1. Kuuma o kĩambĩrĩria-rĩ, nĩ ũndũ ũrĩkũ ũkoretwo ũkĩoneka mawĩra-inĩ ma Ngai?

JEHOVA ombire Jesu mbere ya kũũmba indo iria ingĩ ciothe. Kuuma o kĩambĩrĩria, Jehova na Jesu makoretwo marĩ na ũrũmwe. Jesu ooigire ũũ: “Hĩndĩ ĩyo ndakoragwo hakuhĩ na Mwathani, ngĩmũteithĩrĩria gũthondeka maũndũ, ngamũkenagia mũthenya o mũthenya.” (Thim. 8:​30, The Holy Bible in Gĩkũyũ Language) Jehova na Jesu maarutithanirie wĩra marĩ na ũrũmwe na nĩ ũndũ ũcio makĩũmba indo itiganĩte iria tuonaga ũmũthĩ. O nacio ndungata cia Ngai nĩ ikoretwo ikĩrutithania wĩra irĩ na ũrũmwe. Kwa ngerekano Nuhu na famĩlĩ yake nĩ maarutithanirie wĩra marĩ na ũrũmwe magĩaka thabina, nao Aisiraeli makĩrutithania wĩra na ũrũmwe harĩ kwamba, kwambũra, na gũthamia hema ya gũtũnganwo rĩrĩa maarĩ werũ-inĩ. Ningĩ thĩinĩ wa hekarũ, nĩ maainagĩra Ngai marĩ na ũrũmwe nyĩmbo njega cia kũmũgooca. Maũndũ macio mothe maahotekaga nĩ ũndũ wa kũnyitanĩra.​—Kĩam. 6:​14-16, 22; Ndar. 4:​4-32; 1 Maũ. 25:​1-8.

2. (a) Nĩ ũndũ ũrĩkũ woonekaga wega thĩinĩ wa kĩũngano gĩa tene gĩa Gĩkristiano? (b) Nĩ ciũria irĩkũ tũkwarĩrĩria?

² O na Akristiano a tene nĩ maarutithanagia wĩra marĩ na  ũrũmwe rungu rwa ũtongoria wa Jesu arĩ we mũtwe wa kĩũngano. Mũtũmwo Paulo akĩaria ũhoro wa Akristiano acio aitĩrĩrie maguta oigire atĩ, o na angĩkorũo o ũmwe wao aarĩ na “iheo mwanya mwanya,” “ũtungata mwanya mwanya,” na “mawĩra mwanya mwanya,” othe maarĩ o ‘mwĩrĩ ũmwe.’ (Thoma 1 Akorintho 12:​4-6, 12.) Ĩ narĩo ũmũthĩ? Tũngĩonania atĩa atĩ tũrĩ na ũrũmwe tũkĩhunjia ũhoro ũrĩa mwega? Na tũngĩonania atĩa atĩ tũrĩ na ũrũmwe thĩinĩ wa kĩũngano na thĩinĩ wa famĩlĩ?

3. Nĩ kĩoneki kĩrĩkũ Johana oonirio?

³ Hakuhĩ mũico-inĩ wa karine ya mbere, mũtũmwo Johana nĩ oonirio kĩoneki kĩa araika mũgwanja makĩhuha tũrumbeta. Rĩrĩa mũraika wa gatano aahuhire karumbeta gake, Johana akĩona “njata” ĩkĩgwa kuuma igũrũ. Njata ĩyo yarĩ na cabi guoko-inĩ kwayo. Ĩkĩhingũra irima rĩtarĩ gĩturi, narĩo rĩkiuma ndogo nene, na thĩinĩ wa ndogo ĩyo gũkiuma ngigĩ nyingĩ mũno. Handũ ha gũtharĩkĩra mĩmera, ngigĩ icio cia mũhaano ciatharĩkĩire ‘andũ arĩa mataarĩ na mũhũũri wa Ngai mathiithi-inĩ mao.’ (Kũg. 9:​1-4) Johana nĩ aamenyete ũrĩa ngigĩ nyingĩ cingĩthũkia mĩmera mĩingĩ tondũ nĩ ciekĩte ũguo thĩinĩ wa Misiri matukũ-inĩ ma Musa. (Tham. 10:​12-15) Ngigĩ icio cia mũhaano iria Johana oonetio irũgamĩrĩire Akristiano aitĩrĩrie maguta arĩa mahunjagia ndũmĩrĩri ndũrũ ya matuĩro ma Jehova. Mahinda-inĩ maya andũ milioni nyingĩ arĩa marĩ na kĩĩrĩgĩrĩro gĩa gũgaatũũra gũkũ thĩ nĩ manyitanagĩra nao wĩra-inĩ ũcio. Wĩra ũcio nĩ ũteithĩtie andũ aingĩ makoima ndini-inĩ cia maheeni na nĩ ũndũ ũcio makeyohora kuuma kũrĩ ũtongoria wa Shaitani.

