1-2. Nĩ njĩra ĩrĩkũ njega ya gũthoma na kwĩruta Bibilia? Heana ngerekano.

 TA WĨCIRIE ũkĩenda kũgũra nyũmba. Nĩ maũndũ marĩkũ ũngĩenda kwamba kuona ũtanatua itua rĩu? Hihi no ũiganĩre ũngĩonio mbica tu ya nyũmba ĩyo? Hatarĩ nganja ũngĩenda gũtigĩrĩra nĩ wathiĩ kuona nyũmba ĩyo, ũingĩre rumu ciothe ũkĩbaaraga maũndũ mothe. O na no warie na mũndũ ũĩ wega ũrĩa nyũmba ĩyo yakirũo. Ma nĩ atĩ no wende gũtigĩrĩra atĩ nĩ wamenya maũndũ mothe megiĩ nyũmba ĩrĩa ũrenda kũgũra.

² Ũguo no taguo tũbatiĩ gwĩka rĩrĩa tũrathoma kana kwĩruta Bibilia. Mũthomi ũmwe wa Bibilia aaugire atĩ Bibilia no ĩringithanio na “nyũmba nene ndaihu na igũrũ, yakĩtwo mĩthingi-inĩ mĩrũmu.” Gũkĩrĩ ũguo-rĩ, tũngĩtaũkĩrũo atĩa nĩ ndũmĩrĩri yothe ĩrĩa ĩrĩ Bibilia-inĩ? Ũngĩmĩthomaga ihenya ihenya, ũrĩmenyaga tu o “maũndũ marĩa ma mũthingi megiĩ ndũmĩrĩri theru cia Ngai.” (Ahib. 5:12) No o ta ũrĩa ũbataraga kũingĩra nyũmba nĩgetha ũmĩmenye wega, ũbatiĩ gũthuthuria Bibilia na kinyi nĩgetha ũtaũkĩrũo nĩyo wega. Njĩra ĩrĩa njega ya kwĩruta Bibilia, nĩ kũrora ũrĩa icunjĩ itiganĩte cia ndũmĩrĩri yayo ikoragwo ikonainie. Wĩrutanagĩrie gũtaũkĩrũo nĩ ma iria wĩtĩkĩtie, na ningĩ kĩrĩa gĩtũmaga ũciĩtĩkie.

3. Nĩ ũndũ ũrĩkũ mũtũmwo Paulo eekĩrire Akristiano ngoro mekage, na nĩkĩ? (Aefeso 3:​14-19)

³ Nĩgetha tũtaũkĩrũo wega biũ nĩ ndũmĩrĩri yothe ya Kiugo kĩa Ngai, no mũhaka twĩrute ma ndikĩru cia Bibilia. Mũtũmwo Paulo nĩ eekĩrire ngoro aarĩ na ariũ a Ithe merute Kiugo kĩa Ngai na kĩyo, nĩguo “[mataũkĩrũo] wega nĩ wariĩ, ũraihu, ũraihu wa na igũrũ na ũriku” wa ũhoro wa ma. Gwĩka ũguo nĩ kũngĩamateithirie ‘kwĩhanda wega na kũrũma’ wĩtĩkio-inĩ  wao. (Thoma Aefeso 3:​14-19.) Ũguo noguo twagĩrĩirũo gwĩka. Rekei tuone ũrĩa tũngĩthuthuria Kiugo kĩa Ngai na kinyi nĩguo tũtaũkĩrũo nĩ ndũmĩrĩri yakĩo yothe.

4. Tũngĩka atĩa nĩguo tũkuhĩrĩrie Jehova makĩria? Heana ngerekano.

⁴ Tũrĩ Akristiano, tũtiiganagĩra tu na gũtaũkĩrũo nĩ morutani ma mũthingi ma Bibilia. Tũgĩteithio nĩ roho mũtheru wa Ngai, tũkoragwo twĩhaarĩirie kwĩruta “nginya maũndũ marĩa marikĩru ma Ngai.” (1 Kor. 2:​9, 10) Na githĩ wĩruti-inĩ waku to ũthuthurie maũndũ mangĩgũteithia gũkuhĩrĩria Jehova makĩria? Kwa ngerekano, no ũthuthurie ũrĩa oonanirie atĩ nĩ eendete ndungata ciake cia tene na ũrĩa ũndũ ũcio ũronania atĩ o nawe nĩ akwendete. Ningĩ no ũthuthurie mũbango wa Jehova wa ũthathaiya wa hĩndĩ ya Aisiraeli na ũũringithanie na ũrĩa endaga Akristiano mamũthathaiye ũmũthĩ. Kana hihi no wĩrute na njĩra ndikĩru morathi marĩa Jesu aahingirie hĩndĩ ya ũtũũro na ũtungata wake arĩ gũkũ thĩ.

