Ũngĩenda kũmenya mũndũ, no kũhoteke ũndũ wa mbere ũrĩa ũngĩmũũria nĩ, “Wĩtagwo atĩa?” Ũngĩũria Ngai kĩũria kĩu hihi angĩkwĩra atĩa?

“Niĩ nĩ niĩ Jehova. Rĩu nĩrĩo rĩĩtwa rĩakwa.”​—Isaia 42:8.

Rĩĩtwa rĩu nĩ rĩa bata harĩ Ngai we mwene. Ngai ndaaheirũo rĩĩtwa rĩu nĩ mũndũ ũngĩ; we mwene nĩwe wecagũrĩire rĩĩtwa rĩu. Jehova ooigire ũũ: “Rĩu nĩrĩo rĩĩtwa rĩakwa tene na tene, na nĩrĩo kĩririkanania gĩakwa o nginya njiaro na njiaro.” (Thama 3:15) Thĩinĩ wa Bibilia, rĩĩtwa rĩa Ngai rĩonekaga maita maingĩ gũkĩra rĩĩtwa rĩngĩ o rĩothe rĩa gĩtĩo ta Mwene-Hinya-Wothe, Ithe, Mwathani, kana Ngai na rĩkoneka maita maingĩ gũkĩra marĩĩtwa ma andũ kĩũmbe ta Iburahimu, Musa, Daudi, kana Jesu. Makĩria ma ũguo, Jehova nĩ endaga rĩĩtwa rĩake rĩmenyeke. Bibilia yugaga ũũ: “Nĩguo mamenye atĩ wee, o wee wĩtagwo JEHOVA, nowe wiki Ũrĩa-wĩ-Igũrũ-Mũno o igũrũ rĩa thĩ yothe.”​—Thaburi 83:18.

Rĩĩtwa rĩu nĩ rĩa bata harĩ Jesu. Thĩinĩ wa ihoya rĩrĩa kaingĩ rĩtagwo Ihoya rĩa Ithe Witũ kana rĩa Mwathani, Jesu aarutire arũmĩrĩri ake mahoyage Ngai makĩhũthĩra ciugo ici: “Rĩĩtwa rĩaku nĩ rĩtherio.” (Mathayo 6:9) Jesu we mwene aahoire Ngai ũũ: “Awa, goocithia rĩĩtwa rĩaku.” (Johana 12:28) Kũgoocithia rĩĩtwa rĩa Ngai nĩguo ũndũ ũrĩa Jesu aaigĩte mbere ũtũũro-inĩ wake, na nĩkĩo ooigire ũũ ihoya-inĩ rĩake: “Nĩ ndĩmamenyithĩtie rĩĩtwa rĩaku na no ngũrĩmenyithania.”​—Johana 17:26.

Rĩĩtwa rĩu nĩ rĩa bata harĩ arĩa moĩ Ngai. Andũ a Ngai mahinda-inĩ ma tene nĩ maamenyaga atĩ kũmenya rĩĩtwa rĩa Ngai nĩ kũngĩatũmire magitĩrũo na mahonokio. Bibilia yugaga: “Rĩĩtwa rĩa Jehova nĩ nyũmba ya hinya njake mũthiringo; nĩyo mũndũ mũthingu ahanyũkagĩra agatonya, akarema gũkinyĩrĩrĩka.” (Thimo 18:10) Ningĩ ĩkoiga: “Mũndũ  o wothe ũrĩa ũgakaĩra rĩĩtwa rĩa Jehova nĩakahonoka.” (Joeli 2:32) Bibilia yonanagia atĩ andũ arĩa matungatagĩra Ngai nĩ mangĩkaamenyeka nĩ ũndũ wa rĩĩtwa rĩake. Yugaga ũũ: “Tondũ rĩrĩ, andũ a ndũrĩrĩ ciothe marũmagĩrĩra kĩrĩra kĩa ngai ciao-rĩ, na ithuĩ-rĩ, tũrĩrũmagĩrĩra kĩrĩra kĩa Jehova Ngai witũ tene na tene.”​—Mika 4:5; Atũmwo 15:14.

