Ũhoro wa Ma Wĩgiĩ Ihinda Rĩrĩa Rĩroka
Hihi nĩ ũrĩ weyũria ũrĩa ihinda rĩrĩa rĩroka rĩgaakorũo rĩtariĩ? Bibilia nĩ ĩtwĩraga ũhoro wĩgiĩ maũndũ ma bata megwĩkĩka ica ikuhĩ, na nĩ makaahutia andũ othe thĩinĩ wa thĩ.
Jesu nĩ aataarĩirie ũrĩa tũngĩkaamenya atĩ “Ũthamaki wa Ngai nĩ ũkuhĩrĩirie.” (Luka 21:31) Harĩ maũndũ marĩa aarathire mangĩgekĩka, nĩ aagwetire atĩ nĩ kũngĩgaakorũo na mbaara nene, ithingithia, wagi wa irio, na mĩrimũ mĩũru, na macio nĩmo maũndũ marĩa tũreyonera ũmũthĩ.—Luka 21:10-17.
Bibilia ĩtwĩraga atĩ ũmwe wa maũndũ marĩa mangĩgeekĩka “matukũ-inĩ ma kũrigĩrĩria” ma wathani wa andũ, nĩ atĩ andũ nĩ mangĩgaakorũo na mĩtugo mĩũru. No ũthome maũndũ macio thĩinĩ wa 2 Timotheo 3:1-5. Rĩrĩa wona andũ marĩ na mĩerekera na ciĩko ta icio ũmũthĩ hatarĩ nganja nĩ wĩtĩkagĩra atĩ ũrathi ũcio wa Bibilia nĩ ũratwarana na maũndũ marĩa marekĩka ũmũthĩ.
Kũhinga kwa ũrathi ũcio kũronania atĩa? Ihinda nĩ rĩkuhĩrĩirie rĩa Ũthamaki wa Ngai kũrehe mogarũrũku manene, marĩa magaacenjia ũtũũro wagĩre biũ thĩinĩ wa thĩ. (Luka 21:36) Thĩinĩ wa Bibilia, Ngai nĩ eranĩire maũndũ mega marĩa mageekĩka harĩ thĩ na harĩ andũ arĩa magaatũra thĩinĩ wayo. Reke twarĩrĩrie mamwe mamo.
WATHANI MWEGA
“Na [Jesu] akĩheo wathani, gĩtĩo, na ũthamaki, nĩgetha ikundi cia andũ, ndũrĩrĩ, na andũ a thiomi itiganĩte, othe mamũtungatagĩre. Wathani wake nĩ wathani wa tene na tene na ndũgaathira, naguo ũthamaki wake ndũkaaniinwo.”—DANIELI 7:14.
Ũrĩa ũndũ ũcio uugĩte: No ũkenere ũtũũro rungu rwa thirikari ya thĩ yothe ĩrĩa Ngai ahandĩte, Mũrũwe arĩ Mũthamaki.
ŨGIMA MWEGA WA MWĨRĨ
“Gũtirĩ mũikari wakuo ũkoiga: ‘Ndĩ mũrwaru.’”—ISAIA 33:24.
Ũrĩa ũndũ ũcio uugĩte: Ndũrĩ hĩndĩ ũkaarwara kana wonje; ũgaakorũo na ũhoti wa gũtũũra tene na tene.
THAYŨ MŨINGĨ
“Aniinaga mbaara kũndũ guothe thĩinĩ wa thĩ.”—THABURI 46:9.
Ũrĩa ũndũ ũcio uugĩte: Gũtigaakorũo na mbaara rĩngĩ, na mĩnyamaro ĩrĩa ĩrehagwo nĩ mbaara.
THĨ ĨKAAIYŨRŨO NĨ ANDŨ EGA
“Andũ arĩa aganu matigaakorũo kuo rĩngĩ . . . Andũ arĩa ahooreri nĩ makaagaya thĩ.”—THABURI 37:10, 11.
Ũrĩa ũndũ ũcio uugĩte: Gũtigaakorũo rĩngĩ na andũ oru, andũ arĩa magaakorũo kuo tu no arĩa makoragwo mehaarĩirie gwathĩkĩra Ngai.
THĨ YOTHE ĨGAAKORŨO ĨRĨ PARADISO
“Nĩ magaaka nyũmba na matũũre thĩinĩ wacio, na mahande mĩgũnda ya mĩthabibũ na marĩe maciaro mayo.”—ISAIA 65:21, 22.
Ũrĩa ũndũ ũcio uugĩte: Thĩ yothe ĩgaakorũo ĩrĩ thaka. Ngai nĩ akaahingia ihoya rĩrĩa tũhoyaga atĩ wendi wake wĩkwo “gũkũ thĩ.”—Mathayo 6:10.
Icunjĩ Ingĩ Hihi Ũngĩenda Gũthoma
MACOKIO MA CIŨRIA CIA BIBILIA
Nĩ Maũndũ Marĩkũ Ũthamaki wa Ngai Ũkahingia?
Wĩrute maũndũ marĩa ũngĩĩrĩgĩrĩra kuona rĩrĩa Ũthamaki wa Ngai ũgaathana thĩini wa thĩ.