4. Nĩ wĩra ũrĩkũ andũ a Jehova marĩ naguo, na nĩ kĩĩ kĩngĩmateithia kũũruta?

⁴ Andũ a Jehova marĩ na wĩra mũnene wa kũhunjia ‘ũhoro ũrĩa mwega’ thĩinĩ wa thĩ mũico wa mũtabarĩre ũyũ ũtanakinya. (Mat. 24:14; 28:​19, 20) Wĩra ũcio nĩ wa gwĩta “ũrĩa wothe mũnyotu” oke anyue “maĩ ma muoyo hatarĩ marĩhi.” (Kũg. 22:17) Tũrĩ ahunjia thĩinĩ wa kĩũngano-rĩ, tũngĩhota atĩa kũgaacĩra harĩ kũruta wĩra ũcio? Nĩguo tũhote gwĩka ũguo tũkũbatara gũkorũo ‘tũkĩnyitanĩra wega’ mũndũ na ũrĩa ũngĩ.​—Ef. 4:16.

5, 6. Nĩ na njĩra irĩkũ tũkoragwo na ũrũmwe tũkĩhunjia ũhoro ũrĩa mwega?

⁵ Nĩguo tũhunjĩrie andũ aingĩ o ũrĩa kũngĩhoteka tũkũbatara kũruta wĩra ũcio na mũbango na nĩkĩo tũheagwo ũtongoria. Ũtongoria ũrĩa tũheagwo ciũngano-inĩ thĩinĩ wa thĩ yothe nĩ ũtũhaaragĩria nĩguo tũkaruta wĩra ũcio tũrĩ na ũrũmwe. Thutha wa gwĩka mũcemanio wa gũthiĩ kũhunjia tumagaraga tũgathiĩ kũhunjĩria andũ ndũmĩrĩri ya Ũthamaki. Tũhunjagia ndũmĩrĩri ĩyo na tũnua twitũ na kũgerera mabuku milioni nyingĩ marĩa makoragwo na ũhoro umĩte Bibilia-inĩ. Hihi nĩ wĩrutanagĩria kũrũmĩrĩra ũtongoria wa kũhunjia rĩrĩa kũrĩ na kambĩini cia mwanya cia kũhunjia. Angĩkorũo nĩ wĩkaga ũguo-rĩ, ũkoragwo ũkĩnyitanĩra na andũ milioni nyingĩ thĩinĩ wa thĩ yothe arĩa marahunjia ndũmĩrĩri o ta ĩyo. Ningĩ nĩ ũnyitanagĩra na araika arĩa marateithĩrĩria andũ a Ngai kũhunjia ũhoro ũrĩa mwega.​—Kũg. 14:6.

