GĨCUNJĨ KĨA WĨRUTI KĨA 36
RWĨMBO NA. 89 Thikĩrĩria, Athĩka, Ũrathimwo
“Tuĩkai a Kũhingagia Kiugo”
“Tuĩkai a kũhingagia kiugo no to kũigua tu.”—JAK. 1:22.
ŨNDŨ ŨRĨA WARĨRĨIRIO
Gĩcunjĩ gĩkĩ nĩ gĩgũtũteithia gũkũria wendi mũnene wa gũthomaga Kiugo kĩa Ngai o mũthenya, gwĩcũrania ũhoro wakĩo, na gũkĩhũthĩra ũtũũro-inĩ witũ.
1-2. Nĩ kĩĩ gĩtũmaga ndungata cia Jehova ikorũo na gĩkeno? (Jakubu 1:22-25)
JEHOVA na Mũrũ wake Jesu nĩ mendaga tũkorũo na gĩkeno. Mwandĩki wa Thaburi 119:2 aaugire ũũ: “Gũkena nĩ arĩa marũmagĩrĩra iririkania ciake, arĩa mamũcaragia na ngoro yao yothe.” Ningĩ Jesu aaugire ũũ: “Gũkena-rĩ, nĩ arĩa maiguaga kiugo kĩa Ngai na magakĩrũmia!”—Luk. 11:28.
2 Tũrĩ ndungata cia Jehova, nĩ tũkoragwo na gĩkeno. Nĩkĩ? Twĩ na itũmi nyingĩ, no gĩtũmi kĩmwe kĩnene nĩ atĩ nĩ tũthomaga Kiugo kĩa Ngai tũtegũtĩrĩria na tũkerutanĩria kũhũthĩra maũndũ marĩa tweruta.—Thoma Jakubu 1:22-25.
3. Tũgunĩkaga atĩa rĩrĩa twarũmĩrĩra maũndũ marĩa tũrathoma Kiugo-inĩ kĩa Ngai?
3 Nĩ tũgunĩkaga na njĩra itiganĩte nĩ ũndũ wa “kũhingagia kiugo.” Ũndũ ũmwe nĩ atĩ rĩrĩa twahũthĩra maũndũ marĩa tũreruta Kiugo-inĩ kĩa Ngai, nĩ tũkenagia Jehova na ũndũ ũcio ũgatũma tũgĩe na gĩkeno. (Koh. 12:13) Na rĩrĩa twahũthĩra maũndũ marĩa tũrathoma Bibilia-inĩ, nĩ twagagagĩria ũtũũro witũ wa famĩlĩ, na tũgekĩra hinya ũrata witũ hamwe na Akristiano arĩa angĩ. Kwahoteka nĩ wĩyoneire ũndũ ũcio ũtũũro-inĩ waku. Ningĩ nĩ twĩthemaga mathĩna maingĩ marĩa makoraga andũ arĩa matarũmagĩrĩra mawatho ma Jehova. Hatarĩ nganja no twĩtĩkanie na Mũthamaki Daudi ũrĩa waugire ũũ thutha wa kũgweta ũhoro wĩgiĩ mawatho na matuĩro ma Jehova: “Kũmarũmĩrĩra nĩ kũrĩ kĩrathimo kĩnene.”—Thab. 19:7-11.
4. Nĩkĩ ti ũndũ mũhũthũ kũhingia Kiugo kĩa Ngai?
4 Ma nĩ atĩ, ti hingo ciothe ũkoragwo ũrĩ ũndũ mũhũthũ kũhingia Kiugo kĩa Ngai. Tondũ nĩ tũkoragwo na mĩhangʼo mĩingĩ ya o mũthenya, no twage mahinda ma gũthoma na kwĩruta Bibilia nĩguo tũtaũkĩrũo nĩ ũrĩa Jehova arenda twĩke. Nĩ ũndũ ũcio, rekei twarĩrĩrie maũndũ mamwe mangĩtũteithia gũthomaga Bibilia tũtegũtĩrĩria. Ningĩ nĩ tũkwarĩrĩria kĩrĩa kĩngĩtũteithia gwĩcũranagia maũndũ marĩa twathoma, na tuone ũrĩa tũngĩmahũthĩra ũtũũro-inĩ witũ.
