Tũtibatiĩ gwĩciria atĩ tondũ arutwo acio 70 matiarĩ ho rĩrĩa Jesu aambĩrĩirie Irio cia Hwaĩ-inĩ cia Mwathani, nĩ kuuga atĩ nĩ maatigĩte gwĩtĩkĩrĩka harĩ Jesu kana atĩ nĩ kũmũtiganĩria maamũtiganĩirie. Ũrĩa kũrĩ nĩ atĩ, Jesu no kwenda eendaga gũkorũo hamwe na atũmwo ake ihinda-inĩ rĩu.

Arutwo arĩa 12 o hamwe na acio 70 nĩ meetĩkĩrĩkĩte harĩ Jesu. Jesu aambire agĩthuura arũme 12 kuuma harĩ arutwo ake aingĩ, na akĩmeeta atũmwo. (Luk. 6:12-16) Aarĩ Galili rĩrĩa eetire “arĩa Ikũmi na Erĩ” na “akĩmatũma makahunjie ũhoro wĩgiĩ Ũthamaki wa Ngai na makahonanie.” (Luk. 9:1-6) Thutha ũcio arĩ Judea nĩ aathuurire “angĩ 70 na akĩmatũma marĩ erĩ erĩ.” (Luk. 9:51; 10:1) Kwoguo Jesu nĩ aarĩ na arũmĩrĩri icigo-inĩ itiganĩte arĩa maahunjagia ũhoro wake.

Ayahudi arĩa maatuĩkĩte arutwo a Jesu no maakũngũyagĩra Pasaka o mwaka, hihi marĩ hamwe na famĩlĩ ciao. (Tham. 12:​6-11, 17-20) Jesu arĩ hakuhĩ kũũragwo, nĩ aathiire Jerusalemu hamwe na atũmwo ake. No ndaacokanĩrĩirie arutwo ake othe a kuuma Judea, Galili, na Perea nĩguo makũngũĩre Pasaka hamwe. Hatarĩ nganja Jesu eendaga gũkorũo hamwe na atũmwo ake ihinda-inĩ rĩu. Aameerire ũũ: “Nĩ ngoretwo ngĩĩrirĩria mũno kũrĩanĩra Pasaka ĩno na inyuĩ itananyamarĩka.”—Luk. 22:15.

Jesu aarĩ na gĩtũmi kĩega gĩa gwĩka ũguo. Aatigĩtie ihinda inini akue arĩ “gatũrũme ka Ngai karĩa keheragia mehia ma kĩrĩndĩ gĩa gũkũ thĩ!” (Joh. 1:29) Ũndũ ũcio ũngĩekĩkĩire Jerusalemu, kũrĩa Ngai aakoretwo akĩrutĩrũo magongona kwa ihinda iraihu. Gatũrũme ka Pasaka nĩ kaaririkanagia Aisiraeli atĩ Jehova nĩ aamakũũrĩte kuuma Misiri. No igongona rĩa Jesu nĩ rĩngĩahingirie ũndũ wa bata o na makĩria, tondũ rĩngĩakũũrire andũ othe kuuma harĩ mehia na gĩkuũ. (1 Kor. 5:​7, 8) Nĩ ũndũ wa igongona rĩa Jesu, arĩa Ikũmi na Erĩ nĩ maatuĩkire gĩcunjĩ kĩa mũthingi wa kĩũngano gĩa Gĩkristiano. (Ef. 2:20-22) Ningĩ itũũra itheru rĩa Jerusalemu rĩkoragwo na “mahiga 12 ma mũthingi” marĩa makoragwo mandĩkĩtwo “marĩĩtwa 12 ma atũmwo arĩa 12 a Gatũrũme.” (Kũg. 21:​10-14) Kwoguo atũmwo acio ehokeku nĩ maarĩ na itemi inene harĩ kũhingia muoroto wa Ngai. Nĩ ũndũ ũcio no tũtaũkĩrũo kĩrĩa gĩatũmire Jesu ende gũkorũo hamwe nao agĩkũngũĩra Pasaka ĩyo ya mũthia, na gĩkũngũĩro-inĩ kĩa Irio cia Hwaĩ-inĩ cia Mwathani kĩrĩa kĩarũmĩrĩire thutha ũcio.

O na gũtuĩka arutwo acio 70 hamwe na arutwo arĩa angĩ matiarĩ gĩkũngũĩro-inĩ kĩu, arĩa othe mangĩakorirũo marĩ ehokeku nĩ mangĩagunĩkire kuumana na gĩkũngũĩro kĩu Jesu aambĩrĩirie kĩa Irio cia Hwaĩ-inĩ cia Mwathani. Arĩa othe mangĩatuĩkire Akristiano aitĩrĩrie maguta thutha ũcio nĩ mangĩaingĩrire thĩinĩ wa kĩrĩkanĩro kĩa ũthamaki kĩrĩa Jesu aagweteire atũmwo ake ũtukũ ũcio.—Luk. 22:29, 30.