nĩ makoragwo mehaarĩirie kwandandũra ũtungata wao. (Atũm. 16:9) Ĩ angĩkorũo kwa ihinda rĩrĩ ndũngĩhota gwĩka ũguo? Ndũkeyagĩre kĩene weringithania na arĩa marahota. Ũndũ ũrĩa wa bata nĩ gũthiĩ na mbere gũkirĩrĩria. (Mat. 10:22) Ririkana atĩ Jehova nĩ akenaga mũno nĩ ũndũ wa maũndũ marĩa ũhingagia kũringana na ũhoti waku. Ũcio nĩ ũndũ ũmwe wa bata ũngĩka nĩguo ũthiĩ na mbere kũrũmĩrĩra Jesu thutha wa kũbatithio.—Thab. 26:1.

12-13. Ũngĩka atĩa kĩyo gĩaku kĩngĩambĩrĩria kũhwererekera? (1 Akorintho 9:16, 17) (Ningĩ rora gathandũkũ, “ Kirĩrĩria Ihenya-inĩ rĩa Muoyo.”)

¹² Ĩ rĩmwe ũngĩona ta mahoya maku matuĩkĩte o mũtugo tu kana ũkaga gũkenera ũtungata ta hau kabere? Ĩ angĩkorũo ndũrakenera ũthomi wa Bibilia ta ũrĩa wakenagĩra hau kabere? Ũngĩgekora ũndũ-inĩ ta ũcio thutha wa kũbatithio, ndũkanecirie atĩ nĩ ũtigĩte gũkorũo na roho wa Jehova. Nĩ ũndũ wa kwaga gũkinyanĩra, rĩmwe kĩyo gitũ gĩa gwĩka maũndũ nĩ kĩnyihanyihaga. Kwoguo ũngĩona kĩyo gĩaku kĩambĩrĩria kũhwererekera, wĩcũranie kĩonereria kĩa mũtũmwo Paulo. O na gũtuĩka nĩ eerutanagĩria kwĩgerekania na Jesu, nĩ aamenyaga atĩ rĩmwe nĩ angĩaiguire atarĩ na wendi mũnene wa gwĩka ũrĩa agĩrĩirũo gwĩka. (Thoma 1 Akorintho 9:​16, 17.) Aaugire ũũ: “O na ingĩka ũguo iteyendeire, ndĩ o na wĩra wa ũramati ndĩhokeirũo.” Ũguo nĩ kuuga atĩ Paulo nĩ aatuĩte itua rĩa kũhingia ũtungata wake gũtekũmakania ũrĩa araigua.

 ¹³ O nawe ndũkanareke ũrĩa ũraigua na kũu thĩinĩ nĩ ũndũ wa kwaga gũkinyanĩra kũhutie matua maku. Tua itua irũmu rĩa gwĩkaga ũrĩa kwagĩrĩire gũtekũmakania ũrĩa ũraigua. Ũngĩthiĩ na mbere gwĩka ũrĩa kwagĩrĩire, thutha wa ihinda nĩ ũrĩiguaga ũgĩkenera ũndũ ũcio. Ũrĩa kũrĩ nĩ atĩ gũtũũria mũtaratara mwega wa maũndũ ma kĩĩroho nĩ kũrĩgũteithagia gũthiĩ na mbere kũrũmĩrĩra Jesu thutha wa kũbatithio. Makĩria ma ũguo, aarĩ na ariũ a Ithe witũ nĩ marĩkĩragwo ngoro mona ũkirĩrĩria waku.—1 Thes. 5:11.

‘IKARAGA ŨKĨĨGERAGIA NA ŨGĨĨTHUTHURAGIA’

14. Nĩ maũndũ-inĩ marĩkũ ũbatiĩ gwĩthuthuragia, na nĩkĩ? (2 Akorintho 13:5)

¹⁴ Ningĩ nĩ ũndũ wa bata gũikaraga ũgĩĩthuthuragia thutha wa kũbatithio. (Thoma 2 Akorintho 13:5.) Rĩmwe na rĩmwe nĩ wega gwĩthuthuria kana ũrĩ o na mũtaratara mwega wa gũthoma na kwĩruta Bibilia, kũhoyaga o mũthenya, gũthiĩ mĩcemanio, na kũnyitanĩra wĩra-inĩ wa kũhunjia. Geria kuona ũrĩa ũngĩagagĩria maũndũ macio. Kwa ngerekano, no wĩyũrie ciũria ta ici: ‘Hihi no hote gũtaarĩria andũ arĩa angĩ morutani ma mũthingi ma Bibilia? Ingĩka atĩa nĩguo ngenere ũtungata wakwa o na makĩria? Hihi ngĩhoya nĩ ngwetagĩra Jehova ũrĩa ndĩrenda ĩmwe kwa ĩmwe na ngonania atĩ nĩ ndĩmwĩhokete biũ? Hihi nĩ thiaga mĩcemanio ya Gĩkristiano itegũtĩrĩria? Ingĩka atĩa nĩguo meciria makwa magakindĩria wega mĩcemanio-inĩ na ngaruta macokio?’