⁶ Na githĩ tũtikenaga mũno rĩrĩa tũrathoma thĩinĩ wa Kitabu cha Mwaka maũndũ marĩa tũhingĩtie thĩinĩ wa thĩ yothe! Ningĩ ta wĩcirie ũrũmwe ũrĩa tũkoragwo naguo thĩinĩ wa thĩ yothe rĩrĩa tũreta andũ moke igomano citũ. Thĩinĩ wa igomano icio nĩ tũthikagĩrĩria mĩario mĩega mũno ya Bibilia na tũkerorera drama na cionereria. Icunjĩ icio ciothe itwĩkagĩra ngoro tũtungatagĩre Jehova na ngoro itũ yothe. Gũkũngũĩra gĩkuũ kĩa Jesu o nakuo nĩ gũtũmaga tũkorũo na ũrũmwe. Nĩ ũndũ wa gwathĩkĩra ũtongoria  wa Jesu na kuonania ngatho citũ nĩ ũndũ wa wega ũrĩa Jehova aatuonirie, o mwaka ithuothe nĩ tũcemanagia Nisani 14 thutha wa riũa gũthũa tũgakũngũĩra gĩkuũ kĩa Jesu. (1 Kor. 11:​23-26) Na to Aira a Jehova arĩa mabatithĩtio tu macemanagia mũthenya ũcio. Ciumia cigana ũna mbere ya Kĩririkano nĩ twĩrutanagĩria mũno gwĩta andũ aingĩ o ũrĩa kũngĩhoteka, moke tũnyitanĩre nao thĩinĩ wa mũcemanio ũcio wa bata.

7. Nĩ ũndũ ũrĩkũ tũhingagia nĩ ũndũ wa kũrutithania wĩra tũrĩ na ũrũmwe?

⁷ Ngigĩ ĩmwe ndĩngĩhingia ũndũ mũnene ĩrĩ iiki. O ũndũ ũmwe na ũcio-rĩ, kĩyo gitũ tũrĩ mũndũ ũmwe ũmwe no kĩage kũhingia ũndũ mũnene. No tondũ tũrutithanagia wĩra hamwe, nĩ tũhotaga kũhunjĩria andũ milioni nyingĩ ũhoro wa Jehova na tũgateithia amwe metĩkĩre kũmũgooca na kũmũtungatĩra! O na kũrĩ ũguo, ũcio toguo ũndũ ũrĩa ũtũmaga andũ a Jehova makorũo na ũrũmwe.

8, 9. (a) Nĩ ngerekano ĩrĩkũ Paulo aahũthĩrire kũruta Akristiano maikarage marĩ na ũrũmwe? (b) Tũngĩonania ũnyitanĩri atĩa thĩinĩ wa kĩũngano?

⁸ Thĩinĩ wa marũa marĩa Paulo aandĩkĩire Aefeso nĩ aamataarĩirie ũrĩa kĩũngano gĩkoragwo kĩbangĩtwo na ũrĩa andũ othe thĩinĩ wakĩo magĩrĩirũo nĩ ‘gũkũra maũndũ-inĩ mothe.’ (Thoma Aefeso 4:​15, 16.) Nĩ kĩĩ kĩngĩtũteithia tũrĩ mũndũ ũmwe ũmwe tũkinyĩre muoroto ũcio? Paulo aahũthĩrire ngerekano ya mwĩrĩ wa mũndũ gũtaarĩria atĩ o Mũkristiano o Mũkristiano no ateithie kĩũngano gĩkorũo na ũrũmwe na kĩrũmĩrĩre Jesu arĩ we mũtwe wa kĩũngano. Oigire atĩ ciĩga ciothe cia mwĩrĩ inyitanagĩra hamwe na igateithio ‘nĩ marũngo mothe marĩa maũheaga kĩrĩa ũbataraga.’ Nĩ ũndũ ũrĩkũ tũngĩka tũrĩ mũndũ o mũndũ o na angĩkorũo tũrĩ ethĩ kana tũrĩ akũrũ, andũ marĩ hinya kana matarĩ hinya, nĩguo kĩũngano gĩkorũo kĩrĩ na hinya na ũrũmwe?

