1. Gũtũũria ũhoti witũ wa gwĩciria nĩ kuuga atĩa? (2 Timotheo 4:5)

 RĨRĨA twacemania na moritũ, wĩhokeku witũ harĩ Jehova na harĩ ithondeka rĩake no ũgerio. Tũngĩka atĩa nĩguo tũtoorie moritũ ta macio? Nĩ tũrabatara gũtũũria ũhoti witũ wa gwĩciria na tũikare twĩiguĩte, tũrũmĩte thĩinĩ wa wĩtĩkio. (Thoma 2 Timotheo 4:5.) No tũtũũrie ũhoti witũ wa gwĩciria na njĩra ya gũikara tũhooreire, gwĩciria na njĩra ĩrĩa yagĩrĩire, na kwĩrutanĩria kuona maũndũ na njĩra ya Jehova. Rĩrĩa tweka ũguo, mwĩcirĩrie witũ ndũrĩtongoragio nĩ marakara.

2. Tũkwarĩrĩria maũndũ marĩkũ gĩcunjĩ-inĩ gĩkĩ?

² Gĩcunjĩ-inĩ kĩrĩa kĩhĩtũku nĩ twarĩrĩirie moritũ matatũ marĩa tũngĩcemania namo kuuma nja wa kĩũngano. Gĩcunjĩ-inĩ gĩkĩ tũkwarĩrĩria moritũ matatũ mangiuma thĩinĩ wa kĩũngano na magerie wĩhokeku witũ harĩ Jehova. Moritũ macio nĩ (1) rĩrĩa tũrona ta twĩkĩtwo ũũru nĩ Mũkristiano ũngĩ, (2) rĩrĩa twarũngwo, na (3) rĩrĩa twaritũhĩrũo gwĩtĩkĩra mogarũrũku ithondeka-inĩ. Rĩrĩa twacemania na moritũ ta macio-rĩ, tũngĩtũũria atĩa ũhoti witũ wa gwĩciria na tũtũũre tũrĩ ehokeku harĩ Jehova na ithondeka rĩake?

3. Rĩrĩa tuona ta twekwo ũndũ mũũru nĩ Mũkristiano ũngĩ-rĩ, nĩ atĩa tũngĩĩkora tũgĩka?

³ Hihi wanekwo ũndũ wagũtuurithirie nĩ Mũkristiano ũngĩ, ta hihi mũthuri wa kĩũngano? No kũhoteke mũrũ wa Ithe witũ ũcio ndaarĩ na muoroto wa gũgũtuurithia. (Rom. 3:23; Jak. 3:2) O na kũrĩ ũguo, ciĩko ciake no kũhoteke nĩ ciagũtuurithirie. No gũkorũo o na nduoonaga toro weciria ũndũ ũcio. O na rĩngĩ nĩ weyũririe, ‘Angĩkorũo mũrũ wa Ithe witũ no eke ũguo-rĩ,  hihi rĩrĩ no ithondeka rĩa Jehova?’ Ũguo nĩguo Shaitani angĩenda wĩcirie. (2 Kor. 2:11) Mwĩcirĩrie ta ũcio mũũru no ũtũme twĩyamũranie na Jehova na ithondeka rĩake. Kwoguo tũngĩona mũrũ kana mwarĩ wa Ithe witũ ta atwĩkĩte ũndũ mũũru-rĩ, tũngĩka atĩa nĩguo tũtũũrie ũhoti witũ wa gwĩciria na twĩtheme gũkorũo na mwĩcirĩrie ũtarĩ mwega?