5. Nĩ ũndũ ũrĩkũ ũngĩenda gũthuthuria wĩruti-inĩ waku kĩũmbe?

⁵ Andũ amwe mendete gũthuthuria Bibilia nĩ mooririo nĩ maũndũ marĩkũ marikĩru mangĩenda gũthuthuria Kiugo-inĩ kĩa Ngai. Maũndũ mamwe maagwetire nĩ monanĩtio gathandũkũ-inĩ karĩ na kĩongo “ Maũndũ Ũngĩthuthuria Wĩruti-inĩ Waku Kĩũmbe.” No ũkenere gũthuthuria maũndũ ta macio ũkĩhũthĩra Ũteithio wa Ũthuthuria Harĩ Aira a Jehova. Gũthuthuria Bibilia na njĩra ndikĩru no gwĩkĩre hinya wĩtĩkio waku, na gũgũteithie “[kũgĩa] na ũmenyo wĩgiĩ Ngai.” (Thim. 2:​4, 5) Rekei rĩu twarĩrĩrie ma imwe ndikĩru cia Bibilia iria tũngĩthuthuria.

6. (a) Ngũrani ya gũkorũo na mũbango na gũkorũo na muoroto nĩ ĩrĩkũ? (b) Nĩ kĩĩ kĩngĩtũma tuuge atĩ muoroto wa Jehova harĩ andũ na thĩ nĩ wa “tene na tene”? (Aefeso 3:11)

⁶ Ta wĩcirie ũrĩa Bibilia yugaga igũrũ rĩgiĩ muoroto wa Ngai. Nĩ harĩ ngũrani ya mũndũ gũkorũo na mũbango wa ũndũ mũna na  gũkorũo na muoroto wa ũndũ mũna. Ta rĩu mũndũ no akorũo abangĩte njĩra ĩrĩa ekũgera nĩguo akinye kũrĩa arathiĩ. No mũbango wake no wage gũkinyanĩra angĩkora mĩhĩnga njĩra-inĩ ĩyo. No mũndũ wĩ na muoroto aigaga meciria make mũno harĩ kũrĩa arathiĩ. No akorũo akĩmenya wega kũrĩa arenda gũthiĩ, ĩndĩ no ahũthĩre njĩra itiganĩte gũkinya kuo. Angĩkora njĩra ĩmwe ĩrĩ na mĩhĩnga, no ahũthĩre njĩra ĩngĩ. Nĩ tũcokagia ngatho tondũ Jehova nĩ athiĩte aguũrĩtie ikinya gwa ikinya ũhoro wĩgiĩ “muoroto [wake] wa tene na tene” thĩinĩ wa Bibilia. (Ef. 3:11) Jehova no athuure njĩra itiganĩte kũhingia muoroto wake, na hingo ciothe nĩ agaacagĩra tondũ “nĩ atũmaga indo ciothe ihingie muoroto wake.” (Thim. 16:4) Na ũndũ ũrĩa wothe Jehova ekaga ũkoragwo na maumĩrĩro ma gũtũũra tene na tene. Hihi muoroto wa Jehova nĩ ũrĩkũ, na nĩ mogarũrũku marĩkũ ekĩte nĩguo aũhingie?

7. Jehova aagarũrĩire atĩa njĩra ĩrĩa angĩahingirie muoroto wake nayo thutha wa Adamu na Hawa kwĩhia? (Mathayo 25:34)

⁷ Ngai nĩ aamenyithirie Adamu na Hawa muoroto ũrĩa aarĩ naguo kũmerekera. Maabatiĩ ‘gũciarana na maingĩhe, maiyũrie thĩ na mamĩtoorie, na maathage kĩũmbe o gĩothe kĩrĩ muoyo’ gũkũ thĩ. (Kĩam. 1:28) Rĩrĩa Adamu na Hawa maaremeire Jehova na magĩtũma mehia mathereme harĩ andũ othe, muoroto wa Jehova ndwathararire. Nĩ aagarũrĩire njĩra ĩrĩa angĩaũhingirie nayo. Aatuire itua o rĩo rĩa kũhanda Ũthamaki kũrĩa igũrũ ũrĩa ũngĩahingirie muoroto ũrĩa aarĩ naguo kĩambĩrĩria-inĩ kwerekera andũ na thĩ. (Thoma Mathayo 25:34.) Ihinda rĩa Jehova rĩakinya, nĩ aatũmire Mũrũ wake wa irigithathi gũkũ thĩ nĩguo arute andũ ũhoro wĩgiĩ Ũthamaki ũcio, na arute muoyo wake nĩguo atũkũũre kuuma mehia-inĩ na gĩkuũ. Thutha ũcio Jesu nĩ aariũkirio na agĩcoka igũrũ nĩguo atuĩke Mũthamaki wa Ũthamaki wa Ngai. No kũrĩ o na maũndũ mangĩ maingĩ tũngĩthuthuria megiĩ muoroto wa Ngai.