⁹ Twagĩrĩirũo gwathĩkĩra na gũtĩa athuri tondũ nĩo Jesu amũrĩte matũtongoragie thĩinĩ wa kĩũngano. (Ahib. 13:​7, 17) Ti hingo ciothe arĩ ũndũ mũhũthũ gwĩka ũguo. O na kũrĩ ũguo no tũhoe Jehova atũteithie. Roho wake mũtheru no ũtũteithie tũhote kũnyita mbaru mĩbango ya kĩũngano na ngoro itũ yothe. Nĩ ũndũ ũcio, rĩmwe na rĩmwe tũngĩigua hinya kũrũmĩrĩra ũtongoria ũrĩa tũraheo, twagĩrĩirũo nĩ gwĩcũrania ũrĩa kĩũngano gĩgũkorũo na ũrũmwe tũngĩĩnyihia na tũnyitanĩre na athuri. Makĩria ma ũguo, kuonania ũnyitanĩri maũndũ-inĩ ta macio no gũtũteithie tũthiĩ na mbere kwendana makĩria.

10. Ndungata cia kĩũngano iteithagia kĩũngano atĩa gũkorũo na ũrũmwe? (Rora mbica kĩambĩrĩria-inĩ gĩa gĩcunjĩ gĩkĩ.)

¹⁰ Wĩra ũrĩa ndungata cia kĩũngano irutaga nĩ ũteithagia mũno harĩ gũtũma kĩũngano gĩkorũo na ũrũmwe. Gũtekũmakania marĩ na ũkũrũ ũrĩkũ, ariũ a Ithe witũ acio nĩ merutanagĩria mũno kũruta mawĩra marĩa magunaga andũ othe. Kwa ngerekano, nĩ mateithagĩrĩria athuri na njĩra ya gũtigĩrĩra atĩ tũrĩ na mabuku ma kũigana ma kũhũthĩra ũtungata-inĩ. Makĩria ma ũguo nĩ marũmbũyanagia na ũtheru na ũramati wa Nyũmba ya Ũthamaki na makanyita ũgeni arĩa maroka mĩcemanio-inĩ itũ. Rĩrĩa tũranyitanĩra nao, nĩ tũteithagia harĩ gũtũma maũndũ mathiĩ wega thĩinĩ wa kĩũngano.​—Ringithania Atũmwo 6:​3-6.

11. Nĩ atĩa andũ ethĩ mangĩka nĩguo mateithie kĩũngano kĩao gĩkorũo na ũrũmwe?

¹¹ Athuri amwe makoretwo makĩruta mawĩra ma kĩũngano kwa ihinda rĩa mĩaka mĩingĩ. No nĩ ũndũ wa ũkũrũ rĩu no maremwo kũhingia maũndũ maingĩ ta ũrĩa mekaga tene, na nĩ ũndũ ũcio nĩ kũbataraga ũgarũrũku. Ariũ a Ithe witũ arĩa ethĩ no  mamateithĩrĩrie mũno. O na gũtuĩka matirĩ na ũmenyeru mũingĩ, mangĩmenyerio no mehokerũo maũndũ mangĩ. Na githĩ ti ũndũ mwega mũno rĩrĩa ndungata cia kĩũngano irerutanĩria kwagĩrĩra gũtuĩka athuri! (1 Tim. 3:​1, 10) Ariũ a Ithe witũ amwe ethĩ nĩ merutanĩirie mũno nginya magatuĩka arori a mũthiũrũrũko na nĩ ũndũ ũcio magakorũo magĩtungatĩra aarĩ na ariũ a Ithe witũ thĩinĩ wa ciũngano nyingĩ. Na githĩ tũtikenaga mũno nĩ wĩra ũrĩa andũ ethĩ marutaga?​—Thoma Thaburi 110:3; Kohelethu 12:1.

12, 13. Nĩ kĩĩ kĩrĩteithagia andũ othe thĩinĩ wa famĩlĩ kũnyitanagĩra?