4. Jusufu aatũũririe ũhoti wake wa gwĩciria atĩa rĩrĩa eekirũo maũndũ moru, na tũreruta atĩa kuumana na kĩonereria gĩake? (Kĩambĩrĩria 50:19-21)

⁴ Ndũkaige marakara ngoro. Jusufu arĩ tinĩnja, ariũ a ithe arĩa akũrũ nĩ maamwĩkire maũndũ moru. Nĩ maamũthũire, na amwe ao o na nĩ meendaga kũmũũraga. (Kĩam. 37:4, 18-22) Thutha-inĩ, nĩ maamwendirie arĩ ngombo. Ũndũ ũcio watũmire Jusufu acemanie na moritũ manene ihinda-inĩ rĩa mĩaka ta 13. Jusufu nĩ angĩeciririe atĩ Jehova ndaamwendete. Ningĩ nĩ angĩeyũririe kaĩ Jehova amũtiganĩirie hĩndĩ ĩrĩa arabatara ũteithio. No Jusufu ndaigire marakara ngoro. Handũ ha ũguo, nĩ aatũũririe ũhoti wake wa gwĩciria na njĩra ya gũikara ahooreire. Rĩrĩa aagĩire na mweke wa kwĩrĩhĩria harĩ ariũ a ithe ndeekire ũguo, no nĩ aamonirie wendo na akĩmohera. (Kĩam. 45:4, 5) Jusufu aahotire gwĩka ũguo tondũ nĩ eeciragia na njĩra ĩrĩa yagĩrĩire. Handũ ha kũiga meciria harĩ mathĩna make, eeciririe igũrũ rĩgiĩ wendi wa Jehova. (Thoma Kĩambĩrĩria 50:19-21.) Tũreruta atĩa? Ũngĩkwo ũndũ mũũru, ndũkarakarĩre Jehova kana wambĩrĩrie kuona ta agũtiganĩirie. Handũ ha ũguo, wĩcũranie ũrĩa aragũteithia gũkirĩrĩria igerio rĩu. Makĩria ma ũguo, rĩrĩa arĩa angĩ magwĩka maũndũ moru, mohagĩre na ũkaririkanaga atĩ “wendo nĩ ũhumbagĩra mehia maingĩ.”—1 Pet. 4:8.

5. Miqueas aatũũririe ũhoti wake wa gwĩciria atĩa rĩrĩa oonire ta ekwo ũndũ ũtarĩ mwega?

⁵ Ta wĩcirie ũhoro wa kĩonereria kĩa mahinda maya kĩa mũthuri ũmwe wa kĩũngano kuuma South America wĩtagwo Miqueas. b Nĩ aririkanaga hĩndĩ ĩmwe oonaga ta ekĩtwo ũndũ mũũru mũno nĩ ariũ a Ithe witũ amwe maatongoragia maũndũ. Aaugire ũũ: “Ndirĩ ndakorũo na mĩtangĩko ta ĩrĩa ndarĩ nayo hĩndĩ ĩyo. Nĩ ndagiĩkaga mũno. Ũtukũ ndioonaga toro, na nĩ ndarĩraga tondũ ndioonaga ta harĩ ũndũ ingĩahotire gwĩka.” O na kũrĩ ũguo, Miqueas nĩ aatũũririe ũhoti wake wa gwĩciria na akĩĩrutanĩria gũtooria mĩtangĩko yake. Nĩ aahoyaga kaingĩ, akera Jehova amũhe roho mũtheru na hinya wa gũkirĩrĩria. Ningĩ nĩ aacaririe ũhoro ũngĩmũteithia mabuku-inĩ maitũ. Tũreruta atĩa? Ũngĩona ta wekwo ũndũ mũũru nĩ mũrũ kana mwarĩ wa Ithe witũ, ikara ũhooreire na ũgerie kũgirĩrĩria meciria o mothe moru ũngĩkorũo namo. No wage kũmenya maũndũ marĩa maratũmire mũndũ ũcio auge kana eke ũndũ ũcio. Kwoguo aria na Jehova kũgerera mahoya, na ũmwĩre agũteithie kuona maũndũ kũringana na muonere wa mũndũ ũcio. Gwĩka ũguo no gũgũteithie kuona atĩ mũrũ kana mwarĩ wa Ithe witũ ũcio ndaneka ũguo akĩenda gũgũtuurithia na ũhote kũmuohera. (Thim. 19:11) Ririkanaga atĩ Jehova nĩ onaga maũndũ marĩa ũragerera, na nĩ arĩkũheaga hinya ũrĩa ũrabatara wa gũkirĩrĩria.—2 Maũ. 16:9; Koh. 5:8.

