GĨCUNJĨ KĨA WĨRUTI KĨA 40
‘Kũrehe Andũ Aingĩ Harĩ Ũthingu’
“Arĩa marehaga andũ aingĩ harĩ ũthingu [magaacangarara] o ta njata, tene na tene.”—DAN. 12:3.
RWĨMBO NA. 151 Nĩ Agetana
GĨCUNJĨ-INĨ GĨKĨ a
1. Nĩ maũndũ marĩkũ ma gũcanjamũra tũgaakenera hĩndĩ ya Wathani wa Mĩaka Ngiri?
NA GITHĨ rĩtigaakorũo rĩrĩ ihinda rĩa gũcanjamũra rĩrĩa andũ makaambĩrĩria kũriũkio gũkũ thĩ hĩndĩ ya Wathani wa Mĩaka Ngiri wa Kristo! Arĩa othe makuĩrĩirũo nĩ endwa ao nĩ meriragĩria gũkaamona rĩngĩ. Na noguo o na Jehova. (Ayub. 14:15) Ta hũũra mbica ũrĩa andũ othe thĩinĩ wa thĩ magaakena rĩrĩa makonana na endwa ao arĩa makaariũkio. O ta ũrĩa tũrerutire gĩcunjĩ-inĩ kĩrĩa kĩhĩtũku, “arĩa athingu,” arĩa marĩĩtwa mao mandĩkĩtwo ibuku-inĩ rĩa muoyo, makaariũkio “iriũkĩro rĩa muoyo.” (Atũm. 24:15; Joh. 5:29) No kũhoteke endwa aitũ aingĩ magaakorũo marĩ amwe a arĩa makaariũkio kĩambĩrĩria-inĩ. b Makĩria ma ũguo, “arĩa matarĩ athingu,” ta arĩa mataagĩire na mweke wa kũmenya Jehova kana wa kũmũtungatĩra matanakua, nĩ makaariũkio “iriũkĩro rĩa gũtuĩrũo.”
2-3. (a) Nĩ wĩra ũrĩkũ mũnene mũno wa kũrutana ũkaarutwo thĩinĩ wa thĩ ũtaarĩirio thĩinĩ wa Isaia 11:9, 10? (b) Tũkwarĩrĩria maũndũ marĩkũ gĩcunjĩ-inĩ gĩkĩ?
2 Andũ arĩa othe makaariũkio nĩ makaabatara kũrutwo. (Isa. 26:9; 61:11) Kwoguo nĩ gũkaarutwo wĩra mũnene mũno wa kũrutana ũtarĩ warutwo rĩngĩ thĩinĩ wa thĩ. (Thoma Isaia 11:9, 10.) Wĩra ũcio ũkaabatarania nĩkĩ? Ũndũ ũmwe nĩ atĩ arĩa matarĩ athingu makaariũkio, nĩ makaabatara kwĩruta igũrũ rĩgiĩ Jesu Kristo, Ũthamaki wa Ngai, ũkũũri, na ũhoro wĩgiĩ thitango ĩgiĩ rĩĩtwa rĩa Jehova na ũnene wake. O na arĩa athingu nĩ makaabatara kũrutwo maũndũ marĩa Jehova athiĩte aguũrĩtie megiĩ muoroto wake harĩ thĩ. Amwe a acio athingu maakuire ihinda inene mbere ya Bibilia yothe ĩrĩkĩte kwandĩkwo. Kwoguo arĩa matarĩ athingu na arĩa athingu nĩ magaakorũo na maũndũ maingĩ ma kwĩruta.
3 Gĩcunjĩ-inĩ gĩkĩ tũkwarĩrĩria ciũria ici: Wĩra ũcio mũnene ũguo wa kũrutana ũkaarutwo atĩa? Wĩra ũcio ũgaateithĩrĩria atĩa harĩ gũtua kana rĩĩtwa rĩa mũndũ nĩ rĩkwandĩkwo ibuku-inĩ rĩa muoyo ũndũ rĩtangĩthario, kana rĩtikwandĩkwo? Macokio ma ciũria icio nĩ ma bata harĩ ithuĩ ũmũthĩ. O ta ũrĩa tũkuona, morathi mamwe ma gũcanjamũra mandĩkĩtwo ibuku-inĩ rĩa Danieli na rĩa Kũguũrĩrio, nĩ megũtũteithia kwagagĩria ũtaũku witũ wĩgiĩ ũrĩa gũgaathiĩ rĩrĩa andũ arĩa makuĩte makaariũkio. Rekei twambe twarĩrĩrie maũndũ ma gũcanjamũra marĩa maarathĩtwo thĩinĩ wa Danieli 12:1, 2.