¹² Tũngĩteithia andũ a famĩlĩ citũ atĩa kũnyitanagĩra? Andũ aingĩ nĩ meyoneire atĩ gũkorũo na ũthathaiya mwega wa famĩlĩ o kiumia nĩ gũteithĩtie mũno kũrehe ũrũmwe gatagatĩ-inĩ ka andũ othe thĩinĩ wa famĩlĩ. Tondũ mahinda-inĩ macio andũ maragĩrĩria maũndũ ma kĩĩroho-rĩ, ũndũ ũcio nĩ ũteithagia kũnyitithania famĩlĩ. Ningĩ andũ no memenyerie njĩra cia kũhunjia na ũndũ ũcio no ũmateithie gũkorũo mehaarĩirie wega kũhunjia. Rĩrĩa o mũndũ thĩinĩ wa famĩlĩ araigua arĩa angĩ makĩaria ũhoro wa Kiugo kĩa Ngai na akona atĩ othe nĩ mendete Jehova na nĩ marenda kũmũkenia, ũndũ ũcio nĩ ũtũmaga makuhanĩrĩrie makĩria.

¹³ Mũthuri na mũtumia mangĩka atĩa nĩguo makorũo na ũrũmwe na nĩ ũndũ ũcio magoocithagie Jehova? Angĩkorũo mũthuri na mũtumia nĩ ndungata njĩhokeku cia Jehova, nĩ marĩkoragwo na gĩkeno na ũrũmwe thĩinĩ wa kĩhiko kĩao. Magĩrĩirũo o mũndũ kuonagia ũrĩa ũngĩ wendo o ta ũrĩa Iburahimu na Sara, Isaaka na Rebeka, na Elikana na Hana meekaga. (Kĩam. 26:8; 1 Sam. 1:​5, 8; 1 Pet. 3:​5, 6) Meka ũguo nĩ marĩkoragwo na ũrũmwe o ene na magakuhĩrĩria Jehova makĩria.​—Thoma Kohelethu 4:12.

14. Angĩkorũo ũrĩa mũhikanĩtie nake ndaratungatĩra Jehova-rĩ, ũngĩka atĩa nĩguo kĩhiko gĩaku gĩkorũo na ũrũmwe?

¹⁴ Akristiano nĩ magĩrĩirũo gwĩthema kuohanio icoki rĩmwe na andũ arĩa matarĩ etĩkia. (2 Kor. 6:14) Ĩ nao aarĩ na ariũ a Ithe witũ arĩa makoragwo thĩinĩ wa famĩlĩ igayũkanĩte kĩndini? Ndungata imwe cia Jehova ciamenyire ũhoro wa ma irĩ thĩinĩ wa kĩhiko na nĩ ũndũ ũcio arĩa mahikanĩtie nao ti Aira a Jehova. O na kũrĩ ũguo, kũhũthĩra mootaro ma Bibilia no kũrehe ũrũmwe thĩinĩ wa famĩlĩ ta icio. Nĩguo ũndũ ũcio ũhoteke, Mũkristiano ekũbatara kwĩrutanĩria biũ kũnyitanĩra na ũcio ũtetĩkĩtie ĩndĩ etheme kuuna watho wa Ngai. Ũcio ti ũndũ mũhũthũ ĩndĩ no ũkorũo na moimĩrĩro mega. Ningĩ gwathĩkĩra mootaro ma Bibilia no ũkorũo ũtarĩ ũndũ mũhũthũ mũndũ ũrĩa mũhikanĩtie nake angĩtiga Jehova. Ũndũ ũcio nĩ wakorire mwarĩ wa Ithe witũ ũmwe wĩtagwo Mary. Marĩ na mũthuriwe David maatungatagĩra Jehova marĩ hamwe, ĩndĩ mĩaka 25 mĩhĩtũku mũthuriwe nĩ aatigire gũthiĩ mĩcemanio ya kĩũngano. Mary aathire o na mbere gũthiaga mĩcemanio na igomano, na akĩĩrutanĩria kũhũthĩra mootaro ma Bibilia famĩlĩ-inĩ yao, o hamwe na kũruta ciana ciao ithathatũ. Rĩrĩa ciana ciagimarire na ikiuma mũciĩ, Mary nĩ aaiguaga ihooru mũno. David agĩcoka akĩambĩrĩria gũthomaga ngathĩti iria Mary aamũtigagĩra. Thutha wa ihinda akĩambĩrĩria gũthiĩ mĩcemanio na nĩ aakoraga kamwana ka mũrũwe karĩa kaarĩ na mĩaka itandatũ kamũigĩire gĩtĩ. David angĩagire gũthiĩ mĩcemanio, kamwana kau kamwĩraga, “Guka ũmũthĩ ndinakuona mĩcemanio-inĩ.” Rĩu David atungatagĩra Jehova arĩ na gĩkeno, na Mary nĩ akenaga mũno nĩ kuona atĩ mekaga ũguo marĩ hamwe.

