Tũkĩĩhaarĩria kwĩruta no twĩyũrie, ‘Nĩ ũndũ ũrĩkũ ndĩrerĩgĩrĩra kwĩruta?’ O na kũrĩ ũguo, nĩ wega kũririkana atĩ o na tũrĩ na maũndũ marĩa tũrerĩgĩrĩra kwĩruta, kũrĩ o na maũndũ mangĩ Jehova angĩkorũo akĩenda gũtũruta. Tũngĩka atĩa nĩguo tũtigagĩrĩre atĩ harĩ na ũndũ mwerũ tweruta?

Hoya ũheo ũũgĩ. Hoya Jehova agũteithie gũtaũkĩrũo nĩ ũndũ ũrĩa arenda wĩrute ihinda-inĩ rĩu ũrathoma. (Jak. 1:5) Ndũkaiganĩre tu na maũndũ marĩa ũĩ.—Thim. 3:​5, 6.

Rekaga hinya wa Kiugo kĩa Ngai ũrutage wĩra thĩinĩ waku. “Kiugo kĩa Ngai kĩrĩ muoyo.” (Ahib. 4:12) Kwoguo rĩrĩa rĩothe twathoma Bibilia, no twĩrute ũndũ mwerũ na ũtũteithie na njĩra itiganĩte ũtũũro-inĩ witũ. No ũndũ ũcio no ũhotekire tu angĩkorũo nĩ tũgũkorũo twĩhaarĩirie kwamũkĩra maũndũ marĩa Ngai aratũruta.

Kenagĩra kĩrĩa gĩothe kĩrĩ metha-inĩ ya Jehova. Irio cia kĩĩroho iria Jehova atũheaga itariĩ ta “ndĩa ya irio njega.” (Isa. 25:6) Ndũkarũgagĩrĩre icunjĩ iria ũreciria atĩ ndũgũkenera gũthoma. Weka ũguo nĩ ũrĩtĩkagĩria Ngai agũteithie gũtuĩka mũndũ mwega makĩria, na nĩ ũrĩkenagĩra biũ wĩruti waku.