“ARĨA MAKOMETE RŨKŨNGŨ-INĨ . . . NĨ MAGOOKĨRA”
4-5. Ibuku rĩa Danieli 12:1 rĩguũrĩtie ũndũ ũrĩkũ wĩgiĩ ihinda rĩa mũthia?
4 Thoma Danieli 12:1. Ibuku rĩa Danieli nĩ rĩguũragia ũrĩa maũndũ makaarũmanĩrĩra ihinda-inĩ rĩa mũthia. Kwa ngerekano, Danieli 12:1 nĩ ĩguũragia atĩ Jesu Kristo, o we Mikaeli, nĩ ‘akaarũgama nĩ ũndũ wa andũ a Ngai.’ Ũrathi ũcio waambĩrĩirie kũhinga mwaka wa 1914 rĩrĩa Jesu aamũrirũo gũtuĩka Mũthamaki wa Ũthamaki wa Ngai kũrĩa igũrũ.
5 O na kũrĩ ũguo, Danieli ningĩ nĩ eerirũo atĩ Jesu ‘angĩkarũgama’ hĩndĩ ya “ihinda rĩa mĩtangĩko rĩtarĩ rĩoneka kuuma rĩrĩa kwagĩire na rũrĩrĩ o nginya hĩndĩ ĩyo.” “Ihinda [rĩu] rĩa mĩtangĩko” nĩ “thĩna mũnene” ũrĩa ũgwetetwo thĩinĩ wa Mathayo 24:21. Jesu akaarũgama kana arũĩrĩre andũ a Ngai mũthia-inĩ wa ihinda rĩu rĩa mĩtangĩko, hĩndĩ ya Hari–Magedoni. Ibuku rĩa Kũguũrĩrio rĩĩtĩte andũ acio makaahonoka andũ kĩrĩndĩ kĩnene “arĩa moimĩte thĩna-inĩ ũrĩa mũnene.”—Kũg. 7:9, 14.
6. Gũgaathiĩ atĩa thutha wa andũ kĩrĩndĩ kĩnene kũhonoka thĩna ũrĩa mũnene? Taarĩria. (Ningĩ rora gĩcunjĩ gĩa “Ciũria Kuuma Kũrĩ Athomi” ngathĩti-inĩ ĩno, kĩgiĩ arĩa makaariũkio gũkũ thĩ.)
6 Thoma Danieli 12:2. Gũgaathiĩ atĩa thutha wa andũ kĩrĩndĩ kĩnene kũhonoka ihinda rĩu rĩa mĩtangĩko? Ũrathi ũcio ndũrarĩrĩria ũhoro wa kũriũkio kwa mũhaano, kana ũrĩa ndungata cia Ngai ciaarahũkire kĩĩroho thutha wa wĩra wa kũhunjia kũhaana ta warũgamio nĩ akararia mwaka-inĩ wa 1918, ta ũrĩa twataũkagĩrũo hau kabere. c Handũ ha ũguo, ciugo icio irarĩrĩria ũhoro wa kũriũkio kwa arĩa makuĩte kũrĩa gũgeekĩka hĩndĩ ya thĩ njerũ. Tũngiuga ũguo nĩkĩ? Kiugo “rũkũngũ-inĩ” kĩrĩa kĩhũthĩrĩtwo thĩinĩ wa Danieli 12:2, nĩ ũndũ ũmwe na kiugo “tĩri-inĩ” kĩrĩa kĩhũthĩrĩtwo thĩinĩ wa Ayubu 17:16, na cierĩ cionanagia “Mbĩrĩra.” Ũndũ ũcio ũronania atĩ Danieli 12:2 yaragia ũhoro wa kũriũkio gwa biũ kũrĩa gũgeekĩka thutha wa matukũ ma kũrigĩrĩria gũthira na thutha wa mbaara ya Hari–Magedoni.