15. Andũ arĩa maahikanirie tene mangĩteithia arĩa mataahikanirie tene atĩa?

¹⁵ Tondũ Shaitani nĩ aratharĩkĩra famĩlĩ  mũno ũmũthĩ-rĩ, harĩ bata ndungata ciothe cia Jehova ciĩrutanĩrie kũnyitanĩra thĩinĩ wa famĩlĩ. Gũtekũmakania ũkoretwo thĩinĩ wa kĩhiko ihinda rĩigana atĩa, wĩcirie ũrĩa ũngiuga kana ũngĩka nĩguo wĩkĩre kĩhiko gĩaku hinya. Arĩa maikarĩte thĩinĩ wa kĩhiko ihinda iraya no mateithie arĩa mataahikanirie tene. Rĩmwe na rĩmwe no mũnyitage ũgeni arĩa mataahikanirie tene makanyitanĩra na inyuĩ ũthathaiya-inĩ wa famĩlĩ. Andũ acio rĩrĩa marĩ na inyuĩ nĩ mekwĩyonera atĩ wendo na ũrũmwe nĩ cia bata mũno gũtekũmakania andũ maikarĩte kĩhiko-inĩ mĩaka ĩigana.​—Tit. 2:​3-7.

16, 17. Nĩ ũndũ ũrĩkũ andũ a Jehova matanyaga ihinda rĩrĩa rĩroka?

¹⁶ Ta hũũra mbica Aisiraeli a tene makĩgooca Jehova hĩndĩ ya gĩathĩ hekarũ-inĩ yake thĩinĩ wa Jerusalemu. Nĩguo makinye kũu, maabataraga kũnyitanĩra harĩ kũhaarĩria rũgendo, gũteithania marĩ rũgendo-inĩ, na kũnyitanĩra ũthathaiya-inĩ thĩinĩ wa hekarũ. (Luk. 2:​41-44) Tondũ o na ithuĩ tũrĩ rũgendo-inĩ twerekeire thĩ njerũ, tũkũbatara gũkorũo na ũrũmwe na twĩrutanĩrie biũ kũnyitanĩra. Hihi nĩ ũrona ta harĩ handũ ũngĩbatara kũrutĩra wĩra?

¹⁷ Andũ thĩinĩ wa thĩ ĩno nĩ makoragwo na thogothogo na makarũa. O na kũrĩ ũguo ithuĩ nĩ tũkenaga mũno tondũ Jehova nĩ atũteithĩtie kũgĩa na thayũ na gũtaũkĩrũo nĩ ũhoro wa ma! Andũ ake thĩinĩ wa thĩ yothe maramũthathaiya na njĩra ĩrĩa endaga. Na makĩria matukũ-inĩ maya ma kũrigĩrĩria andũ a Jehova marĩ na ũrũmwe gũkĩra hĩndĩ ĩngĩ o yothe. O ta ũrĩa Mika na Isaia maarathĩte, tũraambata “kĩrĩma-inĩ kĩa Jehova,” tũrĩ hamwe. (Isaia 2:​2-4; thoma Mika 4:2-4.) Nĩ tũgaakorũo na gĩkeno kĩnene rĩrĩa andũ othe thĩinĩ wa thĩ magaakorũo makĩnyitanĩra hamwe marĩ na ũrũmwe!