Thĩinĩ wa 1 Akorintho 15:8, Paulo aaugire ũũ: “Akĩnyumĩrĩra o na niĩ ndĩ wa mũico ndariĩ ta mũndũ waciarĩtwo atarĩ mũkinyu.” Mũhari-inĩ ũyũ, Paulo aaragĩrĩria ũrĩa gwekĩkire hĩndĩ ĩyo aagarũrũkire agĩtuĩka mwĩtĩkia. No hihi eendaga kuuga atĩa rĩrĩa aaugire atĩ ‘aaciarĩtwo atarĩ mũkinyu’? Mahinda mahĩtũku, twataaragĩria atĩ no kũhoteke Paulo aaragĩrĩria kĩoneki kĩrĩa oonete kĩa Jesu arĩ riri-inĩ wa igũrũ. Nĩ ta aahetwo mweke wa gũciarũo, kana kũriũkio arĩ na mwĩrĩ wa roho, mĩaka mĩingĩ mbere ya ũriũkio ta ũcio gwĩkĩka. O na kũrĩ ũguo, thutha wa gũthuthuria mũhari ũcio makĩria, nĩ kuonekete atĩ harĩ na bata wa kũgarũrĩra ũtaũku witũ wĩgiĩ mũhari ũcio.

Kwoguo-rĩ, Paulo eendaga kuuga atĩa rĩrĩa aaugire atĩ ‘aaciarĩtwo atarĩ mũkinyu’? Ciugo icio no itaũkĩke na njĩra cigana ũna ngũrani.

Ũgarũrũku wake warĩ wa na ihenya na wa kũmakania. Mwana ũtarĩ mũkinyu kaingĩ aciaragwo ihinda-inĩ aterĩgĩrĩirũo. Hĩndĩ ĩyo Saulu (ũrĩa wacokire gwĩtwo Paulo) aathiaga Dameski kũnyarira Akristiano, nderĩgagĩrĩra kuona kĩoneki kĩa Jesu ariũkĩtio. Ũgarũrũku wa Paulo warĩ ũndũ ũterĩgĩrĩirũo, to harĩ we tu, no nĩ nginya harĩ Akristiano arĩa aabangĩte kũnyarira itũũra-inĩ rĩu. Makĩria ma ũguo, ũndũ ũcio wekĩkire na njĩra ya kũmakania mũno. O na maitho make nĩ moorire kwa ihinda.—Atũm. 9:1-9, 17-19.

Aagarũrũkire “ihinda rĩrĩa rĩtagĩrĩire.” Kiugo gĩa Kĩngiriki kĩrĩa gĩtaũrĩtwo “mũndũ waciarĩtwo atarĩ mũkinyu” ningĩ no gĩtaũrũo “mũndũ waciarĩtwo ihinda rĩrĩa rĩtagĩrĩire.” Bibilia ya The Jerusalem Bible yugaga ũũ: “Nĩ ta ndaciarirũo ihinda rĩrĩa gũtarĩ mũndũ werĩgagĩrĩra.” Ihinda-inĩ rĩrĩa Paulo aagarũrũkire agĩtuĩka mwĩtĩkia, Jesu nĩ aacokete igũrũ. Ngũrani na arĩa Paulo aagwetire mĩhari-inĩ ĩrĩa ĩrĩ mbere ya mũhari ũcio, Paulo ndoonete Jesu atanacoka igũrũ thutha wa kũriũkio. (1 Kor. 15:4-8) Kĩoneki kĩu kĩa Jesu nĩ kĩaheire Paulo mweke wa kuona Jesu ariũkĩtio, o na angĩkorũo ũndũ ũcio nĩ ũngĩonekire ta wekĩka “ihinda rĩrĩa rĩtagĩrĩire.”

Aaragia ũhoro wake we mwene arĩ na ũigananĩru. Kũringana na athomi amwe, ciugo iria Paulo aahũthĩrire hau no cioneke ta arĩ cia kwĩyagĩra kĩene. Angĩkorũo ũndũ ũcio nĩguo Paulo aarĩ naguo meciria-inĩ, eendaga kuonania atĩ ndaagĩrĩire mweke ũcio aahetwo. O na aacokire akiuga ũũ: “Nĩ niĩ mũnini mũno harĩ atũmwo, na ndiagĩrĩire gwĩtwo mũtũmwo, tondũ nĩ ndanyaririre kĩũngano kĩa Ngai. No nduĩkĩte ũguo ndariĩ kũgerera ũtugi mũnene wa Ngai.”—1 Kor. 15:9, 10.

Kwoguo, kũroneka atĩ no kũhoteke Paulo aaragĩrĩria ũhoro wa ũrĩa Jesu aamuumĩrĩire na ihenya na njĩra ĩterĩgĩrĩirũo, ũrĩa aagarũrũkire agĩtuĩka mwĩtĩkia ihinda rĩterĩgĩrĩirũo, kana ũrĩa ataagĩrĩire kuonio kĩoneki kĩu kĩa magegania. O ũrĩa kũngĩkorũo kũrĩ, Paulo nĩ oonire ũndũ ũcio ũrĩ wa bata mũno. Nĩ wamũteithirie gũkorũo na ma biũ atĩ Jesu nĩ aariũkĩtio. Nĩkĩo kaingĩ akĩhunjĩria arĩa angĩ ũhoro wĩgiĩ kũriũkio kwa Jesu, nĩ aagwetaga ũndũ ũcio eeyoneire ũterĩgĩrĩirũo.—Atũm. 22:6-11; 26:13-18.