BANGA MAHINDA MARĨA ŨRĨTHOMAGA KIUGO KĨA NGAI
5. Nĩ maũndũ ta marĩkũ matũmaga tũkorũo na mĩhangʼo mĩingĩ ũtũũro-inĩ?
5 Ndungata nyingĩ cia Jehova ikoragwo na mĩhangʼo mĩingĩ ũtũũro-inĩ wacio. Nĩ tũhũthagĩra mahinda maingĩ kũhingia maũndũ matiganĩte ma bata marĩa twĩhokeirũo. Kwa ngerekano, aingĩ aitũ nĩ tũrutaga wĩra nĩguo tũhote kũhingia mabataro maitũ na ma famĩlĩ citũ. (1 Tim. 5:8) Ningĩ nĩ kũrĩ Akristiano aingĩ makoragwo makĩrũmbũiya andũ ao arĩa arwaru kana akũrũ. Na ithuothe nĩ tũbataraga kũhũthĩra mahinda tũkĩrũmbũiya ũgima witũ wa mwĩrĩ. Makĩria ma ũguo, kũrĩ o na mawĩra mangĩ tũkoragwo twĩhokeirũo kĩũngano-inĩ. Wĩra ũmwe wa bata twĩhokeirũo nĩ kũhunjia tũrĩ na kĩyo. Tũrĩ na mawĩra macio mothe-rĩ, hihi tũngĩruta kũ mahinda ma gũthoma Bibilia tũtegũtĩrĩria, gwĩcũrania, na kũhũthĩra kĩrĩa tweruta?
6. Ũngĩka atĩa nĩguo ũhotage gũthoma Bibilia ũtegũtĩrĩria? (Ningĩ rora mbica.)
6 Gũthoma Bibilia nĩ ũndũ ũmwe wa “bata makĩria” harĩ ithuĩ tũrĩ Akristiano, kwoguo nĩ tũrabatara kũũiga mbere ũtũũro-inĩ witũ. (Afil. 1:10) Thaburi ya mbere yugaga ũũ igũrũ rĩgiĩ mũndũ ũrĩa ũkoragwo na gĩkeno: “Watho wa Jehova nĩguo ũmũkenagia, na athomaga watho ũcio Wake na mĩheehũ ũtukũ na mũthenya.” (Thab. 1:1, 2) Ũndũ ũcio ũronania atĩ nĩ twagĩrĩirũo kũbanga mahinda ma gũthomaga Bibilia. Hihi nĩ mathaa marĩkũ mega ma gũthomaga Bibilia? Nĩ gũkũringana na mũndũ kĩũmbe. Ũndũ ũrĩa wa bata nĩ gũthuura mathaa marĩa ũrĩhotaga gũthoma ũtegũtĩrĩria. Mũrũ wa Ithe witũ ũmwe wĩtagwo Victor aaugire: “Niĩ nyendaga gũthoma Bibilia rũcinĩ. O na gũtuĩka ndiendete gũũkĩra rũcinĩ tene, nyonaga mahinda macio marĩ mega tondũ matirĩ ihĩngĩca nyingĩ. Hĩndĩ ĩyo meciria makwa makoragwo marĩ manogoku, na kwoguo nĩ nyitaga wega maũndũ marĩa ndĩrathoma.” Kwahoteka o nawe noguo wonaga. No wĩyũrie, ‘Nĩ ihinda rĩrĩkũ rĩega na niĩ rĩa gũthomaga Bibilia?’
Nĩ mathaa marĩkũ mega ma gũthomaga Bibilia? Nĩ rĩ wee ũngĩhota kũmĩthomaga ũtegũtĩrĩria? (Rora kĩbungo gĩa 6)
WĨCŨRANAGIE KĨRĨA WATHOMA
7-8. Nĩ kĩĩ kĩngĩtũma twage kũgunĩka biũ kuumana na maũndũ marĩa tũrathoma? Heana ngerekano.
7 Ma nĩ atĩ, no twĩkore twĩ na mũtugo wa gũthomaga maũndũ maingĩ, no makaga kũrikĩra ngoro-inĩ citũ. Hihi nĩ ũrĩ wathoma ũhoro mũna no thutha wa ihinda inini ũgakora o na ndũraririkana kĩrĩa wathoma? Ithuothe twanekora handũ ta hau. Ũndũ wa kĩeha nĩ atĩ, ũndũ ta ũcio no ũhaanĩke nginya rĩrĩa tũrathoma Bibilia. No tũkorũo twĩigĩire muoroto wa gũthomaga mĩrango ĩigana ũna ya Bibilia o mũthenya. Na ũcio nĩ ũndũ mwega, tondũ nĩ tũbatiĩ kwĩigĩra mĩoroto na tũkerutanĩria kũmĩhingia. (1 Kor. 9:26) O na kũrĩ ũguo, gũthoma Bibilia ti kũiganu. Harĩ na ũndũ ũngĩ tũbatiĩ gwĩka nĩgetha tũgunĩke biũ kuumana na maũndũ marĩa tũrathoma Kiugo-inĩ kĩa Ngai.