Rĩĩtwa rĩu nĩ rĩmenyithanagia Ngai. Athomi aingĩ moigaga atĩ rĩĩtwa Jehova riugĩte “Nĩ Atũmaga Maũndũ Mekĩke.” Jehova Ngai nĩ aaguũririe ũrĩa rĩĩtwa rĩake riugĩte rĩrĩa eemenyithanirie kũgerera ciugo ici eerire Musa: “Ngũtuĩka Kĩrĩa Ngũthuura Gũtuĩka.” (Thama 3:14, New World Translation) Kwoguo rĩĩtwa rĩake rĩonanagia maũndũ maingĩ mamwĩgiĩ to gũkorũo tu atĩ nĩwe Mũũmbi wa indo ciothe. Rĩĩtwa rĩake rĩonanagia atĩ arĩ na ũhoti wa gũtũma we mwene kana indo iria ombĩte ituĩke kĩrĩa gĩothe kĩrabatarania nĩguo ahingie muoroto wake. O na gũtuĩka marĩĩtwa ma Ngai ma gĩtĩo nĩ monanagia ũnene, ũhoti, na hinya wake, rĩĩtwa rĩake Jehova norĩo tu rĩonanagia ũrĩa atariĩ na kĩrĩa angĩtuĩka.

Rĩĩtwa rĩu nĩ rĩguũragia atĩ Ngai nĩ atwĩciragia. Ũrĩa rĩĩtwa rĩa Ngai riugĩte nĩ wonanagia atĩ nĩ endete andũ o hamwe na ũũmbi wake wothe. Makĩria ma ũguo, gũkorũo atĩ Ngai nĩ amenyithanĩtie rĩĩtwa rĩake kuonanagia atĩ nĩ endaga tũmũmenye. Ningĩ nĩwe waguũrĩirie andũ rĩĩtwa rĩake o na matamũũrĩtie. Kwoguo Ngai ndendaga tũmuone atariĩ ta mũndũ tu wa gwĩcirĩrio tũtangĩhota gũkuhĩrĩria no endaga tũmuone atariĩ ta mũndũ tũngĩhota gũkuhĩrĩria.​—Thaburi 73:28.

Kũhũthĩra rĩĩtwa rĩa Ngai nĩ kuonanagia atĩ nĩ tũrenda kũmũkuhĩrĩria. Ta nĩ tũtue nĩ ũrenda mũndũ mũna atuĩke mũrata waku na kwoguo ũkamwĩra agwĩtage rĩĩtwa rĩaku. Ũngĩigua atĩa mũndũ ũcio angĩrega kũhũthagĩra rĩĩtwa rĩaku rĩrĩa rĩothe arakwarĩria? No kũhoteke thutha wa ihinda no wambĩrĩrie kwĩyũria kana mũndũ ũcio nĩ endaga gũtuĩka mũrata waku. Ũguo noguo kũrĩ ũhoro-inĩ wĩgiĩ Ngai. Jehova nĩ atwĩrĩte rĩĩtwa rĩake na atwĩkagĩra ngoro tũrĩhũthagĩre. Rĩrĩa tweka ũguo nĩ tuonagia Jehova atĩ nĩ tũrenda kũmũkuhĩrĩria. Ngai o na nĩ arũmbũyagia arĩa ‘mecũranagia ũhoro wa rĩĩtwa rĩake’!​—Malaki 3:16.

Ikinya rĩa mbere rĩa bata harĩ kũmenya Ngai nĩ kwĩruta ũhoro wĩgiĩ rĩĩtwa rĩake. No gwĩka ũguo gwiki ti kũiganu. Nĩ tũbatiĩ kũmenya ũcio wĩtagwo rĩĩtwa rĩu atariĩ atĩa.