7. (a) Nĩ na njĩra ĩrĩkũ andũ amwe makaariũkio maheo “muoyo wa tene na tene”? (b) Nĩ na njĩra ĩrĩkũ ũcio ũgaakorũo ũrĩ “ũriũkio mwega makĩria”?
7 No hihi Danieli 12:2 yendaga kuonania atĩa ĩkiuga atĩ andũ amwe makaariũkio maheo “muoyo wa tene na tene”? Yonanagia atĩ arĩa makaariũkio na mamenye Jehova na Jesu, kana mathiĩ na mbere kũmamenya na kũmathĩkĩra ihinda-inĩ rĩa mĩaka ĩrĩa 1,000, mũthia-inĩ nĩ makaaheo muoyo wa tene na tene. (Joh. 17:3) Ũcio ũgaakorũo ũrĩ “ũriũkio mwega makĩria” gũkĩra wa andũ amwe arĩa maariũkirio mahinda-inĩ ma tene. (Ahib. 11:35) Gĩtũmi nĩ tondũ andũ acio maariũkirio nĩ maacokire magĩkua rĩngĩ.
8. Nĩ na njĩra ĩrĩkũ amwe makaariũkio “maconorithio na matũũre mamenetwo tene na tene”?
8 No ti andũ othe arĩa makaariũkio magetĩkĩra kũrutwo nĩ Jehova. Ũrathi wa Danieli ugaga atĩ amwe makaariũkio “maconorithio na matũũre mamenetwo tene na tene.” Tondũ makoonania mwerekera wa ũremi, marĩĩtwa mao matikaandĩkwo ibuku-inĩ rĩa muoyo na matikaaheo muoyo wa tene na tene. Handũ ha ũguo, ‘magaatũũra mamenetwo tene na tene,’ na njĩra ĩngĩ, nĩ makaaniinwo. Kwoguo Danieli 12:2 yaragia ũhoro wa ũrĩa gũgaathiĩ harĩ arĩa othe makaariũkio gũkĩringana na maũndũ marĩa mageeka thutha wao kũriũkio. d (Kũg. 20:12) Amwe nĩ makaaheo muoyo wa tene na tene, na amwe matikaaheo.
‘KŨREHE ANDŨ AINGĨ HARĨ ŨTHINGU’
9-10. Nĩ ũndũ ũrĩkũ ũngĩ ũgeekĩka thutha wa thĩna ũrĩa mũnene, na nĩa “magaakenga o ta mũtambũrũko wa igũrũ”?
9 Thoma Danieli 12:3. Nĩ ũndũ ũrĩkũ ũngĩ ũgeekĩka thutha wa “ihinda rĩa mĩtangĩko” rĩrĩa rĩũkĩte? Makĩria ma ũndũ ũrĩa ũgwetetwo thĩinĩ wa Danieli 12:2, mũhari wa 3 nĩ ũgwetete ũndũ ũgeekĩka thutha wa thĩna ũrĩa mũnene.
10 Nĩa “magaakenga o ta mũtambũrũko wa igũrũ”? No tuone macokio thĩinĩ wa ciugo cia Jesu iria irĩ thĩinĩ wa Mathayo 13:43 ĩrĩa yugaga ũũ: “Hĩndĩ ĩyo arĩa athingu magaacangarara o ta riũa Ũthamaki-inĩ wa Ithe wao.” Jesu akĩgweta ciugo icio aaragia ũhoro wĩgiĩ “ariũ a Ũthamaki,” kana ariũ a Ithe arĩa aitĩrĩrie maguta arĩa magaatungata nake Ũthamaki-inĩ wa igũrũ. (Mat. 13:38) Kwoguo no mũhaka akorũo Danieli 12:3 yaragia ũhoro wĩgiĩ arĩa aitĩrĩrie maguta na wĩra ũrĩa makaaruta hĩndĩ ya Wathani wa Mĩaka Ngiri.