15-16. Ũndũ ũcio Robert aagereire ũrakũruta atĩa igũrũ rĩgiĩ kũregana na magerio?

¹⁵ Ũndũ ũngĩ ũngĩka nĩ gwĩthuthuria kuuma ngoro nĩguo ũmenye mawathe maku. Mũrũ wa Ithe witũ ũmwe wĩtagwo Robert nĩ aataarĩirie ũndũ aagereire ũronania bata wa gwĩka ũguo. Aaugire: “Ndĩ na kĩndũ mĩaka 20, harĩ wĩra ndarutaga thikũ imwe. Mũthenya ũmwe thutha wa wĩra, mũirĩtu ũmwe twarutaga wĩra nake nĩ aanjĩrire tũthiĩ gwake ngamũceerere. Aanjĩrire tũgũkorũo tũrĩ o ithuerĩ nĩguo tũgĩe na ihinda rĩa gwĩkenia. Kĩambĩrĩria-inĩ ndamũheaga o ciĩgwatio itarĩ na mũthingi mũrũmu, no mũthia-inĩ nĩ ndahotire kũrega na ngĩmũtaarĩria gĩtũmi.” Robert nĩ eekire wega nĩ kũregana na igerio rĩu. O na kũrĩ ũguo, acokia meciria na thutha nĩ oonire atĩ nĩ angĩahiũranirie na ũndũ ũcio na njĩra njega makĩria. Aaugire: “Ndiareganire na igerio rĩu na ihenya na ndĩ na ũmĩrĩru ta ũrĩa Jusufu aareganire na mũtumia wa Potifa. (Kĩam. 39:​7-9) Nĩ ndamakire kuona ũrĩa ndaritũhĩirũo nĩ kũregana na igerio rĩu. Ũndũ ũcio nĩ wandeithirie kuona atĩ nĩ ndabataraga gwĩkĩra hinya ũrata wakwa hamwe na Jehova.”

 ¹⁶ O nawe no ũgunĩke ũngĩĩthuthuria ta ũguo Robert eethuthuririe. O na rĩrĩa wahota kũregana na igerio, wĩyũrie ũũ, ‘Hihi nĩ ndoya ihinda ingĩkaregana na igerio rĩu?’ Ũngĩona harĩ ũndũ ũrabatara kwagagĩria, ndũkemene. Handũ ha ũguo, kena tondũ nĩ wamenya thĩna ũrĩa ũrabatara kũrutĩra wĩra, na ũhoe igũrũ rĩaguo, ũcoke woe makinya marĩa marabatarania nĩguo wĩkĩre hinya itua rĩaku rĩa gũtũũra kũringana na ithimi cia Jehova.—Thab. 139:​23, 24.

17. Ũndũ ũrĩa Robert aagereire wahutirie rĩĩtwa rĩa Jehova atĩa?

¹⁷ Harĩ ũndũ ũngĩ tũngĩĩruta kuumana na ũhoro ũcio wa Robert. Aacokire akiuga: “Thutha wa kũrega gũthiĩ, mũirĩtu ũcio aanjĩrire, ‘Nĩ wahĩtũka kĩgeranio!’ Ngĩmũũria arenda kuuga atĩa. Akĩnjĩra atĩ harĩ mũrata wake warĩ Mũira wa Jehova tene, wamwĩrĩte atĩ Aira a Jehova othe ethĩ maikaraga ũtũũro wa ũhinga, na atĩ no meingĩrie mehia-inĩ mweke ũngĩyumĩria. Kwoguo akĩra mũrata ũcio wake atĩ nĩ ekũngeria one kana nĩguo. Ndaigua ũguo ngĩkena nĩ kũmenya atĩ nĩ ndatĩithia rĩĩtwa rĩa Jehova.”

18. Ũtuĩte itua rĩa gwĩka atĩa thutha wa kũbatithio? (Ningĩ rora gathandũkũ, “ Icunjĩ Igĩrĩ Ũngĩkenera Gũthoma.”)

¹⁸ Ũngĩĩamũrĩra Jehova na ũbatithio, ũgũkorũo ũkĩonania nĩ ũrenda gũtheria rĩĩtwa rĩa Jehova gũtekũmakania maũndũ marĩa ũngĩcemania namo. Na no ũkorũo na ma atĩ Jehova nĩ oĩ moritũ marĩa ũracemania namo na magerio marĩa ũrerutanĩria kũregana namo. Nĩ arĩrathimaga kĩyo gĩaku gĩa gũtũũra wĩ mwĩhokeku. No ũkorũo na ma atĩ nĩ arĩkũheaga hinya wa gwĩka ũguo kũgerera roho wake mũtheru. (Luk. 11:​11-13) Kũgerera ũteithio wa Jehova, nĩ ũrĩhotaga gũthiĩ na mbere kũrũmĩrĩra Jesu thutha wa kũbatithio.