6. Nĩkĩ nĩ ũndũ wa bata kuona kũrũngwo arĩ njĩra ya Jehova ya gũtuonia wendo? (Ahibirania 12:5, 6, 11)

⁶ Kũrũngwo no gũtũme mũndũ aigue ruo rũingĩ rwa ngoro. No tũngĩciria mũno ũhoro wĩgiĩ ũrĩa tũraigua, no twambĩrĩrie kuona ta twarũngwo na njĩra ĩtarĩ ya kĩhooto, kana tũhũthie kũrũngwo kũu. Ũndũ ũcio no ũtũgirĩrĩrie gũtaũkĩrũo nĩ ũndũ ũrĩa wa bata makĩria atĩ Jehova atũrũngaga tondũ nĩ atwendete.  (Thoma Ahibirania 12:5, 6, 11.) Na tũngĩciria mũno ũhoro wĩgiĩ ruo rũrĩa tũraigua, no tũhe Shaitani mweke wa gũtũtharĩkĩra. Ndendaga twĩtĩkĩre kũrũngwo, na ũndũ mũũru o na makĩria, endaga tũraihĩrĩrie Jehova na kĩũngano gĩake. Angĩkorũo nĩ ũrũngĩtwo-rĩ, ũngĩka atĩa nĩguo ũtũũrie ũhoti waku wa gwĩciria?

7. (a) O ta ũrĩa mbica ĩronania-rĩ, Petero aahũthĩrirũo atĩa nĩ Jehova thutha wake gwĩtĩkĩra kũrũngwo? (b) Ũreruta atĩa kuumana na kĩonereria kĩa Petero?

⁷ Ĩtĩkĩra kũrũngwo, na wĩke mogarũrũku marĩa marabatarania. Jesu nĩ aarũngire Petero maita maigana ũna mbere ya atũmwo arĩa angĩ. (Mar. 8:33; Luk. 22:31-34) Ũndũ ũcio no mũhaka ũkorũo nĩ watũmire Petero aigue aconokete. O na kũrĩ ũguo, Petero aatũũrire arĩ mwĩhokeku harĩ Jesu. Nĩ eetĩkĩrire kũrũngwo na akĩĩruta kuumana na mahĩtia make. Jehova nĩ aarathimire Petero nĩ ũndũ wa wĩhokeku wake, na akĩmwĩhokera mawĩra ma bata thĩinĩ wa kĩũngano. (Joh. 21:15-17; Atũm. 10:24-33; 1 Pet. 1:1) Tũngĩĩruta atĩa kuumana na kĩonereria kĩa Petero? Nĩ tũgunĩkaga na tũkaguna andũ arĩa angĩ rĩrĩa twaga gwĩciria mũno igũrũ rĩgiĩ gĩconoko kĩrĩa kiumanaga na kũrũngwo, na handũ ha ũguo tũgetĩkĩra kũrũngwo, na tũgeka mogarũrũku marĩa marabatarania. Tũngĩka ũguo, no tũhũthĩrũo na njĩra nene nĩ Jehova na tũgune aarĩ na ariũ a Ithe witũ.

8-9. Kĩambĩrĩria-inĩ Bernardo aaiguaga atĩa thutha wa kũrũngwo, na nĩ kĩĩ kĩamũteithirie kũrũnga mwĩcirĩrie wake?