Arĩa 144,000 nĩ makaarutithania wĩra na Jesu Kristo harĩ gũtongoria wĩra wa kũrutana ũrĩa ũkaarutwo hĩndĩ ya mĩaka ĩrĩa 1,000 (Rora kĩbungo gĩa 11)
11-12. Nĩ wĩra ũrĩkũ arĩa 144,000 makaaruta hĩndĩ ya mĩaka ĩrĩa 1,000?
11 Arĩa aitĩrĩrie maguta makaarehe “andũ aingĩ harĩ ũthingu” na njĩra ĩrĩkũ? Arĩa aitĩrĩrie maguta nĩ makaanyitanĩra biũ na Jesu Kristo harĩ gũtongoria wĩra wa kũrutana ũrĩa ũkaarutwo gũkũ thĩ hĩndĩ ya mĩaka ĩrĩa 1,000. Acio 144,000 to gwathana magaathana marĩ athamaki tu, no ningĩ nĩ magaatungata marĩ athĩnjĩri-Ngai. (Kũg. 1:6; 5:10; 20:6) Kwoguo nĩ magaateithĩrĩria harĩ “kũhonia ndũrĩrĩ” na o kahora mateithĩrĩrie andũ gũtuĩka akinyanĩru. (Kũg. 22:1, 2; Ezek. 47:12) Na githĩ gĩtigaakorũo kĩrĩ gĩkeno kĩnene harĩ arĩa aitĩrĩrie maguta kũnyitanĩra wĩra-inĩ ũcio?
12 “Andũ aingĩ” arĩa makaarehwo harĩ ũthingu nĩa? Nĩ arĩa makaariũkio na arĩa makaahonoka hĩndĩ ya Hari–Magedoni o hamwe na ciana iria hihi igaaciarũo thĩinĩ wa thĩ njerũ. Gũkinyĩria mũthia wa mĩaka ĩrĩa 1,000, arĩa othe magaakorũo thĩinĩ wa thĩ magaakorũo marĩ akinyanĩru. Kwoguo nĩ rĩ marĩĩtwa mao makaandĩkwo ibuku-inĩ rĩa muoyo na rangi ũndũ matangĩthario?
IGERIO RĨA MŨTHIA
13-14. Andũ othe akinyanĩru thĩinĩ wa thĩ makaabatara kuonania ũndũ ũrĩkũ matanaheo muoyo wa tene na tene?
13 No mũhaka tũririkanage atĩ gũkorũo mũndũ arĩ mũkinyanĩru ti kuuga atĩ no mũhaka akoona muoyo wa tene na tene. Ta wĩcirie ũhoro wa Adamu na Hawa. Maarĩ akinyanĩru, no nĩ maabataraga kuonania wathĩki wao harĩ Jehova Ngai mbere ya maheetwo muoyo wa tene na tene. Na ũndũ wa kĩeha nĩ atĩ nĩ maagire kũmwathĩkĩra.—Rom. 5:12.
14 Arĩa magaakorũo thĩinĩ wa thĩ mũthia-inĩ wa mĩaka ĩrĩa 1,000 magaakorũo matariĩ atĩa? Othe magaakorũo matuĩkĩte akinyanĩru. Hihi andũ acio othe akinyanĩru nĩ makaanyita mbaru biũ wathani wa Jehova tene na tene? Kana amwe mageeka o ta Adamu na Hawa, arĩa maagire gwathĩka o na gũtuĩka maarĩ akinyanĩru? Ciũria icio nĩ ikaabatara gũcokio, no hihi igaacokio atĩa?
15-16. (a) Nĩ rĩ andũ othe makaaheo mweke wa kuonania wĩhokeku wao harĩ Jehova? (b) Maumĩrĩro ma igerio rĩa mũthia magaakorũo marĩ marĩkũ?
15 Shaitani agaakorũo ohetwo ihinda-inĩ rĩu rĩa mĩaka 1,000. Ihinda-inĩ rĩu ndakahota kũhĩtithia mũndũ o na ũmwe. No mũthia-inĩ wa mĩaka ĩyo 1,000, Shaitani nĩ akaarekererio na agerie kũhĩtithia andũ akinyanĩru. Hĩndĩ ya igerio rĩu, andũ othe akinyanĩru thĩinĩ wa thĩ nĩ makaaheo mweke wa kuonania kana nĩ matĩĩte rĩĩtwa rĩa Ngai na makanyita mbaru wathani wake. (Kũg. 20:7-10) Maũndũ marĩa o mũndũ ageeka hĩndĩ ĩyo nĩ magaatua kana rĩĩtwa rĩake nĩ rĩkaandĩkwo ibuku-inĩ rĩa muoyo ũndũ rĩtangĩthario.
