HIHI nĩ wonaga ũrĩ ũndũ mũritũ gũkenera wĩruti waku wa Bibilia na kũwĩkaga ũtegũtĩĩrĩria? Ithuothe nĩ tũiguaga ũguo rĩmwe na rĩmwe. No ta wĩcirie ũndũ ũngĩ twĩkaga tũtegũtĩĩrĩria, ta gwĩthamba. Gwĩthamba nĩ kũbataraga mahinda na kĩyo, no thutha-inĩ mũndũ nĩ aiguaga acanjamũkĩte. O na kwĩruta Bibilia nĩ ta ‘gwĩthamba na maĩ kũgerera harĩ kiugo,’ na nĩ gũtũmaga tũigue tũcanjamũkĩte. (Ef. 5:26) Reke tuone maũndũ mangĩtũteithia gwĩkaga ũguo:

• Koragwo na mũtaratara wa kwĩruta. Wĩruti wa Bibilia nĩ ũmwe wa “maũndũ marĩa ma bata makĩria” Mũkristiano atagĩrĩirũo kũhũthĩrĩria. (Afil. 1:10) Nĩgetha ndũkariganĩrũo nĩ kwĩruta, no wandĩke karatathi-inĩ mũthenya na mathaa marĩa ũrĩthomaga na ũkaige handũ ũrĩkonaga na njĩra hũthũ, ta hihi gũkamandĩkĩrĩria rũthingo-inĩ kana frinji-inĩ. O na no wĩkĩre alamu thimũ-inĩ ĩgakũririkania mahinda ma kwĩruta marĩ hakuhĩ gũkinya.

• Wĩbange kũringana na ũrĩa maũndũ maku maikaire. Hihi ũngĩthuura gũthomaga ihinda rĩmwe iraihu-ĩ kana ũngĩthuura gũthomaga ndagĩka nini maita maigana ũna harĩ kiumia? Banga mahinda ma kwĩruta gũkĩringana na ũrĩa maũndũ maku maikaire. Ũngĩigua ũnogereire rĩrĩa mahinda maku ma kwĩruta makinya, no ũgerie kwĩruta ndagĩka ikũmi tu. Ndũngĩaga ũndũ ũngĩĩruta, o na angĩkorũo wahũthĩra ndagĩka nini. Na wambĩrĩria kwĩruta, no ũgĩe na mĩĩto ya gũthiĩ na mbere.—Afil. 2:13.

• Banga kabere ũndũ ũrĩa ũkwĩruta. Angĩkorũo wetagĩrĩra nginya mahinda ma kwĩruta makinye nĩguo ũmenye kĩrĩa ũkwĩruta, no ũkorũo ‘ũtekũhũthĩra mahinda maku wega biũ.’ (Ef. 5:16) Geria kwandĩka handũ maũndũ marĩa ũngĩenda kwĩruta igũrũ rĩamo. Kwa ngerekano, ũngĩgĩa na kĩũria kĩgiĩ ũndũ ũtarataũkĩrũo, no ũkĩandĩke nĩguo ũgaagĩthuthuria. Na o hĩndĩ thutha wa wĩruti waku, no wongagĩrĩre maũndũ mangĩ marĩa ũngĩenda gũkeruta hĩndĩ ĩngĩ ũhoro wamo.

• Koragwo wĩhaarĩirie kũgarũrĩra. Wĩhaarĩrie kũgarũrĩra mũtaratara waku, ta mahinda marĩa ũhũthagĩra kwĩruta kana maũndũ marĩa ũthuuraga kwĩruta. Ũndũ ũrĩa wa bata ti mathaa marĩa wĩrutaga, mahinda marĩa ũhũthagĩra ũkĩĩruta, kana ũndũ ũrĩa ũreruta, no nĩ kwĩrutaga ũtegũtĩĩrĩria.

Nĩ tũgunĩkaga rĩrĩa twarũmĩrĩra mũtaratara witũ wa kwĩruta tũtegũtĩĩrĩria. Nĩ tũrĩkĩraga hinya ũrata witũ hamwe na Jehova, tũkeruta gũtua matua ma ũũgĩ ũtũũro-inĩ, na tũkaigua tũcanjamũkĩte.—Josh. 1:8.