⁸ Ta wĩcirie ũrĩa gwathiire harĩ mũrũ wa Ithe witũ ũmwe kuuma Mozambique wĩtagwo Bernardo. Nĩ aatigithirio gũtuĩka mũthuri wa kĩũngano. Hihi Bernardo aaiguire atĩa kĩambĩrĩria-inĩ? Aaugire ũũ: “Nĩ ndarakarire tondũ ndiakenirio nĩ njĩra ĩrĩa ndarũngirũo nayo.” Nĩ eeciragia mũno ũhoro wĩgiĩ ũrĩa andũ arĩa angĩ kĩũngano-inĩ mangĩamuonire. Aaugire ũũ: “Thutha wa mĩeri ĩigana ũna, nĩ ndagĩire na mawoni marĩa magĩrĩire megiĩ ũndũ ũcio na ngĩambĩrĩria kwĩhoka Jehova na ithondeka rĩake rĩngĩ.” Nĩ kĩĩ gĩateithirie Bernardo gũkorũo na muonere ũrĩa wagĩrĩire?

⁹ Bernardo nĩ aarũngire mwĩcirĩrie wake. Aaugire ũũ: “Rĩrĩa ndatungataga ndĩ mũthuri wa kĩũngano, nĩ ndahũthagĩra Ahibirania 12:7 gũteithia andũ arĩa angĩ gũkorũo na muonere mwega rĩrĩa marũngwo nĩ Jehova. Nĩ ũndũ ũcio ngĩĩyũria, ‘Nũũ ũrabatara kũhũthĩra ũtaaro wa rĩandĩko rĩu?’ Nĩ ndungata ciothe cia Jehova o hamwe na niĩ.” Thutha ũcio Bernardo agĩka mogarũrũku mangĩ nĩguo ekĩre  hinya mwĩhoko wake harĩ Jehova na ithondeka rĩake. Nĩ eekĩrire kĩyo makĩria gũthoma Bibilia na gwĩcũrania igũrũ rĩayo. O na gũtuĩka no eeciragia ũrĩa aarĩ na ariũ a Ithe witũ maamuonaga, nĩ aahunjagia hamwe nao na akaruta macokio mĩcemanio-inĩ. Thutha wa ihinda, Bernardo nĩ aamũrirũo rĩngĩ gũtuĩka mũthuri wa kĩũngano. Angĩkorũo nĩ ũrũngĩtwo o ta Bernardo, geria kwaga gwĩciria mũno gĩconoko kĩrĩa kiumanaga na ũndũ ũcio, na handũ ha ũguo wĩtĩkĩre kũrũngwo, na wĩke mogarũrũku marĩa marabatarania. c (Thim. 8:33; 22:4) Ũngĩka ũguo, no ũkorũo na ma atĩ Jehova nĩ egũkũrathima nĩ ũndũ wa gũkorũo ũrĩ mwĩhokeku harĩ we na ithondeka rĩake.