16 Bibilia yonanagia atĩ andũ amwe nĩ makaaregana na wathani wa Jehova o ta Adamu na Hawa. Gũgaathiĩ atĩa harĩ o? Kũguũrĩrio 20:15 yugaga ũũ: “Mũndũ o wothe ũtaandĩkĩtwo thĩinĩ wa ibuku rĩa muoyo nĩ aaikirio iria-inĩ rĩu rĩa mwaki.” Kwoguo andũ acio aremi nĩ makaaniinwo tene na tene. No andũ aingĩ akinyanĩru nĩ mageetiiria igerio rĩu rĩa mũthia. Hĩndĩ ĩyo nĩrĩo marĩĩtwa mao makaandĩkwo ibuku-inĩ rĩa muoyo ũndũ matangĩthario.
“IHINDA RĨA MŨTHIA”
17. Nĩ maũndũ marĩkũ Danieli eerirũo mangĩgeekĩka matukũ-inĩ maitũ? (Danieli 12:4, 8-10)
17 Na githĩ ti ũndũ wa gũcanjamũra gwĩciria igũrũ rĩgiĩ maũndũ macio mageekĩka ihinda rĩũkĩte! O na kũrĩ ũguo, Danieli ningĩ nĩ aamũkĩrire ũhoro wa bata kuuma kũrĩ mũraika wĩgiĩ ihinda rĩrĩ ritũ, na nĩrĩo “ihinda rĩa mũthia.” (Thoma Danieli 12:4, 8-10; 2 Tim. 3:1-5) Mũraika ũcio eerire Danieli ũũ: “Ũmenyo ũrĩa wa ma nĩ ũkaaingĩha.” Ũguo nĩ kuonania atĩ ũrathi ũrĩa ũrĩ thĩinĩ wa ibuku rĩake nĩ ũngĩgaataũkĩka wega makĩria harĩ andũ a Ngai. Mũraika ũcio oongereire atĩ matukũ-inĩ macio, “andũ arĩa aganu nĩ [mangĩgeeka] maũndũ ma waganu, na gũtirĩ mũndũ mwaganu [ũngĩgaataũkĩrũo].”
18. Nĩ ũndũ ũrĩkũ ũrĩkĩka ica ikuhĩ harĩ arĩa aganu?
18 Ũmũthĩ no kuoneke ta andũ arĩa aganu mataherithagio nĩ ũndũ wa mĩtugo yao mĩũru. (Mal. 3:14, 15) No ica ikuhĩ Jesu nĩ arĩtuĩra andũ arĩa matariĩ ta mbũri na amaamũranie na arĩa matariĩ ta ngʼondu. (Mat. 25:31-33) Andũ acio aganu matikaahonoka thĩna ũrĩa mũnene, na o na matikaariũkio thĩinĩ wa thĩ njerũ. Marĩĩtwa mao matigaakorũo thĩinĩ wa “ibuku rĩa kĩririkano” rĩrĩa rĩgwetetwo thĩinĩ wa Malaki 3:16.
19. Twagĩrĩirũo gwĩka atĩa ihinda-inĩ rĩrĩ, na nĩkĩ? (Malaki 3:16-18)
19 Rĩrĩ nĩrĩo ihinda rĩrĩa twagĩrĩirũo kuonania atĩ tũtirĩ amwe a arĩa aganu. (Thoma Malaki 3:16-18.) Jehova nĩ aracokanĩrĩria arĩa onaga marĩ “kĩndũ kĩa mwanya” kana kĩndũ kĩa bata harĩ we. Hatarĩ nganja tũngĩenda gũkorũo tũrĩ amwe ao.