8 Ta wĩcirie ngerekano ĩno: Mĩmera nĩ ĩbataraga maĩ nĩgetha ĩhote gũkũra. No kũngiura mbura nene o rĩmwe, tĩri no ũremwo nĩ kũgucia maĩ macio mothe na kwoguo ĩngĩthiĩ na mbere kuura, no yage kũguna mĩmera. Tĩri nĩ ũbataraga ihinda rĩa kũgucia maĩ kahora nĩguo mateithie mĩmera gũkũra. Na njĩra o ta ĩyo, nĩ tũbatiĩ gwĩthema gũthomaga Bibilia ihenya ihenya ũndũ tũkũremwo nĩ kũrikĩria maũndũ marĩa tũrathoma, kũmaririkana, na kũmahũthĩra ũtũũro-inĩ.—Jak. 1:24.
O ta ũrĩa tĩri ũbataraga ihinda rĩa kũgucia maĩ ma mbura nĩguo mĩmera ĩkũre, no taguo o na ithuĩ tũbataraga ihinda rĩa gwĩcũrania na kũhũthĩra maũndũ marĩa twathoma Kiugo-inĩ kĩa Ngai (Rora kĩbungo gĩa 8)
9. Twagĩrĩirũo gwĩka atĩa angĩkorũo tũrĩ na mũtugo wa gũthomaga Bibilia ihenya ihenya?
9 Hihi rĩmwe nĩ wĩkoraga ũgĩthoma Bibilia ihenya ihenya? Ũngĩĩkora ũgĩka ũguo, tithia na ũthome kahora ũndũ ũkũhota gwĩciria maũndũ marĩa ũrathoma kana marĩa warĩkia gũthoma. Ti ũndũ mũritũ gwĩka ũguo. Rĩrĩa twekĩrũo ngoro twĩcũranie, na njĩra hũthũ tũkoragwo tũkĩĩrũo twĩcirie ũhoro wa maũndũ marĩa tũrathoma. No ũthuure kuongerera ihinda rĩaku rĩa kwĩruta nĩguo ũkagĩa na mahinda ma gwĩciria kana gwĩcũrania kĩrĩa wathoma. Kana hihi no ũtue itua rĩa gũthomaga mĩhari ĩtarĩ mĩingĩ nĩgetha ũkahũthĩra ihinda rĩu rĩatigara gwĩciria ũhoro wa kĩrĩa wathoma. Victor ũrĩa ũkũgwetetwo na hau kabere aaugire ũũ: “Niĩ thomaga o gĩcunjĩ kĩnini kĩa Bibilia, ta hihi mũrango ũmwe. Tondũ ndĩmĩthomaga rũcinĩ tene, mũthenya ũcio wothe nĩ hotaga gũikara ngĩĩcũranagia maũndũ marĩa thomire.” Gũtekũmakania ũgũthuura gũthomaga gĩcunjĩ kĩigana atĩa kĩa Bibilia, ũndũ ũrĩa wa bata nĩ gũthoma na njĩra ĩgũgũteithia kũgunĩka biũ kuumana na maũndũ marĩa wathoma.—Thab. 119:97; rora gathandũkũ, “ Cĩũria Ingĩgũteithia Gwĩcũrania.”
10. Heana ngerekano ya ũrĩa ũngĩhũthĩra maũndũ marĩa ũreruta. (1 Athesalonike 5:17, 18)
10 Gũtekũmakania mathaa marĩa ũthuurĩte gũthomaga Bibilia, kana mũigana wa ihinda rĩrĩa ũhũthagĩra kũmĩthoma, tigagĩrĩra atĩ nĩ wecũrania ũrĩa ũngĩhũthĩra maũndũ marĩa wathoma. Wĩyũragie ũũ rĩrĩa ũrathoma, ‘Ingĩhũthĩra ũhoro ũyũ atĩa ihinda-inĩ rĩrĩ kana ihinda rĩũkĩte?’ Kwa ngerekano, ta nĩ tũtue ũthomi-inĩ waku wa Bibilia nĩ wathoma 1 Athesalonike 5:17, 18. (Thoma.) Thutha wa gũthoma mĩhari ĩyo ĩĩrĩ, no ũtithie wĩyũrie wee ũhoyaga maita maigana na wĩitũrũraga harĩ Jehova na gĩkĩro kĩigana atĩa. Ningĩ no ũtaranie irathimo iria ũgĩte nacio, na hihi ũthuure maũndũ matatũ marĩa ũngĩenda gũcokeria Jehova ngatho nĩ ũndũ wamo. O na angĩkorũo ũkũhũthĩra ndagĩka nini tu gwĩcũrania na njĩra ta ĩyo, ũndũ ũcio nĩ ũgũgũteithia gũtaũkĩrũo nĩ Kiugo kĩa Ngai na gũkĩhingia. Ta wĩcirie ũrĩa ũngĩgunĩka ũngĩkaga ũguo o mũthenya rĩrĩa ũrathoma Bibilia. Hatarĩ nganja ũndũ ũcio no ũgũteithie kwĩmenyeria kũhingagia Kiugo kĩa Ngai. No hihi ũngĩka atĩa ũngĩona ta kũrĩ na maũndũ maingĩ ũrabatara kũrutĩra wĩra?