10. Nĩ ũgarũrũku ũrĩkũ ũngĩkorũo wageririe wĩhokeku wa arũme amwe thĩinĩ wa Isiraeli?

¹⁰ Mogarũrũku ma ithondeka no magerie wĩhokeku witũ. Tũngĩaga kwĩmenyerera, o na no twĩtĩkĩrie mogarũrũku ta macio matũtigithũkanie na Jehova. Kwa ngerekano, ta wĩcirie ũrĩa hĩndĩ ĩmwe maũndũ maacenjirie harĩ Aisiraeli. Mbere ya Watho wa Musa wambĩrĩirie kũruta wĩra, ciongo cia famĩlĩ nĩ meekaga maũndũ marĩa maagĩrĩire gwĩkwo nĩ athĩnjĩri-Ngai. Kĩongo kĩa famĩlĩ nĩ angĩakire kĩgongona, na arutĩre Jehova magongona nĩ ũndũ wa famĩlĩ yake. (Kĩam. 8:20, 21; 12:7; 26:25; 35:1, 6, 7; Ayub. 1:5) No rĩrĩa Watho ũcio waambĩrĩirie kũruta wĩra, ciongo cia famĩlĩ matietĩkĩrĩtio gwĩka maũndũ macio. Jehova nĩ aamũrire athĩnjĩri-Ngai kuuma famĩlĩ-inĩ ya Haruni nĩguo marutage magongona. Rĩrĩa ũgarũrũku ũcio wekirũo, kĩongo kĩa famĩlĩ angĩakorirũo atarĩ wa rũciaro rwa Haruni acoke arute wĩra wa mũthĩnjĩri-Ngai, nĩ angĩoragirũo. d (Alaw. 17:3-6, 8, 9) Hihi ũcio nĩ ũndũ ũmwe watũmire Kora, Dathani, Abiramu, na atongoria angĩ 250 mokĩrĩre ũtongoria wa Musa na Haruni? (Ndar. 16:1-3) Tũtiũĩ wega. O ũrĩa kũngĩkorũo kwarĩ, Kora na arũme acio angĩ nĩ maagire gũikara marĩ ehokeku harĩ Jehova. Hihi ũngĩka atĩa wĩhokeku waku ũngĩgerio nĩ ũndũ wa mogarũrũku ithondeka-inĩ rĩa Jehova?

11. Tũreruta atĩa kuumana na kĩonereria kĩa Alawii amwe arĩa maarĩ Akohathu?

¹¹ Nyitaga mbaru biũ mogarũrũku ma ithondeka. Rĩrĩa Aisiraeli maarĩ werũ-inĩ, Akohathu nĩ maaheetwo wĩra wa mwanya mũno. Hĩndĩ ciothe Aisiraeli makiuma kambĩ ĩmwe gũthiĩ ĩrĩa ĩngĩ, Akohathu amwe nĩ maakuuaga ithandũkũ rĩa kĩrĩkanĩro maumĩtwo thutha nĩ andũ acio angĩ othe. (Ndar. 3:29, 31; 10:33; Josh. 3:2-4) Ũcio warĩ mweke wa mwanya. No maũndũ nĩ maacenjirie rĩrĩa Aisiraeli maaingĩrire Bũrũri wa Kĩĩranĩro. Ithandũkũ rĩa Kĩrĩkanĩro rĩtiabataraga gũikara rĩgĩthamagio. Kwoguo gũkinyĩria rĩrĩa Suleimani aathanaga arĩ mũthamaki, Akohathu amwe nĩ maahetwo wĩra wa gũkorũo marĩ aini, angĩ wĩra wa kũrangĩra ihingo, na angĩ wĩra wa kũrũmbũiya thitoo cia irio. (1 Maũ. 6:31-33; 26:1, 24) Hatirĩ handũ tũthomaga atĩ Akohathu nĩ maatetire kana makiuga maheo wĩra ũngĩ atĩ tondũ nĩ meehokeirũo wĩra wa mwanya mbere ĩyo. Tũreruta atĩa? Nyitaga mbaru mogarũrũku ma ithondeka rĩa Jehova na ngoro yaku yothe, o na marĩa marahutia wĩra ũrĩa wĩhokeirũo. Kenagĩra mweke o wothe wa ũtungata waheo. Ririkanaga atĩ mweke ũrĩa ũrĩ naguo wa ũtungata tiguo ũtũmaga ũkorũo ũrĩ wa bata maitho-inĩ ma Jehova. Jehova akenagio mũno nĩ  wathĩki waku gũkĩra mweke o wothe wa ũtungata ũngĩkorũo naguo.—1 Sam. 15:22.