Na githĩ gĩtigaakorũo kĩrĩ gĩkeno kĩnene kuona Danieli, endwa aitũ, na andũ angĩ aingĩ ‘makĩrũgama’ nĩguo mamũkĩre igai rĩao thĩinĩ wa thĩ njerũ! (Rora kĩbungo kĩa 20)
20. Nĩ kĩĩranĩro kĩrĩkũ kĩa mũthia Danieli eerĩirũo, na wĩrĩgagĩrĩra kũhinga gwa kĩĩranĩro kĩu nĩkĩ?
20 Hatarĩ nganja tũratũũra mahinda-inĩ ma bata mũno. No nĩ harĩ maũndũ ma magegania o na makĩria megwĩkĩka ica ikuhĩ. Ihinda rĩtarĩ kũraihu nĩ tũkwĩyonera maũndũ mothe moru makĩniinwo. Thutha ũcio, twĩyonere kũhinga gwa kĩĩranĩro gĩkĩ Jehova eerĩire Danieli: “Nĩ ũkaarũgama nĩguo wamũkĩre igai rĩaku mũthia-inĩ wa matukũ macio.” (Dan. 12:13) Hihi nĩ wĩriragĩria mũthenya ũrĩa Danieli o hamwe na endwa aku ‘makaarũgama’ rĩngĩ? Angĩkorũo nĩ wĩriragĩria, wĩrutanĩrie o ũrĩa wothe ũngĩhota gũikara ũrĩ mwĩhokeku ihinda-inĩ rĩrĩ, na no ũkorũo na ma atĩ rĩĩtwa rĩaku nĩ rĩgũikara rĩandĩkĩtwo ibuku-inĩ rĩa muoyo rĩa Jehova.
RWĨMBO NA. 80 “Camai Muone atĩ Jehova nĩ Mwega”
a Gĩcunjĩ gĩkĩ kĩrĩ na ũgarũrũku harĩ ũtaũku witũ wĩgiĩ wĩra mũnene wa kũrutana ũrĩa ũgwetetwo thĩinĩ wa Danieli 12:2, 3. Nĩ tũkuona rĩrĩa wĩra ũcio ũkaarutwo na nĩa makaanyitanĩra wĩra-inĩ ũcio. Ningĩ nĩ tũkuona ũrĩa gĩthomo kĩu gĩgaateithia arĩa magaakorũo gũkũ thĩ kwĩhaarĩria nĩ ũndũ wa igerio rĩa mũthia rĩrĩa rĩgaakorũo mũthia-inĩ wa Wathani wa Mĩaka Ngiri wa Kristo.
b No kũhoteke arĩa makamba kũriũkio nĩ arĩa maakuire marĩ ehokeku matukũ-inĩ ma kũrigĩrĩria, macokwo nĩ arĩa maakuire mbere yao o rũciaro thutha wa rũrĩa rũngĩ. Angĩkorũo ũguo nĩguo gũgaathiĩ, o andũ nĩ makaagĩa na mweke wa kũnyita ũgeni andũ arĩa maakuire rĩrĩa o maarĩ muoyo. O ũrĩa gũgaathiĩ, Maandĩko monanagia atĩ arĩa marĩ na kĩĩrĩgĩrĩro gĩa gũthiĩ igũrũ mariũkagio “o mũndũ ihinda-inĩ rĩake mwene,” na kwoguo no twĩrĩgĩrĩre atĩ arĩa makaariũkio gũkũ thĩ o nao makaariũkio na mũbango mwega.—1 Kor. 14:33; 15:23.
c Ũyũ nĩ ũgarũrũku harĩ ũtaũku witũ wa na hau kabere ũrĩa ũrĩ thĩinĩ wa ibuku rĩa Sikiliza Unabii wa Danieli! gĩcunjĩ gĩa 17, na ngathĩti ya The Watchtower ya Julaĩ 1, 1987, kar. 21-25.
d Ngũrani na ũguo, ciugo “arĩa athingu” na “arĩa matarĩ athingu” iria irĩ thĩinĩ wa Atũmwo 24:15, na ciugo “arĩa meekaga maũndũ mega” na “arĩa meekaga maũndũ moru” iria irĩ thĩinĩ wa Johana 5:29, ciaragia ũhoro wa ciĩko iria andũ arĩa makaariũkio meekire mbere ya makuĩte.