8. (a) Ndũmĩrĩri ĩrĩa nene ya Bibilia nĩ ĩrĩkũ? (b) Muoroto ũrĩa mũnene wa Jehova nĩ ũrĩkũ kũringana na Aefeso 1:​8-11? (Rora mbica ngothi-inĩ.)

⁸ Ndũmĩrĩri ĩrĩa nene ya Bibilia nĩ atĩ rĩĩtwa rĩa Jehova nĩ rĩgaatũũgĩrio, rĩrĩa akaahingia muoroto wake harĩ thĩ kũgerera Ũthamaki wake rungu rwa ũtongoria wa Kristo. Muoroto wa Jehova ndũngĩcenjia. Nĩ aheanĩte ũũma atĩ akaaũhingia o ta ũrĩa eeranĩire. (Isa. 46:​10, 11, tũũhoro twa magũrũ-inĩ.; Ahib. 6:​17, 18) Mũthia-inĩ, thĩ nĩ ĩgaatuĩka Paradiso kũrĩa andũ akinyanĩru na athingu a rũciaro rwa Adamu na Hawa “[magaakenera] ũtũũro tene na tene.” (Thab. 22:26) No macio tomo maũndũ marĩa Jehova akaahingia. Muoroto wake ũrĩa mũnene nĩ gũcokanĩrĩria athathaiya ake othe kũrĩa igũrũ na gũkũ thĩ. Hĩndĩ ĩyo arĩa othe marĩ muoyo nĩ magaathĩkagĩra Jehova arĩ we Mwathani Wao Ũrĩa Mũnene marĩ na wĩhokeku. (Thoma Aefeso 1:​8-11.) Na githĩ ti ũndũ wa gũcanjamũra kuona ũrĩa Jehova arahingia muoroto wake?

9. Nĩ maũndũ marĩkũ megiĩ ihinda rĩũkĩte tũngĩmenya tũngĩthoma Bibilia?

⁹ Ta wĩcirie ũhoro wĩgiĩ ũrathi ũrĩa Jehova aaheanire mũgũnda-inĩ wa Edeni, ũrĩa ũrĩ thĩinĩ wa Kĩambĩrĩria 3:15. b Nĩ wonanĩtie maũndũ marĩa mangĩkaahingia muoroto wake, ĩndĩ mangĩahaanĩkire mĩaka ngiri nyingĩ thutha ũcio. Maũndũ macio nĩ hamwe na kuumĩra kwa mbeũ ya Iburahimu ĩrĩa Kristo angĩoimanire nayo. (Kĩam. 22:15-18) Thutha ũcio  mwaka wa 33 M.M., Jesu nĩ aaguraririo ndiira ya kũgũrũ o ta ũrĩa kwarathĩtwo. (Atũm. 3:13-15) Ũndũ wa mũico ũrathi-inĩ ũcio wĩgiĩ Shaitani kũhehenjwo mũtwe, ũkaahinga thutha wa makĩria ma mĩaka 1,000 kuuma rĩu. (Kũg. 20:​7-10) Na Bibilia nĩ ĩguũrĩtie ũhoro makĩria wĩgiĩ ũrĩa gũgeekĩka kĩrĩkĩrĩro-inĩ kĩa ũthũ gatagatĩ ka mũtabarĩre wa Shaitani na ithondeka rĩa Jehova.

10. (a) Nĩ maũndũ marĩkũ megwĩkĩka ica ikuhĩ? (b) Tũngĩhaarĩria atĩa meciria na ngoro citũ? (Rora kohoro ka magũrũ-inĩ.)