12. Zaina aaiguire atĩa rĩrĩa aacenjeirio mweke wa gũtungata Betheli?

¹² Ta wĩcirie ũhoro wa kĩonereria kĩa mwarĩ wa Ithe witũ Zaina kuuma Asia ya Gatagatĩ ũrĩa wacenjeirio mweke eendete wa ũtungata. Aatũmirũo agatungate arĩ painia wa mwanya thutha wa gũtungata Betheli mĩaka makĩria ma 23. Aaugire ũũ: “Gũcenjerio mweke wa ũtungata nĩ kwahutirie na njĩra nene. Ndaiguaga itarĩ kĩene, na ngaikara ngĩyũragia, ‘Nĩ ha ndĩrahĩtirie.’” Ũndũ wa kĩeha nĩ atĩ, aarĩ na ariũ a Ithe witũ amwe kĩũngano-inĩ nĩ maatũmaga aigue ũũru o na makĩria, na njĩra ya kũmwĩra: “Ndũngĩrũo uume Betheli o ũguo hatarĩ ũndũ wĩkĩte.” Kwa ihinda rĩna, Zaina aaiguaga akuĩte ngoro mũno na ũndũ ũcio watũmaga arĩre hĩndĩ ciothe ũtukũ. No aaugire ũũ: “Gũtirĩ hĩndĩ ndetĩkĩririe ũndũ ũcio ũtũme njĩkĩrĩre nganja ithondeka rĩa Jehova kana wendo wa Jehova kũnjerekera.” Zaina aahotire atĩa gũtũũria ũhoti wake wa gwĩciria?

13. Zaina eekire atĩa nĩguo atige gwĩciria na njĩra ĩtagĩrĩire?

¹³ Zaina nĩ aahotire gũtiga gwĩciria na njĩra ĩtagĩrĩire. Eekire ũguo atĩa? Nĩ aathomire icunjĩ mabuku-inĩ maitũ iria ciaragĩrĩria ũritũ ũrĩa aageragĩra. Nĩ aagunĩkire mũno rĩrĩa aathomire gĩcunjĩ kĩarĩ na kĩongo “Unaweza Kukabiliana na Kivunja-Moyo!” thĩinĩ wa ngathĩti ya Mnara wa Mlinzi ya Februarĩ 1, 2001. Gĩcunjĩ kĩu nĩ gĩtaarĩirie ũrĩa Mariko, mwandĩki wa Bibilia, angĩkorũo aahiũranirie na ũritũ ta ũcio rĩrĩa aacenjeirio mweke wa ũtungata. Zaina aaugire: “Kĩonereria kĩa Mariko nĩkĩo ndabataraga nĩguo ndige gũkua ngoro.” Ningĩ Zaina ndeyamũranirie na arata ake kana akĩambĩrĩria kwĩiguĩra tha. Nĩ aataũkĩirũo atĩ roho wa Jehova nĩguo ũtongoragia matua marĩa maratuo ithondeka-inĩ rĩake na atĩ ariũ a Ithe witũ arĩa maatongoragia nĩ maamũrũmbũyagia mũno. Ningĩ nĩ aataũkĩirũo atĩ no mũhaka ithondeka rĩa Jehova rĩke ũrĩa wothe rĩngĩhota nĩguo rĩtwarithie na mbere wĩra wa Jehova.