WĨIGĨRE MĨOROTO ŨNGĨHOTA GŨKINYĨRA
11. Nĩ kĩĩ kĩngĩtũma rĩmwe tũigue tũritũhĩirũo twathoma Bibilia? Heana ngerekano.
11 Rĩrĩa tũrathoma Bibilia, no tũigue tũritũhĩirũo nĩ kuona atĩ harĩ na maũndũ maingĩ tũrabatara kũrutĩra wĩra. Kwa ngerekano, ta tua atĩ ũthomi waku wa Bibilia wa ũmũthĩ ũkwaragĩrĩria ũhoro wĩgiĩ kwaga kuonania kĩmenyano. (Jak. 2:1-8) Ũkona atĩ nĩ ũrabatara kwagagĩria ũrĩa ũrũmbũyanagia na andũ arĩa angĩ, na kwoguo ũgatua itua rĩa gwĩka mogarũrũku. Ũcio nĩ ũndũ mwega! Rũciũ narĩo ũgathoma gĩcunjĩ kĩronania bata wa kũgirĩrĩria rũrĩmĩ rwaku. (Jak. 3:1-12) Ũkona atĩ rĩmwe nĩ waragia ciugo itarĩ njega, na kwoguo ũgatua itua rĩa kwaragia ciugo cia gwaka na gwĩkĩra ngoro. Naguo mũthenya ũcio ũngĩ ũgathoma ũhoro wĩgiĩ gwĩthema kũgĩa ũrata na thĩ. (Jak. 4:4-12) Ũkona atĩ nĩ ũrabatara kũhũthĩra ũũgĩ ũgĩthuura maũndũ ma gwĩkenia. Gũgĩkinya thikũ ya kana, ũkaigua ũritũhĩirũo nĩ maũndũ marĩa mothe ũrabatara kũrutĩra wĩra.
12. Wagĩrĩirũo kwaga gũkua ngoro nĩkĩ ũngĩona atĩ he maũndũ maingĩ ũrabatara kũrutĩra wĩra thutha wa gũthoma Bibilia? (Ningĩ rora kohoro ka magũrũ-inĩ.)
12 Ũngĩona atĩ harĩ na maũndũ maingĩ ũrabatara kũrutĩra wĩra, ndũgakue ngoro. Ũndũ ũcio ũronania atĩ wĩ na ngoro njega. Mũndũ mwĩnyihia na wĩ na ngoro njega athomaga Maandĩko arĩ na muoroto wa kuona kũrĩa arabatara kũrutĩra wĩra. a Ningĩ ririkana atĩ kwĩhumba “ũmũndũ mwerũ” nĩ ũndũ wa gũthiĩ na mbere. (Kol. 3:10) Hihi nĩ kĩĩ kĩngĩgũteithia gũthiĩ na mbere kũhingagia Kiugo kĩa Ngai?
13. Ũngĩĩigĩra atĩa muoroto ũngĩhota gũkinyĩra? (Ningĩ rora mbica.)
13 Handũ ha kũgeria kũrutĩra wĩra maũndũ mothe ihinda-inĩ rĩmwe, wĩigĩre muoroto ũngĩhota gũkinyĩra. (Thim. 11:2) No ũgerie kũhũthĩra njĩra ĩno: Andĩka maũndũ marĩa mothe ũrabatara kũrutĩra wĩra, ũcoke ũthuure ũndũ ũmwe kana merĩ marĩa ũkwambia namo, namo macio mangĩ ũrĩmarutĩra wĩra thutha-inĩ. Nĩ maũndũ ta marĩkũ ũngĩambia namo?