¹⁰ Ta wĩcirie ũhoro wa maũndũ maya ma magegania Bibilia yarathĩte. Wa mbere, ndũrĩrĩ nĩ ikaanĩrĩra atĩ kũrĩ na “thayũ na ũgitĩri!” (1 Thes. 5:2, 3) Hĩndĩ ĩyo, thĩna ũrĩa mũnene no kwambĩrĩria ũkaambĩrĩria “o rĩmwe” rĩrĩa ndũrĩrĩ icio igaatharĩkĩra ndini ciothe cia maheeni. (Kũg. 17:16) Thutha ũcio, no kũhoteke nĩ gũkooneka mahinya ma ndũire makĩonania “Mũrũ wa mũndũ agĩũka arĩ thĩinĩ wa matu ma igũrũ arĩ na hinya na riri mũnene.” (Mat. 24:30) Jesu nĩ agaatuĩra andũ, amũranie andũ a mũhaano wa ngʼondu na wa mbũri. (Mat. 25:31-33, 46) No Shaitani ndagaakorũo aikarĩte o ũguo hatarĩ ũndũ areka. Nĩ ũndũ wa rũmena rũrĩa akoragwo naruo, nĩ agaacogera ngwatanĩro ya mabũrũri ĩrĩa Bibilia ĩtaga Gogu wa bũrũri wa Magogu nĩguo ĩtharĩkĩre athathaiya a ma a Jehova. (Ezek. 38:2, 10, 11) Ihinda rĩna thutha ũcio, aitĩrĩrie maguta arĩa magaakorũo matigarĩte gũkũ thĩ nĩ magaathiĩ igũrũ, nĩguo manyitanĩre na Kristo na mbũtũ yake kũrũa mbaara ya Hari–Magedoni ĩrĩa ĩkaarĩkĩrĩria thĩna ũrĩa mũnene. c (Mat. 24:31; Kũg. 16:14, 16) Thutha ũcio nĩrĩo Wathani wa Mĩaka Ngiri wa Kristo ũkaambĩrĩria.—Kũg. 20:6.

11. Muoyo wa tene na tene ũgaakũhotithia kũhingia maũndũ ta marĩkũ? (Ningĩ rora mbica.)

¹¹ Rĩu ta geria gwĩciria ũrĩa ũtũũro ũgaakorũo ũhaana thutha wa mĩaka ĩrĩa ngiri. Bibilia yugaga atĩ Mũũmbi witũ “o na nĩ ekĩrĩte ũhoro wa tene na tene ngoro-inĩ” citũ. (Koh. 3:11) Ta wĩcirie ũrĩa ũndũ ũcio ũrakũhutia o hamwe na ũrata waku na Jehova. Ibuku rĩa Kuhĩrĩria Jehova rĩheanĩte ũhoro ũyũ wa  kũgegania karatathi-inĩ ka 382: “Thutha wa gũtũũra mĩaka magana, makiri, mamilioni, o na mabilioni maingĩ, tũgakorũo tũũĩ maũndũ maingĩ megiĩ Jehova Ngai gũkĩra marĩa tũũĩ ũmũthĩ. Ĩndĩ o na hĩndĩ ĩyo no tũkaaiguaga kũrĩ o na maũndũ maingĩ ma magegania tũrabatara kũmenya. . . . Ũtũũro wa tene na tene ũgakorũo na muoroto, na maũndũ maingĩ mega ma gwĩka—na gũkuhĩrĩria Jehova nĩguo ũndũ ũrĩa tũgaakenagĩra makĩria.” No hihi nĩ ũndũ ũrĩkũ ũngĩ tũngĩthuthuria tũkĩĩruta Kiugo kĩa Ngai?

12. Nĩ kĩĩ kĩngĩtũteithia kũmenya ũrĩa igũrũ gũtariĩ? Heana ngerekano.

¹² Kiugo kĩa Ngai nĩ gĩtũteithagia kũhũũra mbica ũrĩa gĩikaro kĩa Jehova kũrĩa “igũrũ mũno” gĩtariĩ. (Isa. 33:5) Bibilia nĩ ĩguũragia maũndũ ma magegania megiĩ Jehova na gĩcunjĩ gĩa kũrĩa igũrũ gĩa ithondeka rĩake. (Isa. 6:​1-4; Dan. 7:​9, 10; Kũg. 4:​1-6) Kwa ngerekano, no tũthome ũhoro wĩgiĩ maũndũ ma magegania marĩa Ezekieli oonire rĩrĩa igũrũ “rĩahingũkire na [akĩambĩrĩria] kuona cioneki cia Ngai.”—Ezek. 1:1.