14. Nĩ ũgarũrũku ũrĩkũ wa ithondeka Vlado aaritũhĩirũo nĩguo, na nĩ kĩĩ kĩamũteithirie?

¹⁴ Mũthuri ũmwe wa kĩũngano wa mĩaka 73 wĩtagwo Vlado kuuma Slovenia, nĩ aaritũhĩirũo rĩrĩa kĩũngano kĩao gĩaturanĩirũo na kĩũngano kĩngĩ na Nyũmba ya Ũthamaki ĩrĩa aathiaga ĩkĩhingwo. Aaugire ũũ: “Ndiataũkĩirũo kĩrĩa gĩatũmire nyũmba thaka ũguo ya Ũthamaki  ĩhingwo. Nĩ ndatuurirũo tondũ twakoretwo twacokereria nyũmba ĩyo kũrĩa yabataraga gũthondekwo. Ngoragwo ndĩ bundi wa mbaũ, na nĩ ndathondekete indo imwe ciarĩ njerũ nyũmba-inĩ ĩyo. Ningĩ gũturanĩrũo kũu nĩ kwabataraga mogarũrũku maingĩ na ndwarĩ ũndũ mũhũthũ harĩ ahunjia arĩa akũrũ ta niĩ.” Nĩ kĩĩ gĩateithirie Vlado kũnyita mbaru ũtongoria ũcio? Aaugire ũũ: “Kũnyita mbaru mogarũrũku marĩa ithondeka rĩa Jehova rĩreka hingo ciothe nĩ kũrehaga irathimo. Nĩ gũtũhaaragĩrĩria nĩ ũndũ wa mogarũrũku o na manene makĩria ma mahinda mokĩte.” Hihi nĩ ũraritũhĩrũo nĩ ũndũ wa gũkorũo kĩũngano kĩanyu gĩturanĩirũo na kĩngĩ kana nĩ ũndũ wa gũcenjerio mweke wa ũtungata? Korũo na ma atĩ Jehova nĩ ataũkagĩrũo nĩ ũrĩa ũraigua. Rĩrĩa wanyita mbaru mogarũrũku ta macio na wakorũo ũrĩ mwĩhokeku harĩ Jehova na ithondeka rĩake, hatarĩ nganja nĩ arĩkũrathimaga.—Thab. 18:25.

15. Tũngĩtũũria atĩa ũhoti witũ wa gwĩciria rĩrĩa twacemania na moritũ kĩũngano-inĩ?

¹⁵ O ũrĩa tũrakuhĩrĩria mũthia wa thĩ ĩno njũru, no twĩrĩgĩrĩre atĩ nĩ tũrĩcemanagia na moritũ thĩinĩ wa kĩũngano. Moritũ macio no magerie wĩhokeku witũ harĩ Jehova. Kwoguo nĩ twagĩrĩirũo gũtũũria ũhoti witũ wa gwĩciria. Ũngĩona ta wĩkĩtwo ũndũ mũũru nĩ Mũkristiano ũngĩ, ndũkaigage marakara ngoro-inĩ. Ũngĩrũngwo, ndũgecirie mũno gĩconoko kĩrĩa kĩngiumana na kũrũngwo kũu, handũ ha ũguo wĩtĩkĩre kũrũngwo, na wĩke mogarũrũku marĩa marabatarania. Na rĩrĩa ithondeka rĩa Jehova rĩeka mogarũrũku marakũhutia ĩmwe kwa ĩmwe, manyitage mbaru na ngoro yaku yothe na ũkamathĩkĩra.

16. Ũngĩhota atĩa gũthiĩ na mbere kwĩhoka Jehova na ithondeka rĩake?

¹⁶ No ũhote gũthiĩ na mbere kwĩhoka Jehova na ithondeka rĩake o na rĩrĩa wĩhokeku waku wagerio. No nĩguo wĩke ũguo, nĩ ũrabatara gũtũũria ũhoti waku wa gwĩciria, na ũguo nĩ kuuga gũikara ũhooreire, gwĩciria na njĩra ĩrĩa yagĩrĩire, na kuona maũndũ kũringana na muonere wa Jehova. Tua itua rĩa kwĩruta igũrũ rĩgiĩ andũ magwetetwo Bibilia-inĩ arĩa maahotire kũhiũrania na ũndũ ta ũrĩa ũragerera, na wĩcũranie ũhoro wĩgiĩ kĩonereria kĩao. Hoyaga Jehova agũteithie. Ningĩ ndũkaneyamũranie na kĩũngano. Weka ũguo, o na kũngiumĩra ũndũ ũrĩkũ, Shaitani ndangĩhota gũgũtigithũkania na Jehova na ithondeka rĩake.—Jak. 4:7.