Handũ ha kũgeria kũrutĩra wĩra maũndũ mothe ihinda-inĩ rĩmwe thutha wa gũthoma Bibilia, wĩigĩre muoroto ũngĩhota gũkinyĩra. No wambie na ũndũ ũmwe kana merĩ (Rora kĩbungo gĩa 13-14)
14. Nĩ maũndũ ta marĩkũ ũngĩambĩrĩra kũrutĩra wĩra?
14 No ũthuure kwambĩrĩria na ũndũ ũrĩa ũrona ũrĩ mũhũthũ kũrutĩra wĩra, kana ũndũ ũrĩa ũrona ũgĩbatarania makĩria. Wathuura ũndũ ũrĩa ũkwamba kũrutĩra wĩra, ĩka ũthuthuria mabuku-inĩ maitũ, hihi ũkĩhũthĩra Ũteithio wa Ũthuthuria Harĩ Aira a Jehova kana Fahirisi. Hoya Jehova akũhe “wendi o na ũhoti wa gwĩka maũndũ,” nĩguo ũhote kũhingia muoroto waku. (Afil. 2:13) Thutha ũcio ũhũthĩre maũndũ marĩa weruta. Ũngĩona atĩ nĩ wahota kũhingia ũndũ ũrĩa ũrabangĩte kũrutĩra wĩra, no ũigue ũkĩhĩahĩa gũthuura ũndũ ũngĩ ũrabatara kwagagĩria. Ma nĩ atĩ, mũndũ angĩona nĩ ahota gwĩka mogarũrũku kana kũrutĩra wĩra ngumo ĩmwe ya Gĩkristiano, no ũkorũo ũrĩ ũndũ mũhũthũ harĩ we kũrutĩra wĩra ũndũ ũngĩ ũrabatarania.
REKE KIUGO KĨA NGAI ‘KĨRUTAGE WĨRA THĨINĨ WAKU’
15. Ndungata cia Jehova ikoragwo irĩ ngũrani atĩa na andũ angĩ arĩa maugaga nĩ mathomaga Bibilia? (1 Athesalonike 2:13)
15 Andũ amwe maugaga atĩ manathoma Bibilia maita maingĩ. No hihi nĩ metĩkĩtie biũ ũrĩa yugaga? Hihi nĩ marũmagĩrĩra Kiugo kĩa Ngai kana makareka kĩgarũre mũtũũrĩre wao? Ũndũ wa kĩeha nĩ atĩ andũ aingĩ matiĩkaga ũguo. No ithuĩ tũrĩ ngũrani tondũ o ta Akristiano a karine ya mbere, twamũkagĩra ndũmĩrĩri ya Bibilia ‘o ta ũrĩa ĩtariĩ na ma, ĩrĩ kiugo kĩa Ngai.’ Makĩria ma ũguo nĩ twĩrutanagĩria kũreka Kiugo kĩa Ngai kĩrute wĩra ũtũũro-inĩ witũ.—Thoma 1 Athesalonike 2:13.
16. Nĩ kĩĩ kĩngĩtũteithia kũhingagia Kiugo kĩa Ngai?
16 Rĩmwe ti hahũthũ gũthoma Kiugo kĩa Ngai na gũkĩhũthĩra ũtũũro-inĩ witũ. No twĩkore tũkĩaga mahinda ma gũgĩthoma kana tũgagĩthoma ihenya ihenya tũtegwĩcũrania kĩrĩa twathoma. Ningĩ no tũigue tũritũhĩirũo nĩ maũndũ marĩa mothe tũrabatara kũrutĩra wĩra. Gũtekũmakania ũritũ ũrĩa ũracemania naguo, no ũhote kũũtooria kũgerera ũteithio wa Jehova. Kwoguo rekei tũtue itua rĩa gwĩtĩkĩra ũteithio wake, nĩgetha tũtigatuĩke andũ a kũigua tũgacoka tũkariganĩrũo, ĩndĩ tũtuĩke a kũhingagia Kiugo gĩake. Hatarĩ nganja, o ũrĩa tũrĩthomaga Kiugo kĩa Ngai na tũgakĩhũthĩra ũtũũro-inĩ witũ, noguo tũrĩgĩaga na gĩkeno makĩria.—Jak. 1:25.
RWĨMBO NA. 94 Gũcokia Ngatho nĩ Kiugo kĩa Ngai
a Wĩrorere video ya Ũrĩa Andũ a Riika Rĩaku Maroiga—Gũthoma Bibilia thĩinĩ wa jw.org/ki.