13. Nĩ ũndũ ũrĩkũ ũgũkenagia wĩgiĩ itemi rĩa Jesu kũrĩa igũrũ o ta ũrĩa Ahibirania 4:​14-16 yonanĩtie?

¹³ Ningĩ ta wĩcirie ũhoro wa itemi rĩa Jesu kũrĩa igũrũ arĩ Mũthamaki witũ na Mũthĩnjĩri-Ngai Ũrĩa Mũnene ũrĩ ũcayanĩri. Kũgerera harĩ we no tũkuhĩrĩrie “gĩtĩ kĩa ũnene [kĩa Ngai] kĩa ũtugi mũnene” na njĩra ya mahoya, na tũhoe tũiguĩrũo tha na tũheo ũteithio “ihinda rĩrĩa rĩagĩrĩire.” (Thoma Ahibirania 4:​14-16.) Kwoguo tũtibatiĩ kũreka mũthenya o na ũmwe ũhĩtũke tũtecũranĩtie ũhoro wa maũndũ marĩa Jehova na Jesu matwĩkĩire, na marĩa marathiĩ na mbere gũtwĩkĩra marĩ kũrĩa igũrũ. Wendo ũrĩa matuonetie nĩ wagĩrĩire kũhutia ngoro citũ na ũtũtindĩke gũkorũo  na kĩyo tũgĩtungatĩra Jehova.—2 Kor. 5:​14, 15.

14. Njĩra ĩmwe njega tũngĩonania ngatho harĩ Jehova na Jesu nĩ ĩrĩkũ? (Ningĩ rora mbica.)

¹⁴ Njĩra ĩmwe njega tũngĩonania ngatho harĩ Ngai na Mũrũ wake nĩ kwĩrutanĩria gũteithia andũ arĩa angĩ matuĩke Aira a Jehova na arutwo a Jesu. (Mat. 28:​19, 20) Ũguo nĩguo mũtũmwo Paulo eekire nĩguo onanie ngatho harĩ Ngai na Kristo. Nĩ aamenyaga atĩ wendi wa Jehova nĩ “andũ a mĩthemba yothe mahonokio na magĩe na ũmenyo wa ma wĩgiĩ ũhoro wa ma.” (1 Tim. 2:​3, 4) Nĩ eerutanagĩria biũ ũtungata-inĩ gũteithia andũ aingĩ o ũrĩa angĩahotire “nĩguo kũngĩhoteka na njĩra o yothe, [ahonokie] amwe.”—1 Kor. 9:​22, 23.

15. Nĩ ũndũ ũrĩkũ ũngĩtũrehera gĩkeno kũringana na Thaburi 1:2?

¹⁵ Mwandĩki wa Thaburi aataarĩirie atĩ mũndũ ũrĩa ũrĩ gĩkeno na ũgaacĩrĩte, nĩ ũrĩa ‘ũkenagio nĩ watho wa Jehova’ na ‘agecũrania watho Wake ũtukũ na mũthenya.’ (Thab. 1:​1-3; kohoro ka magũrũ-inĩ.) Mũtaũri ũmwe wa Bibilia wĩtagwo Joseph Rotherham akĩarĩrĩria rĩandĩko rĩu ibuku-inĩ rĩake rĩa Studies in the Psalms, aaugire atĩ mũndũ agĩrĩirũo “gũkenagio mũno nĩ ũtongoria wa Ngai nginya akaũcaragia, akeruta ũhoro waguo, na akahũthĩra mahinda kũwĩcũrania.” Aacokire akiuga atĩ mũndũ “angĩreka mũthenya ũthire atathomete Bibilia, mũthenya ũcio nĩ kũũra wora.” No ũkenagĩre kwĩruta Bibilia ũngĩthuthuragia maũndũ marikĩru marĩa marĩ thĩinĩ wayo na ũkarora ũrĩa makonainie. Na githĩ ti ũndũ wa gũcanjamũra gũthuthuria ndũmĩrĩri yothe ya Kiugo kĩa Ngai!

16. Tũkaarĩrĩria ũndũ ũrĩkũ gĩcunjĩ-inĩ kĩrĩa kĩrũmĩrĩire?

¹⁶ Ma cia gũcanjamũra iria Jehova atũrutaga Kiugo-inĩ gĩake ti nditũ ũndũ tũtangĩhota gũtaũkĩrũo nĩcio. Gĩcunjĩ-inĩ kĩrĩa kĩrũmĩrĩire nĩ tũkaarĩrĩria ũhoro wĩgiĩ ma ndikĩru ĩgiĩ hekarũ nene ya Jehova ya kĩĩroho, ĩrĩa Paulo aataarĩirie marũa-inĩ make kũrĩ Akristiano Ahibirania. Tũkwĩhoka nĩ ũgaakenera gũthuthuria ũhoro ũcio.